“პირდაპირი ფრენების აღდგენის ან სავიზო რეჟიმის შეცვლის ნაცვლად, ქართველ ხალხს, სავარაუდოდ ის ურჩევნია, რომ პუტინმა რუსეთის მიერ ოკუპირებული საქართველოს ტერიტორიის 20 პროცენტიდან, რუსეთის ჯარი გაიყვანოს” – ასე ეხმაურება  ამერიკის სახელმწიფო დეპარტამენტი კრემლის გადაწყვეტილებას.

რუსეთის პრეზიდენტმა ვლადიმირ პუტინმა საქართველოსთან პირდაპირი ავიამიმოსვლის აკრძალვის გადაწყვეტილება 10 მაისიდან გააუქმა. პუტინმა საქართველოს მოქალაქეებს ასევე სავიზო შეზღუდვებიც მოუხსნა, რის საფუძველზეც, 15 მაისიდან, საქართველოს მოქალაქეებს რუსეთში უვიზოდ 90 დღის განმავლობაში ყოფნა კანონიერად შეეძლებათ.

“ამერიკის ხმისთვის” მიცემულ წერილობით კომენტარში, სახელმწიფო დეპარტამენტის წარმომადგენელი ამბობს, რომ ახლა რუსეთთან დაახლოების დრო არ არის.

“ბევრი დასავლური ქვეყანა, მათ შორის შეერთებული შტატები, რუსულ თვითმფრინავებს საკუთარ საჰაერო სივრცეში შესვლას უკრძალავს. თუ რუსეთსა და საქართველოს შორის პირდაპირი ფრენები აღდგება, ჩვენ შეგვაშფოთებს ის, რომ კომპანიები საქართველოს აეროპორტებში შესაძლოა სანქციების რისკის წინაშე აღმოჩნდნენ ისეთი თვითმფრინავების მომსახურების გამო, რომლებიც იმპორტისა და ექსპორტის კონტროლს ექვემდებარება.

ამ სასტიკ რეჟიმს მთელი დასავლური საზოგადოება დაშორდა – ახლა რუსეთთან ჩართულობის გაზრდის დრო არ არის. პირდაპირი ფრენების აღდგენის ან სავიზო რეჟიმის შეცვლის ნაცვლად, ქართველ ხალხს, სავარაუდოდ ის ურჩევნია, რომ პუტინმა რუსეთის ჯარი გაიყვანოს რუსეთის მიერ ოკუპირებული საქართველოს ტერიტორიის 20 პროცენტიდან”, – აცხადებს სახელმწიფო დეპარტამენტი.

პრემიერ-მინისტრ, ირაკლი ღარიბაშვილის ხელმძღვანელობით, საქართველოს დემოგრაფიულ საკითხთა განმხილველი საბჭოს სხდომა გაიმართა. ამის შესახებ ინფორმაციას მთავრობის ადმინისტრაცია ავრცელებს.

მათივე ცნობით, მთავრობის ადმინისტრაციაში გამართულ სხდომაზე დემოგრაფიული განვითარების ძირითადი მიზნები განიხილეს. საბჭოს წევრებმა იმსჯელეს დემოგრაფიული მდგომარეობის გაუმჯობესების მიზნით შემუშავებულ ინიციატივებზე. ყურადღება გამახვილდა სხვადასხვა პროგრამების შემუშავებასა და დანერგვაზე, ასევე უკვე არსებული პროგრამების დახვეწასთან დაკავშირებით. განიხილეს დასაქმების ხელშეწყობისა და მიგრაციის საკითხები, ასევე იმსჯელეს ჯანდაცვის, სოციალური სფეროსა და განათლების მიმართულებით არსებულ ინიციატივებზე.

როგორც საბჭოს სხდომის დასრულების შემდეგ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ თამარ გაბუნიამ განაცხადა, უმოკლეს ვადაში მომზადდება პაკეტი, რომელიც წარმოდგენილი იქნება მომდევნო სხდომაზე განსახილველად.

„საბჭოს პირველი სხდომა გაიმართა დღეს. წარმოდგენილი იქნა ის ძირითადი ტენდენციები, რაც აღინიშნება დემოგრაფიული კუთხით და ასევე ინიციატივები, რაც უკვე მიმდინარეობს ჯანდაცვის, განათლებისა და სოციალური მიმართულებით. ვიმსჯელეთ საჭირო გაუმჯობესებებზე, საერთაშორისო პრაქტიკაზე და იმ აუცილებელ ცვლილებებზე, რაც ხელს შეუწყობს დემოგრაფიული ტენდენციების გაუმჯობესებას მომავალში. შედგა შეთანხმება, რომ უმოკლეს ვადაში მომზადდეს პაკეტი, რომელიც წარმოდგენილი იქნება მომდევნო სხდომაზე განსახილველად“, – განაცხადა თამარ გაბუნიამ.

მათივე ინფორმაციით, მთავრობის ადმინისტრაციაში გამართულ შეხვედრას საკანონმდებლო და აღმასრულებელი ხელისუფლების წარმომადგენლები, აჭარის ავტონომიური რესპუბლიკის მთავრობის თავმჯდომარე, თორნიკე რიჟვაძე, საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსი, ლერი ბარნაბიშვილი და საქართველოს სტატისტიკის ეროვნული სამსახურის აღმასრულებელი დირექტორის მოადგილე, ირაკლი აფხაიძე ესწრებოდნენ.

