ირაკლი კობახიძეს ვურჩევდი, რომ მის მიერვე დაწერილ წიგნებში ჩაეხედა – მისი სახელი და გვარი ადევს კონსტიტუციის შესაბამის განმარტებებს და ჩვენ მათ შორის, კობახიძის განმარტებას დავეყრდნობით, როცა საკონსტიტუციო სასამართლოში გავასაჩივრებთ,-ამის შესახებ „ლელოს“ წევრმა, ანა ნაცვლიშვილმა განაცხადა.
მისი თქმით, საკონსტიტუციო სასამართლოში მოუწევთ თქვან, რომ ან ძველად ტყუოდა ირაკლი კობახიძე, როცა შესაბამის განმარტებებს წერდა, ან ახლა ტყუის.
„ქართულ ოცნებას“, როგორც ჩანს, უჯრაში რაღაც სხვა კონსტიტუცია აქვს ჩაკეტილი და იმით ხელმძღვანელობს და არა იმ კონსტიტუციით, რომელიც ამ სახელმწიფოში მოქმედი კონსტიტუციაა. რაც შეეხება კომისიებზე პოზიციას, ირაკლი კობახიძეს ვურჩევდი, რომ მის მიერვე დაწერილ წიგნებში ჩაეხედა. ალბათ, მისი დაწერილია ის წიგნი, რადგან კონსტიტუციის შესაბამის განმარტებებს მისი სახელი, გვარი ადევს და ჩვენ კობახიძის განმარტებას დავეყრდნობით, როცა საკონსტიტუციო სასამართლოში გავასაჩივრებთ. ირაკლი კობახიძემ ან უნდა თქვას, რომ ის წიგნები მისი დაწერილი არ არის, რაც სერიოზული სკანდალი იქნება, ან თავად უნდა გაიხსენოს, რას წერდა 2012 წლამდე სახელმძღვანელოებში კონსტიტუციონალისტი ირაკლი კობახიძე. როგორც ჩანს, ახლა ირაკლი კობახიძე ნანობს იმ პოზიტიურ ცვლილებებს, რაც განხორციელდა, მაგრამ ეს ცვლილებები მოქმედი კანონმდებლობაა და მისი უკან წაღება ვერ მოხერხდება. ამიტომ მოუწევთ საკონსტიტუციო სასამართლოში ან თქვან, რომ ძველად ტყუოდა ირაკლი კობახიძე, როცა წიგნებს წერდა, ან ახლა ტყუის. ყველა შემთხვევაში, მატყუარა გამოდის“, – განაცხადა ანა ნაცვლიშვილმა.
