პატარ-პატარა, მაგრამ შედეგის მომცემი ქმედებები, საბოლოო ჯამში, შლის რუსეთის ჰიბრიდული ომის გეგმებს – რუსული მოღალატური ინტერესების დამცველია დღეს საქართველოს ხელისუფლება, – ამის შესახებ ოპოზიციონერმა დეპუტატმა რომან გოცირიძემ ბათუმში სოჭიდან შემოსული გემის გამო გამართული აქციის კომენტირებისას განაცხადა.

მისივე თქმით, მოქალაქეთა უდიდესი ნაწილი მხარს უჭერდა ბათუმში გამართულ აქციას, თუ ვინმე ყვავილებით შეხვდა და ამართლებდა რუსი ოკუპანტების და პროპაგანდისტების საქართველოში შემოსვლას, ერთადერთი ეს იყო “ქართული ოცნების” პოლიტიკური ელიტა.

“ბათუმში გამართულ აქციას, რომელსაც მოჰყვა რუსული გემის გაძევება და ვერ გაბედავენ მეორედ აქ შემოსვლას, მხარს უჭედა ჩვენი ქვეყნის მოქალაქეების უდიდესი ნაწილი და თუ ვინმე ყვავილებით შეხვდა და ამართლებდა რუსი ოკუპანტების და პროპაგანდისტების საქართველოში შემოსვლას, ერთადერთი იყო “ქართული ოცნების” პოლიტიკური ელიტა. “ქართული ოცნების” 99.9 პროცენტი დარწმუნებული ვარ, სოლიდარული იქნებოდა იმ მოვლენებისადმი, რაც გუშინ ბათუმში განვითარდა. მოწყვეტილია რეალობას “ქართული ოცნება”, პირდაპირ დგანან რუსეთის ინტერესების სადარაჯოზე.

ლავროვის შვილის ქორწილი რომ არ ჩაეშალა საზოგადოებას, ხვალ შოიგუს შვილის ქორწილი გაიმართებოდა და ზეგ კიდევ პრიგოჟინის. ასე რომ, ასეთი პატარ-პატარა, მაგრამ შედეგის მომცემი ქმედებები, საბოლოო ჯამში, შლის რუსეთის ჰიბრიდული ომის გეგმებს. ასე რომ ეს იყო სწორი, საერთო, სახალხო გულისწყრომა და თუკი პოლიტიკური პარტიები მონაწილეობდნენ მასში, გასაკვირი არ არის პოლიტიკური პარტია უნდა იყოს იქ, სადაც არის ხალხი,” – განაცხადა გოცირიძემ.

გოცირიძე ასევე გამოეხმაურა საია-ს განცხადებას, რომელიც შინაგან საქმეთა სამინისტროს „ანტიკონსტიტუციური ქმედებების“ შეწყვეტისაკენ მოუწოდებს და საგანგაშოს უწოდებს იმას, რომ პოლიცია ყველა სხვა შემთხვევისგან განსხვავებით, განსაკუთრებით ზრუნავს რუსეთის მოქალაქეების უსაფრთხოებაზე. გოცირიძე მიიჩნევს, რომ დაკავებები უკანონო იყო და ხელისუფლება რუსეთის ინტერესებს იცავს.

“ის დაკავებები, რაც მოხდა, არის უკანონო და არის ძალის გადამეტება, როგორც ეს ხდება სხვა შემთხვევაში. მსგავსი ქმედებებისთვის, მათ შორის, ბევრჯერ პარლამენტიდან ჩადენილი დანაშაულისთვის დაისჯება ყველა. ნუ ჰგონიათ დაუსჯელი დარჩებიან, არაფერი იმალება, ყველაფერს თავის დრო და ადგილი ექნება. რუსული მოღალატური ინტერესების დამცველია დღეს საქართველოს ხელისუფლება,” – განაცხადა გოცირიძემ.

