უკრაინის პრეზიდენტი, ვოლოდიმირ ზელენსკი აცხადებს, რომ რუსეთის პრეზიდენტი ვლადიმერ პუტინი “კიდევ 10 წელიწადსაც” ვერ იცოცხლებს.

ბრაზილიურ გამოცემა Globo-სთან ინტერვიუში ზელენსკის ჰკითხეს, ფიქრობს თუ არა, რომ უკრაინაში მიმდინარე ომი სირიის ომის მსგავსია და შეიძლება თუ არა, უკრაინა სირიას დაემსგავსოს.

„არა, ეს შეუძლებელია, რადგან პუტინი ამდენ წელს ვერ იცოცხლებს. ის სირიაში არ იბრძოდა ისეთი ტემპით, როგორითაც ჩვენ გვებრძვის. სირიაში ომი განსხვავებულია. რუსეთის პრეზიდენტი კიდევ 10 წელსაც ვერ იცოცხლებს”, – აღნიშნა ზელენსკიმ.

მისი თქმით, რუსული ჯარების მოქმედებები ბრძოლის ველზე ადასტურებს, რომ დღეს რუსეთს არ შეუძლია უკრაინის სრული ოკუპაცია და უკრაინელების განადგურება.

რუსულმა ძალებმა ხარკოვს „კამიკაძე“ დრონებით შეუტიეს, რის შედეგადაც ქალაქში ხანძარი გაჩნდა, – ინფორმაციას უკრაინული მედია ხარკოვის საოლქო-სამხედრო ადმინისტრაციის ხელმძღვანელზე, ოლეგ სინეგუბოვზე დაყრდნობით ავრცელებს.

მათივე ინფორმაციით, დრონმა ერთ-ერთი საერთო საცხოვრებლის ორი სართული გაანადგურა.

„ოკუპანტებმა ხარკოვს „კამიკაძე” დრონებით შეუტიეს. შემთხვევის ადგილზე ხანძარი გაჩნდა, ადგილზე საგანგებო სიუტუაციების სამსახურები მუშაობენ”, – აცხადებს ოლეგ სინეგუბოვი.

მისივე თქმით, ამ დროისთვის დაღუპულების ან დაშავებულების შესახებ ინფორმაცია არ ვრცელდება.

აშშ-ის სახელმწიფო დეპარტამენტი რუსეთის ფედერაციას მოუწოდებს, შეწყვიტოს უკრაინელი ბავშვების დეპორტაცია ოკუპირებული ტერიტორიებიდან და ისინი, ვინც უკვე წაიყვანა, სახლებში დააბრუნოს.

“ერთ-ერთი ყველაზე საშინელი ინციდენტი, რაც ჩვენ ვნახეთ ამ ომში, არის უკრაინელი მშვიდობიანი მოსახლეობის დეპორტაცია რუსეთში. მოვუწოდებთ რუსეთს, შეწყვიტოს ეს სასტიკი ქმედებები და დააბრუნოს უკრაინელი ბავშვები“, – განაცხადა თეთრი სახლის პრესსპიკერმა მეთიუ მილერმა.

რუსეთის ფედერაციის ბავშვთა უფლებების რწმუნებულის, მარია ლვოვა-ბელოვის განცხადებით, 2022 წელს უკრაინიდან რუსეთის ტერიტორიაზე 700 ათასზე მეტი ბავშვი იქნა გაყვანილი.

პოლონეთის სახელმწიფო მდივანმა და პრეზიდენტის ადმინისტრაციაში საგარეო პოლიტიკის საკითხებზე მომუშავე ოფისის ხელმძღვანელმა, მარჩინ პშიდიჩმა განაცხადა, რომ კარგი იქნება, თუ კიევი პოლონეთის დახმარების როლს დააფასებს. ამის შესახებ განცხადება პშიდიჩმა პოლონურ მედიასთან ინტერვიუში გააკეთა.

ჟურნალისტმა მას სთხოვა, კომენტარი გაეკეთებინა უკრაინული მარცვლეულის პოლონეთის გავლით ექსპორტის საკითხზე, რაზეც პოლონეთის პრეზიდენტის ადმინისტრაციის წარმომადგენელმა შემდეგი პასუხი გასცა: „კარგი იქნებოდა, კიევს დაეწყო იმ როლის დაფასება, რომელიც პოლონეთმა უკრაინისთვის ითამაშა ბოლო თვეებსა და წლებში“.

ამ განცხადება გამოეხმაურნენ უკრაინის პრეზიდენტის ოფისში. როგორც ზელენსკის ოფისის ხელმძღვანელის მოადგილემ განაცხადა, კიევი კატეგორიულად უარყოფს ცალკეული პოლონელი პოლიტიკოსების მცდელობას, „თავს მოახვიონ პოლონეთის საზოგადოებას უსაფუძვლო შეხედულება, რომ უკრაინა პოლონეთის დახმარებას არ აფასებს“.

მისივე თქმით, უკრაინა ყოველდღიურად დე ფაქტო უხდის მადლობას პოლონეთს და სხვა მოკავშირეებს, როდესაც უკრაინელი სამხედროების აგრძელებენ ფრონტის დაცვას.

„ჩვენი დახმარება შეიარაღებით არ არის ქველმოქმედება, არამედ არის ინვესტიცია პოლონეთის უსაფრთხოებაში“, – განაცხადა უკრაინის პრეზიდენტის ოფისის ხელმძღვანელის მოადგილემ.

რუსეთის მიერ შავი ზღვის მარცვლეულის შეთანხმებიდან გასვლის შემდეგ, უკრაინა სოფლის მეურნეობის პროდუქციის ექსპორტს ხმელეთით და სამდინარო ტრანსპორტით ახორციელებს. პროდუქციის ექსპორტის სახმელეთო მარშრუტი პოლონეთზე გადის.

მანამდე პოლონეთის სოფლის მეურნეობის მინისტრმა თქვა, რომ ვარშავა ითხოვს, ევროკავშირთან შეთანხმებით უკრაინული მარცვლეულის ქვეყანაში იმპორტზე დაწესებული შეზღუდვები გახანგრძლივდეს, წინააღმდეგ შემთხვევაში პოლონეთი მზადაა, უკრაინული პროდუქციის იმპორტი ცალმხრივად აკრძალოს.

თეთრ სახლში აცხადებენ, რომ „უგუნური და უპასუხისმგებლოა“ რუსეთის უშიშროების საბჭოს თავმჯდომარის მოადგილის, დიმიტრი მედვედევის კომენტარი, რომ რუსეთმა, შესაძლოა, მიმართოს ბირთვულ იარაღს, თუ უკრაინის კონტრშეტევა წარმატებული აღმოჩნდება. ინფორმაციას „სიენენი“ ავრცელებს.

„ბირთვული იარაღის გამოყენება უკრაინაში ან სადმე დამღუპველი იქნება მსოფლიოსთვის და მძიმე შედეგები მოჰყვება რუსეთისთვის“, – აღნიშნა თეთრი სახლის სპიკერმა.

თუმცა, თეთრი სახლის სპიკერმა ასევე აღნიშნა, რომ აშშ განაგრძობს მჭიდრო მონიტორინგს რუსეთის ბირთვული იარაღის გამოყენებასთან დაკავშირებით და ვერ ხედავენ რაიმე მინიშნებას, რომ რუსეთი ემზადება ბირთვული იარაღის გამოსაყენებლად.