ეუთო-ს დემოკრატიული ინსტიტუტებისა და ადამიანის უფლებათა ოფისი (ODIHR) საქართველოში წინასაარჩევნო გარემოსთან დაკავშირებით შუალედურ ანგარიშს აქვეყნებს.

დოკუმენტის თანახმად, შუალედურ ანგარიშში 11 სექტემბრიდან 9 ოქტომბრამდე პერიოდია მიმოხილული.

ანგარიშში აღნიშნულია, რომ 26 ოქტომბერს საქართველოში პირველი საპარლამენტო არჩევნები გაიმართება სრულად პროპორციული სისტემით.

„არჩევნები ტარდება ღრმად ფესვგადგმული პოლიტიკური პოლარიზაციის, განგრძობადი პოლიტიკური დაძაბულობის, ოპოზიციის მხრიდან სახელმწიფო ინსტიტუტებისადმი უნდობლობისა და გაერთიანების, გამოხატვის უფლების დაცვასთან დაკავშირებული შეშფოთების ფონზე. ეს ასევე პირველი არჩევნებია მას შემდეგ, რაც საქართველოს 2023 წელს მიენიჭა ევროკავშირის კანდიდატის სტატუსი,პროცესი, რომელიც ევროკავშირის საბჭოს 2024 წლის ივნისის დასკვნების თანახმად, დე ფაქტო შეჩერდა „უცხოური გავლენის გამჭვირვალობის შესახებ“ კანონის მიღების შემდეგ. კანონის მიღების წინმსწრებმა პროცესმა და თავად მიღებამ ფართომასშტაბიანი საზოგადოებრივი პროტესტი გამოიწვია“, – აღნიშნულია ანგარიშში.

დოკუმენტში ასევე ნათქვამია, რომ ბოლო საპარლამენტო არჩევნების შემდეგ, საარჩევნო კოდექსში 20-ზე მეტი ცვლილება შევიდა, რომლითაც „ოდირის“ რამდენიმე წინა რეკომენდაციაა გათვალისწინებული, თუმცა აქვე აღნიშნულია, რომ „ოდირის“ რამდენიმე რეკომენდაცია კვლავ შეუსრულებელი რჩება.

„2022 და 2023 წლების ცვლილებებს წინ უძღოდა საჯარო განხილვები, რომლებმაც ფართო მხარდაჭერა მოიპოვა და მიუხედავად იმისა, რომ არ უზრუნველყო რეკომენდებული ყოვლისმომცველი რეფორმა, გაითვალისწინა „ოდირის“ რამდენიმე წინა რეკომენდაცია. თუმცა, 2024 წლის ცვლილებები მიღებულ იქნა საკმარისი საჯარო კონსულტაციის ან კონსენსუსის გარეშე და გამოიწვია შეშფოთება მათი გავლენის შესახებ. გარდა ამისა, „ოდირის“ რამდენიმე რეკომენდაცია კვლავ შეუსრულებელი რჩება, მათ შორის ისინი, რომლებიც უკავშირდება საარჩევნო ადმინისტრაციის მიუკერძოებლობას, ადმინისტრაციული რესურსების ბოროტად გამოყენებას, წინასაარჩევნო კამპანიისა და კამპანიის დაფინანსებას, მედიასთან დაკავშირებულ საარჩევნო რეგულაციებს და საარჩევნო დავების გადაწყვეტის ჩარჩოს გაძლიერებას“, – აღნიშნულია დოკუმენტში.

აქვე ნათქვამია, რომ საარჩევნო ადმინისტრაციამ დღემდე დაიცვა ყველა კანონიერი ვადა, ჩაატარა ტრენინგები სხვადასხვა დაინტერესებული მხარისთვის და წამოიწყო ამომრჩეველთა ფართომასშტაბიანი ინფორმირების კამპანია.

