აბსოლუტურად, ძალიან სწორი შეკითხვაა და სწორი აქცენტი გაქვთ დასმული. ნამდვილად, როდესაც მე ვესაუბრები ჩვენს ევროპელ  და ამერიკელ მეგობრებს, მათ ვეუბნები, რომ სტატუსი კიდევ უფრო მეტად მომხიბვლელს გახდის ჩვენთან ერთად თანაცხოვრებას, ჩვენი აფხაზი და ოსი ძმებისთვის და დებისთვის, –  ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტის კითხვის საპასუხოდ განაცხადა, რომელიც შეეხებოდა, რამდენად აქვთ  პარტნიორებს, რომლებიც მხარს უჭერენ საქართველოს ტერიტორიულ მთლიანობას, გაცნობიერებული ის, რომ კანდიდატის სტატუსი შესაძლებელია იყოს კიდევ ერთი მომხიბვლელობა ჩვენი თანამოქალაქეებისთვის, ჩვენი ტერიტორიული მთლიანობის აღდგენის ნაწილში.

მთავრობის მეთაურის თქმით,  ტერიტორიული მთლიანობის, გაერთიანების გარეშე ჩვენ  ვერ ვიქნებით სრულყოფილნი, ვერ შევდგებით, როგორც ერთიანი, ძლიერი სახელმწიფო.

„მე უბრალოდ პერსპექტივას ვერ ვხედავ, რომ აფხაზებმა და ოსებმა ჩვენს გარეშე გააგრძელონ განვითარება. ჩვენ ხომ კარგად ვიცით, რამხელა პრობლემების წინაშე არიან ისინი. ამ დროს ისინი უყურებენ, რამხელა პროგრესი აქვს, ასეთ მოკლე პერიოდში, საქართველოს, მთლიანად ჩვენს, ასე ვთქვათ, კონტროლირებად ტერიტორიაზე. აუცილებელია და მე ვერ წარმომიდგენია ჩვენი ქვეყანა ტერიტორიული მთლიანობის, გაერთიანების გარეშე. ჩვენ უბრალოდ ვერ ვიქნებით სრულყოფილნი, ვერ შევდგებით, როგორც ერთიანი, ძლიერი სახელმწიფო. ამიტომ, ეს უნდა იყოს ყველა პოლიტიკური ძალის, ყველა ჩვენი მოქალაქის მთავარი მიზანი. ეს მინდა ვთქვა და ამიტომ, ჩვენ ამ მიზნისკენ მივდივართ გეგმაზომიერად, ყოველი ჩვენი ნაბიჯი, ყოველი ჩვენი პრაგმატული, გააზრებული, გონიერი მოქმედება და ნაბიჯი გვაახლოებს ამ დიდ მიზანთან.

მე ისიც მინდა ვთქვა, წარმოვიდგინოთ, რომ დღეს ქვეყანა გაერთიანდეს, ჩვენ ხომ ვიცით, საერთოდ, სრულიად სხვანაირი ქვეყანა ვიქნებით ავტომატურად, იმავე წუთს, იმავე წამს გავხდებით სხვანაირი ქვეყანა, სხვანაირი მომხიბვლელობა შეეძინება საქართველოს. ჩვენ შეიძლება გავხდეთ ერთ-ერთი ყველაზე სამაგალითო ქვეყანა მთელს მსოფლიოში, არათუ რეგიონში. ეს მინდა რომ გაიაზროს კარგად ჩვენმა აფხაზმა და ოსმა ძმებმა და დებმა. ჩვენი მშვიდობიანი პოლიტიკა სწორედ ამისკენ არის მიმართული. ჩვენ არავისთან არ გვინდა, არც ომი, არც კონფლიქტი, არც არავითარი დაპირისპირება. ჩვენ გვინდა მშვიდობიანი თანაცხოვრება ერთიან, ძლიერ საქართველოში“, –  განაცხადა ირაკლი ღარიბაშვილმა.

მქონდა მნიშვნელოვანი ორმხრივი შეხვედრებიც ევროპელ ლიდერებთან. მე მათ ანალოგიურად მივაწოდე ინფორმაცია ამ მიღწეულ პროგრესზე და მათგან, ყველა ევროპელი ლიდერისგან, მივიღე დასტური იმის თაობაზე, რომ ისინი მხარს დაუჭერენ საქართველოსთვის კანდიდატის სტატუსის მინიჭებას, – ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებთან საუბრისას განაცხადა.

როგორც ირაკლი ღარიბაშვილმა აღნიშნა, ფორუმში მონაწილეობა იყო ძალიან მნიშვნელოვანი.