„სასამართლოს გუშაგის“ ხელმძღვანელის, ნაზი ჯანეზაშვილის განცხადებით, სასამართლოს ე.წ.კლანი და მისი კავშირები ხელისუფლებასთან მთავარ გამოწვევად რჩება, განსაკუთრებით იმ პირობებში, როდესაც იუსტიციის უმაღლეს საბჭოში პარლამენტის მიერ უკვე არჩეულია სამი არამოსამართლე წევრი, თუმცა მათი არჩევის შემდგომ საბჭოს საქმიანობაში არაფერი შეცვლილა. ამასთან, ჯანეზაშვილის თქმით, საბჭოში გადაწყვეტილება კვლავ ერთხმად მიიღება, რაც გამოიხატება იმაში, რომ იუსტიციის უმაღლესი საბჭოს დამოუკიდებელი ინსპექტორის თანამდებობაზე შოთა ქადაგიძე ერთხმად დანიშნა. როგორც ნაზი ჯანეზაშვილმა აღნიშნა, ის პრინციპები, რითაც აქამდე იმართებოდა სასამართლო იგივე კორპორატივიზმით, ნეპოტიზმით, ე.წ. კლანური წესებით, გრძელდება და ბოლო რამდენიმე კვირაში კიდევ უფრო თვალსაჩინო გახდა.

აღნიშნულის შესახებ ნაზი ჯანეზაშვილმა ჟურნალისტებს “ფონდი ღია საზოგადოება საქართველოს” ოფისში განუცხადა, სადაც “ფონდი ღია საზოგადოება საქართველოს” ლიდერობით 9 საზოგადოებრივმა ორგანიზაციამ წარმოადგინა მათ მიერ შემუშავებული მეხუთე შეფასების დოკუმენტი საკითხზე, როგორ ასრულებს საქართველოს ხელისუფლება ევროკავშირის 12 პრიორიტეტს.

მისი თქმით, დაახლოებით ერთი თვის წინ წარმოადგინეს ანგარიში, თუმცა ანგარიშის გამოქვეყნებიდან დღემდე, ფაქტობრივად, არაფერი შეცვლილა.

„შეიძლება ითქვას, რომ გარკვეული კუთხით სიტუაცია გაუარესებულიც კი, არის. პირველ რიგში, უნდა აღვნიშნო, რომ გამოქვეყნდა ეუთო/ოდირის მოსაზრება და ძალიან ბევრ პრობლემაზეა საუბარი, მათ შორის სასამართლოს თავმჯდომარეებზე, იუსტიციის უმაღლეს საბჭოში გადაწყვეტილების მიღებაზე, მოსამართლის როლზე, რომლებსაც მაგალითად, სისტემაში აქვთ მაღალი თანამდებობები და სხვა მნიშვნელოვანი საკითხები, რაც ვენეციის კომისიის დასკვნაშიც არის მითითებული. გარდა ამისა, მნიშვნელოვანი ის მოხდა, რომ ევროპის საბჭოს მონიტორინგის კომიტეტმა ვენეციის კომისიაში გაგზავნა უკვე მიღებულ კანონში ცვლილებები მოსაზრებებისთვის და ცხადია, ველოდებით იმას, თუ როგორი იქნება მათი რეკომენდაცია და შემდეგ უკვე ხელისუფლება როგორ მოახდენს რეაგირებას. თუმცა, ერთ-ერთი პრობლემური საკითხი, რაც პრაქტიკაში გამოიკვეთა, ეს არის იუსტიციის უმაღლეს საბჭოში მიღებული გადაწყვეტილება. საბჭომ მიიღო არაორდინალური გადაწყვეტილება და საბჭოს ყოფილი არამოსამართლე წევრი აირჩია იუსტიციის საბჭოს დამოუკიდებელი ინსპექტორის თანამდებობაზე. ეს ადამიანი არის შოთა ქადაგიძე, რომელსაც ძალიან მჭიდრო კავშირი ჰქონდა საბჭოს ე.წ.გავლენიან ჯგუფებთან და ცხადია, მისი დანიშვნა ამ მაღალ თანამდებობაზე, რომელიც მისმა წინამორბედმა ზურაბ აზარაშვილმა ვადაზე ადრე დატოვა, კითხვებს აჩენს და სისტემაში კორპორატივიზმს კიდევ უფრო აძლიერებს”. განაცხადა ნაზი ჯანეზაშვილმა.

