“იმდენად სამარცხვინოა უშუალოდ „ნაციონალური მოძრაობა“, როგორც ბრენდი, რომ ცდილობენ საზოგადოება შეცდომაში შეიყვანონ თითქოსდა იქმნება ახალი ცენტრები, რომელიც არის უბრალოდ „ნაციონალური მოძრაობის“ ახალი ფლანგები”, – ამის შესახებ ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა წინასაარჩევნოდ ოპოზიციური პარტიების გადაჯგუფებაზე საუბრისას განაცხადა.

მაჭავარიანის თქმით, რამდენი სახელიც არ უნდა დაირქვან ოპოზიციურმა პარტიებმა, ნებისმიერი ადამიანი, რომელსაც ოდნავ ლოგიკური აზროვნება შეუძლია დაასკვნის, რომ ეს არის „ერთიანი ნაციონალური მოძრაობა“.

„ეს არის „კოლექტიური ნაცმოძრაობა“. ეს არის „ნაციონალური მოძრაობის“ სხვადასხვა ფლანგები და ამ ყველაფერს აკეთებენ გარე დაკვეთით იქიდან გამომდინარე, რომ იმდენად სამარცხვინოა უშუალოდ „ნაციონალური მოძრაობა“, როგორც ბრენდი, რომ ცდილობენ საზოგადოება შეცდომაში შეიყვანონ თითქოსდა იქმნება ახალი ცენტრები, რომელიც არის უბრალოდ „ნაციონალური მოძრაობის“ ახალი ფლანგები.

ეს ყველაფერი დაიწყო წლების წინ როდესაც ნაციონალურ მოძრაობას თითქოს გამოეყო გიგა ბოკერია და შეიქმნა „ევროპული საქართველო“. ამომრჩევლის იმ ნაწილმა, რომელსაც ეგონა, რომ „ევროპულ საქართველოს“ და „ნაციონალურ მოძრაობას“ არანაირი კავშირი არ ჰქონდათ, გუშინ თუ გუშინწინ გიგი წერეთელი რომ შეუერთდა მათ, ისინიც დარწმუნდნენ, რომ ეს უბრალოდ არის სხვადასხვა სახელწოდებები, ისინი წარმოადგენენ ერთიან ძალას. იგივე შემთხვევა არის მაგალითად „ახალი“, ახალთახალიც რომ დაირქვან, მაინც არიან ძალიან ძველები. როგორ უნდა შეიყვანონ საზოგადოება მათ შეცდომაში? ყველას კარგად ახსოვს ყველაფერი და კარგად აზროვნებს ჩვენი საზოგადოება.

ბატონი გვარამია გახლდათ გენპროკურორი თუ გენპროკურორის მოადგილე და იუსტიციის მინისტრი და რამდენ სისხლიან და უსამართლო საქმეში აქვს მონაწილეობა უშუალოდ მიღებული ხომ? ბატონი მელია გახლდათ „ნაციონალური მოძრაობის“ თავმჯდომარე, როგორ არის ის ახალი? ქალბატონო ელენე ხოშტარია რამდენი ფლანგიც იყო ყველგან ნამყოფია, „ევროპული საქართველოს“ წევრიც იყო და ისიც და მისი ოჯახიც წლების განმავლობაში უკვე ფინანსდება რუსეთიდან და ამ კითხვებზეც არ აქვს პასუხი გაცემული საზოგადოებისთვის.

ზურა გირჩი ჯაფარიძე, რომელიც ასევე „ნაციონალური მოძრაობის“ წარმომადგენელია და რა ამორალური განცხადებები აქვს მას გაკეთებული, მე ვერ გაკადრებთ, რომ ეს ყველაფერი გავიმეორო, მაგრამ როგორი არა პატრიოტული განცხადებები აქვს გაკეთებული ამას გეტყვით – მას პირდაპირ ეთერში აქვს ნათქვამი, რომ მისთვის ავტორიტეტს არც მისი მშობელი და არც პატრიარქი არ წარმოადგენს. კი ბატონო ეს მისი უფლებაა და მისმა ამომრჩეველმა გადაწყვიტოს გაჰყვება თუ არა ასეთ ლიდერს, მაგრამ კითხვაზე თვლის თუ არა ის თავს ქვეყნის პატრიოტად, მას პასუხი აქვს გაცემული, რომ მე თავს ქვეყნის პატრიოტად არ ვთვლიო. ეს ჩამოვთვალე „ახალი“ თუ ძველების შემადგენლობა.

