პოლიციელი საერთოდ აღარ იყო ქუჩაზე და ახლა პირდაპირ ეთერში ვუყურებ, რომ დაიწყეს ქვების სროლა, ჭიშკრის მონგრევა და რაღაზე ვლაპარაკობთ? როგორღა უნდა დამტკიცდეს საკუთარი თვალით ნანახის იქით, რომ ეს დემონსტრაცია სამწუხაროდ მშვიდობიანი არ არის, – ამის შესახებ „ქართული ოცნების“ აღმასრულებელმა მდივანმა და უმრავლესობის ლიდერმა მამუკა მდინარაძემ „ქრონიკასთან“ განაცხადა.

მისი თქმით, საჭიროა რომ აქციაზე მყოფმა პოლიტიკოსებმა აიღონ პასუხისმგებლობა და მოუწოდონ აქციის მონაწილეებს პროტესტის მშვიდობიანი ფორმით გამოხატვისკენ.

„ვუყურებდი ახლა, ამხელა აგურებს რომ ესვრიან და ამით ზიანდებიან პოლიციელები, ეს ხალხი ადამიანები არიან, გმირები არიან და ჩვენი ქვეყნის უსაფრთხოებას იცავენ. ასეთი რამ არ შეიძლება. გუშინ კიდევ ჰქონდათ ინტერპრეტაციის საშუალება, რადგან ასეთი უშუალო შეხება იყო, ეთქვათ, რომ არა პირველმა ამან დაარტყა. დღეს კი საერთოდ არ იყო პოლიციელი და გადავიდნენ პარლამენტის ჭიშკრის მონგრევაზე. რომ აუხსნან და უთხრან, რომ პროტესტი მშვიდობიანად გამოხატონ პოლიციელს თავში აგური არ უნდა გაარტყან, ხომ შეიძლება მაგრამ პასუხისმგებლობას არ იღებენ და ამ დროს გამოდის ვაშაძე და ამბობს, რომ მე ვერ ვნახე ასეთი რაღაცო, წიწაკის სპრეი ვნახე მარტოო. ამ დროს ელემენტარული პასუხისმგებლობის აღების თავი უნდა ჰქონდეს ვინმეს“, – განაცხადა მდინარაძემ.

მე მინდა მივმართო გულანთებულ ახალგაზრდებს, რომ რაღაცები არ არის საჭირო, დაანებეთ თავი პარლამენტის კარებს, იქ არაფერი აღარ ხდება, მეორე მოსმენით უკვე მიღებულია ეს კანონი, – ამის შესახებ საქართველოს პრეზიდენტმა, სალომე ზურაბიშვილმა „უცხოური გავლენის გამჭვირვალობის შესახებ“ კანონის საწინააღმდეგო აქციის მონაწილეებისადმი გავრცელებულ ვიდეომიმართვაში განაცხადა.

სალომე ზურაბიშვილის განცხადებით, ბრძოლის ხაზი ახლა უკვე არა „უცხოური გავლენის გამჭვირვალობის შესახებ“ კანონზე, არამედ არჩევნებზე გადის.

„თვალყურს ვადევნებ ამ საღამოს მიმდინარე მოვლენებს სასახლიდან და თქვენ გვერდით ვარ, როგორც არაერთხელ მითქვამს. მთელი მსოფლიო გვიყურებს და დღევანდელი გამოსვლები აჩვენებს ქართველი ხალხის განწყობას, შემართებას და მიზანმიმართულობას., ეს არის უდიდესი ძალა იმისთვის, რომ ჩვენ მოვიგოთ ის გრძელვადიანი ბრძოლა, რომელიც მთავრდება არჩევნებზე, რომ საქართველო არასოდეს არ იქნება რუსეთი.

ამავე დროს მე მინდა მივმართო გულანთებულ ახალგაზრდებს, რომლებიც დღეს თავიანთ ენერგიას გვიზიარებენ, რომ რაღაცები არ არის საჭირო. დაანებეთ თავი პარლამენტის კარებს, იქ არაფერი აღარ ხდება. მეორე მოსმენით უკვე მიღებულია ეს კანონი და ჩვენი ბრძოლა უკვე პრაქტიკულად ეს კანონი არ არის, ჩვენი ბრძოლა გადის არჩევნებზე და ყველა იმ კანონის გაუქმებაზე, რომელიც მიღებულია ამ ბოლო დროს ხელისუფლების მიერ და რომელიც გვაშორებს ევროპული გზიდან. ესაა ჩვენი მიზანი და კარებზე არაფერი არ გადაწყდება გარდა გაზის გაშვებისა და ძალადობისა, რაც არ არის საჭირო, რომ გამოვიწვიოთ იმიტომ, რომ ძალადობასთან გვექნება უთუოდ საქმე. დღეს არის ვნების კვირა, ის პერიოდი, როცა არ შეიძლება გამოწვევა, ისედაც გააქტიურებულია ეშმაკი. ჩვენ ეს ვიმყოფოთ და ვიყოთ მშვიდობიანად რუსთაველის გამზირზე, სადაც ვაჩვენებთ კიდევ ერთხელ მსოფლიოს, თუ რა არის საქართველო და რა შეუძლია საქართველოს ახალგაზრდობას“, – განაცხად სალომე ზურაბიშვილმა.

