პოლიტიკური პარტია “გირჩის” ერთ-ერთმა ლიდერმა იაგო ხვიჩიამ “ღამის კურიერის” ეთერში რუსეთის პრეზიდენტის, ვლადიმერ პუტინის გადაწყვეტილება შეაფასა საქართველოსთან სავიზო რეჟიმის გაუქმების შესახებ. მისი თქმით, სავიზო რეჟიმით უნდა ისარგებლონ საქართველოს მოქალაქეებმა, თუმცა არ უნდა დაგვავიწყდეს, რატომ აკეთებს ამას რუსეთი. ხვიჩია მიიჩნევს, რომ პუტინს “სურს ჩვენი თავი წაართვას დასავლეთს” და ეს გადაწყვეტილებაც ამ გეგმის ნაწილია. “მტერს რასაც წაღლიტავთ, ზოგადად, მგონია, რომ ყველაფრით უნდა ისარგებლო. უბრალოდ, უნდა გესმოდეს, რომ ის მტერია და მეორე – რომ ეს მტრის შენს მიმართ მეგობრული ნაბიჯი კი არ არის, არამედ ნაბიჯია, რომ შე დამოკიდებული გაგხადონ და შენი სიმპათიები აღიძრას არასწორი რამის მიმართ, რომელიც მერე ისე დამთავრდება, როგორც 2006 წელს დამთავრდა ან როგორც 2008 წელს დამთავრდა. უნდა გესმოდეს, რომ რუსეთი ამას არ აკეთებს იმის გამო რომ შენ უყვარხარ, არამედ იმისთვის, რომ შენ საცდური დაგიდოს. შენ თუ ამ საცდურს წამოეგები და ამ საცდურში მე არ ვგულისხმობ, რომ არ ვისარგებლოთ, საქართველოს მოქალაქეებმა, რასაკვირველია, უნდა ისარგებლონ, საცდური, რომ ამის გამო შენი სიმპათიები გადაიხრება რუსეთისკენ – ამას არ უნდა წამოვეგოთ. უნდა გვესმოდეს, რომ რუსეთი ამას ჩვენი სიყვარულის გამო არ აკეთებს. ამას იმის გამო აკეთებს, რომ ჩვენი თავი წაართვას დასავლეთს. თუ ამ მიზანს მივხვდებით და აქედან გამომდინარე გავაკეთებთ ყველაფერს, მგონია რომ ნებისმიერი რამე, რასაც დამპყრობელს წაართმევ და შენი მოქალაქეები ისარგებლებენ, ზოგადად, კარგია და არა ცუდი. ზოგადად, მე არ მგონია, რომ ჩვენ უნდა გაგვასამართლონ პუტინის გადაწყვეტილების გამო, ჩვენ უნდა გაგვასამართლონ ჩვენი ქმედებების გამო. ეს ის ქმედებები არ არის, რომელიც ჩვენ ჩავიდინეთ, ის პუტინმა ჩაიდინა – თავად ჩაკეტა, თავად გახსნა და კიდე თავად ჩაკეტავს იმისთვის, რომ დაგვაზიანოს. ფიზიკურად როგორც კი თავისად დაგიგულებს, ეგრევე ისე მოიქცევა, როგორც 2006 წელს მოიქცა და გუდა-ნაბად აყრილი გარეთ გამოაგდო ჩვენი მოქალაქეები. ეს უნდა გვახსოვდეს და თუ ამ რწმენით გავაკეთებთ ნებისმიერ რამეს, მაშინ, ცხადია, საფრთხე ნაკლებად იარსებებს,”-აცხადებს ხვიჩია.

