კინორეჟისორი გოგა ხაინდრავა აშშ-ის ელჩის, კელი დეგნანის განცხადებებს სოციალურ ქსელ „ტვიტერში“ ეხმიანება.
„პანდორას ყუთი გახსენით, ქალბატონო დეგნან, ისეთი სიმყრალე ამოვა ინანებთ! აშშ-ის სახელმწიფო მდივანი ცილის მწამებლად აქციეთ! საკუთარი მისია კრახით დაამთავრეთ რეგიონში აშშ-ის ერთადერთ მეგობარ და დასაყრდენ ხალხს შეურაცხყოფა მოგვაყენეთ! უდანაშაულო ადამიანებს ბრალი დასდეთ! სამართლებრივად მოგეკითხებათ!“, – წერს ხაინდრავა.
ომის 408-ე დღეს, უკრაინის თავდაცვის ძალებმა, გასული დღის განმავლობაში, 4 მიმართულებით მოწინააღმდეგის 40-ზე მეტი შეტევა მოიგერიეს, – ინფორმაციას უკრაინის შეიარაღებული ძალების გენერალური შტაბი ავრცელებს.
„მტერი აგრძელებს ძირითადი ძალისხმევის კონცენტრირებას ლიმანის, ბახმუტის, ავდიივკასა და მარინკას მიმართულებით შეტევითი ოპერაციების ჩატარებაზე. ჩვენმა დამცველებმა, ბოლო დღე-ღამის განმავლობაში, 40-ზე მეტი მტრის შეტევა მოიგერიეს,“ – აცხადებენ გენშტაბში.
უწყების ინფორმაციით, ბახმუტის მიმართულებით რუსული ძალები შტურმს განაგრძობენ და ქალაქზე სრული კონტროლის დაწესებას ცდილობენ. სასტიკი ბრძოლები გრძელდება.
ამასთან, გენშტაბში აცხადებენ, რომ რუსულმა ძალებმა უკრაინის ჯარების პოზიციებისა და ქვეყნის დასახლებების სამოქალაქო ინფრასტრუქტურის წინააღმდეგ 5 სარაკეტო და 18 საჰაერო დარტყმა განახორციელეს, მრავალჯერადი სარაკეტო სისტემებიდან კი ცეცხლი 53-ჯერ გახსნეს.
საპასუხოდ, უკრაინის თავდაცვის ძალების ავიაციამ ბოლო დღის განმავლობაში 6 დარტყმა მიაყენა ოკუპანტების პირადი შემადგენლობისა და სამხედრო ტექნიკის კონცენტრაციის უბნებს. გარდა ამისა, გაანადგურეს 3 სხვადასხვა ტიპის უპილოტო საფრენი აპარატი („Orlan-10“, „Supercam“ და „Lancet-3“). უკრაინის სარაკეტო და საარტილერიო დანაყოფებმა კი მოწინააღმდეგის ცოცხალი ძალის კონცენტრაციის 2 ტერიტორიას, საწვავი და საპოხი მასალების 2 საცავსა და რადიოელექტრონული ბრძოლის სადგური გაანადგურეს.
რუსმა ოკუპანტებმა კი, ხერსონის ოლქის სოფელი დაბომბეს, დაშავებულია 4 ადამიანი. ინფორმაციას ამის შესახებ ხერსონის საოლქო სახელმწიფო ადმინისტრაციის ხელმძღვანელი ალექსანდრ პროკუდინი “ტელეგრამის” პირად არხზე ავრცელებს.
მისი თქმით, რუსულმა დრონმა ხერსონის ოლქის სოფელ ზმიევკაში ასაფეთქებელი ისროლა, რის შედეგადაც სხვადასხვა სიმძიმის ჭრილობები 4-მა ადგილობრივმა მოსახლემ მიიღო. ისინი უახლოეს სამედიცინო პუნქტში გადაიყვანეს.
7 აპრილს ქუთაისში +23 გრადუსი და უნალექო დღეა მოსალოდნელი, ღამით კი +8 გრადუსი იქნება. მზიანი დღე იქნება ოზურგეთშიც, სადაც დღისით +22 გრადუსი დაფიქსირდება, ღამით კი +8 გრადუსია ნავარაუდევი. ბათუმშიც გამოიდარებს. დღისით ჰაერი +20 გრადუსამდე გათბება, ღამით კი +10 გრადუსი დაფიქსირდება.
ფოთშიც უნალექო დღეა ნავარაუდები. დღისით +21 გრადუსი დაფიქსირდება, ღამით კი +8 გრადუსია მოსალოდნელი. ზუგდიდში დღისით ტემპერატურა +23 გრადუსს მიაღწევს, ღამით კი +7 გრადუსია ნავარაუდევი. +21 გრადუსია მოსალოდნელი დღისით სოხუმში, ღამით +15 გრადუსი დაფიქსირდება.
მესტიაშიც გამოიდარებს. დღისით +17 გრადუსია, ღამით კი +1 გრადუსი დაფიქსირდება. ამბროლაურში ჰაერი დღისით +20 გრადუსამდე გათბება, ღამით კი +6 გრადუსი დაფიქსირდება.
