20 მილიონი დოლარი დაუჯდა სახელმწიფოს მათი [ოპოზიციის] მავნებლობა, საქართველოს მოქალაქეების რეზერვიდან 20 მილიონი დოლარი დაჯდა ვაშაძის ფეხების და ხელების ქნევა, გაქცევა და ზურგისკენ შეშინებული გამოხედვა – ამის შესახებ „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტებს განუცხადა.

მისი თქმით, „რადიკალურმა ოპოზიციამ ვერ მოახერხა ფინანსური სისტემის ჩამოშლა, გუშინ იყო პატარა ტურბულენტობა და ეროვნულ ბანკს 20 მილიონი დოლარის გაყიდვა დასჭირდა“.

„მათ არ გაუვიდათ, ძალიან ნერვიულობენ, დღეს ორი წევრიც ავირჩიეთ და აქედან გამომდინარე, მათ ვერ მოახერხეს საქართველოს ფინანსური სისტემის ჩამოშლა. ამ მცდელობის მიუხედავად, ჩვენი მეგობარი ქვეყნებიდან დღეს რაღაც გადაწყვეტილებები გვესმის, რომელშიც შეიძლება ამოვიკითხოთ ამ ყველაფრის მხარდაჭერა, რაც ძალიან სამწუხაროა, მაგრამ საქართველოს ფინანსური სექტორი, მათი [ოპოზიციის] მცდელობის მიუხედავად, არ ჩამოიშლება და არანაირი პრობლემა არ ექნება. გუშინ იყო პატარა ტურბულენტობა ამ მიმართულებით და 20 მილიონი დოლარის გაყიდვა დასჭირდა [ეროვნულ ბანკს]. ანუ, ამათი აქაური მავნებლობა, აქ რაც აკეთეს, 20 მილიონი დოლარი დაუჯდა სახელმწიფოს. საქართველოს მოქალაქეების რეზერვიდან 20 მილიონი დოლარი დაჯდა ვაშაძის ფეხების და ხელების ქნევა, გაქცევა და ზურგისკენ შეშინებული გამოხედვა. ასეთი მავნებლობებით არიან დაკავებული, მაგრამ საბედნიეროდ, ვერ გააქვთ ეს მავნებლობა“, – განაცხადა მამუკა მდინარაძემ.

კანონის დარღვევაა, როდესაც სხვა ქვეყნის მოქალაქე ერევა საქართველოს საარჩევნო პროცესში, ერევა პოლიტიკაში, მით უმეტეს, ასეთი უხეში ფორმებით, სადაც ძალადობისა და არეულობისკენ მოუწოდებს თავის მხარდამჭერებს, – ამის შესახებ საპარლამენტო უმრავლესობის წევრმა, არჩილ თალაკვაძემ მიხეილ სააკაშვილის განცხადებაზე კომენტირებისას აღნიშნა.

როგორც არჩილ თალაკვაძემ განაცხადა, მიხეილ სააკაშვილი პატიმრობაშია და მოწყვეტილია პოლიტიკურ რეალობას.

„მისი კოლეგები ძალიან ბევრს აკეთებენ, რათა ის მთლიანად გაანეიტრალონ პარტიაში და ჩამოართვან თანამდებობა, იყოფენ ძალაუფლობას. მაგრამ არ უნდა დაგვავიწყდეს გარემოცვა, ყოველდღე არაერთი ადამიანი შედის და სრულად აწვდიან ინფორმაციას. აქედან გამომდინარე, ეს იყო პირდაპირი დადასტურება იმისა, რომ რადიკალური ოპოზიცია ნამდვილად მხარს უჭერს და ყველაფერს აკეთებს იმისთვის, რომ ქვეყანაში მოხდეს დესტაბილიზაცია და როგორმე საარჩევნო პროცესისთვის გვერდის ავლით დაიბრუნონ ხელისუფლებაში რაღაც გავლენა.