„რუსეთის ეს ჟესტი „ქართულ ოცნებას“ შეუძლია გამოიყენოს შანტაჟისთვის, -არ გინდათ? აგერ არის რუსეთი.“- ამის შესახებ პარტია „ლელოს“ წევრმა, სალომე სამადაშვილმა „ტვ პირველის“ ეთერში განაცხადა, რითაც რუსეთის მიერ საქართველოს მოქალაქეებისთვის სავიზო რეჟიმის გაუქმებას გამოეხმაურა. სალომე სამადაშვილის განცხადებით, დასავლელ პარტნიორებთან ხშირად არის საუბრები იმასთან დაკავშირებით, როგორ ითხოვენ ქვეყნის დასანქცირებას. „ჩვენ დასავლელ პარტნიორებთან ხშირად გვაქვს ამაზე საუბარი, რომ როცა ჩვენ ვითხოვთ სანქციებს და ა.შ. ეს ხომ არ აიძულებთ მათ [ქართულ ოცნებას] რომ კიდევ უფრო დაუახლოვდე რუსეთს. მიუხედავად იმისა, კანდიდატის სტატუსზე როგორ დასრულდება მიმდინარე წელს დებატები, ეს ყველაფერი უნდა დავასრულოთ იმით, რომ სიცხადე შევქმნათ ჩვენი დასავლელი პარტნიორებისთვის და ქართველი ხალხისთვის, რომ ეს ხელისუფლება უნდა შეიცვალოს თუ ევროპას და ქართველ ხალხს მართლაც სურს თანაცხოვრება ერთად ევროპულ სივრცეში.“- განაცხადა სალომე სამადაშვილმა.

როდესაც, ქვეყნის მესამე პრეზიდენტი და ერთიანი ნაციონალური მოძრაობის დამფუძნებელი იმყოფება უკანონო პატიმრობაში, პარტიაში არ არის შიდა არჩევნების ჩატარების დრო… – ამის შესახებ „ნაციონალური მოძრაობის“ წევრმა მირდატ ქამადაძემ მედიასთან სივრცეში“ განაცხადა. „ეს არ არჩევნები რას მოიტანს?! არაფერს განსაკუთრებულს, იმიტომ, რომ ჩვენ მაშინაც ვამბობდით და დღესაც იგივე აზრზე ვრჩებით, რომ პარტიაში არ არის ახლა არჩევნების დრო, არც მაშინ იყო ამის დრო და არც ახლა არის. თუ პარტია აცხადებს, რომ პარტია არის საგანგებო მდგომარეობაში იმიტომ, რომ მისი დამფუძნებელი, ქვეყნის მესამე პრეზიდენტი და პარტიის ერთ-ერთი მთავარი და უდავო ლიდერი არის უკანონო პატიმრობაში და ამას ემატება ის, რომ მისი ჯანმრთელობის მდგომარეობის გამო ჰუმანიტარული მიზნით მისი ქვეყნიდან გაყვანა არ ხდება, ამ დროს პარტიაში შიდა არჩევნების ჩატარება არ ემსახურება მთავარ მიზანს და მთავარ ინტერესს“, – განაცხადა მირდატ ქამადაძემ.

ოპოზიციამ და სამოქალაქო აქტივისტებმა საგარეო საქმეთა სამინისტროსთან შეკრება მინისტრ დარჩიაშვილის განცხადების შემდეგ დაიწყეს, რომელიც “ქართული ოცნების” ლიდერების მსგავსად ღიად მიესალმება პუტინის გადაწყვეტილებას და უვიზო მიმოსვლის აღდგენას.

ერთადერთი, ვინც საქართველოსთვის უმძიმეს გადაწყვეტილებას გაემიჯნა და მოსკოვის პროვოკაცია დაგმო, ქვეყნის პრეზიდენტია” – აცხადებენ აქციის მონაწილეები

საგარეო საქმეთა სამინისტროსთან აქცია ამ წუთებშიც მიმდინარეობს.

საგარეო საქმეთა მინისტრი, ილია დარჩიაშვილი გერმანიის საგარეო უწყების სახელმწიფო მდივანს ტობიას ლინდნერს შეხვდა. შეხვედრაზე მხარეებმა განიხილეს ორ ქვეყანას შორის როგორც ორმხრივ ისე მრავალმხრივ ფორმატში არსებული თანამშრომლობის მნიშვნელოვანი საკითხები. განსაკუთრებული ყურადღება გამახვილდა საქართველოს ევროინტეგრაციის საკითხზე. აღინიშნა ამ მიმართულებით ქვეყნის მიერ მიღწეული პროგრესი და საუბარი შეეხო სამომავლო გეგმებს. კიდევ ერთხელ აღინიშნა გერმანიის მხარდაჭერა საქართველოს ევროპული ინტეგრაციის მიმართ. შეხვედრის ფარგლებში, ხელი მოეწერა ორი ქვეყნის საგარეო უწყებებს შორის დიპლომატიური საქმიანობის შესახებ ტექნიკური ხასიათის შეთანხმებას.