უნალექო დღეა მოსალოდნელი ჭიათურაში, დღისით +23 გრადუსია მოსალოდნელი, ღამით კი +7 გრადუსი. ახალციხეში იწვიმებს. დღისით ჰაერი +18 გრადუსამდე გათბება, ღამით კი ტემპერატურა +4 გრადუსამდე დაიწევს.
წვიმას ვარაუდობენ ბორჯომშიც, სადაც დღისით +18 ღამის ღამით კი +5 გრადუსი დაფიქსირდება. ბაკურიანში დღისით წვიმა და +15 გრადუსია მოსალოდნელი, ღამით +0 გრადუსი დაფიქსირდება.
გორშიც წვიმაა მოსალოდნელი. დღისით +20 გრადუსია მოსალოდნელი, ღამის განმავლობაში კი +7 გრადუსი დაფიქსირდება. ცხინვალში, დღისით ჰაერს ტემპერატურა +19 გრადუსი იქნება, ღამით კი +6 გრადუსი დაფიქსირდება.
გუდაურში +10 გრადუსი და წვიმაა ნავარაუდევი, ღამით კი ჰაერის ტემპერატურა 0 გრადუსი იქნება. წვიმაა მოსალოდნელი ომალოშიც, სადაც დღისით +9, ღამით კი +2 გრადუსი დაფიქსირდება.
ლაგოდეხში ჰაერის ტემპერატურა დღის განმავლობაში +19 გრადუსი იქნება, ღამით კი 10 გრადუსი დაფიქსირდება. იწვიმებს. თელავში დღისით +217 გრადუსი დაფიქსირდება, ღამით კი +9 გრადუსია ნავარაუდევი. მოსალოდნელია წვიმა. გურჯაანშიც ნალექიანი დღეა ნავარაუდები. დღისით +19 გრადუსი, ღამით კი 8 გრადუსი დაფიქსირდება. სიღნაღში +17 გრადუსი და ნალექიანი დღეა მოსალოდნელი, ღამით +8 გრადუსი დაფიქსირდება.
რუსთავში +19 გრადუსია მოსალოდნელი, ღამით კი +9 გრადუსი დაფიქსირდება. იწვიმებს.
თბილისში ჰაერის ტემპერატურა დღისით +18 გრადუსს მიაღწევს, ღამით კი +10 გრადუსი იქნება. მოსალოდნელია ხანმოკლე წვიმა.
რადიკალური ოპოზიციისთვის ეს საკითხი ერთგვარ ჟანგბადის წყაროდ იქცა და ამის გააქტიურებას და გამოყენებას შეეცდებიან, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა, რითაც გამოეხმაურა ოპოზიციის მოთხოვნას სასამართლო სისტემაში კორუფციის და სხვა სამართალდარღვევების შესწავლისთვის საგამოძიებო კომისიის შექმნის შესახებ.
„ამ საკითხებთან დაკავშირებით კითხვები რა ფორმით შეიძლება ფორმირდეს და პარლამენტმა მეტად შეიძლება წამოიწყოს ამაზე გამოძიება თუ არა – ეს საერთო მსჯელობის საგანი მართლაც შეძლება გახდეს“, – აღნიშნა ქადაგიშვილმა.
სასამართლო სისტემაში კორუფციის და სხვა სამართალდარღვევების შესწავლისთვის ოპოზიცია საგამოძიებო კომისიის შექმნას გეგმავს და პრეზიდენტს პარლამენტის რიგგარეშე სხდომის მოწვევის თხოვნით მიმართავს.
აშშ-ის სახელმწიფო მდივნის, ენტონი ბლინკენის განცხადებით, აშშ-მა მოსამართლეებს მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს, მნიშვნელოვან კორუფციულ საქმიანობაში მათი ჩართულობის მოტივით, სანქციები დაუწესა.
ვერძი
ამ დღეს აქტიურობა უნდა შეამციროთ და მეტი ყურადღება გარშემომყოფების გრძნობებს და მათთან დაკავშირებულ მოვლენებს უნდა დაუთმოთ. ეცადეთ, ადამიანებს თავშეკავებულად და ტაქტიანად მოექცეთ და ნაკლებად აკრიტიკოთ. საეჭვო შეთავაზებებს ნუ დათანხმდებით, თორემ შეიძლება ფინანსურად დაზარალდეთ.
კურო
საკუთარი სისუსტეების გამო შეიძლება ძალიან დაისაჯოთ. ამ დღეს კვებასა თუ ურთიერთობებში სიფრთხილე და თავშეკავება უნდა გამოიჩინოთ. წინააღმდეგ შემთხვევაში კვებითი ინტოქსიკაცია ან იმედგაცრუება გელით. გირჩევთ ახალი კონტაქტები და შეხვედრები შეამციროთ და საყვარელ ადამიანებთან მეტი დრო გაატარეთ. შოპინგისთვის არახელსაყრელი დღეა – მაღაზიებში ვიზიტი სხვა დროისთვის უნდა გადადოთ.
ტყუპები
ამ დღეს ადამიანებს პირველივე შეხედვით ხიბლავთ. თუ სასურველის ასაღებად უკან არაფერზე დაიხევთ და საკმარისად იაქტიურებთ, შეიძლება ძალიან ბევრს მიაღწიოთ. არახელსაყრელი დღეა რთული და ერთფეროვანი სამუშაოსთვის. გირჩევთ, ასეთი საქმეები სხვა დროისთვის დაგეგმოთ.
