პრეზიდენტის ვეტო თუ იქნება ფორმალური, აცდენილი გამჭვირვალობის პრინციპს, რა პრინციპსაც ეფუძნება კანონპროექტი, ის იქნება დაძლეული, – ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა განაცხადა.

ოხანაშვილის თქმით, ნებისმიერი კრიტიკა არგუმენტს უნდა ეფუძნებოდეს.

„გვაქვს პოზიცია, თუ ვინმეს სურს ვეტომდე შინაარსში შეცვლა, მზად ვართ კომუნიკაციისთვის, შესაბამისად ჩვენი ეს პოზიციაც უცვლელია. ვეტო თუ იქნება ფორმალური, აცდენილი გამჭვირვალობის პრინციპს, რა პრინციპსაც ეფუძნება კანონპროექტი, ის იქნება დაძლეული. გავაკეთეთ შეთავაზება, რომ მზად ვართ კომუნიკაციისთვის, თუ ამის ინტერესი იქნება. რაღაცას როცა აკრიტიკებ და არ მოგწონს, ეს უბრალოდ შენი სუბიექტური აზრი კი არ უნდა იყოს, უნდა იყოს არგუმენტი, დასაბუთება. ნებისმიერი კრიტიკა უნდა ეფუძნებოდეს არგუმენტს“, – განაცხადა ანრი ოხანაშვილმა.

ამასთან, როგორც ოხანაშვილმა აღნიშნა, მმართველი გუნდი მზად არის, კანონპროექტთან დაკავშირებით პარტნიორებთან იმსჯელოს, გამართონ დისკუსია საზოგადოების თვალწინ.

„მიუღებელია, როცა ვხედავთ, რომ არ არის არგუმენტი, დასაბუთება. მზად ვართ და გვექნება დამატებით შეხვედრებიც, კომუნიკაციაც  პარტნიორებთან და ამ საკითხებთან დაკავშირებით ვართ ღია. პრემიერ-მინისტრმა გააკეთა შეთავაზება. რაღაცას არასწორად თუ ვაკეთებთ, დავსხდეთ საზოგადოების თვალწინ, პირდაპირ ეთერში, გავმართოთ დისკუსია. დებატებს კი არ ვეუბნებით პარტნიორი ქვეყნების წარმომადგენლებს, არამედ დისკუსიას. ხომ ამბობენ, რომ რაღაც არასწორია, საზოგადოებამ იხილოს ეს ჯანსაღი დისკუსია, მსჯელობა კანონპროექტთან დაკავშირებით და საზოგადოება ნახავს, რომ ჩვენს მხარეს, „ქართული ოცნების“ მხარეს, ჩვენი ხალხის მხარეს არის სიმართლე. სამწუხაროა, როდესაც ამბობენ, რომ რაღაც არ მოსწონთ, მაგრამ არგუმენტი არ არსებობს“, – განაცხადა ანრი ოხანაშვილმა.

საქართველოს პრეზიდენტმა, სალომე ზურაბიშვილმა გუშინ განაცხადა: „ვეტოს წარმოვადგენ, მაგრამ არცერთ მანიპულაციაში არ შევალ და არ დავიწყებ თამაშებს, რადგან ამას მხოლოდ ერთი მიზეზი აქვს, ხალხში გაუგებრობა შემოიტანოს“.

“ვეროპტიმისტების” ერთ-ერთი ლიდერის ხატია დეკანოიძის განცხადებით, იურიდიულ საკითხთა კომიტეტის სხდომა დაიწყო და დასრულდა 1 წუთსა და 7 წამში. რაც მისი თქმით, იყო წარმოუდგენელი, სამარცხვინო, არალეგიტიმური სხდომა, რომელზეც უმრავლესობის წარმომადგენლებმაც ვერ მოასწრეს შესვლა.

ხატია დეკანოიძის განცხადებით, ახლა ქვეყნისთვის ისტორიული და გადამწყვეტი მომენტია, რაც ხალხის გამარჯვებით უნდა დასრულდეს.