მისი თქმით, ვენეციის კომისიის და ევროკომისიის მთავარი რეკომენდაცია და მოთხოვნაა, რომ უზრუნველყოფილი იყოს სასამართლოს დამოუკიდებლობა.

ოპოზიციონერი დეპუტატის, რომან გოცირიძის განცხადებით, რომელიმე პარტიის აკრძალვა ფაშისტური ლოზუნგია და საქართველოს კონსტიტუციით თუ რომელიმე პარტიაა ასაკრძალი, ეს „ხალხის ძალა“ და პრორუსული ძალები არიან.

როგორც საქართველოს პირველ არხს გოცირიძემ განუცხადა, ძალიან კარგია, რომ სოზარ სუბარმა მოლდოვა ახსენა, სადაც პრორუსული და კრემლის მიერ მართული პარტია აიკრძალა, რომელთა ლოზუნგები „ხალხის ძალის“ პოზიციას პირდაპირ სიტყვა-სიტყვით ემთხვევა.

„როგორც მოლდოვაში აიკრძალა ეს პარტია, საქართველოშიც ასე უნდა აიკრძალოს „ხალხის ძალა“. პარლამენტში „ნაციონალური მოძრაობის“ აკრძალვის საკითხს კენჭი ორჯერ უყარეს და თუ არ ვცდები, 46 ხმა ჰქონდათ. ეს არის სისულელე, იაფფასიან პიარზე აგებული იმ ადამიანების მხრიდან, ვინც საქართველოში რუსულ ინტერესებს პირდაპირ ემსახურებიან“, – განაცხადა გოცირიძემ.

„ხალხის ძალის“ ერთ-ერთი ლიდერი სოზარ სუბარი დღეს გამოვიდა წინადადებით, საქართველოს პარლამენტში დაიწყოს „ნაციონალური მოძრაობის“ დანაშაულებრივი საქმიანობის შესწავლის და მისი გასამართლების პროცესი.

2023 წლის 1-ელი აპრილიდან 30 ივნისის ჩათვლით ყველა პარტიამ ჯამში 453,336 ლარის ოდენობის შემოწირულება მიიღო, აქედან ყველაზე მეტი თანხა შესწირეს პარტიას „ლელო საქართველოსთვის“ – 218,300 ლარი, მეორე ადგილზე „ქართული ოცნება“ გავიდა 108,000 ლარით, ხოლო მესამეზე – „ერთიანი ნაციონალური მოძრაობა“ 90,790 ლარით, – ამის შესახებ „საერთაშორისო გამჭვირვალობა -საქართველოს“ მიერ გავრცელებულ ინფორმაციაშია ნათქვამი.

ორგანიზაციის ცნობით, შემოწირულებების რაოდენობაში, გასული კვარტლის მსგავსად, კვლავ „ლეიბორისტული პარტია“ ლიდერობს, რომელსაც საანგარიშო პერიოდში 44-ჯერ შესწირეს თანხა. პარტიის შემოწირულებების უმრავლესობა ამჯერადაც მცირე თანხებს შეადგენდა (საშუალოდ 109 ლარი).

„საანგარიშო პერიოდში „ქართულ ოცნებას“ სულ სამი დონორი ჰყავდა, რომელთაც პარტიას ჯამში 108,000 ლარი შესწირეს. სამი დონორიდან ორი — ოთარ ფუტკარაძე და დავით დევაძე ბათუმის საკრებულოს ყოფილი წევრის, ნუკრი დოლიძის ბიზნესპარტნიორები არიან, მათმა საერთო კომპანიამ „ბონდი-2009”, ამავე პერიოდში, 35 მილიონ ლარზე მეტი ოდენობის ტენდერი მოიგო.