„„ოდირის“ სადამკვირვებლო მისიის ბევრმა თანამოსაუბრემ გამოხატა ნდობა საარჩევნო ადმინისტრაციის ტექნიკური და ორგანიზაციული შესაძლებლობების მიმართ, მაგრამ „ოდირის“ სადამკვირვებლო მისიის ზოგიერთმა თანამოსაუბრემ გამოთქვა შეშფოთება, რომ ცესკო-ს გადაწყვეტილების მიღების გამარტივებულმა პროცესმა, ოპოზიციის მიერ დანიშნული თავმჯდომარის მოადგილის თანამდებობიდან გათავისუფლებამ და მისი წევრების დანიშვნის ახალმა მეთოდმა შესაძლოა, უარყოფითად იმოქმედოს საარჩევნო ადმინისტრაციის მიუკერძოებლობაზე“, – აღნიშნულია შუალედურ ანგარიშში.

დოკუმენტში ასევე საუბარია საარჩევნო პროცესში ელექტრონული სისტემების გამოყენების საკითხზეც.

„პირველად, ელექტრონული მოწყობილობები გამოყენებული იქნება უმეტეს საარჩევნო უბანზე ამომრჩეველთა იდენტიფიკაციის, ხმების დათვლის, წინასწარი შედეგების დადგენისა და გადაცემისთვის. მაშინ, როცა ამ ტექნოლოგიების შემოღება მხარდაჭერილია უმეტესი დაინტერესებული მხარის მიერ, ზოგიერთმა გამოთქვა შეშფოთება საუბნო საარჩევნო კომისიების (სუბკო) შესაძლებლობებთან დაკავშირებით, გაუმკლავდნენ რეგისტრირებული ამომრჩევლების გაზრდილ რაოდენობას თითოეულ საარჩევნო უბანზე, რომელიც გაორმაგდა ბოლო არჩევნების შემდეგ და ხაზი გაუსვეს ტექნოლოგიის შემდგომი გამჭვირვალე აუდიტის და ამომრჩეველთა ინფორმირების საჭიროებას, რათა გაქარწყლდეს მცდარი შეხედულებები იმის შესახებ, რომ მოწყობილობები შეიძლება, გამოყენებულ იქნას ხმის მიცემის ფარულობის დარღვევისთვის“, – ნათქვამია დოკუმენტში.

„ოდირის“ შუალედურ ანგარიშში აღნიშნულია, რომ სადამკვირვებლო მისიის უმეტეს თანამოსაუბრეს არ გამოუთქვამს მნიშვნელოვანი შეშფოთება ამომრჩეველთა სიების ინკლუზიურობასთან დაკავშირებით, თუმცა ზოგიერთმა აღნიშნა უზუსტობები.

„დაახლოებით 3.4 მილიონი რეგისტრირებული ამომრჩეველია. ცესკო-მ ამომრჩეველთა რეგისტრაციის ინფორმაციის შესამოწმებლად და შესწორებების მოთხოვნისთვის რამდენიმე ვარიანტი შესთავაზა, როგორც პირადად, ისე ონლაინ. „ოდირის“ სადამკვირვებლო მისიის უმეტეს თანამოსაუბრეს არ გამოუთქვამს მნიშვნელოვანი შეშფოთება ამომრჩეველთა სიების ინკლუზიურობასთან დაკავშირებით, თუმცა ზოგიერთმა აღნიშნა უზუსტობები, რომლებიც ძირითადად გამოწვეულია სიაში გარდაცვლილი ამომრჩევლებისა და საზღვარგარეთ დე ფაქტო მცხოვრები მოქალაქეების პოტენციური არსებობით“, – ნათქვამია დოკუმენტში.

შუალედური ანგარიშს თანახმადვე, „ოდირის“ სადამკვირვებლო მისიის თანამოსაუბრეებს არ გამოუთქვამთ შეშფოთება საარჩევნო კანდიდატთა რეგისტრაციის პროცესთან დაკავშირებით.