კირჩხიბი
ემოციები და გრძნობები გავსებთ. ყველაფერი რაც დღეს ხდება, თქვენს ძლიერ რეაქციას იწვევს. ვარსკვლავები გირჩევენ, რომ მუშაობისგან ცოტა შეისვენოთ, ურთიერთობა შეზღთუდოთ და მთელი დღე მარტოობაში გაატაროთ. სიჩუმე და მშვიდი ატმოსფერო სულიერი წონასწორობის აღდგენაში დაგეხმარებათ.
ლომი
გირჩევთ იმ საქმეებს, რომლებიც მოგწონთ ან კარგად გამოგდით, მეტი დრო დაუთმოთ. ეცადეთ გულწრფელი საუბრისთვის დრო გამონახოთ და რაიმე საინტერესო ღონისძიება დაგეგმოთ. გახსოვდეთ, რომ საყვარელ ადამიანებს წვრილმანების გამო გული არ უნდა ატკინოთ.
ქალწული
ყურადღება მიაქციეთ რაზე საუბრობენ თქვენ გარშემო. ახლობელ ადამიანებს ნუ გააკრიტიკებთ და სარკასტულ გამონათქვამებამდე ნუ დაეშვებით. თუ სამსახურებრივ პრობლემებს დამოუკიდებლად ვერ უმკლავდებით, გირჩევთ დახმარებისთვის მეგობრებს ან კოლეგებს მიმართოთ.
სასწორი
იღბლიანი დღეა. წარმატება ფეხდაფეხ დაგყვებათ და ჩანაფიქრის განხორციელებაში გეხმარებათ. ეცადეთ მომენტით ისარგებლოთ და რაც შეიძლება მეტი საქმე მოასწროთ. თავი შეიკავეთ მაღაზიებში სეირნობისა და ფულის ხარჯვისგან. გირჩევთ, საკუთარი პრობლემები ოჯახის წევრებთან განიხილოთ – მათგან კარგ რჩევას დ მხარდაჭერას მიიღებთ.
მორიელი
ბოლო დღეები ძალიან დაძაბული იყო, ამიტომ კარგი იქნება თუ პაუზას აიღებთ და ცოტა დაისვენებთ. გირჩევთ, ჯანმრთელობას მეტი ყურადღება მიაქციოთ და პრევენციული მკურნალობისთვის დრო გამონახოთ. სახლის დალაგება სტრესის მოხსნაში დაგეხმარებათ.
მშვილდოსანი
სჯობს, რთული და საპასუხისმგებლო საკითხები სხვა დროისთვის გადადოთ, დღეს კი მსუბუქი საქმეებით დაკავდეთ. ზამთრის შემდეგ დაქვეითებულ იმუნიტეტს გაძლიერება სჭირდება – მეტი ხილი და ბოსტნეული მიირთვით, ვიტამინები დალიეთ და სუფთა ჰაერზე მეტი იარეთ.
თხის რქა
თუ შესაძლებელია, საქმეების კეთება სამომავლოდ გადადეთ და ენერგიის აღდგენაზე იზრუნეთ. ამისთვის გჭირდებათ სრულყოფილი დასვენება, კარგად გამოძინება და პოზიტიურ ადამიანებთან ურთიერთობა. სახლის დალაგება და ნივთების მოწესრიგება სტრესის მოხსნაში დაგეხმარებათ და კარგ განწყობას დაგიბრუნებთ. მოერიდეთ ფულის უსარგებლო ხარჯვას.
მერწყული
ეცადეთ, საკუთარ თავს და ახლობელ ადამიანებს მეტი დრო დაუთმოთ. მნიშვნელოვანი საკითხებზე გადაწყვეტილების მისაღებად არახელსაყრელი დღეა. ამის ნაცვლად, ჯობს საყვარელ ადამიანს გრძნობებში კიდევ ერთხელ გამოუტყდეთ და ლამაზი სიურპრიზი მოუწყოთ. მოერიდეთ ექსპერიმენტებს და ახალ ნაცნობობას.
თევზები
ენერგიით სავსე ხართ, ამიტომ სამსახურში წარმატებას ადვილად აღწევთ. თუ სურვილის ასრულებას დიდი ხნის განმავლობაში ვერ ახერხებთ, იქნებ მასზე უარის თქმა ან კორექტირება ჯობს – ვარსკვლავები სწორ მიმართულებას გიჩვენებენ.
დღეს, მართლმადიდებელი ეკლესია ყოვლადწმინდა ღვთისმშობლის ხარების დღესასწაულს აღნიშნავს.
ხარება ერთ-ერთი საუფლო დღესასწაულია ქრისტიანულ ეკლესიაში. უძრავი დღესასწაული ძველი სტილით 25 მარტს აღინიშნება, ახალი სტილით კი – 7 აპრილს.
დღესასწაულთან დაკავშირებით, ყველა ტაძარში წირვა-ლოცვა აღევლინება.
ამ დღეს ყოვლადწმიდა მარიამთან ერთად მთელ კაცობრიობას ეუწყა, რომ სახიერმა ღმერთმა ადამიანი სიკვდილისა და ცოდვის სამუდამო ტყვეობისათვის ვერ გაიმეტა და ეშმაკის მონობისაგან მისი გამოხსნა გადაწყვიტა. ეს დღე არის დასაბამი “ჩვენი ცხონებისა და გამოჩინება საუკუნოითგან დამალულისა საიდუმლოისა”.
