„ამერიკული სამხედრო დახმარება უკვე კიევისაკენ მიემართება. ის უბედურება რომ გადაიტანოს, რომელშიც ქვეყანა აღმოჩნდა ჩავარდნილი, უკრაინის მთავრობამ აღნიშნული 61-მილიარდიანი დახმარება გონივრულად უნდა გამოიყენოს. სავარაუდოდ, აშშ-ის კონგრესის მიერ გამოყოფილი ფულით და იარაღით კიევი შეძლებს რუსების შეტევის შეჩერებას და რიგ შემთხვევებში, ალბათ, უკუაგდებს კიდეც მათ ცალკეული მიმართულებებით, მაგრამ დახმარება არასაკმარისი იქნება 2022 წლის შემდეგ დაკარგული ტერიტორიების უკან დასაბრუნებლად“, – ნათქვამია აშშ-ის გაზეთ „ჰილ“-ში (The Hill) დაბეჭდილ მასალაში სათაურით „აშშ უკრაინას კვლავ დაეხმარა, მაგრამ კიევმა 2023 წელს დაშვებული შეცდომები არ უნდა გაიმეოროს“ (ავტორი – ტომ მოსქაითისი, ჩიკაგოს დეპოლის უნივერსიტეტის პროფესორი).

გთავაზობთ პუბლიკაციას შემოკლებით:

გასულ ზაფხულს უკრაინის არმიის სარდლობამ და თავდაცვის სამინისტრომ თავიანთი რესურსების დიდი ნაწილი „ქარს გაატანეს“ – უნაყოფოდ დახარჯეს უშედეგო კონტრშეტევაში. რუსეთის ჯარი, რომელმაც ვერ შეძლო 2022 წლის გაზაფხულზე ოკუპირებული ტერიტორიების შენარჩუნება, წარმატებული და მოხერხებული აღმოჩნდა თავდაცვით ოპერაციებში: 2023 წლის ზაფხულში უკრაინელებმა ვერაფერი მოუხერხეს რუსების მიერ გამაგრებულ თავდაცვით-საფორტიფიკაციო კომპლექსს და დიდი ზარალი განიცადეს.

(…)

უკრაინის არმიის წარუმატებლობით, ფაქტიურად, დასავლეთის რეპუტაციაც შეილახა – ამერიკულ (და ნაწილობრივ, ევროპულ) პოლიტიკური წრეების თვალსაზრისებში გაძლიერდა უკრაინისათვის სამხედრო დახმარების შემცირების ტენდენცია, რაც აშშ-ის კონგრესის წარმომადგენელთა პალატის რესპუბლიკელი წევრების მიერ უკრაინისათვის განკუთვნილი სამხედრო პაკეტის დაბლოკვით გამოიხატა – რამდენიმე თვის განმავლობაში. თუმცა დემოკრატებმა, პრეზიდენტ ჯო ბაიდენის ძალისხმევითა და სხვადასხვა პოლიტიკური მანევრების მეშვეობით, მოახერხეს წარმომადგენელთა პალატის რესპუბლიკელი სპიკერის მაიკ ჯონსონის დარწმუნება კიევისადმი დახმარების აუცილებლობაში, რომელმაც, საბოლოო ჯამში, კანონპროექტის წარმატებით მიღება უზრუნველყო. ამასთან, რესპუბლიკელებმა კატეგორიულად განაცხადეს, რომ ამგვარი პოლიტიკური მანევრი თეთრ სახლს აღარ გაუვა და რომ უკრაინისათვის ეს სამხედრო დახმარება უკანასკნელი იქნება.

(…)

ყველა ეს ფაქტორი იმას მიანიშნებს, რომ უკრაინამ დღევანდელ სიტუაციაში მეტი ყურადღება უნდა დაუთმოს იმ ტერიტორიის შენარჩუნებას, რომელსაც ამჟამად კიევი აკონტროლებს და არ უნდა შეეცადოს იმის დაბრუნებას, რაც უკვე დაკარგული აქვს. უკრაინას დრო ჭირდება, რომ რუსული დაბომბვებით ძლიერ დაზიანებული კრიზისული (ენერგეტიკული) ინფრასტრუქტურა აღადგინოს და თავისი არმიის წრთვნა და აღჭურვა გააგრძელოს.