„პარტიებისგან მიღებული 40 განაცხადიდან ცესკო-მ დაარეგისტრირა 27 საარჩევნო სუბიექტი, რომელთაგან 19-მა წარადგინა კანდიდატთა სიები, საბოლოოდ კი 18 დარეგისტრირდა მონაწილედ. პოლიტიკურ პარტიებს არ აქვთ უფლება, კენჭი იყარონ წინასაარჩევნო ბლოკებში, რაც იწვევს იმას, რომ პოლიტიკური პარტიები დე ფაქტო კოალიციებში ერთიანდებიან და კოალიციის ფარგლებში თავის კანდიდატებს წამყვანი პარტიის სიებში არეგისტრირებენ. „ოდირის“ სადამკვირვებლო მისიის თანამოსაუბრეებს არ გამოუთქვამთ შეშფოთება კანდიდატთა რეგისტრაციის პროცესთან დაკავშირებით“, – ნათქვამია დოკუმენტში.

აქვე აღნიშნულია, რომ ქალთა წარმომადგენლობა არჩევით თანამდებობებზე კვლავ დაბალია, კონსტიტუციური დებულებების მიუხედავად, რომლებიც სახელმწიფოსგან მოითხოვს სპეციალური ზომების მიღებას გენდერული თანასწორობის უზრუნველსაყოფად.

„2024 წლის ცვლილებებით გაუქმდა სავალდებულო გენდერული კვოტა, ისევე როგორც სხვა დროებითი სპეციალური ზომები კანდიდატთა სიებისთვის და სხვა საკანონმდებლო ზომები, რომლებიც მიზნად ისახავდა ქალთა პოლიტიკური მონაწილეობის გაზრდას. ეს ნაბიჯი გააკრიტიკა „ოდირის“ სადამკვირვებლო მისიის რამდენიმე თანამოსაუბრემ მისი პოტენციური უარყოფითი გავლენის გამო პოლიტიკაში გენდერულ წარმომადგენლობაზე. ცესკო-ს მონაცემებით, 11 ოქტომბრის მდგომარეობით, 1,185 კანდიდატი იყო. ქალებს სამ სიაში უკავიათ წამყვანი ადგილები და კანდიდატთა საერთო რაოდენობის 29%-ს შეადგენენ“, – ნათქვამია დოკუმენტში.

შუალედურ ანგარიშში საუბარია პოლიტიკური პარტიების წინასაარჩევნო კამპანიებთან დაკავშირებითაც.

„წინასაარჩევნო კამპანიის გზავნილები, რომელზეც აქამდე განხორციელდა დაკვირვება, იყენებს მეტად პოლარიზებულ რიტორიკას. მმართველმა პარტიამ არჩევნები წარმოადგინა როგორც არჩევანი მშვიდობასა და ომს შორის, ხოლო ოპოზიციური პარტიების უმეტესობა არჩევნებს წარმოაჩენს როგორც რეფერენდუმს ქვეყნის გეოპოლიტიკურ პოზიციაზე. „ოდირის“ სადამკვირვებლო მისიის ზოგიერთმა თანამოსაუბრემ გამოთქვა შეშფოთება დაშინების ტაქტიკასთან დაკავშირებით, მმართველი პარტიის მხარდამჭერებისა და სახელმწიფო ორგანოების მხრიდან, რომელიც სავარაუდოდ, მიმართული იყო მათი წინასაარჩევნო აქტივობებისა და ასევე ამომრჩევლების წინააღმდეგ. სიტყვიერი თავდასხმების, საარჩევნო მასალების განადგურებისა და ფიზიკური დაპირისპირების იზოლირებული შემთხვევები დაფიქსირდა როგორც მმართველი, ისე ოპოზიციური პარტიების მხრიდან. არსებული რეგულაციების მიუხედავად, „ოდირის“ სადამკვირვებლო მისიის რამდენიმე თანამოსაუბრემ ხაზი გაუსვა ხარვეზებს კანონმდებლობასა და მის განხორციელებაში ადმინისტრაციული რესურსების პოტენციურ ბოროტად გამოყენებასთან დაკავშირებით“, – ნათქვამია დოკუმენტში.