ოთარ ფუტკარაძემ და დავით დევაძემ ერთსა და იმავე დღეს, 6 ივნისს, „ქართულ ოცნებას“ ჯამში 100,000 ლარი შესწირეს. ფუტკარაძეს 2021 წელსაც ჰქონდა მმართველი პარტიისთვის 60,000 ლარი შეწირული. დევაძე და ფუტკარაძე სამ კომპანიაში არიან პარტნიორები: შპს „ფიშ პოინტი“, შპს „მეთევზეთა გაერთიანება“ და „შპს ბონდი-2009“. განსაკუთრებით საინტერესოა „ბონდი-2009“, სადაც მათი კიდევ ერთი პარტნიორი ბათუმის საკრებულოს ყოფილი წევრი ნუკრი დოლიძეა. მიმდინარე წლის მარტი-ივნისის პერიოდში კომპანიამ „ბონდი-2009“ 35 მილიონ ლარზე მეტი ღირებულების ტენდერები მოიგო. 2012 წლიდან „ბონდი-2009“-ს ჯამში 190 მილიონ ლარამდე ღირებულების ტენდერი აქვს მოგებული და 800,000 ლარზე მეტი გამარტივებული შესყიდვის კონტრაქტები მიღებული, ხოლო ამ კომპანიის პარტნიორებს „ქართული ოცნებისთვის“ ჯამში 270,000 ლარი აქვთ შეწირული.

ამასთან, აპრილი-ივნისის პერიოდში სახელმწიფო აუდიტის სამსახურმა განხორციელებული შემოწირულებების კანონიერების შემოწმების მიზნით, შემოსავლების სამსახურიდან 11 პოლიტიკური პარტიის შემომწირველ 32 ფიზიკური პირის შესახებ გამოითხოვა ინფორმაცია. მიღებული ინფორმაციით, შემოწირულების განხორციელებისთვის საკმარისი შემოსავალი 28 პირს დაუდასტურდა, ხოლო 4 პირს არ დაუდასტურდა.

ამ ოთხ პირზე აუდიტის სამსახურმა კომერციული ბანკებიდან დამატებითი ინფორმაცია გამოითხოვა. მათგან ორი „ნაციონალური მოძრაობის“ შემომწირველი იყო, ხოლო ორი — „კონსერვატიული მოძრაობის“- ნათქვამია ინფორმაციაში.

გიორგი ვაშაძე ერთგვარი მინი სააკაშვილია, თვისებებით ჰგავს სააკაშვილს, ოღონდ სააკაშვილის ერთგვარი მინი ვერსიაა, – ამის შესახებ „ქართული ოცნების“ თავმჯდომარემ, ირაკლი კობახიძემ პარტიის ოფისში გამართულ ბრიფინგზე ჟურნალისტებს განუცხადა.

კობახიძეს კითხვა დაუსვეს ფილოსოფოს ზაზა შათირიშვილის სტატუსთან დაკავშირებით, რომელმაც განაცხადა, რომ „გიორგი ვაშაძე მზადაა, უფროსების ნებისმიერი დავალება უყოყმანოდ შეასრულოს, როგორი დამაზიანებელიც არ უნდა იყოს ეს დავალება ქვეყნის ინტერესებისთვის. აშკარაა, რომ ახალი როლისთვის ამერიკელები ვაშაძეს უკვე დიდი ხანია, ამზადებენ“.