„ჩვენ, ოპოზიციის წარმომადგენლებს, საშუალება არ მოგვეცა, რომ სხდომას დავსწრებოდით, რადგან პოლიციელებმა გარეთ შეგვაყოვნეს. სხდომა დაიწყო და დასრულდა 1 წუთსა და 7 წამში, ანუ ეს იყო წარმოუდგენელი, სამარცხვინო, არალეგიტიმური სხდომა, რომელზეც უმრავლესობის წარმომადგენლებმაც ვერ მოასწრეს შესვლა, მხოლოდ კომიტეტის თავმჯდომარე ოხანაშვილი შევიდა და რამდენიმე ადამიანი, ვითომ, ლეგიტიმაცია მიანიჭეს. ეს არის არალეგიტიმური სხდომა, ყველა იმ ადამიანმა, ვინც ახლა გარეთაა, უნდა იცოდეს, რომ საქართველოს პარლამენტი, „ქართული ოცნება“, ბიძინა ივანიშვილი ამ კანონის მიღებას და გათრევას აპირებს არალეგიტიმაციით, არალეგიტიმური სხდომებით, საქართველოს კონსტიტუციის დარღვევით. გუშინ, ღამე, საქართველოს პარლამენტის შენობაში არ შემიშვეს საქართველოს პარლამენტის წევრი, სამაგიეროდ, უშვებდნენ „ქართული ოცნების“ ფრაქციის წარმომადგენლებს, ასეთი უკანონობა და არასამართლიანობა ხდება. მესმის, რომ წვიმაა, სიცივეა, მთელი ღამე გარეთ ვიდექით, იდგნენ ადამიანები, მაგრამ ძალიან მნიშვნელოვანია გვესმოდეს, რომ ახლა არის ისტორიული დრო ჩვენი ქვეყნისთვის, ეს ისტორიული დრო არის ყველას, ჩვენი თანამონაწილეობით, რა თქმა უნდა, ჩვენი თანამონაწილეობა ჩვენი გამარჯვებით უნდა იყოს დასრულებული“, – განაცხადა დეკანოიძემ.

ოპოზიციონერი დეპუტატები იდგნენ და მიზანმიმართულად არ შემოდიოდნენ. კამერებით იყვნენ, კამერები ჰქონდათ ჩართული და აშუქებდნენ. დაკავებულები იყვნენ კადრების გადაღებით, – ამის შესახებ იურიდიულ საკითხთა საპარლამენტო კომიტეტის თავმჯდომარე ანრი ოხანაშვილმა ჟურნალისტებს განუცხადა.

მისივე განმარტებით, კომიტეტის სხდომა 09:00 საათზე ძალიან ბევრჯერ დაწყებულა.

„რას მეუბნებით, რომ ოპოზიციას ჩვენ უნდა დავლოდებოდით დათქმულ ვადაზე მეტად, რომ კეთილი ენებათ და შემოსულიყვნენ? ამ პრეტენზიას გვიყენებთ? ვინ აქცევდათ ალყაში მერე, კითხვას ამაზე რატომ არ სვამთ? ალყაში რატომ აქცევენ და რატომ სურთ პიკეტირება, რატომ სურთ ისეთი ქმედებები, რომელიც შესაძლოა დანაშაულს შეიცავდეს?

მარტივად არის საკითხი, თუ ვინმეს სურს გაპროტესტება, არის ამის სივრცე, არის პარლამენტის წინა მხარე, არის ასევე უკანა მხარე, გააპროტესტონ, გამოხატონ თავისი აზრი, ვინ უშლის ხელს? მაგრამ როდესაც ხდება კანონდარღვევა, პიკეტირება, უხერხულობას იმ ოპოზიციონერ დეპუტატებს უნდა უქმნიდეს. თქვენ თუ ქაოსი გინდათ, ქაოსის საშუალებას არ მოგცემთ“,-აღნიშნა ანრი ოხანაშვილმა ჟურნალისტებთან საუბრისას.

ოპოზიციონერი დეპუტატის, თეონა აქუბარდიას განცხადებით, ზუსტად წუთნახევარი დასჭირდათ იმისთვის, რომ „რუსული კანონი“ მიეღოთ.

მისი თქმით, წინააღმდეგობა გაგრძელდება, არათუ კანონის გაწვევამდე, არამედ იქამდე, სანამ „ქართული ოცნება“, რომელიც კრემლის დავალებების შემსრულებლად იქცა ქვეყანაში, არ დატოვებს ძალაუფლებას.

