თურქეთი შავი ზღვის საბადოდან მოპოვებული ბუნებრივი აირის პირველი მიწოდებისთვის ემზადება, – ინფორმაციას ბრიტანული გამოცემა „ფაინენშალ თაიმსი“ ავრცელებს.

საქმე ეხება საქარიას საბადოს, საიდანაც ბუნებრივი აირის მიწოდების დაწყება 14 მაისს დაგეგმილ არჩევნებამდე იგეგმება.

როგორც „ფაინენშალ თაიმსი“ წერს, თურქეთი საჭირო ბუნებრივი აირის დიდ ნაწილს უცხოეთიდან იღებს. თურქეთის მთავრობას იმედი აქვს, რომ „საქარიას“ საბადოდან ბუნებრივი აირის მიღება მნიშვნელოვან ბიძგს მისცემს ქვეყნის ენერგეტიკული სექტორს.

თურქეთის ნავთობის და გაზის სახელმწიფო კომპანია „თურქიშ პეტროლიუმის“ აღმასრულებელი დირექტორის, მელიჰ ჰან ბილგინის თქმით, ამ კვირაში კომპანია შავ ზღვაში მდებარე საბადოს სამი ჭაბურღილიდან დაიწყებს გაზის მიწოდებას. თურქეთი საქარიას საბადოს განვითარებაზე ამერიკულ და ბრიტანულ კომპანიებთან ერთად მუშაობს.

ბილგინის თქმით, სექტემბრიდან, როდესაც საბადოს შვიდივე ჭაბურღილი ამუშავდება, დღე-ღამეში 10 მილიონი კუბური მეტრი ბუნებრივი აირის მოპოვება იქნება შესაძლებელია. ეს თურქეთის მიერ მოხმარებული აირის დაახლოებით 7 პროცენტს შეადგენს.

ამასთან, თურქეთის მთავრობა აღნიშნული საბადოდან მოპოვებული გაზის ნაწილის ექსპორტზე გატანას აპირებს.

„თურქით პეტროლიუმმა“ პროექტ „საქარიაზე“ 1,8 მილიარდი დოლარი უკვე დახარჯა. კომპანიაში იმედი აქვთ, რომ უახლოეს წლებში საბადოდან მოპოვებული ბუნებრივი აირის დღიური მოცულობა გაიზრდება და 40 მილიონ კუბურ მეტრს მიაღწევს.

სუდანში გასამხედროებულ დაჯგუფებასა და ქვეყნის არმიას შორის შეტაკებებს ასამდე ადამიანი ემსხვერპლა, დაჭრილია ათასზე მეტი. არმია და გასამხედროებული დაჯგუფება ვერ თანხმდებიან, თუ როგორ უნდა გადავიდეს ქვეყანა სამოქალაქო მმართველობაზე.

სუდანს სამხედრო გენერლები მას შემდეგ მართავენ, რაც 2019 წელს, სამხედრო გადატრიალების შედეგად, პრეზიდენტი ომარ ალ-ბაშირი დაამხეს.

გერმანიის საგარეო საქმეთა მინისტრის განცხადებით, „დიდმა შვიდეულმა“ უნდა დაუმტკიცოს ვლადიმერ პუტინს, რომ ის ვერ შეძლებს უკრაინაში საკუთარი გეგმების ხორცშესხმას.

ამის შესახებ განცხადება ანალენა ბერბოკმა იაპონიაში, „დიდი შვიდეულის“ წევრი ქვეყნების საგარეო საქმეთა მინისტრების შეხვედრასთან დაკავშირებით გერმანულ მედიასთან ინტერვიუში გააკეთა.

გერმანელი დიპლომატის თქმით, უკრაინამ ზამთარში რუსული შეტევა და ენერგეტიკული კრიზისი სწორედ „დიდი შვიდეულის“ მხარდაჭერით გადაიტანა და აუცილებელია, რომ ეს დახმარება გაგრძელდეს, პუტინმა გააცნობიეროს, რომ ომის გამო დაღლილობისა და გამოფიტვის მიუხედავად, უკრაინაში მისი მიზნები არ შესრულდება.

ჩეხეთის დედაქალაქ პრაღაში მთავრობის საწინააღმდეგო საპროტესტო აქციაზე რამდენიმე ათასი ადამიანი შეიკრიბა. დემონსტრანტებმა მთავრობის გადადგომა და უკრაინის ომის დასრულება მოითხოვეს.

პრაღაში ანტისამთავრობო დემონსტრაცია „ჩეხეთი სიღარიბის წინააღმდეგ“ ორგანიზებული იყო არასაპარლამენტო პოპულისტური პოლიტიკური პარტიის, „უფლება, პატივისცემა, პროფესიონალიზმის“ მიერ.

დემონსტრანტებმა მაღალი ინფლაცია და ენერგეტიკის ფასები გააპროტესტეს. აქციის მონაწილეებს ხელში ეჭირათ ბანერები წარწერებით: „როცა უსამართლობა კანონი ხდება, წინააღმდეგობა მოვალეობად იქცევა“, „ხალხს არ უნდა ეშინოდეს თავისი ხელისუფლების, ხელისუფლებას უნდა ეშინოდეს თავისი ხალხის“, „საერთო გაფიცვა“, „მიეცით მშვიდობას შანსი“, „არავითარი ომი“, „გამოდით ნატო-დან“, „ცრუ ხელისუფლება და მედია“.

„ჩვენ არავითარ შემთხვევაში არ გვინდა ომი, ჩვენ გვინდა, დავიცვათ მშვიდობიანი გადაწყვეტა ჩვენს კონტინენტზე. მსოფლიო ძალები ჭადრაკს თამაშობენ, უკრაინა მხოლოდ ერთი უჯრედია და ყველაზე ბოლო, რაც მათ აინტერესებთ, არის ჩვეულებრივი უკრაინელებისა და რუსების ცხოვრება, რომლებიც ყოველდღე კვდებიან“, – თქვა ოპოზიციური პარტიის ლიდერმა, იინდრჟიხ რაიხლმა.