პარლამენტის ოპოზიციონერი დეპუტატი ხატია დეკანოიძე აცხადებს, რომ საქართველოში ბოლო დროს გახშირებული ტრანსნაციონალური დანაშაულის ნიშნების აღმოჩენა, ქვეყნისთვის მძიმეა.

„კონკრეტულად რომელიმე ადამიანთან კავშირი გამოძიებამ უნდა დაადგინოს, მე ვერ გეტყვით, არ ვიცი. მხოლოდ საჯარო ინფორმაცია რაც გაჟღერდა, ის ვიცი. ზოგადად, საქართველოში ყველა სადარბაზოში ტრანსნაციონალური დანაშაულის ნიშნების აღმოჩენა, ძალიან მძიმეა ქვეყნისთვის“, – განაცხადა დეკანოიძემ.

„ქართული ოცნების” და “ნაციონალური მოძრაობის” გარდა შეიძლება ბარიერი ვერავინ გადალახოს – მე ვხედავ გამსხვილების და პარტიების ძალიან მჭიდრო კოორდინაციის პროცესს, – ამის შესახებ ჟურნალისტებთან ოპოზიციონერმა დეპუტატმა ხატია დეკანოიძემ განაცხადა.

როგორც მან აღნიშნა, 5 – პროცენტიანი ბარიერის პირობებში “ნაციონალური მოძრაობის” “ორბიტაზე” შევლენ სხვა პარტიები, ვისაც გაერთიანება და გამსხვილება სურს. დეკანოიძე აცხადებს, რომ რამდენადაც მისთვის ცნობილია, მსჯელობა მიმდინარეობს იმ საკითხზეც, იქნებიან თუ არა ისინი ერთი ნომრით წარმოდგენილი.

„მაშინაც კი როცა „ნაციონალურ მოძრაობაში” ვიყავი, მე ვემხრობოდი დაბალი ბარიერის სისტემას, საერთოდ, მე ვემხრობი ბუნებრივ ბარიერს, ვფიქრობ, ძალიან საინტერესო მოცემულობა შეიძლება მიგვეღო. ახლანდელი მოცემულობით, “ქართული ოცნების” და “ნაციონალური მოძრაობის” გარდა შეიძლება ვერავინ გადალახოს ბარიერი. ამიტომ ბუნებრივად “ნაციონალური მოძრაობის” ორბიტაზე, სიაში უნდა შევიდნენ სხვა პარტიები და ჩვენ ვიცით ეს პარტიები, ვისაც უნდა გაერთიანება და გამსხვილება, არ აქვს მნიშვნელობა ერთი ნომრით იქნებიან თუ სხვა ნომრით და ამაზეც არის მსჯელობა რამდენადაც ჩემთვის ცნობილია. რაც შეეხება გამოსავალს, შარლ მიშელის დოკუმენტში იყო ჯერ კიდევ ჩადებული დაბალი ბარიერი, საკონსტიტუციო ცვლილებები უნდა განხორციელებულიყო და ვხედავ ამ ორბიტას შორის გამსხვილების პროცესს და პარტიების მუშაობის და ძალიან მჭიდრო კოორდინაციის პროცესს იმ შემთხვევაში, რომ ეს მოცემულობა და კოალიცია მომავალ პარლამენტში “ქართული ოცნების” წინააღმდეგ რაც შეიძლება აქტიური და ეფექტური იყოს,”– განაცხადა დეკანოიძემ.

მგონი, მე და მამაჩემს არ გვაქვს “ქოლ ცენტრი”, თორემ ყველა პენსიონერებს ატყავებდა – არ მჯერა, დღისით, მზისით, მთელ საქართველოში, „ქოლ – ცენტრები” ისეა მოწყობილი, რომ სუს-მა და “ქართულმა ოცნებამ” არაფერი იცოდა,- ამის შესახებ ჟურნალისტებთან „მოქალაქეების” დეპუტატმა ალეკო ელისაშვილმა განაცხადა.

როგორც მან აღნიშნა, ბევრი კითხვაა და საგამოძიებო კომისიის შექმნას სწორედ ამიტომ უჭერდა მხარს, რომ პასუხები მიეღო.