ხატია დეკანოიძე რომ უერთდება, ყველამ ვიცით ხატია დეკანოიძე რამხელა თანამდებობებს იკავებდა, ჩვეულებრივად „ნაციონალური მოძრაობის“ რიგითი წევრია. სადაც არ უნდა გავიხედოთ აბსოლუტურად ყველგან, რამდენი სახელიც არ უნდა დაირქვან და იმისთვის აკეთებენ მათი გარე დავალების მიმცემები ამას, რომ თითქოსდა ჩვენი საზოგადოება შეცდომაში შეიყვანონ, რომ სხვადასხვა ცენტრებია, სხვადასხვა პარტიებია, ანუ ადამიანს, რომელსაც ოდნავ ლოგიკური აზროვნება შეუძლია ყველა დაასკვნის იმას, რომ ეს არის „ერთიანი ნაციონალური მოძრაობა”, – აღნიშნა ლევან მაჭავარიანმა.

აზერბაიჯანმა BRICS-ში გაწევრიანებისთვის ოფიციალური განაცხადა გააკეთა, – ამის შესახებ აზერბაიჯანის საგარეო საქმეთა სამინისტროს სპიკერმა, აიჰან ჰაჯიზადემ თურქულ გამოცემა Anadolu Agency-სთან საუბარში განაცხადა.

„აზერბაიჯანმა ოფიციალური განაცხადი გააკეთა, რათა BRICS-ის წევრი გახდეს“, – განაცხადა ჰაჯიზადემ.

ივლისის დასაწყისში ყაზახეთში გამართული “შანხაის თანამშრომლობის ორგანიზაციის” სახელმწიფო მეთაურების შეხვედრაზე აზერბაიჯანსა და ჩინეთს შორის “სტრატეგიული პარტნიორობის დამყარების შესახებ” ერთობლივი დეკლარაცია იქნა მიღებული. დეკლარაციაში აღნიშნული იყო, რომ ბაქოს BRICS-ში გაწევრიანება სურს, ხოლო პეკინი ამ მისწრაფებას მიესალმება.

რუსეთის პრეზიდენტის ვლადიმერ პუტინის 18-19 აგვისტოს აზერბაიჯანში გამართული ვიზიტის შედეგად მიღებულ ერთობლივ დეკლარაციაშიც აღნიშნული იყო, რომ მოსკოვი მხარს უჭერს BRICS-ში აზერბაიჯანის წევრობას

„ორ თვეში არჩევნებია და ბევრს ვნახავთ ასეთ დაშლებს, გაერთიანებებს, რებრენდინგებს, მაგრამ წარსულის რებრენდინგს ვერ გააკეთებ და წარსულს ვერ ამოშლი. ზედმეტი მტკიცებაც არ გვჭირდება, სახელი და გვარებიც მეტყველებს, რომ ეს არის ერთი „კოლექტიური ნაცმოძრაობა“- განაცხადა ფრაქცია „ქართული ოცნების“ თავმჯდომარის მოადგილე ირაკლი კირცხალიამ ოპოზიციური პარტიების გადაჯგუფებაზე დასმული კითხვის საპასუხოდ.

როგორც ირაკლი კირცხალია აღნიშნავს, მსგავს გადაჯგუფებებს კიდევ ვიხილავთ, მაგრამ ამით საზოგადოებას ვერ მოატყუებენ და წარსულს ვერ წაშლიან.