უფალმა იესო ქრისტეს შობამდე დიდი ხნით ადრე აღუთქვა კაცობრიობას, რომ მხსნელს, მესიას მოუვლენდა, რომელსაც შობდა ქალწული და უწოდებდა სახელად ემანუელს, რომელიც ითარგმანება როგორც “ჩვენთარ არს ღმერთი”. ჭეშმარიტად, ღვთის განკაცებით ჩვენთან არს ღმერთი.
და აი, მიავლინა უფალმა მთავარანგელოზი გაბრიელი გალილეის ქალაქ ნაზარეთში ქალწულ მარიამთან, რომელიც დაწინდული იყო იოსებზე, დავითის მოდგმის შთამომავალზე.
წარუდგა ანგელოზი ქალწულს და უთხრა: “გიხაროდენ, მიმადლებულო, უფალი შენთანაა. კურთხეულ ხარ შენ დედათა შორის”. მარიამი შეაძრწუნა მისმა სიტყვებმა და გაიფიქრა: “ვითარ-მე არს მოკითხვაჲ ესე?” – რას უნდა ნიშნავდეს ეს მოკითხვაო? ანგელოზმა უთხრა: “ნუ გეშინინ, მარიამ, რამეთუ ჰპოვე მადლი წინაშე ღმრთისა. და აჰა, ესერა შენ მუცლად-იღო და ჰშვა ძე და უწოდი სახელი მისი იესუ”.
მარიამის ძეს ღმერთი დავითი საყდარს ანუ ისრაელის სამეფო ტახტისა და იაკობის სახლზე – ისრაელის თორმეტ ტომზე – საუკუნო (მარადიულ) სუფევას აღუთქვამს. მარადიული მხოლოდ ღმერთია, ხოლო “იაკობის სახლი” უფლის მხილველი, მორწმუნე ერია, რომელიც სულით უფალთანაა შეერთებული.
ადამიანის გონებისათვის მიუწვდომელია ქალწულისაგან უმამაკაცოდ შობა. ღვთისმშობელი, რადგან ქალწულების აღთქმა ჰქონდა დადებული, იკითხავს: “ვითარმე იყოს ესე ჩემდა, რამეთუ მე მამაკაცი არა ვიცი?” ანგელოზი მიუგებს: “სული წმიდაჲ მოვიდეს შენ ზედა და ძალი მაღლისა გფარვიდეს შენ”, – და ნიშანსაც აძლევს: მისი ნათესავი, მოხუცი ელისაბედი, უკვე მეექვსე თვეა, რაც მიდგომილია.
მარიამმა, როცა ყოველივე გამოწვლილვით გაიგო, დამორჩილდა, მიენდო უფალს და ღვთის ნებას თავისი ნება შეუერთა: “აჰა მხევალი უფლისაჲ, მეყავნ მე სიტყვისაებრ შენისა”. და მეყსეულად შევიდა სულიწმიდა ქალწულის შეუგინებელ ტაძარში.
რითი დაიმსახურა ქალწულმა მარიამმა ესოდენი მადლი ღვთისა, რომ ადამის მთელი მოდგმიდან სწორედ ის აირჩიეს ღვთის განხორციელების მსახურად? იმით, რომ იგი ყოველი სათნოებით იყო შემკული, რამდენადაც ეს ადამიანის ბუნებისთვისაა შესაძლებელი, და იყო ჭეშმარიტი ტაძარი ღვთისა. განსაკუთრებით აღნიშნავენ მის სიმდაბლესა და სიმშვიდეს – სწორედ ამ სათნოებათა გამო გამოირჩია იგი უფალმა.
ქალწულ ღვთისმშობელზე ასეთი გადმოცემა არსებობს: როდესაც იგი ესაია წინასწარმეტყველის წიგნს კითხულობდა, იქ, სადაც წერია: “აჰა ესერა ქალწული მიუდგეს და შვეს ძე და უწოდონ სახელი მისი ემმანუილ”, – თურმე შეყოვნდა, გაიფიქრა, რა ნეტარი იქნება ის ქალწული, რომელზეც ეს ითქვაო და ღმერთს შეევედრა, მისი ხილვის ღირსი გამხდარიყო, რათა მხევალივით მომსახურებოდა მას.
სწორედ ამ სიმდაბლის გამო იყო, რომ მთავარანგელოზმა ესოდენ სულგრძელად დაუთმო ქალწულ მარიამს, რომელმაც ზეციურ მახარებელს ნათქვამის დამტკიცება და ახსნა მოსთხოვა. არცთუ დიდი ხნის წინ გაბრიელი მღვდელ ზაქარიას გამოეცხადა და შვილის შეძენა ახარა, მაგრამ მღვდელმა არ დაუჯერა, რადგან ისიც და მისი ცოლიც ღრმად მოხუცებულნი იყვნენ. მთავარანგელოზი განურისხდა მას და დაადუმა, ვიდრე წინასწარმეტყველება ახდებოდა. ყოვლადწმიდა ქალწულს კი არამცთუ არ უსაყვედურა, არამედ დიდი კრძალვითა და მოთმინებით დააჯერა იგი და არ განეშორა, სანამ მორჩილებითა და სასოებით აღსავსე სიტყვები არ გაიგონა მისგან. მიზეზი ის გახლდათ, რომ ზაქარიამ თავისი ეჭვით ღრმად დაფარული ურწმუნოება გამოხატა, ყოვლადწმინდა მარიამმა კი – მორჩილება და სიმდაბლე.