შუალედური ანგარიშის თანახმად, პოლიტიკური პარტიების შემოსავლებსა და ხარჯებს ზედამხედველობას უწევს ახლად შექმნილი ანტიკორუფციული ბიურო (ACB), რომელმაც საარჩევნო კამპანიის პერიოდში დაიწყო პარტიების ფინანსების შემოწმება და საკუთარი უფლებამოსილების ფარგლებში დამატებითი ანგარიშგება მოითხოვა.

„ყველა კონკურენტმა წარადგინა პირველი შუალედური ანგარიში. ანტიკორუფციულმა ბიურომ ისინი გამოაქვეყნა ონლაინ, თუმცა კანონი არ ავალდებულებს მას, არჩევნების დღემდე შეამოწმოს და გამოაქვეყნოს დასკვნები ამ ანგარიშებზე. ანტიკორუფციულმა ბიურომ თავდაპირველად რამდენიმე სამოქალაქო საზოგადოების ორგანიზაცია (CSO), მათ შორის მოქალაქეთა სადამკვირვებლო ჯგუფი, მოიხსენია „დეკლარირებული საარჩევნო მიზნების მქონე სუბიექტად“, რომელიც ვალდებულია, დაიცვას საარჩევნო კამპანიის დაფინანსების რეგულაციები, თუმცა მთავრობის მოთხოვნის შემდეგ, უკან წაიღო თავისი გადაწყვეტილებები“, – აღნიშნულია დოკუმენტში.

შუალედური ანგარიშის თანახმად, დღემდე, საარჩევნო ადმინისტრაციამ და სასამართლოებმა მიიღეს დაახლოებით 120 საჩივარი, ძირითადად დაბალი დონის საარჩევნო კომისიის წევრების დანიშვნის, ადმინისტრაციული რესურსების ბოროტად გამოყენებისა და კამპანიის წესების დარღვევის შესახებ.

„საჩივრების უმეტესობა უარყოფილ იქნა არსებითი განხილვის შემდეგ. „ოდირის“ სადამკვირვებლო მისიის რამდენიმე თანამოსაუბრემ აღნიშნა სამართალდამცავი ორგანოების, საარჩევნო ადმინისტრაციისა და სასამართლო სისტემის უნარის მიმართ დაბალი ნდობის დონე, ეფექტურად და მიუკერძოებლად განიხილონ და გადაწყვიტონ პოლიტიკურად მგრძნობიარე საკითხები“, – ნათქვამია ანგარიშში.

დოკუმენტში ასევე აღნიშნულია, რომ 10 ოქტომბრის მდგომარეობით, ცესკო-მ აკრედიტაცია მისცა მოქალაქეთა 68 სადამკვირვებლო ორგანიზაციას 2,602 დამკვირვებლით და საერთაშორისო დამკვირვებელთა 51 ჯგუფს 512 დამკვირვებლით.

„რამდენიმე სამოქალაქო საზოგადოების ორგანიზაციამ (CSO) დაიწყო გრძელვადიანი დაკვირვების აქტივობები და მრავალმა აღნიშნა უფრო რთული სამუშაო გარემო, რაც გამოწვეულია მათი საჯარო სტიგმატიზაციით „უცხოური გავლენის გამჭვირვალობის შესახებ“ კანონის მიღების შემდეგ“, – აღნიშნულია შუალედურ ანგარიშში.

პირველმა ვიცე-პრემიერმა, ეკონომიკისა და მდგრადი განვითარების მინისტრმა კომენტარი გააკეთა საზოგადოებრივი აზრის კვლევებზე, რომლებსაც, მისი თქმით, ოპოზიციური პარტიები წინასაარჩევნოდ აქვეყნებენ.

ლევან დავითაშვილის განცხადებით, ასეთი ტიპის რეიტინგები საკმაოდ სუბიექტურია და არ არის გამყარებული ობიექტური კვლევებითა და მეთოდოლოგიით, რომლებიც საჭიროა, რომ ეს ინფორმაცია იყოს სარწმუნო. პირველი ვიცე-პრემიერის შეფასებით, იმის მიუხედავად, რომ ასეთ რეიტინგებში საერთაშორისო ბრენდები და ავტორიტეტული სახელები მონაწილეობენ, მათ საიმედოობა არ აქვთ.

