საქართველო და სომხეთი 20-წლამდე მსოფლიო თასის მასპინძლობაზე ერთობლივ განაცხადს შეიტანენ

38
spot_img

ფეხბურთის ფედერაციის ცნობით, საქართველო და სომხეთი FIFA-ს 2029 წლის 20-წლამდე მსოფლიო თასის მასპინძლობაზე ერთობლივ განაცხადს შეიტანენ. ამის შესახებ, ერევანში გამართულ ბრიფინგზე განცხადება საქართველოს ფეხბურთის ფედერაციის და სომხეთის ფეხბურთის ფედერაციის პრეზიდენტებმა გააკეთეს.

„გვინდა განვაცხადოთ, რომ ერთობლივად, ორი მეგობარი და მეზობელი, საფეხბურთო ისტორიით მდიდარი ქვეყნები ვაპირებთ განაცხადის შეტანას 2029 წლის ფიფას 20-წლამდე მსოფლიო ჩემპიონატის მასპინძლობაზე. ეს ძალიან მნიშვნელოვანი ტურნირია და გვიხარია, რომ ერთობლივად ვიმუშავებთ ამ პროექტზე. ჩვენი ქვეყნებისთვის და ფეხბურთისთვის ეს ძალიან მნიშვნელოვანია. დაგვეხმარება სამომავლოდ საქართველოში და სომხეთში ფეხბურთის კიდევ უფრო მეტად განვითარებაში. იმედია, გავიმარჯვებთ და ერთობლივად ვუმასპინძლებთ ამ პრესტიჟულ ჩემპიონატს. მასშტაბური ღონისძიების მასპინძლობის დიდი გამოცდილება გვაქვს. მათ შორის, გასულ წელს, წარმატებით ვუმასპინძლეთ უეფას 21-წლამდე ევროპის ჩემპიონატს“, – განაცხადა ლევან კობიაშვილმა.

თავის მხრივ, სომხეთის ფეხბურთის პრეზიდენტმა არმენ მელიქბეკიანმა აღნიშნა, რომ ტურნირის ჩატარება ორივე ქვეყნისთვის დიდი წარმატება იქნება.

„ეს არის ერთ-ერთი მთავარი ტურნირი, რომელსაც ფიფა ატარებს. 20-წლამდე მსოფლიო თასის მასპინძლობა ძალიან დიდი წარმატება იქნება ორივე ქვეყნისთვის. მინდა აღვნიშნო, რომ გვქონდა კონსულტაციები ფეხბურთის მმართველ ორგანოებთან. უეფა მზად არის მხარი დაგვიჭიროს ამ პროცესში, რათა ერთად ვუმასპინძლოთ 20-წლამდე მსოფლიო თასს“, – აღნიშნა არმენ მელიქბეკიანმა.

ფიფას 20-წლამდელთა მსოფლიო თასი 1977 წლიდან, ორ წელიწადში ერთხელ ტარდება. ფინალურ ეტაპზე 24 გუნდი მონაწილეობს. ტურნირის მოქმედი ჩემპიონი ურუგვაის ნაკრებია.