ღმერთს არ სურდა, იძულებითა და შიშით აღგვასრულებინოს რომელიმე საქმე ან, პირიქით, დაგვიშალოს რაიმეს კეთება. იგი გულმოწყალეა, სამართლიანი, წმინდა და სურს, ჩვენც ასეთივენი ვიყონ, მაგრამ კი არ გვაიძულებს სიკეთეს, არამედ შეგონებით, დარიგებით, სწავლით, სიყვარულით მივყავართ მისკენ. მას სურს, რომ ჩვენი ნებით აღვასრულებდეთ ყოველ კეთილ საქმეს.
როცა იოსებმა გაიგო, რომ მარიამი ბავშვს ელოდებოდა, გადაწყვიტა მისი ფარულად გაშვება, მაგრამ ძილში უფლის ანგელოზი გამოეცხადა და უთხრა: “იოსებ, ძეო დავითისა, ნუ გაშინებს შენი ცოლის, მარიამის, მიღება, ვინაიდან ის, ვინც მასშია ჩასახული, სულიწმიდისაგან არის. ძეს შობს და დაარქმევ მას სახელად იესოს, ვინაიდან იგი იხსნის თავის ხალხს მათი ცოდვებისგან”.
სანდო ინფორმაცია გვაქვს, რომ ეს პირები ჩართული იყვნენ მნიშვნელოვან კორუფციაში, რომელიც მათ ამჟამინდელ და ყოფილ სასამართლო პოზიციებს უკავშირდება, – ამის შესახებ აშშ-ის სახელმწიფო დეპარტამენტის სპიკერის მოადგილემ, ვედანტ პატელმა განაცხადა.
ვედანტ პატელმა აღნიშნულის შესახებ აშშ-ის მიერ მიხეილ ჩინჩალაძის, ლევან მურუსიძის, ირაკლი შენგელიასა და ვალერიან ცერცვაძის მიმართ სანქციების დაწესებაზე საუბრისას განაცხადა.
როგორც ვედანტ პატელმა ბრიფინგზე განაცხადა, კორუფციამ ძირი გამოუთხარა კანონის უზენაესობას საქართველოში.
„დასაწყისიდანვე ამერიკელი ხალხი, სოლიდარობის ნიშნად, გვერდში ედგა ქართველ ხალხს და მათ სურვილს, იყვნენ თავისუფალი, სუვერენული ქვეყანა მის საერთაშორისოდ აღიარებულ საზღვრებში. ბოლო 30 წლის განმავლობაში ჩვენ გავხდით სტრატეგიული პარტნიორები, ერთად ვმუშაობთ საქართველოს ერთიან ხედვაზე, იყოს სრულიად ინტეგრირებული ევროატლანტიკურ ოჯახში. კონკრეტულად იმ გადაწყვეტილებაზე, რომელიც გუშინ გამოვაცხადეთ, სანდო ინფორმაცია გვაქვს, რომ ეს პირები ჩართული იყვნენ მნიშვნელოვან კორუფციაში, რომელიც მათ ამჟამინდელ და ყოფილ სასამართლო პოზიციებს უკავშირდება. ამ კორუფციამ ძირი გამოუთხარა კანონის უზენაესობას საქართველოში და ძირი გამოუთხარა დემოკრატიულ პროცესებს. მან დააზიანა საზოგადოების ნდობა საქართველოს დემოკრატიული ინსტიტუტებისადმი და ოფიციალური პირებისადმი. როგორც მანამდე ვთქვით, ინფორმაცია სხვადასხვა წყაროდან არის მოპოვებული, მათ შორის ღია წყაროებიდან და ძალიან სანდო ინფორმაცია გვაქვს, რათა დავიჯეროთ, რომ მნიშვნელოვანი ჩართულობა იყო კორუფციაში“, – განაცხადა ვედანტ პატელმა.
ჩემი აზრით, თქვენ გაქვთ უკვე კარგი კანონმდებლობა, რაც აძლევს მთავრობას, ხელისუფლებას საშუალებას, რომ ნახოს, რაში იხარჯება საზღვარგარეთის დახმარება, – ამის შესახებ საქართველოში ამერიკის შეერთებული შტატების ელჩმა, კელი დეგნანმა „იმედის“ ეთერში განაცხადა.
კელი დეგნანმა უცხოური გამჭვირვალობის შესახებ კანონპროექტებთან დაკავშირებით განვითარებულ მოვლენებზე ისაუბრა.
