„ნაციონალური მოძრაობის“ პოლიტიკა 2024 წლის არჩევნებზე მათი სრული დამარცხების განმაპირობებელი იქნება, ამას ჩვენ ხელს შევუწყობთ, – ამის შესახებ საქართველოს პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა საქართველოს პირველ არხს განუცხადა.

მისივე თქმით, „ნაციონალური მოძრაობა“ საკუთარი ქვეყნის ინტერესების წინააღმდეგ მიდის და, რა თქმა უნდა, ეს მათთვის ძალიან მწარე ნაყოფს გამოიღებს.

„„ნაციონალური მოძრაობა“ რადარებზეა, მაგრამ მათი რადარებზე ყოფნა რადარის დაბინძურებაა. მათი პოლიტიკიდან გაქრობის წინაპირობა ის კი არ იქნება, რომ „ქართული ოცნება“ რეპრესიების ქვეშ ამყოფებს, არამედ ხელისუფლებამ ყველაფერი გააკეთა, რომ ქვეყანაში დემოკრატიული ცხოვრებისთვის შესაბამისი პირობები შეექმნა და ამის ბევრი მაგალითია.

„ნაცმოძრაობას“ თავისი პოლიტიკა აკნინებს და რეიტინგი იკლებს. მათი პოლიტიკა 2024 წლის არჩევნებზე სრული დამარცხების განმაპირობებელი იქნება. რა თქმა უნდა, ჩვენ ამას ხელს შევუწყობთ. საქართველოში დღეს საკუთარი აზრის გამოხატვა არავის ეშინია. „ნაციონალური მოძრაობა“ საკუთარი ქვეყნის ინტერესების წინააღმდეგ მიდის და, რა თქმა უნდა, ეს მათთვის ძალიან მწარე ნაყოფს გამოიღებს“, – განაცხადა ქადაგიშვილმა.

ევროკავშირის ანგარიში სინამდვილეში ძალიან კრიტიკული და მძიმეა, სადაც აღნიშნულია, რომ სერიოზული პრობლემებია მართლმსაჯულების სისტემაში, კორუფციის მიმართულებით და ინსტიტუციების დამოუკიდებლობის თვალსაზრისით, – ამის შესახებ „ნაციონალური მოძრაობის“ წევრმა, თინა ბოკუჩავამ განაცხადა.

მისი თქმით, „რუსული ოცნება“ ყველაფერს უკუღმა კითხულობს და ამ თვალსაზრისით გამონაკლისს არც ევროკავშირის ანგარიში წარმოადგენს.

„სინამდვილეში, ანგარიში ძალიან კრიტიკული და მძიმეა, სადაც აღნიშნულია, რომ სერიოზული პრობლემებია მართლმსაჯულების სისტემაში, კორუფციის მიმართულებით და ინსტიტუციების დამოუკიდებლობის თვალსაზრისით. ეს ის მოთხოვნები, რომელსაც ევროკავშირი საქართველოს უყენებს იმისთვის, რომ ქვეყანამ კანდიდატის სტატუსი მიიღოს და ევროინტეგრაციის გზაზე სვლა წარმატებით გავაგრძელოთ“, – განაცხადა ბოკუჩავამ.

ევროკავშირმა მსოფლიოში ადამიანის უფლებებისა და დემოკრატიის მდგომარეობის შესახებ 2022 წლის ყოველწლიური ანგარიში გამოაქვეყნა. როგორც ანგარიშშია აღნიშნული, ზოგადად, საქართველოში ადამიანის უფლებათა მყარი სისტემა არსებობს, რომელიც საერთაშორისო და ევროპულ სტანდარტებთან შესაბამის კანონებსა და პოლიტიკას მოიცავს. თუმცა, მათი აღსრულება/განხორციელება რამდენიმე მიმართულებით უნდა გაძლიერდეს.

ეს არის სრული დეჟავიუ იმისა, რაც ხდებოდა ჩვენთან 2020 წლის საპარლამენტო არჩევნების შემდეგ. ჩვენ ვხედავთ ახლა, თუ რა არის ამერიკული სტანდარტი, – ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.