„ამასაც ვამხელდით, რომ რაც უფრო მოახლოვდება არჩევნები, აი ამ „საპნის ოპერის“ ჟანრიდან, კიდევ ბევრს ვნახავთ. ერთი დღე დამისახელონ აი ეს სახეები, რომლებიც დღეს ხან „ნაციონალურ მოძრაობაში“ მიდიან, ხან მის ანასხლეტებში, როდის არ იყვნენ ესენი „ნაციონალური მოძრაობის“ წევრები?! როდის არ იყვნენ ესენი „ნაციონალური მოძრაობის“ იდეოლოგიის გამტარებლები?! და კიდევ ერთს ვიტყვი, როგორ შეიძლება ძველი სახეების, პირდაპირ აფილირებული პოლიტიკოსების გადანაცვლებით ხალხს და საზოგადოებას მიაყენო შეურაცხყოფა და უთხრა, რომ ეს არის ახალი სახე და ახალი სისხლი.
რაც შეეხება, გადასვლებს, გადმოსვლებს, შეერთებებს, ვითომ ახალი სახის მიერთებებს და ა.შ. ბევრი ვნახეთ ამ ფლანგზე, რასაც „ნაციონალური მოძრაობის“ ფლანგი ჰქვია, მარტივი არითმეტიკული შეკითხვა მაქვს-ერთს რომ ერთი, ორი ან სამი ნული მიუმატო, ხომ დარჩება ერთი? აი ეს არის და მეტი არაფერი. ზოგადად ყველაფრის შეზელა, უპრინციპობა, უღირსობა და ასე შემდეგ, არ მინდა სახელებს და გვარებს შევეხო, მათი მხრიდან გასაკვირი არ არის. ასე რომ, კიდევ ბევრს ვნახავთ ასეთ გადასვლა-გადმოსვლებს, მაგრამ ამით საზოგადოებას ვერ მოატყუებენ, მეხსიერებაც კარგი აქვს და ბრძენია საზოგადოება. ისინი წარსულს ვერ წაშლიან. იციან, რომ „ნაციონალური მოძრაობა“ საბოლოოდ დაჩირქდა და ახლა არის მცდელობა, მათი პატრონების დავალებით, როგორმე ამ ანასხლეტებმა 5%-იანი ბარიერი გადალახონ და შემოვიდნენ პარლამენტში, მაგრამ შედეგი არის ერთი და ეს შედეგი არის „კოლექტიური ნაციონალური მოძრაობის“ შედეგი და ამას მივიღებთ 26 ოქტომბერს, ისტორიულ მინიმუმს დაწერენ ისინი“-განაცხადა ირაკლი კირცხალიამ.

ახლა ზუგდიდში ჩამობრძანდი და იმ ხალხს, ვისაც მელიასთან ერთად შეხვედრებზე ეუბნებოდი, პარტიაში ოლიგარქები არიან და მაგიტომ წამოვედი, „ქოცებს“ შეეკრნენ, ენმ-ში მხოლოდ ბელადომანები დარჩნენო და კიდეც ათას სისაძაგლეს კადრულობდი, აუხსენი, რომ იტყუებოდი და უსინდისო იყავი, – ამის შესახებ „ნაციონალური მოძრაობის“ წევრი ანა წითლიძე სოციალურ ქსელში ხატია დეკანოიძესთან დაკავშირებით წერს.

როგორც ანა წითლიძე აღნიშნავს, ხატია დეკანოიძე საპარლამენტო სიის ხათრით დაბრუნდა „ნაციონალურ მოძრაობაში“.

„პირადი ეგოს დამარცხების დროაო და იმედია, შენ დაამარცხე ეგ პირადი ეგო და საპარლამენტო გამსვლელის სიის ხათრით არ შეიწმინდე და არ მოხვედი უკან. თუმცა მე ზუსტად ვიცი, რომ მაგის ხათრით და გარანტიით მოხვედი. მიშას თუ ახსენებ ხშირად, ნუ გგონია, ჩვენს ამომრჩეველს არ ახსოვს, რაც იკადრე“, – წერს ანა წითლიძე.

ხატია დეკანოიძე „ერთიან ნაციონალურ მოძრაობაში“ დაბრუნდა. როგორც პარტიაში აღნიშნეს, ხატია დეკანოიძე ეროვნული კომიტეტის თავმჯდომარის მოადგილე იქნება.

ცესკო საარჩევნო პროცესში ჩართულ მხარეებს მოუწოდებს, გამოიჩინონ სახელმწიფოებრივი მიდგომა და უსაფუძვლო ბრალდებებით ნუ დააზიანებენ საარჩევნო გარემოს, – ნათქვამია ცესკოს მიერ გავრცელებულ განცხადებაში.