კითხვაზე: „გასულ თვეში ჩვენ ვნახეთ ვნებათაღელვა ორი კანონპროექტის გარშემო, ერთი იყო ამერიკული FARA-ს პირდაპირ თარგმანი და მეორე, როგორც ავტორები ამტკიცებდნენ, ეს იყო შერბილებული ვერსია FARA-სი, რომელიც, გარდა დეკლარირებისა, სხვა ფუნქციასა და შინაარსს არ ითვალისწინებდა. ამ თემაზე მთავარი იარლიყი იყო რუსული კანონი. ბოლო კვირებმა აჩვენა, რომ გამჭვირვალობის თემაზე ანალოგიურ საკითხებზე მსჯელობს არაერთი ქვეყანა, მათ შორის ევროპარლამენტშიც, „ევროპის სახალხო პარტიის“ ინიციატივა ალბათ იცით, რომ სწორედ ამ თემას ეხება. საინტერესოა, ამ საკითხზე თქვენი პოზიცია, რადგან საზოგადოებაში გარკვეული დაბნეულობა გამოიწვია, თუკი ევროპაში და მსოფლიოს სხვადასხვა დემოკრატიულ ქვეყნებში ამაზე მსჯელობენ, მაშინ რატომ არის ეს კანონი რუსული საქართველოში?“ – ელჩმა აღნიშნა, რომ ეს კანონი არ იყო ამერიკული კანონის მსგავსი.
„მე არ ვეთანხმები თქვენს განცხადებას, რომ ეს კანონი იყო მსგავსი ამერიკის კანონის ან სხვა კანონების, რაც განიხილება. ეს იყო კრემლით შთაგონებული კანონი, რომელიც მიზნად იღებდა არასამთავრობო ორგანიზაციებს და იარლიყს მიაწებებდა იმ ადამიანებს, რომლებიც მუშაობენ და მათ ჯაშუშებს და უცხო აგენტებს უწოდებდა. ეს არის ხალხი, რომელიც მუშაობს საქართველოსთვის და არასამართლიანია, დაადანაშაულო ენჯეო, სამოქალაქო საზოგადოება, რომელიც მართლაც მნიშვნელოვან საქმეს აკეთებს, რომ დაეხმარონ თავიანთ თანამოქალაქეებს. თუ შეხედავთ, რა ეფექტი, რა შედეგი ჰქონდა რუსეთში, დაინახავთ, რომ მან გაანადგურა სამოქალაქო საზოგადოება და ჩაახშო ხმა, ეს უნდა საქართველოს? რადგან ამას გააკეთებდა ეს კანონი“, – აღნიშნა კელი დეგნანმა.
ჟურნალისტის კითხვაზე, – „კანონის ავტორები აცხადებენ, რომ ამ კანონში არ იყო სისხლის სამართლის პასუხისმგებლობა, რაც არის რუსულ კანონში, არ ითვალისწინებდა კონკრეტული ორგანიზაციების მარკირებას, არ ითვალისწინებდა აუდიტის შესვლას რამდენიმე თვით და ხელისუფლების მიერ შეჩერებას მათი საქმიანობის. ისინი ამბობდნენ, რომ ეს კანონი ემსახურებოდა მხოლოდ გამჭვირვალობას, ავტორთა ამ არგუმენტებზე დაყრდნობით რა შეგიძლიათ თქვათ?“ – კელი დეგნანმა განაცხადა, რომ მის მიერ წაკითხული კანონი შეავიწროებდა ქართულ ორგანიზაციებს.
„შეიძლება, ჩვენ წავიკითხეთ სხვადასხვა კანონი, რადგან მე რაც წავიკითხე, კანონი აძლევდა საშუალებას იუსტიციის სამინისტროს, ჩაეტარებინა გამოძიება და უფრო შორს წასულიყო. ეს აძლევდა ძალიან დიდი ჩარევის უფლებას იუსტიციის სამინისტროს და მას ექნებოდა იგივე შედეგი, რაც რუსულ კანონს, სადაც დავინახეთ, თუ როგორ დაიხურა ორგანიზაციები, როგორ ჩაჩუმდა. ეს ნამდვილად შეავიწროებდა ქართულ ორგანიზაციებს. ეს ორგანიზაციები საქართველოში მუშაობენ ბევრ სასარგებლო საქმეზე, იქნება ფერმერების, ბიზნესორგანიზაციების თუ სხვა, ყველა მოექცეოდა ამ არეალში.
ქართული კანონმდებლობით უკვე არსებობს გარკვეული რეგულაციები გამჭვირვალობაზე. ყოველ სამ თვეში ერთხელ USAID-ი აწვდის უამრავ დოკუმენტაციას პარლამენტს, სადაც დეტალურად არის აღწერილი, თუ რაში ეხმარება USAID-ის ფინანსური დახმარება. ასე რომ, ეს არ იყო საკითხი. ეს ინფორმაცია ხელმისაწვდომია მთავრობისთვის, საგადასახადოსთვის, ასევე საზოგადოებისთვის. ასე რომ, გამჭვირვალობა აქ არ არის მთავარი საკითხი, რადგან არსებობს რეგულაციები. ეს კანონი, რომელიც ზუსტად ასახავს რუსულ კანონს, მას ექნებოდა გამანადგურებელი შედეგი საქართველოს სამოქალაქო საზოგადოებაზე“, – აღნიშნა ელჩმა.
კითხვაზე, პრობლემა იქნებოდა თუნდაც მეორე კანონის დამტკიცება, რომელიც პირდაპირი თარგმანი იყო ამერიკული FARA-სი, კელი დეგნანმა აღნიშნა, რომ ამერიკული კანონის სამიზნე არ არის სამოქალაქო საზოგადოება.