„რასაც ვუყურებ, მგონი მე და მამაჩემს არ გვაქვს “ქოლ ცენტრი”, თორემ დანარჩენი ყველა პენსიონერებს ატყავებდა. მე პირადად იმიტომ მინდოდა საგამოძიებო კომისიის შექმნა, რომ გაგვეგო, მართლა რა ხდება. როგორც ჩანს „ნაცი“, „ქოცი“, დიდი, პატარა, ყველა ერთად შეიკრა, რომ ევროპელი პენსიონერები გავატყავოთ. ჩემთვის თანაბრად საძაგელია ყველა, ვინც დაკავებულია პენსიონერების ძარცვით, არ აქვს მნიშვნელობა კეზერაშვილი იქნება თუ სხვა, ჩემი ნათესავი რომ იყოს სისხლით, იმასაც შევიძულებდი მთელი ცხოვრება. ბევრი კითხვაა, მე არ მჯერა, რომ ქალაქის ცენტრში, დღისით, მზისით, მთელ საქართველოში, ყველა ქალაქში „ქოლ ცენტრები” ისეა მოწყობილი, რომ სუს-მა არაფერი იცის, „ქართულმა ოცნებამ” არაფერი იცოდა“, – განაცხადა ელისაშვილმა.

“ლელოს”  ლიდერის, მამუკა ხაზარაძის  განცხადებით, ყველა დასასჯელია კანონის მთელი სიმკაცრით, ვინც  ” ქოლ-ცენტრების ე.წ. ბიზნესშია  ჩართული.

მისივე თქმით, ახალგაზრდების კრიმინალსა და ადამიანების ძარცვაში ჩართვა მათი ცხოვრებისა და მომავლის დამახინჯებაა.

„ქოლ-ცენტრები“ – კრიმინალური ე.წ. „ბიზნესი“, დიდი უბედურებაა ქვეყნისა და მისი საერთაშორისო იმიჯისთვის. ახალგაზრდების კრიმინალსა და ადამიანების ძარცვაში ჩართვა მათი ცხოვრებისა და მომავლის დამახინჯებაა. ყველამ ვიცით, რომ ასეთი სტრუქტურები მთავრობისა და ხელისუფლების მფარველობის გარეშე ვერ იარსებებს. ყველა დასასჯელია კანონის მთელი სიმკაცრით, ვინც ამ სქემაშია ჩართული, მონაწილეობს, მფარველობს, ან იცის და ჩუმადაა. თუმცა, რა გასაკვირია, პრემიერის ოფისში, კანცელარიაში, ბოტებისა და ტროლების ფაბრიკაა გახსნილი“, – აღნიშნავს ხაზარაძე.

საზოგადოებრივი მოძრაობა „ხალხის ძალა“ განცხადებას ავრცელებს, რომელსაც „ჯორჯიან თაიმსი“ უცვლელად გთავაზობთ:

„გვინდა გამოვხატოთ აღშფოთება ევროპარლამენტში გამართულ გამოფენასთან დაკავშირებით, რომელიც უხეშად და მიზანმიმართულად შეურაცხყოფს ქრისტიანების რელიგიურ გრძნობებს და არის იმ ფსევდოლიბერალური პროპაგანდის გაგრძელება, რომელიც პრინციპულად მიუღებელია საქართველოს მოსახლეობის უდიდესი უმრავლესობისთვის, საქართველოს ყველა საღად მოაზროვნე მოქალაქისთვის, განურჩევლად რელიგიური კუთვნილებისა.

ჩვენ ვართ ადამიანის უფლებების ერთგული და მიგვაჩნია, რომ მყარად უნდა იყოს დაცული ნებისმიერი ადამიანის უფლება, განურჩევლად მისი ცხოვრების წესისა. თუმცა, ჩვენთვის მიუღებელია ფსევდოლიბერალების მიერ წარმოებული პროპაგანდა, რომელსაც ადამიანის უფლებების დაცვასთან არაფერი აქვს საერთო. რაც შეეხება ევროპარლამენტში გამართულ გამოფენას, ის პროპაგანდაზე ბევრად მეტია და თავად უხეშად ლახავს ადამიანის უფლებებს. ადამიანების რელიგიური გრძნობების მიმართ სრული შეუწყნარებლობა არის იმის მკაფიო დადასტურება, რომ ფსევდოლიბერალები თანამედროვე პოლიტიკაში ყველაზე არალიბერალურ და არატოლერანტულ პოლიტიკურ მიმდინარეობას წარმოადგენენ. ადამიანების რელიგიური გრძნობების ხელყოფის ესოდენ უხეში გამოვლინება ბოლოს ბოლშევიკებისგან გამოვცადეთ. აღმაშფოთებელია, რომ რასაც სჩადიოდნენ ბოლშევიკები 100 წლის წინ, იმის კიდევ უფრო უხეში რეკონსტრუქცია დღეს ევროპარლამენტის კედლებში ვიხილეთ.

