გერმანიის ელჩს თავისი უფლება-მოვალეობები ცოტა არეული აქვს. მგონია, ფუნქცია-მოვალეობებში დაბნეული და დაკარგულია, – ამის შესახებ საპარლამენტო უმრავლესობის წევრმა, ირაკლი ზარქუამ საქართველოში გერმანიის ელჩის, პეტერ ფიშერის განცხადებასთან დაკავშირებით დასმული კითხვის პასუხად განაცხადა.

ირაკლი ზარქუას კითხვა დაუსვეს გერმანიის ელჩის განცხადებაზე, რომლის თანახმადაც, „საქართველოში ეკონომიკური მდგომარეობა მალე შეიცვლება, რადგან უკრაინაში შექმნილმა პროცესებმა შექმნა ის ფაქტორები, რამაც ეკონომიკა გაზარდა, თუმცა ეს დროებითია“.

კითხვის საპასუხოდ ზარქუამ აღნიშნა, რომ ბატონმა ფიშერმა კარგად უნდა გაიაზროს თავისი უფლება-მოვალეობები.

„ამ ტონალობაში დამოუკიდებელი ქვეყნის ხელისუფლებას არ უნდა ელაპარაკო. მით უმეტეს, თქვენ, რომელიც დაგნიშნეს, ლეგიტიმაცია გაქვთ თუ არა, ეგეც არ ვიცი. დაიშალა მთავრობა, რომელმაც თქვენ დაგნიშნათ და იმდენს ბედავთ, რომ პოლემიკაში შედიხართ და პოლიტიკურ განცხადებებს აკეთებთ.

რაც შეეხება ეკონომიკის მიმართულებას, ეტყობა, ეგ ნიუანსი გამოგრჩათ. რომ იცოდეთ, სწორედ აღმოსავლეთ ევროპიდან თქვენმა მეგობრებმა გადაასწრეს საქართველოს, მაგალითად, რუსეთთან ვაჭრობაში ღვინის მიმართულებით. ნახეთ ლატვია და სხვა ქვეყნები. ეს კიდევ ერთხელ მიუთითებს ორმაგ სტანდარტზე. თქვენ თუ რადიკალების მომხრე ხართ, ეს თქვენთვის შეინახეთ, თქვენს მანდატს არ შეეფერება. მინდა, საგარეო საქმეთა სამინისტროს მივმართო, იქნებ ამ ელჩის აქ მოღვაწეობით დაინტერესდეს და ვისურვებდი, ამ ელჩის გაწვევის პროცედურა დავიწყოთ, რადგან ის არ შეესაბამება იმ მანდატს, რა მანდატითაც აქ არის. არ მგონია, მან შეძლოს გერმანელი და ქართველი ხალხის ურთიერთობაში რამე პოზიტიურის შეტანა. პირიქით მგონია, რომ ის მავნებლობს. არ ვიცი, რა დაკვეთა აქვს. ფაქტობრივად, იგივე როთია, როთი ორი.

მინდა, ამ როთებს მივმართო, რომ ის მთავრობა, რომელმაც თქვენ დაგნიშნათ, შოლცის მთავრობა ჩამოშლილია, დაინგრა კოალიცია და თქვენ ლეგიტიმაცია არ გაქვთ, ამ ტონალობაში ელაპარაკებით 54%-ით არჩეულ მთავრობას. ამას არ გაგიტარებთ. მე კიდევ ერთხელ მივმართავ საგარეო საქმეთა სამინისტროს და ახალ მინისტრს, ალბათ ამის შესახებ ვთხოვ, რომ ამ პერსონით დაინტერესდეს, რასთან გვაქვს საქმე – გერმანის ელჩი, რომელიც არ შეესაბამება თავისი განცხადებებითა და ქმედებებით ელჩის მანდატს“, – განაცხადა ირაკლი ზარქუამ.

მინდა მადლობა გადავუხადო ქართველ ხალხს და ასევე ჩვენი გუნდის ლიდერს, პარტიის დამფუძნებელს, ბიძინა ივანიშვილს, – ამის შესახებ საქართველოს პრემიერ-მინისტრობის კანდიდატმა ირაკლი კობახიძემ პარლამენტის პლენარულ სხდომაზე სიტყვით გამოსვლისას განაცხადა.

როგორც ირაკლი კობახიძემ აღნიშნა, სწორედ ბიძინა ივანიშვილის დამსახურებაა, რომ დღეს ქვეყანას აქვს მშვიდობა და იმის შესაძლებლობა, რომ იფიქროს განვითარებაზე.