„ასევე ვუთხარი, რომ თუ სტატუსს ქვეყანა არ მიიღებს, ეს იქნება აბსოლუტურად გაუგებარი, ეს იქნება შეურაცხყოფა ჩვენი ქართველი ხალხის, ეს იქნება დაუმსახურებელი, ასე ვთქვათ, მორიგი მცდელობა, რომ ქვეყანა დაჩაგრონ ან უსამართლოდ მოექცნენ და მოეპყრონ. ეს იქნება აბსოლუტურად მიუღებელი და რაც მთავარია, ბოლო მესიჯი, რაც მე მათ ვუთხარი, რომ ეს იქნება პირდაპირი გზავნილი, თუნდაც იგივე რუსეთისთვის და სხვა ქვეყნებისთვის, ზოგადად, რეგიონისთვის ან იმ ქვეყნებისთვის, რომლებიც ცდილობენ, რომ დაახლოვდნენ ევროკავშირთან.

ამ საკითხებზე გვქონდა ჩვენ საუბარი და ვფიქრობ, ძალიან მნიშვნელოვანი იყო ჩვენი მონაწილეობა ამ ფორუმში”, – განაცხადა პრემიერმა.

იმის ნაცვლად, რომ პრეზიდენტს მხარი დაეჭირა მთავრობისთვის, ხელისუფლებისთვის, ღიად, დეკლარირებულად გამოეცხადა მხარდაჭერა იმ პროცესისთვის, რომელიც ჩვენ დავიწყეთ შარშან, პარლამენტმა რომ დაიწყო პარლამენტში, უნდა ეთქვა, რომ თუ რაიმეში დაგვჭირდებოდა მისი დახმარება, იგი მზად იქნებოდა. ეს უნდა ყოფილიყო სახელმწიფოებრივად მოაზროვნე  ადამიანის პოზიცია. ჩვენ ნაცვლად ამისა ვნახეთ ოპოზიციის დონეზე დასული პრეზიდენტი, – ამის შესახებ საქართველოს პრემიერ-მინისტრმა ირაკლი ღარიბაშვილმა ესპანეთში, ჟურნალისტებთან საუბრისას განაცხადა.

პრემიერის თქმით, მანაც გაიმეორა ზუსტად ანალოგიური მესიჯები, ის ნარატივი, რომელიც ოპოზიციას ჩამოყალიბებული აქვს.

„რომ ვთქვათ გულწრფელად, ეს პროცესი, რომელიც წამოიწყო სამწუხაროდ და ჩვენ გვაიძულა ქალბატონმა პრეზიდენტმა, რომ ჩვენ ეს ნაბიჯი გადაგვედგა, რა თქმა უნდა, არ არის სასიამოვნო. მით უმეტეს, ჩვენი ქვეყანა, ამდენი გამოწვევების წინაშეა. ბევრად მეტი პრობლემა აქვს ქვეყანას მოსაგვარებელი, ვიდრე ასეთი გაუმართლებელი სიტუაცია და ურთიერთობები პრეზიდენტსა და ხელისუფლებას შორის. მაგრამ ჩვენ სხვა გზა არ დაგვიტოვა ქალბატონმა სალომემ, რომელმაც დემონსტრაციულად, მიზანმიმართულად დაარღვია კონსტიტუცია. ეს იყო გამიზნული პროვოკაცია. მე ამას ვუწოდებ პროვოკაციას. მით უმეტეს, ასეთ ვითარებაში, როცა ქვეყანა ელოდება სტატუსს. რა დროს ასეთი ტიპის, მდარე ხარისხის პროვოკაციაზე წასვლა არის, მე ამ კითხვას ვუსვამ ქალბატონ სალომეს. დროული იყო ეს პროვოკაციები?