როგორც შალვა პაპუაშვილმა აღნიშნა, საზოგადოებამ ამერიკის საპირისპირო სტანდარტი იხილა საქართველოში 2020 წლის არჩევნების დროს, როდესაც მტკიცებულებების გარეშე ხდებოდა აპელირება იმაზე, რომ თითქოს, არჩევნები გაყალბდა.

,,ამერიკული სტანდარტი არის ის, რომ პირველი, მტკიცების ტვირთი არის მის მხარეს, ვინც ამტკიცებს, რომ არჩევნებს ჰქონდა ხარვეზები და მეორე, როდესაც დადასტურდება, რომ ეს ხარვეზები არ არსებობდა, პასუხისმგებლობა არის იმის მხარეს, ვინც ამას ამტკიცებდა და ხედავთ, რამდენად მძიმეა ეს პასუხისმგებლობა ამერიკის შეერთებულ შტატებში. სამწუხაროდ, ამის საპირისპიროს ვხედავდით ჩვენ საქართველოში, როდესაც მტკიცებულებების გარეშე ხდებოდა აპელირება, რომ თითქოს არჩევნები გაყალბდა და ა.შ. როგორც ქვეყნის შიგნით, ისე ჩვენი რადიკალური ოპოზიციის უცხოელი მფარველების მხრიდან, რომ თითქოს იყო არჩევნების გაყალბება. შემდეგ ყველაფერი გაირკვა. აბსოლუტურად ყველა პრეტენზია რიგრიგობით გაბათილდა და ვხედავთ, რომ ამაზე პასუხისმგებლობა არავინ არ აიღო. პირიქით, ამ ყალბ კამპანიაში მთავარი იყო ISFED-ი, რომლის მიზანიც იყო საზოგადოებაში ბრაზის გამოწვევა, უნდობლობის ატმოსფეროს შექმნა და არჩევნების ადმინისტრირების მიმართ რწმენის შერყევა – ზუსტად ის, რაც ითქვა ამერიკაში. ეს მიზნები ჰქონდა მაშინ საქართველოში ოპოზიციას და მის გვერდში მყოფ ზოგიერთ არასამთავრობო ორგანიზაციას. პასუხისმგებლობა მაშინ არავინ აიღო. პირიქით, „სამართლიანმა არჩევნებმა“ სათანადოდ ბოდიშიც კი არ მოიხადა და კვლავ იღებს მილიონობით დაფინანსებას დონორების მხრიდან. არც დონორებმა გამოთქვეს რაიმე სახის კრიტიკული მოსაზრება მიუხედავად იმისა, რომ პირადად მეც მათთან რამდენჯერმე მქონდა საუბარი, რომ არ შეიძლებოდა ამ საკითხის ასე გატარება, როდესაც ორგანიზაცია, მათი ფინანსებით საქმიანობს და ასეთ დარტყმას აყენებს დემოკრატიულ პროცესებს და შემდეგ ეს დადასტურდა, რომ იყო ყალბი კამპანია; რომ ამის შემდეგ, ნაცვლად იმისა, რომ კრიტიკულები იყვნენ ამ ორგანიზაციის მიმართ, კვლავ ხელი დააფარონ და უფრო მეტი დაფინანსებაც კი მისცენ ,,სამართლიან არჩევნებს’’ ადგილობრივ თვითმმართველობის არჩევნების დაკვირვებისთვის. ეს გვაძლევს შედეგად იმას, რომ საბოლოო ჯამში თავად არასამთავრობო სექტორში ხდება არაჯანსაღი პროცესები და ვხედავთ, საბოლოო შედეგი, რაც არის. სხვა არასამთავრობო ორგანიზაციებიც ჩუმად იყვნენ მაშინ. ისინიც ხვდებოდნენ, რომ პარალელური დათვლის შედეგები იყო სრული სიყალბე, მიუხედავად ამისა, ხმა არ ამოიღო არცერთმა ორგანიზაციამ. ყველა გაჩუმდა და ყველამ ამ სიჩუმით გაწირა ჩვენი ქვეყანა არეულობისთვის. რომ არა „ქართული ოცნების“ მხრიდან დაჟინებული მხილება – პირველი მხილების შემდეგ ჩვენ გვქონდა კრიტიკის ტალღა დონორებისგან, რომ არ ყოფილიყო შეტევა არასამთავრობო ორგანიზაციებზე, მაშინ ეს ასე ფასდებოდა – თუმცა, ჩვენ არ მოვეშვით და საბოლოო ჯამში გავიტანეთ ჩვენი სიმართლე. რომ არა ეს ჩვენი დაჟინებული მცდელობები, არასამთავრობო ორგანიზაციებისა და ზოგიერთი დონორების მხრიდან, საქართველო გაწირული იყო არადემოკრატიული პროცესებისათვის“, – განაცხადა შალვა პაპუაშვილმა.