აშშ-ში, კოლუმბიის უნივერსიტეტში სტუდენტები დააკავა პოლიციამ, შემდეგ თეთრ სახლში გამოვიდა სპიკერი და პოლიცია გაამართლა, იმიტომ რომ ეს წესრიგის დაცვა იყოო. აშშ-ში აგრესიული სტუდენტების დაკავება თუ წესრიგის დაცვაა, საქართველოში სხვანაირად იკითხება დემოკრატია? – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა განაცხადა.

„ეს რადიკალიზაცია ფულის გარეშე ვერ ხდება. კარგად ვიცით, რომ ფული სჭირდება აქციასაც, მონაწილეების შეიარაღებასაც – პირდაპირი და არაპირდაპირი გაგებით. ეს ის შავი ფულია, რომელზეც ჩვენ ვსაუბრობთ. 4-5 თვეში არის არჩევნები, თუ ასეთი მოლოდინი აქვთ, როგორც ამბობენ, რომ არჩევნებს იგებენ, თუ უმრავლესობა მათ უჭერთ მხარს, მაშინ ეს კანონი კი არა, ბევრი სხვა კანონი გააუქმონ, თუ მოვლენ ხელისუფლებაში ოქტომბერში, მაგრამ ლოგიკა ამას გვეუბნება, რომ არჩევნებზე არ ელოდებიან არანაირ მხარდაჭერას საზოგადოებისგან. ეს კანონი სამი თვის შემდეგ ამოქმედდება, სექტემბერ-ოქტომბერში დადგება ეს ვალდებულებები. თუ დარწმუნებულები არიან, რომ არჩევნებს იგებენ, ეს კანონიც გააუქმონ, სხვა კანონებიც გააუქმონ და ა.შ., მაგრამ იციან, რომ ვერაფერს იგებენ. მცირე პოლიტიკური ჯგუფი ატარებს ძალადობრივ აქციებს. პოლიციელები არ მიდიან აქციის მონაწილეებთან. აქციის აგრესიული მონაწილეები მიდიან პოლიციელებთან – ზოგი აფურთხებს, ზოგი აგინებს, ზოგი ქვებს ესვრის, ძალადობს – ვნახეთ აშშ-ში, კოლუმბიის უნივერსიტეტში სტუდენტები დააკავა პოლიციამ, შემდეგ თეთრ სახლში გამოვიდა სპიკერი და პოლიცია გაამართლა, იმიტომ რომ ეს წესრიგის დაცვა იყოო. აშშ-ში აგრესიული სტუდენტების დაკავება თუ წესრიგის დაცვაა, საქართველოში სხვანაირად იკითხება დემოკრატია?“, – აღნიშნა გურამ მაჭარაშვილმა.

გვინდა, გამოვეხმაუროთ ერთ-ერთი მედიასაშუალებით გავრცელებულ ინფორმაციას, თითქოს „თბილსერვის ჯგუფის” დასუფთავების სამსახურის თანამშრომელი, ვინმე გიორგი მუხიგულაშვილი სამსახურიდან გაათავისუფლეს იმის გამო, რომ „გამჭვირვალობის კანონის” საპროტესტო აქციაზე იმყოფებოდა.

სრული პასუხისმგებლობით ვაცხადებთ, რომ აღნიშნული პიროვნება  არ არის და არც ყოფილა „თბილსერვის ჯგუფის” თანამშრომელი,  შესაბამისად, ვერ მოხდებოდა მისი სამსახურიდან გათავისუფლება.

გავრცელებული ინფორმაცია არის სრული ტყუილი და მიზნად ისახავს საზოგადოების დეზინფორმირებას.

მოვუწოდებთ მედიის წარმომადგენლებს, პატივი სცენ საკუთარ მაყურებელს და თბილისის მუნიციპალიტეტთან დაკავშირებული ნებისმიერი ინფორმაცია გადაამოწმონ თბილისის მერიის პრესსამსახურში.

საქართველოს საპატრიარქო  რუსთაველის გამზირზე გამართულ აქციებთან დაკავშირებით, სადაც “უცხოური გავლენის გამჭვირვალობის შესახებ” კანონს აპროტესტებენ, განცხადებას ავრცელებს.