ამერიკულმა ანალიტიკურმა სააგენტო „ბლუმბერგმა“ (Bloomberg) გამოაქვეყნა სტატია სათაურით „უკრაინაში ყველაზე პოპულარული ადამიანი პრეზიდენტისთვის პრობლემად იქცა: რატომ აღარ მოსწონს ვოლოდიმირ ზელენსკის ვალერი ზალუჟნი?“ (ავტორები – კატერინა ჩურსინა და ანდრეი დუდიკი).
როგორც მასალაშია აღნიშნული, პრეზიდენტსა და გენერალს შორის არსებული ოდნავ შესამჩნევი უთანხმოება უკრაინის კონტრშეტევის ჩაშლამ დღის სინათლეზე გამოიტანა და კიდევ უფრო გაამძაფრა. დაპირისპირების მიზეზები რამდენიმეა: გენერალი მობილიზაციის მომხრეა, პრეზიდენტი ყოყმანობს. გენერალი არმიის იარაღით უზრუნველყოფას ითხოვს, მთავრობა კი უუნაროა.
უკრაინის პრეზიდენტს, ქვეყნის კონსტიტუციის თანახმად, რა თქმა უნდა, უფლება აქვს შეიარაღებული ძალების მთავარსარდალი პოსტიდან გაათავისუფლოს, მაგრამ ამ გადაწყვეტილებით იგი ჯარისკაცებისა და სამოქალაქო მოსახლეობის სულისკვეთებას ძირს დაცემას და დააზარალებს – იმდენად, რამდენადაც ვალერი ზალუჟნი ძალიან დიდი პოპულარობით სარგებლობს ჯარისკაცებში და რიგით მოქალაქეებს შორის.
„თუ პრეზიდენტი ვოლოდიმირ ზელენსკი გენერალ ვალერი ზალუჟნის მთავარსარდლის პოსტიდან გაათავისუფლებს, შეიძლება უწესრიგობები დაიწყოს“, – ამბობს ევგენი, უკრაინის არმიის 38 წლის ჯარისკაცი.
ორ „ზ“-ს შორის უთანხმოებამ, რომელიც ადრე შეუმჩნეველი იყო, განსაკუთრებით თავი იჩინა უკრაინის არმიის წარუმატებელი კონტრშეტევის შემდეგ. წარუმატებლობა განხილვის საკითხი გახდა როგორც ქვეყნის შიგნით, ასევე დასავლეთში, პარტნიორებმა დიდი უკმაყოფილება გამოხატეს – სწორედ ისინი აწვდიდნენ უკრაინის არმიას მილიონობით დოლარის იარაღს. როგორც ცნობილია, კონტრშეტევის დროს უკრაინის ხელისუფლება თავისი შეხედულებით მოქმედებდა. ამერიკელ (პენტაგონელ) მრჩევლებს სურდათ, რომ უკრაინის არმიას შეტევა ერთ-ერთი რომელიმე მთავარი მიმართულებით განევითარებინა (ან აღმოსავლეთით, ან სამხრეთით), მაგრამ პრეზიდენტმა და მთავრობამ ორ ფრონტზე შეტევა ერთად გადაწყვიტა. არმიის სარდლობა (ვალერი ზალუჟნი) იძულებული გახდა უმაღლესი მთავარსარდლის გადაწყვეტილებას დამორჩილებოდა.
პრეზიდენტთან ისედაც რთულ ურთიერთობის პირობებში „ცეცხლზე ნავთი დაასხა“ ვალერი ზალუჟნის ინტერვიუმ ბრიტანულ ჟურნალ „ეკონომისტში“, რომელშიც გენერალმა განაცხადა, რომ „კონტრშეტევა ჩიხში შევიდა“. თავის მხრივ, ვოლოდიმირ ზელენსკიმ მკვეთრად დაგმო მისი ნათქვამი განაცხადა, რომ კონტრშეტევა გრძელდება და გარდატეხა აუცილებლად მოხდებაო.
საერთოდ, ვოლოდიმირ ზელენსკი აშკარად გრძნობს მუქარას (საფრთხეს) ვალერი ზალუჟნის მხრიდან. ნებისმიერ კრიტიკას პრეზიდენტი განიხილავს როგორც მეტოქეობად მისი ლიდერობისადმი. იგი ასევე კარგად ხედავს იმასაც, რომ მისი პოპულარობა მოსახლეობაში ეცემა: დეკემბერში ჩატარებული გამოკითხვის შედეგებით, ვოლოდიმირ ზელენსკის მხარს უჭერს მოსახლეობის 62%, ხოლო ვალერი ზალუჟნის – 88%.
ახლახან ვალერი ზალუჟნიმ სტატია გამოაქვეყნა ამერიკული „სი-ენ-ენ“-ის ვებ-გვერდზე, რომელშიც განაცხადა, რომ მთავრობა თავდაცვითი მრეწველობის განვითარებასა და მობილიზაციის განხორციელებას ამუხრუჭებს. ანუ ფაქტობრივად ისევ პრეზიდენტს უსაყვედურა.
ასე რომ, ამჟამად ვოლოდიმირ ზელენსკი ნამდვილად რთული სიტუაციის წინაშე დგას: მთელი ქვეყანა პრეზიდენტს უყურებს, რომელმაც სწორი გადაწყვეტილება უნდა მიიღოს.