„უნდა გვახსოვდეს, რომ FARA მიღებული იქნა 1939 წელს ნაცისტების წინააღმდე. ეს არ არის იგივე სიტუაცია. ამერიკული FARA მიემართება ლობისტებს, კომპანიებს, რომლებიც დაქირავებულია უცხო ქვეყნების მიერ, რომლებიც მუშაობენ უცხო ქვეყნების ინტერესებისთვის, მისი სამიზნე ნამდვილად არ არის სამოქალაქო საზოგადოება, ინდივიდი. ძალიან განსხვავებული კონცეფციაა. არ ვიცი, რა საკითხის მოგვარებას ცდილობდნენ. ერთ დღეს ამბობდნენ, ეს არის გამჭვირვალობა. ჩემი აზრით, თქვენ გაქვთ უკვე კარგი კანონმდებლობა, რაც აძლევს მთავრობას, ხელისუფლებას საშუალებას, რომ ნახოს, რაში იხარჯება საზღვარგარეთის დახმარება. მე ვარ პასუხისმგებელი ამერიკის მთავრობის, ამერიკის კონგრესის წინაშე, თუ რაში ეხმარება ეს ჩვენი დახმარება ქართველ ხალხს“, – განაცხადა ელჩმა.
გუშინდელი განცხადების ფონზე, პრაქტიკულად, აშშ-ის სახელმწიფო მდივანმა და ელჩმა დეგნანმა ლინჩის წესი აღადგინეს (ცხადია, გადატანითი მნიშვნელობით) და სწორედ ამ წესით „გაასამართლეს“ და „დამნაშავეებად გამოაცხადეს“ ქართველი მოსამართლეები, რაც კიდევ ერთხელ მიუთითებს მათ „მაღალ დემოკრატიულ სტანდარტებზე“, – ამის შესახებ მოსამართლე ირაკლი შენგელია სოციალურ ქსელში წერს.
როგორც ირაკლი შენგელია აღნიშნავს, აშშ-ის გადაწყვეტილება ვერანაირ მტკიცებულებით სტანდარტს ვერ აკმაყოფილებს.
„მსურს, გამოვეხმაურო აშშ-ის სახელმწიფო დეპარტამენტის გადაწყვეტილებას ჩემზე და ჩემს კოლეგებზე სანქციის დაწესების შესახებ.
უპირველეს ყოვლისა, თვალში საცემია ის ფაქტი, რომ ეს უპრეცედენტო გადაწყვეტილება ვერანაირ მტკიცებულებით სტანდარტს ვერ აკმაყოფილებს; მე განმარტება ამის შესახებ ვერც სახელმწიფო მდივან ბლინკენისგან და ვერც ელჩ დეგნანისგან მოვისმინე, გარდა ზოგადი მითითებისა, რომ არსებობს რაღაც „სანდო ინფორმაცია“, რომელიც თურმე ადასტურებს ჩვენს კორუმპირებულობას.
ასეთი მტკიცებულებები ბუნებაში ვერც იარსებებს, იმ მარტივი მიზეზის გამო, რომ კორუფციის ფაქტები არ არსებობს. მეც და ჩემი სხვა კოლეგები (დასანქცირებულების ჩათვლით) ჩვენს სამსახურებრივ უფლებამოსილებას (მართლმსაჯულების განხორციელების ჩათვლით) ვასრულებდით და ვასრულებთ საქართველოს მოქმედი კანონმდებლობის განუხრელი დაცვით, მხოლოდ საქმეში არსებული მტკიცებულებების სრულყოფილი და ობიექტური განხილვა-შეფასების შედეგად. არავითარი ზეწოლა, უკანონო მანიპულაცია არ განხორციელებულა არასდროს არც ჩემი და არც არავის მხრიდან სხვა მოსამართლეებზე, მათ საქმიანობაში ჩარევის მიზნით.
ეს ყველაფერი მაფიქრებინებს, რომ სახეზეა აპრობირებული სქემა, რომელმაც კარგად იმუშავა, მაგალითად, უკრაინაში, ალბანეთში, სადაც, „რეფორმების“ შირმით, განხორციელდა არასასურველი მოსამართლეებისგან სისტემის წმენდა; სადაც ხელყოფილ იქნა სახელმწიფოების სუვერენიტეტი სასამართლო ხელისუფლების ნაწილში და ამ ხელისუფლების ადმინისტრირება (მოსამართლეთა დანიშვნების ჩათვლით) მთლიანად გადაბარებულ იქნა ე.წ. საერთაშორისო ექსპერტებისგან დაკომპლექტებულ „რევიზორთა“ კომისიაზე.
დღევანდელ მოცემულობაში, ნამდვილად არანაირი სურვილი აღარ გვაქვს, არც მე და არც ჩემს ოჯახს, ვეწვიოთ აშშ-ს. ის იდეალები და დემოკრატიული პრინციპები, რითიც აქამდე თავს იწონებდა ეს ქვეყანა, პრაქტიკულად, ნიველირებულია, აღარ არსებობს. პირიქით, გამრუდებული და დაკნინებულია ყველა ის ღირებულება, რაზეც იდგა ამ ქვეყნის იდეოლოგია და, პირველ რიგში, ეს იყო სამართლიანობა და მის საფუძველზე ადამიანის უფლებების შეუვალი დაცვა, თანსწორუფლებიანობა და ა.შ. ყველაფერ ამაზე ხაზის გადასმით, გუშინდელი განცხადების ფონზე, პრაქტიკულად, აშშ-ის სახელმწიფო მდივანმა და ელჩმა დეგნანმა ლინჩის წესი აღადგინეს (ცხადია, გადატანითი მნიშვნელობით) და სწორედ ამ წესით „გაასამართლეს“ და „დამნაშავეებად გამოაცხადეს“ ქართველი მოსამართლეები, რაც კიდევ ერთხელ მიუთითებს მათ „მაღალ დემოკრატიულ სტანდარტებზე“.