„ივანიშვილმა, რომელიც გვპირდებოდა გასაოცარ დემოკრატიას, იმგვარ დემოკრატიას, რომლითაც ევროპას გააოცებდა, ნამდვილად შეასრულა. კანონი შემოიტანა, რომელიც ასრულებს ქვეყანაში დემოკრატიას, ევროპულ და ევროატლანტიკურ მომავალს. ზუსტად 09:01 საათზე, როდესაც „ქართული ოცნების“ დეპუტატები შედიოდნენ დარბაზში და ჩვენც [ოპოზიცია] ვაპირებდით შესვლას, კომიტეტის სხდომა დაასრულეს. ზუსტად წუთ-ნახევარი დასჭირდათ იმისთვის, რომ მიეღოთ „რუსული კანონი“ და სწორედ ესეც აჩვენებს „ქართული ოცნების“ შიშს და მათ განზრახულობას, რომ საქართველო აქციოს რუსეთის გავლენის ქვეყნად, რასაც დარწმუნებული ვარ, საქართველოში არავინ შეეგუება და არ დაუშვებს. წინააღმდეგობა გაგრძელდება, არათუ კანონის გაწვევამდე, არამედ იქამდე, სანამ „ქართული ოცნება“, რომელიც კრემლის დავალებების შემსრულებლად იქცა ქვეყანაში, არ დატოვებს ძალაუფლებას“, – განაცხადა აქუბარდიამ.

იურიდიულ საკითხთა კომიტეტმა „უცხოური გავლენის გამჭვირვალობის შესახებ“ კანონპროექტს მესამე მოსმენით მხარი დაუჭირა.

„მოგეხსენებათ, რომ დღეს განვიხილავთ მესამე მოსმენით დადგენილი წესით, რედაქციულად პაკეტს „უცხოური გავლენის გამჭვირვალობის შესახებ“. მოგეხსენებათ, რომ მესამე მოსმენის ფარგლებში შინაარსობრივი ცვლილებების განხილვა არ ხდება. როგორც ამას რეგლამენტი ითვალისწინებს, შესაძლებელია მხოლოდ რედაქციული ხასიათის შენიშვნები. წარმოდგენილია ტექსტი გარკვეული რედაქტირებებით, მხოლოდ რედაქციულად, გრამატიკულად. დარიგებულია. შეკითხვა, შენიშვნა, მოსაზრებები არ არის. კოლეგებო, დავაყენოთ საკითხი მაშინ კენჭისყრაზე. ვინ არის მომხრე, მხარი დაუჭიროს წარმოდგენილ ტექსტს? დიდი მადლობა, კომიტეტის დამსწრე წევრთა მიერ პროექტი მხარდაჭერილია, კომიტეტის სხდომა დასრულებულია“,-განმარტა კომიტეტის თავმჯდომარე ანრი ოხანაშვილმა.

კანონპროექტის განმარტებითი ბარათის თანახმად, კანონპროექტის მიზანია უცხოური გავლენის გამჭვირვალობის უზრუნველყოფა.

„აქედან გამომდინარე, აუცილებელია ისეთი საკანონმდებლო აქტის მიღება, რომელიც განსაზღვრავს უცხოური ძალის ინტერესების გამტარებელი ორგანიზაციის ცნებას და შესაბამისი სუბიექტების უცხოური ძალის ინტერესების გამტარებელ ორგანიზაციად რეგისტრაციასა და მათი საქმიანობის გამჭვირვალობასთან დაკავშირებულ სხვა საკითხებს მოაწესრიგებს.
ამასთანავე, მნიშვნელოვანია, რომ ეს საკანონმდებლო აქტი მხოლოდ ინფორმირების მიზანს ემსახურებოდეს და მან უცხოური ძალის ინტერესების გამტარებელ ორგანიზაციად რეგისტრირებულ სუბიექტებს არ შეუზღუდოს ჩვეული საქმიანობის განხორციელება. გასათვალისწინებელია, რომ მსგავსი კანონმდებლობა და პრაქტიკა არსებობს ისეთ ქვეყნებში, როგორებიც არის, მაგალითად, აშშ, ავსტრალია, ისრაელი; კერძოდ, აშშ-ში მოქმედებს უცხოური გავლენის აგენტთა რეგისტრაციის შესახებ აქტი (Foreign Agents Registration Act (FARA))1 ; 2018 წელს ავსტრალიამ აშშ-ის კანონის ნიმუშის მიხედვით მიიღო უცხოური გავლენის გამჭვირვალობის სისტემის შესახებ აქტი (Foreign Influence Transparency Scheme Act (FITSA))2 ; ისრაელის ქნესეთმა 2016 წელს ანალოგიური ცვლილება შეიტანა 2011 წლის კანონში უცხოური პოლიტიკური პარტიის მიერ მხარდაჭერილ სუბიექტთა გამოვლენის ვალდებულების შესახებ3 . ამრიგად, წარმოდგენილი კანონპროექტი განმარტავს უცხოური ძალის ინტერესების გამტარებელი ორგანიზაციის ცნებას და უცხოური გავლენის გამჭვირვალობის უზრუნველყოფის მიზნით აწესრიგებს სუბიექტის უცხოური ძალის ინტერესების გამტარებელ ორგანიზაციად რეგისტრაციასა და უცხოური ძალის ინტერესების გამტარებელი ორგანიზაციის საქმიანობის გამჭვირვალობასთან დაკავშირებულ სხვა საკითხებს“, – აღნიშნულია კანონპროექტის განმარტებით ბარათში.