„არჩევნებში გამოჩნდება, როგორია ხალხის განწყობა. დარწმუნებული ვარ, რომ ხალხის განწყობაა ის, რომ მას სურს ქვეყანაში სტაბილურობა და მშვიდობის შენარჩუნება. ასევე განვითარების მხარდაჭერა, რასაც ჩვენს მოსახლეობას „ქართული ოცნება” სთავაზობს,” – განაცხადა პირველმა ვიცე-პრემიერმა.

მოვუწოდებთ ცესკო-ს დაუყოვნებლივ მიიღოს გადაწყვეტილება სტრასბურგში საარჩევნო უბნის გახსნის შესახებ და ხელი შეუწყოს ემიგრანტებს შეუფერხებლად განახორციელონ კონსტიტუციით გარანტირებული საარჩევნო უფლება, – ამის შესახებ საქართველოს პრეზიდენტის ადმინისტრაციის უფროსის ნათია სულავას განცხადებაშია აღნიშნული.

ნათია სულავას განცხადებით, სტრასბურგში საარჩევნო უბანი უნდა გაიხსნას, რადგან სტრასბურგში ცხოვრობს ათასობით საქართველოს მოქალაქე და საკონსულო აღრიცხვაზე იმყოფება საქართველოს მინიმუმ 400 მოქალაქე და რაც მთავარია, სტრასბურგში არსებობს საქართველოს დიპლომატიური წარმომადგენლობა.

„დღეს ცენტრალურმა საარჩევნო კომისიამ მიიღო გადაწყვეტილება საზღვარგარეთ 7 ახალი საარჩევნო უბნის გახსნასთან დაკავშირებით. აღსანიშნავია, რომ ცესკო-ს დღევანდელი გადაწყვეტილება არანაირად არ პასუხობს ათასობით ემიგრანტის მოთხოვნას, გახსნილიყო საარჩევნო უბნები ევროპისა და ამერიკის შეერთებული შტატების დიდ ქალაქებში.

ცესკო-ს დღევანდელ სხდომაზე ასევე, იქნა განხილული საფრანგეთის ქალაქ სტრასბურგში საარჩევნო უბნის გახსნის საკითხი, თუმცა კომისიამ ეს საკითხი არ დააკმაყოფილა.

აღსანიშნავია, რომ ათასობით ემიგრანტის მოთხოვნას, რომელიც გაგზავნილ იქნა ცესკოში და საგარეო საქმეთა სამინისტროში, უარი ეთქვა და საგარეო საქმეთა სამინისტრო ასახელებდა იმ გარემოებას, რომ საზღვარგარეთ უბნის გახსნა შესაძლებელია მხოლოდ საქართველოს დიპლომატიურ წარმომადგენლობაში. უარის ერთ-ერთი მიზეზი ასევე, იყო უსაფრთხოების საკითხი.

საქართველოს პრეზიდენტი არაერთხელ შეხვდა საქართველოში ევროპისა და ამერიკის შეერთებული შტატების ელჩებს, მათ შორის, საფრანგეთის ელჩს და ელჩებისგან მიიღო სრული მხარდაჭერა დამატებითი უბნების გახსნასთან დაკავშირებით.

იქიდან გამომდინარე, რომ სტრასბურგში ცხოვრობს ათასობით მოქალაქე და იქიდან გამომდინარე, რომ სტრასბურგიდან საკონსულო აღრიცხვაზე იმყოფება საქართველოს მინიმუმ 400 მოქალაქე და რაც მთავარია, სტრასბურგში არსებობს საქართველოს დიპლომატიური წარმომადგენლობა, მოვუწოდებთ ცესკო-ს, დაუყოვნებლივ მიიღოს გადაწყვეტილება სტრასბურგში საარჩევნო უბნის გახსნის შესახებ და ამ გადაწყვეტილებით ხელი შეუწყოს ჩვენს ემიგრანტებს შეუფერხებლად განახორციელონ კონსტიტუციით გარანტირებული საარჩევნო უფლება“, – ნათქვამია განცხადებაში.