„მინდა, კიდევ ერთხელ მადლობა გადავუხადო ქართველ ხალხს. სწორედ ქართველმა ხალხმა მოგვანიჭა ჩვენ მანდატი იმისა, რომ შემდეგი ოთხი წლის განმავლობაში ვიზრუნოთ ჩვენი ქვეყნის სტაბილურ, მშვიდობიან განვითარებაზე. მინდა, ვისარგებლო შემთხვევით და კიდევ ერთხელ მადლობა გადავუხადო ჩვენი გუნდის ლიდერს, ჩვენი პარტიის დამფუძნებელს, ბიძინა ივანიშვილს. სწორედ მისი დამსახურებაა ის, რომ დღეს ქვეყანას აქვს მშვიდობა და იმის შესაძლებლობა, რომ იფიქროს განვითარებაზე, წინსვლაზე. მადლობა ბიძინა ივანიშვილს ამ შესაძლებლობისთვის, რომელიც მან ჩვენს ხალხსა და ჩვენს ქვეყანას მიანიჭა”, – განაცხადა ირაკლი კობახიძემ.

ყოველ ჯერზე როგორ შეიძლება ატყუებდე ყველას – ხალხს, საკუთარ ამომრჩეველს, რომ იგებ არჩევნებს, იქნება რიგგარეშე არჩევნები? მერამდენედ უნდა დაიჯეროს ეს ტყუილი თუნდაც მათმა ყველაზე აგრესიულმა მხარდამჭერმა? – ამის შესახებ საქართველოს პრემიერ-მინისტრის მოვალეობის შემსრულებელმა, ირაკლი კობახიძემ „იმედის“ ეთერში განაცხადა.

ირაკლი კობახიძის თქმით, ამდენი ტყუილი, რა თქმა უნდა, არ გაჭრის და ამის შედეგია ის, რომ 1000 კაცზე მეტი ვერ შეკრიბა ოპოზიციამ მთავარ დღეს, როდესაც პირველად იკრიბებოდა ქვეყნის ახლად არჩეული პარლამენტი.

„ეს ტყუილები იწვევს იმედგაცრუებას და ეს არის, საბოლოო ჯამში, ძალიან კარგი, რადგან ასეთ პირობებში საზოგადოება უკეთ გაარჩევს, ვინ მოქმედებს ქვეყნის ინტერესების შესაბამისად და ვინ მოქმედებს უბრალოდ გარე დავალების შესაბამისად. ერთი საინტერესო დეტალია, თვითონ რომ გეგმავდნენ ამ  პროცესებს, ყველაფერს მაინც სხვანაირად გააკეთებდნენ, რადგან შენ როცა ცხოვრობ ამ ქვეყანაში, მაინც სხვანაირად გრძნობ მაჯისცემას ქვეყნის და, შესაბამისად, შეგიძლია, წინასწარ იგრძნო, 1 000 კაცი გამოვა აქციაზე, 500, 1500 თუ 10 000, მაგრამ სწორედ იმის გამო, რომ ისინი ყველა ნაბიჯს დგამენ გარედან დავალებით, მათ უწევთ თვითგანადგურების რეჟიმში მოქმედება. გარედან ვერ ხვდებიან, როგორია მაჯისცემა, რამდენი კაცი გამოვა 25-ში, 1000 გამოვა თუ 100 000, ავალებენ ისეთი შეკრების ჩატარებას, სადაც წინასწარ უნდა იყოს ცნობილი, რომ 1 000 კაცზე მეტი არ გამოვა. ანადგურებენ საკუთარი ხელით საკუთარ აგენტურას. კარგია ასე პროცესების გაგრძელება, დანარჩენს დაველოდოთ“, –  განაცხადა ირაკლი კობახიძემ.

ცესკო-ში ყოფნა არის აუცილებელი, რათა ვამხილოთ სისტემა და მოვახდინოთ მისი სრული დემონტაჟი, – ამის შესახებ ცესკო-ში „ძლიერი საქართველოს“ წარმომადგენელმა, გიორგი სიორიძემ განაცხადა.

აღნიშნული კომენტარით სიორიძემ უპასუხა კითხვას, „ძლიერმა საქართველომ“ რატომ დააყენა ხელახლა ცესკო-ს წევრად მისი კანდიდატურა, როცა ცესკო-ს მიერ ჩატარებული არჩევნების გაყალბებაზე, არალეგიტიმურობაზე საუბრობენ“.

„ცესკო-ს თავმჯდომარე არალეგიტიმურადაა არჩეული და ამას ვამბობთ უკვე ორი წელია. არავის უნდა იქ ყოფნა და არავის სიამოვნებს იქ ყოფნა. იქ ყოფნა არის აუცილებელი იმისთვის, რომ ჩვენ ვამხილოთ სისტემა და მოვახდინოთ მისი სრული დემონტაჟი. ვიდრე ამას გავაკეთებთ, ვიბრძოლებთ ყველგან“, – განაცხადა გიორგი სიორიძემ.

გუშინ, 27 ნოემბერს ცნობილი გახდა, რომ ცენტრალური საარჩევნო კომისიის თავმჯდომარემ, გიორგი კალანდარიშვილმა გიორგი სიორიძის ცესკო-ს წევრად ხელახლა დანიშვნის თაობაზე კოალიცია „ძლიერი საქართველოს“ განცხადება დააკმაყოფილა.