რაც შეეხება კანონპროექტის ძირითად არსს, წესრიგდება შემდეგი საკითხები:

• უცხოური ძალის ინტერესების გამტარებელი ორგანიზაციისა და უცხოური ძალის ცნებების განმარტებები;

• სუბიექტის უცხოური ძალის ინტერესების გამტარებელ ორგანიზაციად რეგისტრაციის საკითხი;

• უცხოური ძალის ინტერესების გამტარებელ ორგანიზაციად რეგისტრაციის შესახებ განაცხადის, სხვა სათანადო დოკუმენტებისა და უცხოური ძალის ინტერესების გამტარებელ ორგანიზაციათა რეესტრის საჯაროობის უზრუნველყოფის საკითხი;

• უცხოური ძალის ინტერესების გამტარებელ ორგანიზაციად რეგისტრირებული სუბიექტის მიერ ყოველწლიური საფინანსო დეკლარაციის წარდგენის საკითხი;

• უცხოური ძალის ინტერესების გამტარებელ ორგანიზაციად რეგისტრირებული სუბიექტის რეგისტრაციის გაუქმების საკითხი;

• უცხოური ძალის ინტერესების გამტარებელი ორგანიზაციის გამოსავლენად ან კანონპროექტით განსაზღვრულ მოთხოვნათა შესრულების შესამოწმებლად მონიტორინგის განხორციელების საკითხი;

• უცხოური ძალის ინტერესების გამტარებელ ორგანიზაციად რეგისტრაციისთვის თავის არიდებისას ან კანონპროექტით განსაზღვრულ შესაბამის მოთხოვნათა შეუსრულებლობისას ადმინისტრაციული პასუხისმგებლობის დაკისრების საკითხი“,- ნათქვამია დოკუმენტში.

„ნაციონალურ მოძრაობა“ არის ძალა, რომელიც ჩასაფრებულია, როგორ არიოს ქვეყანა და ძალით დაითრიოს ხელისუფლება. სანამ ეს არსებობს, ძალიან ფრთხილად უნდა ვიყოთ, – ამის შესახებ ტელეკომპანია „იმედის“ მფლობელმა, ირაკლი რუხაძემ „იმედის კვირასთან“ განაცხადა.

მისივე თქმით, საქართველომ უნდა გაიაროს გამთლიანების პროცესი, რაც ბევრმა ქვეყანამ გამოცადა, სადაც ასევე მასობრივად, ადამიანის უფლებების უხეში დარღვევები იყო.

„ჩვენ ეს უნდა გავაკეთოთ. სანამ „ნაციონალური მოძრაობა“ არსებობს მთავარი დომინანტური ოპოზიციური ძალა ეს არასდროს დასრულდება, რადგან მათი ერთადერთი შანსი, რომ დაბრუნდნენ უკან, არის ასეთი არეულობა. ბოლო-ბოლო ზუსტად იციან, რომ ქართველი ხალხი მათ ხმას არ მისცემს. შესაძლოა, 50 წლის მერე მისცენ, მაგრამ მაშინ ესენი არ იქნებიან და აღარ მადარდებს, მაგრამ ახლა არ მისცემენ. ამიტომ, „ნაციონალურ მოძრაობა“ არის ძალა, რომელიც ჩასაფრებულია, როგორ არიოს ქვეყანა და ძალით დაითრიოს ხელისუფლება. სანამ ეს არსებობს, ძალიან ფრთხილად უნდა ვიყოთ. ეს არის გასაკეთებელი. „ქართულ ოცნებას“ ეს უნდა გაეკეთებინა 2012-13 წლებში. ახლა როგორ გააკეთებენ, არ ვიცი, შევხედოთ“, – განაცხადა რუხაძემ.