ეს იყო ასევე ირიბი დადასტურება სახელმწიფო უსაფრთხოების სამსახურის მიერ გასაჯაროებული ინფორმაციის, სადაც სამსახური მიუთითებდა, რომ რადიკალური ოპოზიცია არის მზადების პროცესში, რომ როგორმე კანდიდატის სტატუსთან დაკავშირებით გამოიწვიონ არეულობა და დესტაბილიზაცია ქვეყანაში. კონკრეტული გამოძიება არის დაწყებული, საუბარია ძალადობრივ სცენარებზე, ესეც, პრინციპში, სააკაშვილმა, ვაშაძემ გუშინ დაადასტურეს და მოუწოდეს მოქალაქეებს იარაღის ხელში აღებისკენაც, რაც პირდაპირ ძალადობრივი გზავნილია.

კანონის დარღვევაა, როდესაც სხვა ქვეყნის მოქალაქე ერევა საქართველოს საარჩევნო პროცესში, ერევა პოლიტიკაში, მით უმეტეს, ასეთი უხეში ფორმებით, სადაც ძალადობისკენ და არეულობისკენ მოუწოდებს თავის მხარდამჭერებს. ეს ყველაფერი წინააღმდეგობაშია და არღვევს საქართველოს კონსტიტუციის პრინციპებსა და საქართველოს კანონმდებლობას“, – განაცხადა თალაკვაძემ.

ქალბატონო სალომე, არანაირი პიარული მუხტი არ არის. ეს სვლა თქვენ, ყველას ერთად ჩაგივარდათ. ამიტომ, შეყოვნებებს აზრი არ აქვს. ჩვეულებრივად უნდა იმოქმედოთ, – ასე მიმართა პრეზიდენტს „ქართული ოცნების“ აღმასრულებელმა მდივანმა და ფრაქცია „ქართული ოცნების“ თავმჯდომარემ, მამუკა მდინარაძემ ოთარ ფარცხალაძისთვის მოქალაქეობის შეჩერების საკითხის კომენტირებისას.

კითხვაზე რატომ აჭიანურებს პრეზიდენტი გადაწყვეტილების მიღებას, მდინარაძემ განაცხადა, რომ სალომე ზურაბიშვილი ოთარ ფარცხალაძისთვის მოქალაქეობის შეჩერების პროცესს „აჭიანურებს ერთი რაღაცის გამო, რომ ეს მუხტი პიარულად როგორღაც იყოს შენარჩუნებული“.

„წარმოდგენა არ მაქვს, რას აკეთებს. გუშინ პრეზიდენტმა „ფეისბუქში“ დაწერა, ვერ მოითმინა, ჟურნალისტებსაც კი არ დაელოდა, რომ დაუყოვნებლივ ელოდებოდა ფარცხალაძის საბუთებს. გუშინ მიუვიდა საბუთები, ჯერაც არ მიუღია გადაწყვეტილება. რას ემსახურება, რას ხლართავენ, კაცმა არ იცის! გამოჩნდება. ამ საუბრების შემდეგ უბრალოდ, დააკარგვინებს მოქალაქეობას.

მოქალაქეობა არ დააკარგვინოს, წარმოუდგენელი ამბავია, მაგრამ აჭიანურებს ერთი რაღაცის გამო, რომ ეს მუხტი პიარულად როგორღაც იყოს შენარჩუნებული. წინასწარ საუბრობდა ადამიანი, დაუყოვნებლივ ველოდებიო და ახლა არ აკმაყოფილებს, განცხადებას არ აკეთებს ამის შესახებ იმიტომ, რომ პირული მუხტი შეინარჩუნოს.

ქალბატონო სალომე, არანაირი პიარული მუხტი არ არის. ეს სვლა თქვენ, ყველას ერთად ჩაგივარდათ. ამიტომ, შეყოვნებებს აზრი არ აქვს. ჩვეულებრივად უნდა იმოქმედოთ.

რაც იმოქმედა, თურმე, ისიც ინანა და საქართველოს მოსახლეობა ნანობს, ჩვენც ვნანობთ მის არჩევას და მაშინ უნდა გადადგეს მაგ ლოგიკით“, – განაცხადა მდინარაძემ.