„ამერიკულ ჩართულობაზე ვერაფერს გეტყვით. რაც შეეხება დანარჩენს, დანარჩენი ძალიან ლოგიკურად ჟღერს. მათ შორის ისიც, რომ ვაშაძე ერთგვარი მინი სააკაშვილია. ამ თვისებებით ჰგავს სააკაშვილს, ოღონდ არის ერთგვარი მისი მინი ვერსია. რა თქმა უნდა, „ნაცმოძრაობა“ თუ ერთიანი სიით გავა არჩევნებზე, ეს უკეთესი იქნება, რადგან საზოგადოებას კიდევ უფრო გაუადვილდება არჩევანის გაკეთება და გადამწყვეტი განაჩენის გამოტანა კოლექტიური „ნაცმოძრაობისთვის“. დღეს ისინი ცდილობენ, რაღაცნაირად დაირქვან სხვადასხვა პარტია. გაერთიანდა ორი პარტია, „ნაცმოძრაობა“ და ვაშაძე. სინამდვილეში, ორივე „ნაცმოძრაობაა“ და დარჩა კიდევ რამდენიმე პარტია, რომელიც რეალურად არის კოლექტიური ნაცმოძრაობა, იგივე „ლელო“, გახარია, „ევროპული საქართველო“, „გირჩი“. კიდევ შეიძლება, სხვებიც არიან, ეს ოთხი პარტიაა არსებითად, სინამდვილეში, ეს 5-6 ყველა არის კოლექტიური „ნაცმოძრაობა“, თუ ისინი გავლენ ერთიანი სიით. ამ შემთხვევაში, საზოგადოებას კიდევ უფრო გაუმარტივდება არჩევანი. ისედაც არ გაუჭირდება საზოგადოებას არჩევანის გაკეთება, მაგრამ თუ კოლექტიური „ნაცმოძრაობა“ გავა ერთიანი სიით, ამ შემთხვევაში საზოგადოებისთვის კიდევ უფრო მარტივი იქნება არჩევანის გაკეთება, ამაში დავეთანხმები ექსპერტს“, – აღნიშნა კობახიძემ.

ოპოზიციონერი დეპუტატის, ანა ბუჩუკურის განცხადებით, „ნაციონალური მოძრაობის“ შემთხვევაში არა მხოლოდ პოლიტიკურ ტვირთშია პრობლემა, არამედ მათ „ნაცურ მენტალიტეტში“, რადგან სისტემური დანაშაული დღესაც ვერ გადააფასეს.

ჟურნალისტებთან საუბარში ანა ბუჩუკური „ხალხის ძალის“ წევრის სოზარ სუბარის განცხადებას გამოეხმაურა. დეპუტატის თქმით, „ნაციონალური მოძრაობის“ ყველაზე დიდი პრობლემა არა მხოლოდ ის არის, რომ მას დანაშაულები აქვს ჩადენილი, არამედ ის, რომ დღესაც არ აქვს გადაფასებული და შეფასებული თავისი დანაშაულები.

„ოღონდ, ეს იყო სისტემური დანაშაულები და არა – ერთეული შემთხვევები. სისტემური დანაშაული იყო სანდრო გირგვლიანის საქმე, რომელიც ერთი ადამიანის ტრაგედია არ იყო, აქ იყო ასახული ის, სისტემამ ადამიანი ჯერ როგორ მოკლა და რა არ გააკეთა დამნაშავეების დასჯისათვის. სტრასბურგის სასამართლოს გადაწყვეტილება სწორედ იმით არის მძიმე და უნიკალური, რომ სისტემურ პრობლემებზე საუბრობს. სისტემურ დანაშაულთან გვქონდა საქმე და არა ინდივიდვალურ გადაცდომებთან. ამას „ნაციონალური მოძრაობა“ შეცდომებს ეძახის. მათი მმართველობიდან 11 წელია გასული და მათ წარსულის გადაფასება არ გაუკეთებიათ, რასაც „ნაცური მენტალიტეტი“ დავარქვით. მათ შემთხვევაში არა მხოლოდ პოლიტიკურ ტვირთშია პრობლემა, არამედ მენტალიტეტში, რადგან სისტემური დანაშაული დღესაც ვერ გადააფასეს. რაც შეეხება „ქართულ ოცნებას“, ათ წელზე მეტია ხელისუფლებაში არიან და როცა ახლა ახსენდებათ, რომ თურმე, ვიღაცეები დასასჯელები არიან, ზუსტად ამიტომ ვამბობთ, რომ „ნაციონალური მოძრაობა“ და „ქართული ოცნება“ ერთმანეთისთვის ლეგიტიმაციის წყარო არიან – ერთი ჯოხის ორი ბოლო“, – განაცხადა ბუჩუკურმა.

