საპარლამენტო უმრავლესობის წევრი ირაკლი ზარქუა უკრაინის რადას მმართველი ფრაქციის თავმჯდომარეს, დავით არახამიას ხელმოცარულს უწოდებს.

მისი თქმით, დავით არახამიას ავტორიტეტი არ აქვს და მისი პოზიცია არავის აინტერესებს. ამასთან, ირაკლი ზარქუა ამბობს, რომ დავით არახამია უკრაინის ინტერესებს არ ემსახურება, რასაც მთელი მსოფლიო მალე ნახავს.

„ვწუხვარ, რომ დროს მაკარგვინებთ ამ ხელმოცარულზე. საკუთარ პარტიაშიც კი, სადაც ხელისუფლებაში არიან, პრეზიდენტმა ვიზები გაუუქმა მას, გონჩარენკოს და კიდევ რამდენიმეს, სახელმწიფოს ხარჯზე დაფრინავ ევროპაში უსაქმურადო. ეს ხელმოცარული ოპოზიციურ არხებს ახლა ექსპერტებად ჰყავს. ვის აინტერესებს არახამია, რომელმაც ქართული არ იცის, დაბადებული და გაზრდილია რუსეთში. პატივს არ სცემს საკუთარ წინაპარსაც, მშობლებს, გვარი ბრაუნად გადაიკეთა. ახლა თქვენ გგონიათ, ის საქართველოსთვის და ქართველებისთვის იბრძვის? რელურად მას უკრაინა რომ უყვარდეს, ერთხელ გინახავთ იარაღით ხელში ფრონტის ხაზზე? გინახავთ ბახმუტში ჩასული? საქართველოს შიდა საქმეებში ჩასარევად სცალია? ვინ კითხავს ამას. ეს არის „ნაცმოძრაობის“ და მათი სატელიტი არასამთავრობოების, თუ ტელევიზიების საყვარელი რესპონდენტი, რომელსაც ნოლი ავტორიტეტი აქვს. აბა, ნახეთ უკრაინელები რას გეტყვიან დავით არახამიაზე. ეს კაცი ხელმოცარულია. იცით როგორ კარგად ვხედავ, თუ როგორ გაასამართლებენ უკრაინელები დავით არახამიას და ასეთ ნაძირლებს? ისინი უკრაინის ინტერესებს არ ემსახურებიან, რასაც უკრაინელი ხალხი და მთელი მსოფლიო მალე ნახავს. ეს ადამიანი არის ნოლი, უავტორიტეტო, უსამშობლობის კოჰორტაა გონჩარენკოები და არახამიები“, – განაცხადა ირაკლი ზარქუამ.

ამასთან, კითხვის საპასუხოდ ირაკლი ზარქუა აღნიშნავს, რომ დავით არახამია დიდი ხანია, ქართულ პოლიტიკაშია ჩართული, რაც მიუღებელია.

„იმდენად უმნიშვნელოა მათი როლი და გავლენა, პირიქით, რაც მეტად ჩაერევა, კიდევ მეტად ნახავს ქართველი ხალხი ნაცების დამოკიდებულებას საკუთარი ქვეყმის მიმართ. საკუთარი ქვეყნის ფრონტის ხაზზე არ არის გასული, აიღოს იარაღი ხელში და გავიდეს, ეს დაიცავს საქართველოს ინტერესებს. რისი სტატუსის მიმცემია ეგ თვითონ უსტატუსო“, – განაცხადა ირაკლი ზარქუამ.

ცნობისთვის, უკრაინის რადას მმართველი ფრაქციის თავმჯდომარემ, დავით არახამიამ სოციალურ ქსელში დაწერა: „საქართველოში ხალხს სურს ევროპა, არის საშინაო დავალებები და გზა, გპირდებით, ჩემს პრეზიდენტთან ერთად, დავეხმარები მშობლიურ საქართველოს ამ უფსკრულის სწრაფად გადალახვაში“.

საქართველოში ხალხს სურს ევროპა, არის საშინაო დავალებები და გზა, გპირდებით, ჩემს პრეზიდენტთან ერთად, დავეხმარები მშობლიურ საქართველოს ამ უფსკრულის სწრაფად გადალახვაში, – ამის შესახებ უკრაინის რადას მმართველი ფრაქციის თავმჯდომარემ დავით არახამიამ განაცხადა.

„ევროკომისიის პრეზიდენტი ურსულა ფონ დერ ლაიენი დღეს სამუშაო ვიზიტით კიევში იმყოფება. სამუშაო დღის წესრიგში ბევრი შეხვედრა იყო, მათ შორის, რა თქმა უნდა, შეხვედრა უკრაინის პრეზიდენტ ვოლოდიმირ ზელენსკისთან. უკრაინამ, როგორც ევროკავშირის მომავალმა წევრმა, ბევრი რეფორმა და საკანონმდებლო ცვლილება უნდა განახორციელოს.

ჩვენს მთავრობას აქვს თანმიმდევრული სამოქმედო გეგმა ყველა მნიშვნელოვან ცვლილებასთან და განხორციელების ვადებთან დაკავშირებით. დარწმუნებული ვარ, ჩვენი კოორდინირებული მუშაობა უახლოეს მომავალში აუცილებლად მოგვცემს სასურველ შედეგს. ევროკავშირის წევრობის კანდიდატის სტატუსის მიღებამდე მივიღეთ საშინაო დავალება.

ჩვენ ვიღებთ ბევრ კანონს, ვიშორებთ ოლიგარქების გავლენას ქვეყნის ეკონომიკასა და პოლიტიკაზე და ვაუმჯობესებთ სასამართლო სისტემას. ყველა ევროპელი დიპლომატი, რომელიც უკრაინაში იმყოფება, ერთხმად აღნიშნავს ამ ცვლილებების სწრაფ პროგრესს და უჩვეულო ტემპს. რაც კეთდება სხვა ქვეყნებში წლების განმავლობაში, ჩვენ ვახორციელებთ ერთ თვეში, რაც კეთდება თვეებში, ჩვენთან სრულდება დღეებში. სხვანაირად ვერ ვიქნებით.

როდესაც ასიათასობით ადამიანი იარაღით იცავს ჩვენს ქვეყანას რუსული აგრესიისგან,ზურგში ჩვენ უნდა ვაკეთოთ საქვეყნო საქმე და მოვამზადოთ ნათელი მომავალი ჩვენი ხალხისთვის. საქართველოშიც ხალხს სურს ევროპა. ასევე არის საშინაო დავალებები და კონკრეტული გზა, თუ როგორ უნდა მივიდეთ იქამდე. ძნელი იქნება მიზნის მიღწევა, როცა ქვეყანაში მთელი ძალაუფლება ერთ ოლიგარქზეა დამოკიდებული, როცა პოლიტპატიმრები არიან, როცა ჟურნალისტები ციხეში არიან. მაგრამ, მიუხედავად ყველა ამ პრობლემისა, ქართველი ხალხი ადრე თუ გვიან გადაჭრის ამ პრობლემას. უკრაინა წინ წავიდა ამ პროცესში და დღეს ჩემს პრეზიდენტთან ერთად გპირდებით, რომ დავეხმარები ჩემს მშობლიურ საქართველოს ამ უფსკრულის შეძლებისდაგვარად სწრაფად გადალახვაში. დიდება უკრაინას! დიდება საქართველოს“, – წერს დავით არახამია.