როგორც ჩაკეტვაზე, ისე გახსნაზე გადაწყვეტილება ცალმხრივად იყო მიღებული – ჩვენი პარტნიორი ქვეყნების მიერ იმპორტისა და ექსპორტის კონტროლს დაქვემდებარებული სატრანსპორტო საშუალებები საქართველოში შესაბამის ოპერაციებს ვერ განახორციელებენ, ვერ იფუნქციონირებენ,- ამის შესახებ ფინანსთა მინისტრმა ლაშა ხუციშვილმა სსფ-ის მისიის დასრულებასთან დაკავშირებით გამართულ პრესკონფერენციაზე განაცხადა, რითაც რუსეთის მიერ საქართველოს მოქალაქეებისთვის სავიზო რეჟიმის გაუქმებასა და რუსული ავიაკომპანიებისთვის საქართველოში ფრენებზე აკრძალვის მოხსნას გამოეხმაურა.

მისი თქმით, საქართველოს მიერ საერთაშორისო დონეზე დაწესებული რეგულაციების აღსრულების თაობაზე კითხვები არაა.

„ეს არის ცალმხრივად მიღებული გადაწყვეტილება – როგორც ჩაკეტვასთან, ისე გახსნასთან მიმართებით. ამ მიმართულებით მე რაც შემიძლია ვთქვა ისაა, რომ პარტნიორი ქვეყნების მიერ იმპორტისა და ექსპორტის კონტროლს დაქვემდებარებული სატრანსპორტო საშუალებები საქართველოს ტერიტორიაზე აქტივობას ვერ განახორციელებენ. შესაბამისად, შეშფოთებას, რომელიც გამოითქვა, საფუძველი არ აქვს, გამომდინარე იქიდან, რომ კონკრეტული რეგულაციების აღსრულებაზე, რომელიც საერთაშორისო დონეზეა დაწესებული, საქართველოში კითხვები არც აქამდე ყოფილა, არც ახლაა და არ მომავალში არ იქნება“,- განაცხადა ლაშა ხუციშვილმა.

ცნობისთვის, რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა.

ბატონი არახამიას უსამართლო განცხადებები, რომლებიც რეალურად საქართველოს შიდა პოლიტიკაში ჩარევაა, ვერ შეცვლის ქართველი და უკრაინელი ხალხის მეგობრობას, ვერ შეცვლის ჩვენს მხარდაჭერას უკრაინის მიმართ, – ამის შესახებ პარლამენტის ვიცე-სპიკერმა, არჩილ თალაკვაძემ საქართველოს პირველი არხის გადაცემაში „დღის თემა“ განაცხადა.

„საქართველო ყველაფერს აკეთებს უკრაინის მხარდასაჭერად, რაც შეუძლია. ეს არის პოლიტიკური მხარდაჭერა, ეს არის ვიზიტი, რომელიც ჩვენ გვქონდა; საქართველოს საპარლამენტო დელეგაცია იყო მსოფლიოში ერთ-ერთი პირველი, რომელიც კიევში ჩავიდა ჩვენი კოლეგის, ბატონი სტეფანჩუკის მოწოდების შემდეგ. აღარ მინდა, ვისაუბრო ჰუმანიტარულ დახმარებაზე. საქართველომ ყველა პოლიტიკურ პლატფორმაზე დაუჭირა მხარი უკრაინას, მათ შორის, რეზოლუციებს, საერთაშორისო გამოძიების დაწყებას ჰააგაში და რუსეთის გარიცხვას ევროპის საბჭოდან. შესაბამისად, საქართველომ გააკეთა ყველაფერი, რაც შეუძლია და ამაზე იყო არაერთი საერთაშორისო პარტნიორის განცხადება, რომ საქართველო აკეთებს ყველაფერს, რაც შეუძლია. რატომღაც ამ ოპოზიციას და მათ მიერ მართულ ტელევიზიებს ეს განცხადებები უყურადღებოდ რჩებათ, სამაგიეროდ, ძალიან ინტერესდებიან განცხადებებით, რომლებიც საქართველოს მიმართ უსამართლოდ და უსაფუძვლოდ არის გამოთქმული. რაც შეეხება ბატონ არახამიას, მისი უსამართლო განცხადებები, რომლებიც რეალურად საქართველოს შიდა პოლიტიკაში ჩარევაა, ვერ შეცვლის ქართველი და უკრაინელი ხალხის მეგობრობას, ვერ შეცვლის ჩვენს მხარდაჭერას უკრაინის მიმართ“, – განაცხადა თალაკვაძემ.

თალაკვაძის განცხადებით,ძალიან სამწუხარო და სევდიანია, როდესაც უკრაინელი პოლიტიკოსი და მაღალი თანამდებობის პირი ასეთი მძიმე ომის დროს იცლის და საკმაოდ ხშირად აკეთებს განცხადებებს საქართველოს შიდა პოლიტიკურ პროცესებზე.

„ჩვენ სხვას არაფერს არ ვიტყვით ახლა, როდესაც ჩვენი მეგობარი უკრაინა არის ომში, თუმცა, როგორც ჩანს, საქართველოში უფრო უკეთ ესმით, რა მძიმე გამოწვევების წინაშეა ჩვენი მეგობარი უკრაინა და რამდენად მნიშვნელოვანია ერთიანობის შენარჩუნება ახლა, ვიდრე ეს ესმის ბატონ არახამიას, რომელიც უკრაინაშია და პირდაპირ ვალდებულია, მთელი დრო და ენერგია დაუთმოს საკუთარი ქვეყნის სუვერენიტეტისა და ინტერესების დაცვას“, – განაცხადა თალაკვაძემ.