ქართველი ხალხის სახელით საუბარი არ არის არც ერთი ელჩის საქმე, მითუმეტეს, როცა აფასებ 150 „ნაციონალის“ აქციას და არქმევ ქართველი ხალხის პროტესტს, ეს ხომ გაუგებარია?! იგივე თქვა სალომე ზურაბიშვილმა, იგივე თქვა ერთ-ერთმა ელჩმა. საზოგადოება შეაფასებს ამ ყველაფერს, უბრალოდ არასწორია, – ამის შესახებ „ქართული ოცნების“ თავმჯდომარემ ირაკლი კობახიძემ განაცხადა, რითაც გამოეხმაურა აშშ-ის ელჩის კელი დეგნანის განცხადებას ბათუმის პორტში გამართულ აქციასთან დაკავშირებით.

ირაკლი კობახიძის თქმით, ელჩის განცხადება გაუგებარი იყო.

„ასე არავინ ფიქრობს, რაც თქვა კელი დეგნანმა. ასე არ ფიქრობენ საქართველოში საზოგადოების წარმომადგენლები, რომ არც ერთი რუსი არ უნდა შემოვიდეს საქართველოში. საზოგადოების უდიდესი უმრავლესობა არის სხვა აზრზე და როდესაც ამბობ ისეთ ფრაზებს, რაც უკავშირდება ქვეყნის მიერ მილიარდი დოლარის დაკარგვას, აქ არ ვიცი რა შეფასება უნდა გავაკეთო.

ქართველი ხალხის სახელით საუბარი არ არის არც ერთი ელჩის საქმე, მითუმეტეს, როცა აფასებ 150 „ნაციონალის“ აქციას და არქმევ ქართველი ხალხის პროტესტს. ეს ხომ გაუგებარია?! იგივე თქვა სალომე ზურაბიშვილმა, იგივე თქვა ერთ-ერთმა ელჩმა. საზოგადოება შეაფასებს ამ ყველაფერს, უბრალოდ არასწორია.

შეგახსენებთ, რომ არავის მოუთხოვია ძალადობის ორგანიზატორების დასჯა. ძალადობა ხომ იყო კვერცხების სროლა და ა.შ. 7-8 მარტი იყო ძალადობა, გუშინდელი აქციაც ძალადობა იყო. ძალადობას სხვადასხვა ფორმა აქვს, 7-8 მარტს იყო უხეში ძალადობა, გუშინ შედარებით რბილი, მაგრამ ძალადობა ძალადობაა. ლისზე 3000 კაცი იყო შეკრებილი, შეიძლება მეტიც და არ იყვნენ არც ერთი პარტიის აქტივის წარმომადგენლები და ხალხის პროტესტი არ დაურქმევია არავის ამისთვის, მაგრამ როცა 150 კოლექტიური „ნაციონალი“ იკრიბება სადღაც და ამას არქმევ ქართველი ხალხის პროტესტს – აქ ჩანს რეალურად რაშიც არის საქმე“, – განაცხადა კობახიძემ.

ცნობისთვის, საქართველოში აშშ-ის ელჩმა, კელი დეგნანმა ბათუმის პორტში გამართულ აქციასთან დაკავშირებით განაცხადა, რომ „ქართველმა ხალხმა ცხადყო, არავინ უნდა ელოდოს ქართველებისგან, რომ მიესალმებიან ხალხს იმ ქვეყნიდან, რომელსაც ოკუპირებული აქვს საქართველოს ტერიტორიის 20 პროცენტი“.