ჩვენთვის ძალიან დიდი მნიშვნელობა აქვს ჩვენი ქვეყნის დაკავშირებადობის ფუნქციის განვითარებას, სატრანზიტო პოტენციალის განვითარებას, – განაცხადა საქართველოს პრემიერ-მინისტრმა ირაკლი კობახიძემ ქუთაისის დავით აღმაშენებლის სახელობის საერთაშორისო აეროპორტის ახალი ასაფრენ-დასაფრენი ზოლის მშენებლობის დაწყებასთან დაკავშირებული კაფსულის ჩაგდების ცერემონიაზე სიტყვით გამოსვლისას.

პრემიერის თქმით, ამ კუთხით აეროპორტების განვითარებას ენიჭება განსაკუთრებული მნიშვნელობა.

„ჩვენ რამდენიმე დღის წინ გვქონდა, ზოგადად, საუბარი ქუთაისის აეროპორტთან და ჩვენს გეგმებთან დაკავშირებით და დღეს უკვე გადავდივართ პრაქტიკულად საქმეზე. დღეს ვიწყებთ ქუთაისის დავით აღმაშენებლის სახელობის საერთაშორისო აეროპორტის ახალი, 3.5 კმ-იანი ასაფრენ-დასაფრენი ზოლის და სააეროდრომო ინფრასტრუქტურის მშენებლობას. შესაბამისად, ეს არის ძალიან მნიშვნელოვანი დღეს არა მხოლოდ ქუთაისის აეროპორტისთვის, არამედ ამ რეგიონისთვის და მთლიანად ჩვენი ქვეყნისთვის.

ახალი ზოლი უმაღლესი საერთაშორისო სტანდარტების შესაბამისად აშენდება, აღჭურვილი იქნება მაღალი სიზუსტის თანამედროვე სანავიგაციო შუქ-ტექნიკით და ნებისმიერი ზომის სამგზავრო და სატვირთო საჰაერო ხომალდების შეუზღუდავი მომსახურების შესაძლებლობა ექნება.

პროექტში, რომელიც ქუთაისის საერთაშორისო აეროპორტის განვითარების გენერალური გეგმის პირველ ფაზას წარმოადგენს, 240 მილიონი ლარის ინვესტიცია ჩაიდება. ეს აღემატება ამ აეროპორტში აქამდე განხორციელებული ყველა ინვესტიციის ჯამს ერთად აღებულს, ჯამურად აქამდე 200 მილიონის ინვესტიცია იყო ჩადებული ამ აეროპორტში და ახლა, მხოლოდ ამ პროექტის ფარგლებში, 240 მილიონი ლარის ინვესტიცია განხორციელდება.

აეროპორტის განვითარების შემდეგ ეტაპზე, გაფართოვდება სამგზავრო ტერმინალი; შედეგად, მგზავრთნაკადი ამ აეროპორტში 1.7 მილიონიდან 5 მილიონამდე გაიზრდება“, – განაცხადა პრემიერმა.

ცენტრალური საარჩევნო კომისიის გადაწყვეტილებით 26 ოქტომბრის პარლამენტის არჩევნებისთვის საზღვარგარეთ მყოფი ამომრჩევლებისთვის დამატებით შვიდი საარჩევნო უბანი შეიქმნა. შესაბამისი განკარგულება ცესკომ დღეს გამართულ სხდომაზე ერთხმად მიიღო. დამატებით საარჩევნო უბნების შექმნის საფუძველი საზღვარგარეთ მყოფი ამომრჩევლების შესახებ განახლებული მონაცემები გახდა, რომელიც ცესკომ საგარეო საქმეთა სამინისტროდან და სხვა შესაბამისი უწყებებიდან მიიღო და დაამუშავა. ამ დროისთვის საზღვარგარეთ ხმის მიცემის უფლების მქონე ამომრჩეველთა რაოდენობა შეადგენს  95 834-ს. ამომრჩეველთა გაზრდილი რაოდენობის შესაბამისად საარჩევნო უბნები დამატებით შეიქმნა ამერიკის შეერთებულ შტატებში – ნიუ-იორკში; გერმანიის ფედერაციულ რესპუბლიკაში –  ბერლინში;  ესპანეთის სამეფოში – ბარსელონაში; იტალიის რესპუბლიკაში – რომში; საბერძნეთის რესპუბლიკაში – ათენსა და  სალონიკში; საფრანგეთის რესპუბლიკაში –  პარიზში.