„გვინდა გამოვეხმაუროთ საერთაშორისო კომპანია „სმარტმატიკთან“ დაკავშირებით მედიაში გავრცელებულ ინფორმაციას, რომელსაც საქართველოს საარჩევნო ადმინისტრაციასთან არანაირი კავშირი და შემხებლობა არ აქვს. მიუხედავად ამისა, ჩვენი დაკვირვებით ხორციელდება მისი მანიპულაციურად გამოყენება უწყებისა და ელექტრონული არჩევნების ნეგატიურ კონტექსტში წარმოსაჩენად და უსაფუძვლო აღქმების შესაქმნელად.

საქმე ეხება კომპანია „სმარტმატიკის“ რამდენიმე წარმომადგენლის მიმართ დაწყებულ დავას. როგორც თავად მედიის მიერ მომზადებულ მასალებშიც არის აღნიშნული, „სმარტმატიკის“ ინფორმაციით დავა მიმდინარეობს არა კომპანიის, არამედ კონკრეტული პირების წინააღმდეგ, რომლებიც ამ ეტაპზე გათავისუფლებული არიან „სმარტმატიკიდან“.

მიუხედავად იმისა, რომ ბრალის ადრესატებს არანაირი ფორმალური თუ იურიდიული შემხებლობა საქართველოს საარჩევნო ადმინისტრაციასთან არ ჰქონიათ, შეინიშნება ამ თემით სპეკულირების და საარჩევნო ადმინისტრაციასთან უარყოფით ჭრილში დაკავშირების მცდელობა, რაც იმთავითვე უსაფუძვლოა. ამასთან, მნიშვნელოვანია აღინიშნოს, რომ დავის საგანი არ არის თვითონ საარჩევნო ელექტრონული აპარატები და მათი მუშაობა. ამდენად ფაქტი, რომელზეც საუბარია მედიის მიერ გამოქვეყნებულ მასალებში, ვერანაირად ვერ აისახება საქართველოში 26 ოქტომბერს დაგეგმილ არჩევნებზე და ვერ დააყენებს კითხვის ნიშნის ქვეშ აპარატების გამართულ მუშაობას და მის მიმართ სანდოობას.

გარდა ამისა, შეგახსენებთ, რომ გასულ წელს ამერიკულმა აუდიტორულმა კომპანიამ ,,Pro V&V”-მ ჩაატარა არჩევნებზე გამოყენებული ელექტრონული საშუალებების შესაბამისობის აუდიტი და დაადგინა, რომ საქართველოში გამოყენებული ტექნოლოგიები სრულ თანხვედრაშია ადგილობრივ კანონმდებლობასთან, საერთაშორისო კარგ პრაქტიკასთან და სტანდარტებთან.

ამასთან აღსანიშნავია, რომ საქართველოს საარჩევნო კანონმდებლობით გარანტირებულია კენჭისყრის ყველა ეტაპის გადამოწმება და აუდიტირება, რადგან ყველა ეტაპზე არის ქაღალდის კვალი, ე.წ. „Paper Trail“. ამასთან, კანონის შესაბამისად, ბიულეტენები დაითვლება ხელითაც და მხოლოდ ამის შემდეგ დადგინდება კენჭისყრის შედეგები.

აღსანიშნავია, რომ დავა, რომელზეც საუბარია მედიაში გავრცელებულ ინფორმაციაში, არის მიმდინარე და რა შედეგითაც არ უნდა დასრულდეს, ეს არის გავრცელებულ ინფორმაციაში ხსენებული კონკრეტული პირებისა და კონკრეტული ქვეყნის შემთხვევა და ის გავლენას ვერ მოახდენს ჩასატარებელ არჩევნებზე.

საზოგადოებას შევახსენებთ, რომ აღნიშნული ვენდორი კომპანია შესყიდვების სააგენტოს მიერ ჩატარებული ტენდერის შედეგად გამოვლინდა გამარჯვებულად და მას აქვს არჩევნების მოდერნიზების გამოცდილება 30-ზე მეტ ქვეყანაში. მათ შორის, დღეის მდგომარეობით, ხსენებული კომპანია ახორციელებს აშშ-ის ერთ-ერთი ყველაზე დიდი საარჩევნო ოლქის, კანადის ზოგიერთი პროვინციის, ბელგიის, ესტონეთის, არგენტინის, ავსტრალიის, ალბანეთის, ბულგარეთის, სომხეთის და ა.შ. ტექნოლოგიურ მხარდაჭერას.