საქართველოს იუსტიციის სამინისტრომ გაავრცელა, რომ სახელმწიფო სერვისების განვითარების სააგენტომ ოთარ ფარცხალაძისთვის საქართველოს მოქალაქეობის შეწყვეტა მიზანშეწონილად მიიჩნია. შესაბამისი დასკვნა საქართველოს პრეზიდენტთანაა გადაგზავნილი.

გვაქვს ორი მთავარი საკითხი – უნდა მოხდეს ფარცხალაძის დაკავება და ეროვნული ბანკის ბრძანება დაუყონებლივ უნდა გაუქმდეს. საზოგადოებას პასუხი უნდა გასცეს „ოცნებამ“, – ამის შესახებ „სტრატეგია აღმაშენებლის“ თავმჯდომარემ გიორგი ვაშაძემ განაცხადა.

მისი თქმით, გუშინ ყველამ ნახა, „ქართული ოცნება“ როგორ ჩადგა ჯაშუშის დამცველის ფუნქციაში.

მისივე თქმით, უტყუარად დადასტურდა, რომ ოთარ ფარცხალაძე საქართველოში იმყოფება.

„მათ მოუწიათ უკან დახევა და ფარცხალაძეს მოქალაქეობა შეუწყვიტეს, მაგრამ ვსვამ მთავარ კითხვას – რუსეთის მოქალაქე ხომ არის უკვე ფარცხალაძე, რატომ არ არის დაკავებული? გუშინ უტყუარად დადასტურდა საჯარო რეესტრის ამონაწერებით, ჟურნალისტებზე თავდასხმით, რომ ფარცხალაძე იმყოფება საქართველოში, შესაბამისად, ჩვენი კითხვა არის ის, თუ რატომ არ ხდება ფარცხალაძის დაუყონებლივ დაკავება რუსეთის სასარგებლოდ ჯაშუშობის ბრალდებით? სუს-ი და სამართალდამცავი ორგანოები, რომლებიც არ აკავებენ რუს ჯაშუშ ფარცხალაძეს, პირდაპირ საკუთარი თავის ლუსტრაციას ახდენენ. კითხვას ვუსვამ „ქართულ ოცნებასაც“, სუს-საც და ყველა უწყებას, რატომ არ ახდენთ ფარცხალაძის დაკავებას?

ორი მთავარი საკითხი, რაც ახლა გვაქვს: უნდა მოხდეს ფარცხალაძის დაკავება და ეროვნული ბანკის ბრძანება დაუყონებლივ უნდა გაუქმდეს. ჩვენთვის მთავარია, „ოცნებამ“ საზოგადოებას პასუხი გასცეს, რატომ არ ხდება ფარცხალაძის დაკავება, კაცი არის მხილებული ჯაშუშურ საქმიანობაში, ამაზე დიდი დანაშაული არ არსებობს“, – განაცხადა ვაშაძემ.

გვქონდა ინფორმაცია ეროვნული ბანკის ვიცე-პრეზიდენტებთან დაკავშირებით, რომ კრიტიკულ მომენტში ისინი წავიდოდნენ ამ ინსტიტუციის და სახელმწიფოს წინააღმდეგ, ამიტომ შევიტანეთ ცვლილება თავის დროზე, როცა შემოვიტანეთ პირველი ვიცე-პრეზიდენტის თანამდებობა, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, კრიტიკულ მომენტში სამივე ვიცე-პრეზიდენტი წავიდა ინსტიტუციის წინააღმდეგ.