საერთო ჯამში ამომრჩევლებს საზღვარგარეთ, 42 ქვეყანაში 67 საარჩევნო უბანი მოემსახურება.

შეგახსენებთ, რომ კანონმდებლობის თანახმად, საზღვარგარეთ საარჩევნო უბანი იქმნება საკონსულო აღრიცხვაზე მყოფი არანაკლებ 50 და არაუმეტეს 3 000 ამომრჩევლისთვის. სხვა რეგულაციებს საქართველოს საარჩევნო კანონმდებლობა საზღვარგარეთ მყოფი საქართველოს მოქალაქეების არჩევნებში მონაწილეობასთან დაკავშირებით არ ითვალისწინებს.

ადამიანს [დარჩო ხეჩუაშვილს] 18-წლიანი ციხე ემუქრებოდა და ასეთ დროს ის ე.წ. მწვანე საზღვარს კვეთს და საქართველოში უკანონოდ შემოსვლას ცდილობს. ამხელა რისკზე როგორ შეიძლება წავიდეს ადამიანი, თუ ის საქართველოში მორიგი დავალების შესასრულებლად არ შემოდის? – ასე გამოეხმაურა საქართველოს პრემიერ-მინისტრი ირაკლი კობახიძე, საქართველოს პროკურატურის მიერ გავრცელებულ ინფორმაციას, რომ გივი თარგამაძეზე თვალთვალი, თარგამაძის მკვლელობის მცდელობის საქმეზე დაკავებულ დარჩო ხეჩუაშვილს მიხეილ სააკაშვილმა დაავალა.

მისი შეფასებით, არჩევნებამდე 2 კვირაა დარჩენილი და სახელმწიფოს მაქსიმალური სიფრთხილე სჭირდება, რადგან საარჩევნო პროცესი პროვოკაციების გარეშე წარიმართოს.

„დეტალები საინტერესოა, ეს უმძიმესი პროვოკაცია უშუალო არჩევნებამდე რამდენიმე დღით ადრე მოხდა, რა თქმა უნდა, საინტერესო დეტალია. მართალია, ეს ადამიანი ბოლომდე ბრალს არ აღიარებს, მაგრამ პირდაპირ ხელს „ნაცმოძრაობასთან“ დაკავშირებულ პირებს, მათ შორის უკრაინის ხელისუფლების ერთ-ერთ მაღალჩინოსანს ადებს. რა თქმა უნდა, ამას სჭირდება დამატებით გამოძიება და დიდი სიფრთხილე, წარმოიდგინეთ ადამიანს პირდაპირ ემუქრებოდა 18-წლიანი ციხე და ასეთ დროს ის ე.წ. მწვანე საზღვარს კვეთს და ცდილობს საქართველოში შემოვიდეს უკანონოდ. ამხელა რისკზე როგორ შეიძლება წავიდეს ადამიანი, თუ ის საქართველოში მორიგი დავალების შესასრულებლად არ შემოდის? ეს არის ვარაუდი, რომელიც შეიძლება გამოითქვას, თუმცა დანარჩენს გამოძიება დაადგენს.

