საქართველოს პრეზიდენტის ადმინისტრაცია მიმართავს პარლამენტს „საარჩევნო კოდექსზე“ პრეზიდენტის ვეტოს დაძლევის პროცედურასთან დაკავშირებით და მოითხოვს დეტალურ ინფორმაციას 3 ივლისს ჩატარებულ კენჭისყრაზე.
„გირჩის“ წევრმა ალექსანდრე რაქვიაშვილმა კენჭისყრის დროს უმრავლესობის დეპუტატებს მიმართა. რაქვიაშვილის თქმით, მან დააფიქსირა, რომ უმრავლესობას დეპუტატთა საკმარისი რაოდენობა არ ჰყავდა.
„რეგლამენტის თანახმად, კენჭისყრისთანავე მე მივმართე პარლამენტის თავმჯდომარეს და მანდატურთუხუცესს, რათა მომხდარიყო დეპუტატების გადათვლა და დამსწრე დეპუტატებისა და კენჭისყრაში მონაწილეთა სიის გადამოწმება. მიუხედავად იმისა, რომ ასეთი მოთხოვნის შემთხვევაში, გადათვლა დაუყოვნებლივ უნდა განხორციელებულიყო, პარლამენტის თავმჯდომარე შემდეგ საკითხზე გადავიდა“, – აღნიშნა რაქვიაშვილმა.