უკრაინას, სავარაუდოდ, შეუძლია რუსეთის არმიის მიერ მიღწეული ზოგიერთი წარმატება გარკვეულწილად გაანეიტრალოს, მაგრამ კიევმა საკუთარ თავს უფლება არ უნდა მისცეს  კიდევ ერთი ტოტალური კონტრშეტევა დაიწყოს. არ არის გამორიცხული შარშანდელი მასშტაბური დანაკარგების გამეორება, რაც უკრაინისათვის ფატალური შეიძლება აღმოჩნდეს – განსაკუთრებით ისეთ სიტუაციაში, როცა ამერიკული დახმარების გაგრძელება გარანტირებული არ არის. პოლიტიკოსებმა და ანალიტიკოსებმა უნდა შეწყვიტონ უკრაინის დარწმუნება იმაში, რომ კიევს მოსკოვზე გამარჯვება და ტერიტორიების მთლიანად დაბრუნება შეუძლია, თუმცა ეს არ ნიშნავს დახმარების შეწყვეტას – დასავლეთმა უნდა გააგრძელოს უკრაინისადმი სამხედრო დახმარება – ისე არ უნდა გამოვიდეს, რომ უკვე დახარჯული ფული და შეწირული სიცოცხლე ფუჭი აღმოჩნდეს.

წყარო

მოამზადა სიმონ კილაძემ

ბრიტანულ გაზეთ „ფაინენშელ თაიმსში” (Financial Times) გამოქვეყნებულია სტატია სათაურით „საქართველოს მთავრობა საპროტესტო აქციის მონაწილეებს უსწორდება, რომლებიც პროევროპულად და ანტირუსულად არიან განწყობილნი“ (ავტორები – ანასტასია სტოგნია და ენდი ბაუნდსი).

გთავაზობთ პუბლიკაციას შემოკლებით:

ქართული პოლიცია მკაცრად გაუსწორდა დემონსტრაციის მონაწილეებს, რომლებიც დემოკრატიის პრინციპების დაცვის მოთხოვნებით გამოდიან და არ ეთანხმებიან მთავრობის პოლიტიკას, მიმართულს სამოქალაქო საზოგადოების შეზღუდვისა და პრორუსული პოლიტიკის გაძლიერებისაკენ. ეს ხდება იმ ქვეყანაში, რომელსაც ევროკავშირში წევრობის კანდიდატის სტატუსი აქვს მიღებული.

ყველაფერი კი ხელისუფლების მიერ ინიციირებულმა „უცხოური აგენტების შესახებ“ კანონპროექტმა გამოიწვია, რომელიც, ოპოზიციური მიტინგის მონაწილეთა თქმით, რუსეთის გავლენით იქნა შემუშავებული. სიტუაცია განსაკუთრებით გამწვავდა მას შემდეგ, რაც ოლიგარქი მილიარდერი, „ქართული ოცნების“ დამაარსებელი ბიძინა ივანიშვილი გამოვიდა ხელისუფლების მხარდამჭერთა ხალხმრავალ მიტინგზე ((100 ათასი ადამიანის მონაწილეობით).

ოპოზიციური და არასამთავრობო ორგანიზაციები არ ეთანხმებიან იმ კანონს, რომელიც მათ თანხების მიღება-ხარჯვის გამჭვირვალობას აიძულებს და თუ ისინი იუსტიციის სამინისტროში არ დარეგისტრირდებიან, დიდ ჯარიმებს გადაიხდიან.

მოახლოებული საპარლამენტო არჩევნების კვალობაზე მმართველი პარტია აღნიშნულ კანონპროექტს განიხილავს როგორც ოპოზიციის შემაკავებელ და პარლამენტში „ქართული ოცნების“ გაბატონებული მდგომარეობის შემნარჩუნებელ ინსტრუმენტს, მაგრამ ის ქართველები, რომლებიც ევროკავშირში გაწევრიანების განწყობაზე არიან, პრორუსული კანონის მიღებაში სერიოზულ საფრთხეს ხედავენ.

პრეზიდენტ სალომე ზურაბიშვილს შეუძლია კანონს ხელი არ მოაწეროს, მაგრამ მთავრობას, თავის მხრივ, პრეზიდენტის ვეტოს გადალახვა შეუძლია. საინტერესოა, რომ სალომე ზურაბიშვილმა საპრეზიდენტო არჩევნებში „ქართული ოცნების“ მხარდაჭერით გაიმარჯვა, მაგრამ შემდეგ მას პარტიასთან უთანხმოება გაუჩნდა და ამჟამად იგი მმართველი პოლიტიკური ძალის მწვავე კრიტიკოსად ითვლება. სამშაბათს პრეზიდენტმა პოლიციის მიერ [მთავრობის ბრძანებით] განხორციელებულ ქმედებას „აბსოლუტურად გაუმართლებელი და არაპროპორციული რეპრესიები“ უწოდა.