მაგრამ ეს ფაქტი მიანიშნებს იმაზე, რომ ჩვენ მაქსიმალური სიფრთხილე გვჭირდება, საარჩევნო პროცესი წარიმართება მშვიდ გარემოში, უპრეცედენტოდ მშვიდ გარემოში, არჩევებამდე 2 კვირაა დარჩენილი, ყველაფერი უნდა გაკეთდეს, რომ საარჩევნო პროცესი ასე მშვიდად მივიყვანოთ ბოლოში. ამისათვის გვჭირდება მძიმე პროვოკაციების პრევენცია, რომელზეც გრძელდება საუბარი კოლექტიური „ნაცმოძრაობის“ პარტიულ ოფისებში. სახელმწიფო იქნება მაქსიმალურად კონცენტრირებული, რათა არა მძიმე არამედ ვერცერთი პროვოკაცია ვერ მოაწყონ ამ ორი კვირის განმავლობაში“,- განაცხადა ირაკლი კობახიძემ.

„ნაციონალური მოძრაობის“ წევრის, გივი თარგამაძის დამამძიმებელ გარემოებებში მკვლელობის მცდელობის ფაქტზე ძებნილმა პირმა გამოძიებას მნიშვნელოვანი ინფორმაცია მიაწოდა, – ამის შესახებ პროკურატურაში გამართულ ბრიფინგზე, ამირან გულუაშვილმა აღნიშნა.

როგორც პროკურატურაში აღნიშნეს, დარჩო ხეჩუაშვილის ჩვენების მიხედვით, გივი თარგამაძის კონტროლისა და თვალთვალის დავალება მიხეილ სააკაშვილმა გასცა.

ამასთან, უწყების ცნობით, მოწმე მიხეილ სააკაშვილთან ერთად ასახელებს ამჟამად უკრაინაში მყოფი, საქართველოს შინაგან საქმეთა მინისტრის ყოფილი მოადგილის გია ლორთქიფანიძის სახელსა და გვარსაც.

მპიჩმენტს აქვს არსებითად სიმბოლური დატვირთვა, პრინციპულად მნიშვნელოვანია, რომ მოღალატემ არ დატოვოს სტანდარტულად პრეზიდენტის თანამდებობა. მან ეს თანამდებობა უნდა დატოვოს, როგორც კონსტიტუციის დამრღვევმა, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

პრემიერის თქმით, შემდეგ, რაც „ქართული ოცნება” მიიღებს ას მანდატზე მეტს საქართველოს პარლამენტში, პირველი სხდომის გამართვის შემდეგ განხორციელდება პრეზიდენტის იმპიჩმენტი.

„სალომე ზურაბიშვილს აქვს ორი პარასკევი დარჩენილი თავის თანამდებობაზე. იმპიჩმენტის წესით მოხდება მისი გადაყენება ნოემბრის ბოლოს ან დეკემბრის დასაწყისში, იმის მიხედვით, თუ როდის ჩაინიშნება პარლამენტის პირველი სხდომა. აქედან გამომდინარე, მის არც ერთ ნაბიჯს არ აქვს არანაირი პრაქტიკული დატვირთვა ჩვენთვის. მას შემდეგ, რაც „ქართული ოცნება” მიიღებს ას მანდატზე მეტს საქართველოს პარლამენტში, მყისიერად, პირველი სხდომის გამართვის შემდეგ განხორციელდება პრეზიდენტის იმპიჩმენტი, რასაც აქვს სიმბოლური დატვირთვა. თქვენ იცით, რომ ისედაც ერთი თვით იკვეცება მხოლოდ პრეზიდენტის უფლებამოსილების ვადა. მას ისედაც გასდის ვადა დეკემბერში, აქედან გამომდინარე, იმპიჩმენტს აქვს არსებითად სიმბოლური დატვირთვა. პრინციპულად მნიშვნელოვანია, რომ მოღალატემ არ დატოვოს სტანდარტულად პრეზიდენტის თანამდებობა. მან ეს თანამდებობა უნდა დატოვოს, როგორც კონსტიტუციის დამრღვევმა, როგორც მოღალატემ, ეს უნდა გაფორმდეს საქართველოს პარლამენტის შესაბამისი გადაწყვეტილებით, საქართველოს კონსტიტუციის შესაბამისად”, – განაცხადა პრემიერმა.