„თავის დროზე აბსოლუტურად უწყინარი ცვლილება შევიტანეთ ეროვნული ბანკის შესახებ კანონში და შემოვიტანეთ პირველი ვიცე-პრეზიდენტის თანამდებობა. გახსოვთ, რამხელა ამბავი ატეხეს ამასთან დაკავშირებით. ჩვენ გვქონდა ინფორმაცია ვიცე-პრეზიდენტებთან დაკავშირებით, რომ კრიტიკულ მომენტში ისინი წავიდოდნენ ამ ინსტიტუციის და სახელმწიფოს წინააღმდეგ, ამიტომ შევიტანეთ ეს ცვლილება თავის დროზე და, როგორც ჩანს, იმ ადამიანებს, რომლებიც ეწინააღმდეგებოდნენ ამ კანონს, მათაც ჰქონდათ შესაბამისი ინფორმაცია, მათ სურდათ საბოტაჟი.

ხომ გამოჩნდა დღეს ყველაფერი, სამწუხაროდ, კრიტიკულ მომენტში სამივე ვიცე-პრეზიდენტი, არცერთის გამოკლებით, წავიდა ინსტიტუციის წინააღმდეგ. ჩვენ ვიცოდით, რომ მათ ჰქონდათ მძიმე ვალდებულებები ყოველგვარი კონკრეტული ინფორმაციის გარეშე. მათ შორის, რა თქმა უნდა, ოპოზიციის წარმომადგენლებამდეც მიდის ეს ყველაფერი. როცა მივიღეთ ინფორმაცია, შევიტანეთ ეს ცვლილება“, – განაცხადა ირაკლი კობახიძემ.

ირაკლი კობახიძის განმარტებით, „დღეს უზრუნველყოფილია ეროვნული ბანკის დამოუკიდებლობა და ის, რომ ეს ორგანო იფუნქციონირებს სწორედ სახელმწიფო ინტერსების და არა კონკრეტული პოლიტიკური სუბიექტების ინტერესების შესაბამისად“.

„ეროვნულ ბანკს შეუძლია ძალიან ბევრი რამის გაკეთებაც და გაფუჭებაც, იმავე ლარის კურსთან, ინფლაციასთან დაკავშირებით. გახსოვთ, რა ხდებოდა, როდესაც გიორგი ქადაგიძე იყო ეროვნული ბანკის პრეზიდენტი. პირდაპირ საბოტაჟი წარმოებდა ეროვნულ ბანკში. ძალიან ბევრი რამის გაფუჭება შეიძლება ეროვნულ ბანკში და ამას ვგულისხმობ. კრიტიკულ მომენტში იყო სერიოზული რისკები დაკავშირებული ამ ადამიანებთან, მით უმეტეს, თუ ერთ-ერთი შეასრულებდა პრეზიდენტის მოვალეობას, იყო ძალიან სერიოზული რისკები“, – აღნიშნა ირაკლი კობახიძემ.

ეროვნული ბანკი 20 სექტემბერს საბჭოს სამმა წევრმა, ვიცეპრეზიდენტებმა – ნიკოლოზ გაგუამ, არჩილ მესტვირიშვილმა და პაპუნა ლეჟავამ დატოვა.

ნაციონალური მოძრაობის“ თავმჯდომარის თინა ბოკუჩავას განცხადებით, ივანიშვილი ხედავს, რომ სანქციების შემდეგი სამიზნე თვითონაა და ამიტომ ხდება კოორდინირებული ქმედებები ფარცხალაძის დასაცავად.

მისი თქმით, განვითარებული მოვლენების ფონზე, სავარაუდოდ, რთული შეხვედრა ექნებოდა ამერიკაში მყოფ პრემიერ-მინისტრს ამერიკის შეერთებული შტატების პრეზიდენტის მრჩეველთან, ჯეიკ სალივანთან.

რაც შეეხება თავად ფარცხალაძეს, ბოკუჩავას თქმით, მას ხელი შეუწყვეს, რომ არ მიეღო ზიანი დასანქცირებით და ფარცხალაძემ სავარაუდოდ, მოასწრო თანხების გატანა, ისევე, როგორც ქონება გადააფორმა ოჯახის წევრზე.