საქართველოს ხელისუფლება დასავლელმა პოლიტიკოსებმა და ევროკავშირის ხელმძღვანელებმაც გააკრიტიკეს, მათ შორის ევროპის კომისიის პრეზიდენტმა ურსულა ფონ დერ ლაიენმა. მან აღნიშნა, რომ ყოველგვარი ანტიდემოკრატიული ქმედება საქართველოსთვის როგორც ევროკავშირის გზაზე მდგარი ქვეყნისათვის, უარყოფითი როლის შემსრულებელი იქნება. „სიტუაცია ძალიან ცუდია და ამიტომ ევროკავშირში შეშფოთებულნი არიან „ქართული ოცნების“ მოქმედებით“, – განაცხადა მან.

გაზეთ „ფაინენშელ თაიმსის“ კორესპონდენტი მოწმე გახდა იმისა, თუ როგორ ტოვებდნენ ანტისამთავრობო მიტინგს მონაწილეები, უმეტესად ქალები, დაწითლებული და ცრემლიანი თვალებით – პოლიციის მიერ მიერ ცრემლმდენი გაზის გამოყენების შედეგად. ექიმებმა დახმარება 20-მდე მომიტინგეს აღმოუჩინეს. განსაკუთრებით დაშავდა ოპოზიციური პარტიის „ერთიანი ნაცმოძრაობის“ ლიდერი ლევან ხაბეიშვილი, რომელიც პოლიციელებმა სასტიკად სცემეს – მას ცხვირი გაუტეხეს, რის შედეგადაც იგი საავადმყოფოში აღმოჩნდა. „მე ტკივილს არ ვგრძნობ ყველაფერი მომირჩება და გაივლის, პუტინისტებთან ბრძოლა კი გაგრძელდება“, – განაცხადა ლევან ხაბეიშვილმა.

პოლიციელებს ვერ გადაურჩა ზოგიერთი ჟურნალისტი, მათ შორის „ფრანს პრესის“ სააგენტოს ფოტოგრაფი, რომელიც რეზინის ხელკეტების ქვეშ აღმოჩნდა – მიუხედავად იმისა, რომ იგი მკაფიოდ იყო იდენტიფიცირებული როგორც პრესის წარმომადგენელი

საქართველოს შინაგან საქმეთა სამინისტროს განცხადებით, პოლიციამ იმიტომ გამოიყენა სპეცსაშუალებები, რომ მიტინგის მონაწილეები სამართალდამცველების კანონიერ მოთხოვნებს ეურჩებოდნენ და შეურაცხყოფდნენ.
პროსამთავრობო მიტინგის მონაწილეები ხელისუფლებამ სპეციალურად ჩამოიყვანა თბილისში რეგიონებიდან. „ეს არის აქცია პუტინის სტილით“, – ასე შეაფასა ხელისუფლების მხარდამჭერთა დემონსტრაცია პრეზიდენტმა სალომე ზურაბიშვილმა. ამ მიტინგის ზოგიერთ ხანში შესულ მონაწილეს „ფაინენშელ თაიმსის“ კორესპონდენტიც გაესაუბრა: მათი თქმით, ისინი რეგიონებიდან იმიტომ ჩამოვიდნენ, რომ მხარი დაუჭირონ „მამულს“, „ენას“ და „სარწმუნოებას“. ისინი მუდმივად იმეორებდნენ რუსული პროპაგანდის თემებს საქართველოში დასავლური სპეცსამსახურების ანტიქართული მოქმედების შესახებ.

თავის გამოსვლაში ბიძინა ივანიშვილმა დასავლეთი იმაში დაადანაშაულა, რომ ნატოში მიღების ნაცვლად, ევროკავშირმა და ამერიკამ უკრაინა და საქართველო „ბედის ანაბარად მიატოვეს“. მისი მტკიცებით, ასეთი გადაწყვეტილება „ომის გლობალურმა პარტიამ“ მიიღო, რომელმაც 2008 წელს საქართველოს რუსეთთან კონფრონტაციისაკენ უბიძგა.

ბიძინა ივანიშვილი საქართველოს მოსახლეობას დაჰპირდა, რომ ქვეყანა ევროკავშირში მიღებისათვის მზად 2030 წელს იქნება.

„ივანიშვილი იშვიათად აკეთებს მსგავს საჯარო განცხადებებს და მხოლოდ იმ სიტუაციებში, როცა მას სხვა არჩევანი აღარ აქვს“, – ამბობს ვანო ჩხიკვაძე, რომელიც საქართველოს სამოქალაქო საზოგადოების ფონდის თანამშრომლად მუშაობს.

წყარო