პირადად მე მაქვს ტრადიციული ოჯახი, მყავს შვილები, რომლებიც სამართლიანობისა და პატიოსნების პრინციპებზე აღიზარდნენ და ამ „ლინჩის წესით გასამართლების“ ფონზე და ასევე იმის გათვალისწინებით, რომ აშშ-ში ბოლო პერიოდის ერთ-ერთ მთავარ დემოკრატიულ მიღწევად მიჩნეულია და აპრობირებულია 6 წლის ასაკიდან ბავშვისათვის სქესის შეცვლა, არაფერი მესაქმება, ვინაიდან მსგავსი „ღირებულებები“ ჩემს ოჯახს ნამდვილად არ სჭირდება“, – წერს ირაკლი შენგელია.
პირადად ჩემთან წლების განმავლობაში მოდიოდნენ ამერიკის შეერთებული საელჩოს წარმომადგენლები და მეუბნებოდნენ, რომ მათთვის სასურველი იქნებოდა, იუსტიციის უმაღლეს საბჭოში ყოფილიყო ესა და ეს მოსამართლე, – ამის შესახებ სააპელაციო სასამართლოს უვადო მოსამართლემ, ლევან მურუსიძემ იუსტიციის უმაღლესი საბჭოს სხდომაზე განაცხადა.
„პირადად ჩემთან წლების განმავლობაში მოდიოდნენ ამერიკის შეერთებული საელჩოს წარმომადგენლები და მეუბნებოდნენ, რომ მათთვის სასურველი იქნებოდა, იუსტიციის უმაღლეს საბჭოში ყოფილიყო ესა და ეს მოსამართლე, იუსტიციის უმაღლესი საბჭოს მიერ მიღებული ყოფილიყო ესა და ეს გადაწყვეტილება. კონფერენცია ჩატარებულიყო ამა და ამ დღეს. ამის მტკიცებულებებიც მაქვს. შესაბამისად, როცა ამას საჭიროდ ჩავთვლი, ეს კონკრეტული ჩარევები, როდესაც ხდებოდა საელჩოს მხრიდან, ამასაც საჭიროების შემთხვევაში საზოგადოება ნახავს.
ახლა ხდება ჩვენი ოჯახების მორალური ტერორი საელჩოს მხრიდან, მათ შორის ქართული სტაფის მხრიდან, ჩხეიძის ხელმძღვანელობით, რომელსაც 25-მილიონიანი ბიუჯეტი აქვს, მაგრამ სასამართლოს კეთილდღეობისთვის ამას არ იყენებენ, იყენებენ იმისთვის, რომ სასამართლო სისტემაში მოხდეს დაპირისპირება, რომ მომხდარიყო არაჯანსაღი სიტუაცია. ამას ცდილობდნენ მუდმივად. თვითონ ქალბატონი ელჩი დადიოდა სასამართლო-სასამართლო, ხვდებოდა მოსამართლეებს, რაც მე წარმოუდგენლად მიმაჩნია, რომ გავლენები მოეხდინა სათითაოდ მოსამართლეებზე და შემდეგ ამ მოსამართლეებისგან მომხდარიყო დაპირისპირება სასამართლო სისტემაში. ახლა არასამთავრობო ორგანიზაციების ჟივილ-ხივილია, მხიარულება ისმის მათი, რომ სისტემაში წავა დაპირისპირებაო. იმდენმა მოსამართლემ გამოხატა მხარდაჭერა ჩემს მიმართ, ისე მიდის სიტუაცია, მგონი, ის მიზანი, რასაც სანქციები ითვალისწინებდა, რომ აქ, სასამართლო სისტემაში წავიდოდა არაჯანსაღი პროცესები და შესაბამისად, მოხდებოდა არეულობა და სასამართლო სისტემის დაქვემდებარება ამერიკის შეერთებული შტატების საელჩოსადმი, მგონი, ეს ალბათ, მეეჭვებამ, რო მოხდეს. თუმცა, ვფიქრობ, ისინი ამაზე არ შეჩერდებიან და ხანდახან იმაზეც ვფიქრობ, რომ სიცოცხლის მოსპობაზე წავიდნენ. იმდენად დიდი მიზანი არის მათი, რომ სასამართლო ხელისუფლება ჩაიგდონ ხელში, ეს მიმდინარეობს წლების განმავლობაში და რაც ვერ მოახერხეს იმ არასამთავროებებმა, პარტიებმა, რომ ამოწეურათ იმედი, მიხვდნენ, რომ ვერ შეძლებდნენ სასამართლო ხელისუფლების დაქვემდებარებას, მიტაცებას, ვერ მიაღწევდნენ მიზანს, საბოლოო ჯამში“, – განაცხადა მურუსიძემ.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge