შშმ ბავშვთა მშობლები მთავრობის მიერ 2023 წლის 29 დეკემბერს მიღებულ დადგენილებას აპროტესტებენ, რომლითაც „სოციალური რეაბილიტაციისა და ბავშვზე ზრუნვის 2024 წლის სახელმწიფო პროგრამაში“ ცვლილება შევიდა.
როგორც შშმ ბავშვთა მშობლების წარმომადგენელმა, ნანა კინწურაშვილმა „ინტერპრესნიუსს“ განუცხადა, აღნიშნული ცვლილებით, სეანსების რაოდენობა, რაც წელიწადში 192 სეანსის დაფინანსებას გულისხმობს, უცვლელი დარჩა, თუმცა თვეში 16-მდე შემცირდა და 12 თვეზე გადანაწილდა.
მშობლები აღნიშნავენ, რომ ეს შშმ ბავშვებს სახელმწიფო პროგრამით სარგებლობისას მნიშვნელოვან დაბრკოლებას შეუქმნით.
300-ზე მეტმა შშმ ბავშვთა მშობელმა პრობლემის მოგვარების მიზნით ჯანდაცვის სამინისტროს არაერთხელ მიმართა.
„192 სეანსი ეკუთვნის თითოეულ შშმ ბავშვს იმისთვის, რომ რეაბილიტაცია გაიაროს. სეანსების ეს რაოდენობა ძალაში დატოვეს, თითქოს არაფერი შეცვლილა ჯამურად, მაგრამ ისე გადაანაწილეს თერაპიები ყოველ თვეზე, რომ ეს სამედიცინო სერვისებზე ბავშვის ხელმისაწვდომობას ზღუდავს. კერძოდ, სეანსების რაოდენობა თვეში 16-მდე შემცირდა და 12 თვეზე გადანაწილდა, სავალდებულო წესით. გამოდის, რომ ბავშვმა თერაპიებზე ყველაზე ცხელ თვეშიც უნდა იაროს, რაც აქამდე პრაქტიკაში არ ყოფილა. ამ დრომდე არსებული პრაქტიკით, ზაფხულში კლინიკები იკეტებოდა, შშმ ბავშვები კი მშობლებს დასასვენებლად მიჰყავდათ, ჰაერს უცვლიდნენ, რადგან მათ სუნთქვის პრობლემა ხშირად აქვთ. ამ შემთხვევაში, ეს უკვე შეუძლებელია იმის გამო, რომ ეს თერაპიები ყველა თვეში არის გადანაწილებული. იმის პრობლემაც იქმნება, რომ შშმ ბავშვმა ხანგრძლივი ოპერაცია დაგეგმოს. შშმ ბავშვებს ოპერაცია სჭირდებათ, რაც დასაგეგმია. ჩვენი მიზანია, 192 სეანსი, რომელიც ბავშვებს ეკუთვნით, ყველა გამოიყენონ და არ დაიკარგოს. ოპერაციას ჩაიტარებს, ქალაქგარეთ გავა თუ რა მიზეზიც არ უნდა იყოს, ეს სეანსები არ უნდა დაიკარგოს. აღსანიშნავია ის გარემოებაც, რომ უმეტეს შემთხვევაში, 192 სეანსიც არ არის საკმარისი და მშობლები თავად იხარჯებიან. ვიბრძვით იმისთვის, რომ არ დაიკარგოს ის მცირედი თანხაც, რაც შშმ ბავშვის რეაბილიტაციისა და თერაპიებისთვის არის გამოყოფილი“,-განაცხადა ნანა კინწურაშვილმა.
როგორც თავად აღნიშნავს, პროგრამაში განხორციელებულმა ცვლილებამ შშმ ბავშვებს რეაბილიტაციაზე ხელმისაწვდომობა შეუზღუდა.
„ეს ცვლილება არ არის შშმ ბავშვების ინტერესებზე და მათ საჭიროებებზე მორგებული. დადგენილება ისეა გაკეთებული, რომ ბავშვებს განაცდური წარმოექმნათ. არ ვიცი, ამის მიზანი რა არის, შეიძლება ვივარაუდოთ, რომ მთავრობის სურვილია, აუთვისებელი თერაპიები დარჩეს, რაც რეალურად, ბიუჯეტის თანხაა და ისევ სავარაუდოდ, ჯანდაცვის სამინისტროში დაბრუნდება“,-აღნიშნავს ნანა კინწურაშვილი.
შშმ ბავშვთა მშობლების წარმომადგენელი კიდევ ერთ გარემოებაზე მიუთითებს. როგორც ნანა კინწურაშვილი განმარტავს, სპეციალისტებს თვეში 20-20 თერაპიის ჩატარება ჰქონდათ განსაზღვრული, ახლა კი, რადგან თვეში 16 სეანსი ჩატარდება, მათ ანაზღაურება თვეში ანაზღაურება შეუმცირდებათ.
„სპეციალისტები ამბობენ, რომ მათ ამ პირობებში მუშაობა არ სურთ, ისედაც კვალიფიკაციის პრობლემაა. შშმ ბავშვების სფეროში „სანთლით დაეძებენ“ სპეციალისტებს. ამ პირობებში, ისეთი დადგენილების მიღება, რომელიც არა მარტო შშმ ბავშვებს შეეხებათ, არამედ ზოგადად, ამ სფეროში მოქმედ სპეციალისტებს, ძალიან აზიანებს ბავშვების ინტერესებს. წინასწარ მშობლებთან კონსულტაციაც კი არ გამართულა, რომ ცვლილებები იგეგმებოდა, პირდაპირ დადგენილება მიიღეს. ჯანდაცვის სამინისტრო არ დაინტერესებულა, ეს დადგენილება გაართულებდა თუ არა შშმ ბავშვების მდგომარეობას“,- აღნიშნავს კინწურაშვილი.
მისი განმარტებით, 16 იანვარს გაიმართა კონსულტაციები სამინისტროსა და მშობლებს შორის, რომელსაც დაახლოებით, 50 ადამიანი დაესწრო. ნანა კინწურაშვილის განცხადებით, უწყებასთან უშედეგო მოლაპარაკების შემდეგ, მათ ხელმოწერების შეგროვება დაიწყეს.
„ჯანდაცვის სამინისტროში 2 წერილია შეტანილი. ორივეს ხელს დაახლოებით, 175-ადამიანზე მეტი აწერს. ამავდროულად, კიდევ ერთი წერილი შევიდა ჯანდაცვის სამინისტროში პროვაიდერი კლინიკების ექიმების მხრიდან. მათ თავად ჩამოწერეს ის არგუმენტები, თუ რატომ არ ვარგა ეს მექანიზმები. სპეციალისტები ხაზგასმით აღნიშნავენ იმას, რომ ეს მშობლების ახირება არ არის და ცვლილება შშმ ბავშვების რეალურ საჭიროებებს არ ითვალისწინებს“,- აცხადებს კინწურაშვილი.
ჯანდაცვის სამინისტრომ მშობლებს საპასუხოდ აცნობა, რომ „სოციალური რეაბილიტაციისა და ბავშვზე ზრუნვის 2024 წლის სახელმწიფო პროგრამა“ ცვლილების პროექტი დამტკიცებისთვის საჭირო სამართლებრივ პროცედურებს გადის. რა შინაარსის არის პროექტი და როდის მიღებენ მას, უცნობია.
„პრობლემა არის ის, რომ უკვე მარტია, უკვე 8 სეანსია ბავშვებისთვის დაკარგული. როდის განიხილავენ და როდის მიიღებენ ახალ დადგენილებას უცნობია. დროს ჩვენთვის გადამწყვეტი მნიშვნელობა აქვს, რადგან ძველ გრაფიკში დაბრუნება პროვაიდერ კლინიკებს ძალიან გაუჭირდებათ. პროფესიონალები სწორედ იმას ამბობენ, რომ საჩქაროდ მისაწვდენია მთავრობამდე ხმა, რომ დროულად იმოქმედონ“, – განაცხადა კინწურაშვილმა.
ამასთან, როგორც ის აღნიშნავს, თუ დროულად არ მიაქცევენ საკითხს სათანადო ყურადღებას, შშმ ბავშვების მშობლები იძულებულები გახდებიან, საპროტესტო აქციები დაიწყონ.
„ეს არის მდგომარეობა, რომელიც დროულ გადაწყვეტას საჭიროებს. ჩვენ სახალხო დამცველს, პრეზიდენტს, მთავრობასაც მივმართეთ. თუ ყველა ინსტანცია და საშუალება ამოიწურება, ბოლო საშუალება საპროტესტო აქცია დაგვრჩება, სხვა ვარიანტი აღარ რჩება“,- განაცხადა ნანა კინწურაშვილმა.