NGO-ები და ოპოზიცია ცდილობდნენ შეენჯღრიათ ქვეყანა. ანალოგიური საქმისთვის ბრალი წაუყენეს ტრამპს და აქ არავინ დასჯილა. ეს რანაირი მიდგომაა?! მინდა ვკითხო ქალბატონ კელის და აშშ-ს საელჩოს, ორმაგი მიდგომა გვაქვს?! თუ აქ ყველაფერი “მოსულა”?! ეს მიდგომა აქვთ?! – ნურას უკაცრავად! – ამის შესახებ ჟურნალისტებთან საპარლამენტო უმრავლესობის წევრმა ირაკლი ზარქუამ განაცხადა.

ზარქუამ 2020 წლის არჩევნები და ISFED-ის მიერ გამოქვეყნებული პარალელური დათვლის შედეგებში უზუსტობა გაიხსენა და განაცხადა, რომ აშშ-ში ყოფილ პრეზიდენტ დონალდ ტრამპს სწორედ არჩევნების შედეგების შეცვლის ფაქტზე წარუდგინეს ბრალი.

“ზუსტად ერთი და იგივე ხელწერა და თემაა. გახსოვთ 2020-ში ჩვენთან ეს ხელმოცარულები და რევოლუციური სცენარის მხარდამჭერები, მათ შორის, არასამთავრობო ორგანიზაციების წარმომადგენლები, რომელთაც იცოდნენ, რომ არანაირი გაყალბება არ ყოფილა, უტიფრად აგრძელებდნენ ჩვენი ქვეყნის პოლიტიკურ რყევას. გახსოვთ “სამართლიანი არჩევნები” – “ფორმულაში გვქონდა შეცდომაო”. ზეპირად იცოდნენ რომ ასე იყო, მაგრამ მაინც ცდილობდნენ შეენჯღრიათ ჩვენი ქვეყანა. ანალოგიური საქმისთვის ბრალი აქვს ახლა წაყენებული ბატონ ტრამპს და აქ კიდევ არავინ დასჯილა და ეს რანაირი მიდგომაა?! მინდა ვთხოვო (ვკითხო) ქალბატონ კელის და ამერიკის საელჩოს, რადგან ისინი აფინანსებენ ამ ორგანიზაციებს, რანაირად ხდება ეს, ორმაგი მიდგომა გვაქვს?! იქ თუ დანაშაულად ითვლება, საქართველოში შესაბამისი რეაგირება არ უნდა მოჰყვეს?! მე მათი პოზიცია მაინტერესებს უბრალოდ. თუ აქ ყველაფერი მოსულა?! ეს მიდგომა აქვთ?! ნურას უკაცრავად, საქართველო უდიდესი ისტორიის, კულტურის, ტრადიციების, წარსულის მქონე სახელმწიფოა. ის, რომ ჩვენ მცირერიცხოვანი ვართ, არავის არ უნდა შეეშალოს. ეს ღირსეული სახელმწიფოა, რომელიც ყოველთვის თავის სიტყვას ამბობდა, ისევე, როგორც ვაპირებთ, 21-ე საუკუნეშიც თავისი როლი შეასრულოს სატრანსპორტო დერეფნის გამოყენებით საქართველომ ევროპასა და აზიას შორის. ამას ჩვენ მივაღწევთ მწყობრად, ქართველ ხალხთან გვერდში დგომით,” – განაცხადა ზარქუამ.