არჩევნების მთლიანობის დაცვა მანიპულაციური ინფორმაციის გავრცელების თავიდან აცილების გზით აუცილებელია დემოკრატიული სისტემების სიჯანსაღისა და სტაბილურობის შესანარჩუნებლად. ამდენად, მოვუწოდებთ საარჩევნო პროცესში ჩართულ მხარეებს, გამოიჩინონ სახელმწიფოებრივი მიდგომა და უსაფუძვლო ბრალდებებით და ინფორმაციით მანიპულირებით ნუ დააზიანებენ საარჩევნო გარემოს. არჩევნები საერთო საქმეა და არჩევნების მოდერნიზების უმნიშვნელოვანეს პროცესში საარჩევნო ადმინისტრაციასთან ერთად ყველა ჩართულ მხარეს აქვს თავისი წილი პასუხისმგებლობა“, – საუბარია განცხადებაში.

„ერთიანობა – ნაციონალურ მოძრაობას“ „ევროოპტიმისტების” დეპუტატი, ხატია დეკანოიძე შეუერთდა.

როგორც „ერთიანი ნაციონალური მოძრაობის“ ეროვნული კომიტეტის თავმჯდომარე კობა ნაყოფიამ ბრიფინგზე განაცხადა, ხატია დეკანოიძე ეროვნული კომიტეტის თავმჯდომარის მოადგილის პოზიციას დაიკავებს.

„დღეს „ერთიანობა – ნაციონალური მოძრაობის“ რიგებში ბრუნდება ხატია დეკანოიძე, რაც მისასალმებელია. ხატია დეკანოიძე დღეიდან შეუდგება საქმიანობას, მიხეილ სააკაშვილის მიერ ინიცირებული ეროვნული კომიტეტის თავმჯდომარის მოადგილის პოზიციაზე. გახსოვთ, რამდენიმე დღის წინ ყრილობამ ამირჩია ეროვნული კომიტეტის თავმჯდომარედ. დღეიდან, ხატია იქნება ეროვნული კომიტეტის თავმჯდომარის მოადგილე. მნიშვნელოვანია, რომ ისეთი ადამიანი, როგორიც ხატია დეკანოიძეა ისევ იქნება „ნაცმოძრაობის“ რიგებში, ამ დიდი ერთობის რიგებში“,- აღნიშნა ნაყოფიამ.

რაც შეეხება უშუალოდ საარჩევნო პროცესს, ნაყოფია დარწმუნებულია, რომ 26 ოქტომბერს „ქართული ოცნება“ ოპოზიციაში გადავა.

„დარწმუნებული ვარ, კიდევ ბევრი საინტერესო, სერიოზული, სხვადასხვანაირი ადამიანი შემოუერთდება ამ დიდ ბრძოლას. ზუსტად ვიცი, რომ 26 ოქტომბერს „ქართული ოცნება“ ოპოზიციაში გადავა. დღევანდელი ოპოზიციური ძალები, დიდი ერთობით უმრავლესობას შექმნიან საქართველოს პარლამენტში. ეს არის გარდაუვალი. პირადად მქონდა კონსულტაციები ამ საკითხთან დაკავშირებით მიხეილ სააკაშვილთან. მინდა მადლობა ვუთხრა მას. ეს კარგად ესმის მას, ამ ერთიანობის სულის ჩამდგმელია, მუდმივად ყველაფრისთვის მზადაა, ოღონდ ბევრი ერთნაირად მოაზროვნე ადამიანი, პატრიოტები გაერთიანდნენ, რადგან ქვეყანა უმძიმეს ვითარებაშია.

თავს ამოვყოფთ რუსეთის ფედერაციაში, ან გამარჯვების შემთხვევაში საქართველო დაიბრუნებს იმ დიდ შანს, რაც გააჩნია – ისტორიულ არჩევანს, ევროპას.

არჩევანი მარტივია ამომრჩევლისთვის. დარწმუნებული ვარ, ჩვენს გამარჯვებაში. ხატია დეკანოიძისნაირი ადამიანები ამ გამარჯვების მოახლოებას კიდევ უფრო გააძლიერებენ ოპოზიციურ ფლანგზე“, – აღნიშნა ნაყოფიამ.