ჩვენ ხშირად გვითქვამს, რომ ევროპა საქართველოს ისტორიული ცივილიზაციური არჩევანია, რაც ისტორიული ფაქტია. თუმცა, გვინდა შეგახსენოთ, რომ ამ ცივილიზაციური არჩევანის მთავარი საფუძველი ქრისტიანობა იყო. საქართველო ყოველთვის იყურებოდა ევროპისკენ, რადგან მასში საკუთარი ეროვნული თვითმყოფადობის ერთ-ერთი უმთავრესი საყრდენის – ქრისტიანული რწმენისა და კულტურის დაცვის შესაძლებლობას ხედავდა. დღეს, როდესაც ევროპარლამენტში ცდილობენ, ევროპა და ანტიქრისტიანული პროპაგანდა ერთმანეთთან გააიგივონ, ეს საქართველოს ცივილიზაციურ არჩევანს პირდაპირ უპირისპირდება, რასაც რეაგირების გარეშე ვერ დავტოვებთ.

ყველას გვახსოვს გზავნილი – ტრადიციებით ევროპაში, რომელსაც ფსევდოლიბერალებიც კი ახმოვანებდნენ. თუმცა, არსებული ტენდენციები გვაძლევს საფუძველს ვივარაუდოთ, რომ როდესაც შესაბამისი გადაწყვეტილების მიღების საკითხი დადგება დღის წესრიგში, ევროპაში არა ტრადიციებით, არამედ მხოლოდ ტრადიციებისა და ტრადიციული ღირებულებების დაგმობით შეიძლება მიგვიღონ. აქვე გავიხსენებთ, რომ რამდენიმე ევროპარლამენტარმა ქედმაღლურად გამოგვიცხადა, კანდიდატის სტატუსს მხოლოდ ჩვენი პირობებით მოგცემთო. ეს განცხადება განსაკუთრებულად ცინიკურად ჟღერს იმ ფონზე, რომ ევროპარლამენტარებმა თავიანთი რეზოლუციებით ბიძინა ივანიშვილისთვის სანქციების შეფარდება და ორი კრიმინალის – სააკაშვილისა და გვარამიას განთავისუფლება მოითხოვეს. ამასთან დაკავშირებით, მკაფიოდ გვსურს განვაცხადოთ, რომ კანდიდატის სტატუსის საპირწონე პირობა ვერც ტრადიციულ ღირებულებებზე უარის თქმა იქნება, ვერც კანონის უზენაესობის დათმობა და ვერც კრიმინალებისთვის ხელისუფლების იძულებით გადაბარება.

ხელისუფლება ყველაფერს აკეთებს კანდიდატის სტატუსის მისაღებად, რისთვისაც ევროკომისიის მიერ განსაზღვრული 12 პუნქტიც ზედმიწევნით სრულდება. თუმცა, მიგვაჩნია, რომ როდესაც საქართველოს ევროპულ ინტეგრაციაზეა საუბარი, ჩვენც უნდა გვქონდეს ჩვენი პირობები და ეს პირობები სწორედ ქართული საზოგადოების ტრადიციულ ფასეულობებსა და სახელმწიფო სუვერენიტეტს უნდა დავუკავშიროთ.

შესაბამისად, საზოგადოებასთან ერთად უნდა დავიწყოთ მსჯელობა იმის დასაზუსტებლად, თუ რა პირობების დაცვას ვითხოვთ ევროკავშირისგან საქართველოს ევროპული ინტეგრაციის გზაზე. თუ ამ პირობებს არ დავაყენებთ, ვერც სუვერენიტეტს დავიცავთ, ვერც ტრადიციულ ფასეულობებს და ვერც მშვიდობას ჩვენს ქვეყანაში“, – ნათქვამია განცხადებაში.