„სალივანთან შეხვედრა დარწმუნებული ვარ მძიმე იყო ივანიშვილის პაიკისთვის, პრემიერად წოდებულ ღარიბაშვილისთვის, რომელიც მონური მორჩილებით ასრულებს მის ყველა დავალებას, მათ შორის იმას, რომ კოორდინირებულად მოქმედებდეს მთელი მთავრობა, ყველა სახელმწიფო უწყება ჯაშუშ ოთარ ფარცხალაძის დასაცავად. კოორდინირებულ მოქმედებებს ფარცხალაძის დასაცავად ვხედავთ იმიტომ, რომ ივანიშვილი კარგად ხედავს, რომ სანქციების წრე ვიწროვდება და შემდეგი სამიზნე არის სწორედ ის. ამიტომ იღებს გადაწყვეტილებებს, რომ თავი დაიზღვიოს იმ გარდაუვალ მოცემულობაში, რომლის წინაშე ის აუცილებლად დადგება, თუ არ გადააბარებს დროულად, მშვიდობიანად ხელისუფლებას”, – განაცხადა ბოკუჩავამ.

სააკაშვილის მოწოდებები მორიგი დასტურია იმისა, რომ მათ გონებაში რევოლუციური გეგმა იხარშება, რომელიც ბუნებრივია განწირულია. თუმცა, არავითარ შემთხვევაში არ უნდა დავმშვიდდეთ, – განაცხადა პარტია „ქართული ოცნების“ თავმჯდომარემ და საპარლამენტო უმრავლესობის ლიდერმა, ირაკლი კობახიძემ ჟურნალისტებთან საუბრისას.

იგი სასამართლო სხდომაზე მიხეილ სააკაშვილის მიერ, ქუჩის აქციების მოწყობაზე, გაკეთებულ განცხადებებს გამოეხმაურა.

კობახიძის თქმით, რაც უფრო სუსტია რადიკალური ოპოზიცია, მით უფრო მეტი რისკი არსებობს პროვოკაციების მოწყობის კუთხით.

„გუშინ მთელი დღის განმავლობაში ატყუებდნენ მოსახლეობას, რომ დეპოზიტები გაეყინებოდათ, ბარათით ვეღარ გადაიხდიდნენ ვერც ქვეყნის შიგნით და ვერც გარეთ, ანუ ათასი სისულელე უთხრეს საზოგადოებას და 200 კაცზე მეტი მაინც ვერ გამოიყვანეს ქუჩაში ამდენი ტყუილის ფონზე. მათ ხომ შეუძლიათ საკუთარი მხარდამჭერები მაინც მოატყუონ, საკუთარ მხარდამჭერებსაც ვეღარ ატყუებენ. ამდენი ტყუილები თქვეს და მძიმე შიშები უნდა შეექმნათ, ისეთ რაღაცას ეუბნებოდნენ – 200 კაცზე მეტი ვერ გამოიყვანეს რეალურად ქუჩაში! საზოგადოება უკვე ძალიან გამოცდილია და ასეთ ტყუილებსაც აღარ იღებს და ყველაფერს ძალიან კარგად ხვდება. შესაბამისად, ეს აქცია ჩავარდა.

რაც შეეხება სააკაშვილის მოწოდებებს, მისი მოწოდებები მორიგი დასტურია იმისა, რომ მათ გონებაში ეს რევოლუციური გეგმა იხარშება, რომელიც ბუნებრივია განწირულია. თუმცა, არავითარ შემთხვევაში არ უნდა დავმშვიდდეთ. რაც უფრო სუსტია ეს რადიკალური ოპოზიცია, მით უფრო მეტი რისკი არსებობს პროვოკაციების კუთხით. ისინი სისუსტის ფონზე არიან ყველაფერზე წამსვლელი – კაცი შეიძლება მოკლან. ყოველგვარი გადაჭარბების გარეშე! არ მოუკლავთ თუ რა?! ყოველგვარი გადაჭარბების გარეშე, კაცი შეიძლება მოკლან იმისთვის, რომ როგორღაც სცადონ აქ ვითარების ადუღება. არაფერი გამოუვათ, მაგრამ ძალიან ფრთხილად უნდა ვიყოთ“, – განაცხადა კობახიძემ.