როცა ადამიანი განგებ, მიზანმიმართულად არღვევს კანონს. ავიღოთ ნებისმიერი ადამიანი. როცა ადამიანი მიდის და არღვევს მოძრაობის წესებს ქუჩაში. იცი, რომ მის ამ დარღვევას მოჰყვება რეაგირება ბუნებრივია. როცა პრეზიდენტი განგებ, მიზანმიმართულად არღვევს კონსტიტუციას, მან ეს რა თქმა უნდა, იცოდა, რომ ხელისუფლებას მოუწევდა რეაგირება. ჩვენ იძულებული ვიყავით, რომ სამართლებრივი შეფასება მიგვეცა მისი ამ ქმედებისთვის, მისი ამ პირდაპირი დემონსტრაციული ქმედებისთვის. მე ეს ავუხსენი ჩვენს ევროპელ კოლეგებს. რა თქმა უნდა, მათ ეს ესმით, ეს სუფთა სამართლებრივი საკითხი ესმით, მაგრამ ასევე გვეუბნებიან, რომ ეს არ არის ლამაზი. რა თქმა უნდა, ეს ოპტიკას და აღქმებს აფუჭებს. მე ამიტომ ვთქვი, რომ იმის ნაცვლად, რომ პრეზიდენტს მხარი დაეჭირა მთავრობისთვის, ხელისუფლებისთვის, ღიად, დეკლარირებულად გამოეცხადა მხარდაჭერა იმ პროცესისთვის, რომელიც ჩვენ დავიწყეთ შარშან, პარლამენტმა რომ დაიწყო პარლამენტში, უნდა ეთქვა, რომ თუ რაიმეში დაგვჭირდებოდა მისი დახმარება, იგი მზად იქნებოდა. ეს უნდა ყოფილიყო სახელმწიფოებრივად მოაზროვნე  ადამიანის პოზიცია. ჩვენ ნაცვლად ამისა ვნახეთ ოპოზიციის დონეზე დასული პრეზიდენტი. თან რომელი ოპოზიციის – რადიკალური დესტრუქციული ოპოზიციის დონეზე, იმიტომ, რომ მანაც გაიმეორა ზუსტად ანალოგიური მესიჯები, ის ნარატივი, რომელიც ოპოზიციას ჩამოყალიბებული აქვს, რომ თურმე ჩვენ არ ვასრულებთ რეკომენდაციებს, თურმე ჩვენი საგარეო პოლიტიკური კურსი არის გაუგებარი და თურმე ქვეყანა არ იმსახურებდა სტატუსს. აი, ამაზეა საუბარი. მე ეს გულწრფელად ავუხსენი ჩვენს ევროპელ კოლეგებს, მეგობრებს. ყველას ესმის ეს აბსოლუტურად სამართლებრივი მდგომარეობა და ვუთხარი, რომ ეს არის ფორმალური, იურიდიული, თუმცა მნიშვნელოვანი პროცესი, რომ გამოჩნდეს კანონის უზენაესობა, კონსტიტუციის უზენაესობა, რომ ქვეყანაში არავინ არ დგას კანონზე მაღლა – არც პრეზიდენტი, არც პრემიერ-მინისტრი, არც პარლამენტი და არც არავინ. ეს არის ჩემი პასუხი. მე იმედი მაქვს, რომ პრეზიდენტი გააცნობიერებს იმას, რომ ქვეყანას გაცილებით მეტი მნიშვნელოვანი საკითხები აქვს მოსაგვარებელი. თუკი იგი მხარს დაგვიჭერს ჩვენ და გახდება ჩვენი მხარდამჭერი ამ პროცესში, მე მხოლოდ მადლიერებით მივესალმები მის ამ ძალისხმევას, მაგრამ, ისე, როგორც ხდებოდა შარშან, მაგალითად, შარშან, მე შეგახსენებთ, რომ სტატუსის მინიჭებამდეც, როცა იყო მომართვები პრეზიდენტისგან, მე მას ვუშვებდი ყველგან, ჩვენ, მთავრობა ვუგზავნიდით თანხმობის წერილებს. რატომაც არა, თუ კიდევ ერთით მეტი ხმა იქნებოდა ევროპაში, რომელიც ჩვენს სათქმელს იტყოდა, რატომაც არა, ეს მისასალმებელია, მაგრამ მან სამწუხაროდ, რადიკალურად შეცვალა ეს ორიენტირები და მთელი მისი მესიჯბოქსი და ნდობა დაიკარგა. ჩვენ ბუნებრივია, ოპოზიციონერს, ჩვენი მანდატით და ჩვენი  უფლებამოსილების ქვეშ ვერ გავუშვებდით ევროპაში. ზოგადად, როცა შიდა სიტუაციაზე მივაწოდე ინფორმაცია და ვუყვებოდი ვითარებაზე, ამ კონტექსტში მოვუყევი“, – განაცხადა პრემიერმა.

დღეს დავინახეთ, რომ საქართველოს პრეზიდენტის მიმართ აქვთ წმინდა პოლიტიკური მოსაზრებები, არ ადარდებთ, კონსტიტუცია დაირღვა თუ არა. მათი დარდი არის  წმინდად პოლიტიკური, გაბრაზებული და განაწყენებული არიან საქართველოს პრეზიდენტზე, – ამის შესახებ საქართველოს პრეზიდენტის იმპიჩმენტის საკითხზე საკონსტიტუციო სასამართლოში პრეზიდენტის წარმომადგენელმა, მაია კოპალეიშვილმა განაცხადა.

როგორც მაია კოპალეიშვილმა აღნიშნა, „მათი სურვილია, საქართველოს პრეზიდენტი გადააყენონ დაკავებული თანამდებობიდან და არა ის, რომ კონსტიტუცია დაირღვა ან კონსტიტუციის გადარჩენის ინტერესი აქვთ“.

„დიდი იმედი მაქვს, საკონსტიტუციო სასამართლო ყურადღებას მიაქცევს 49-ე მუხლის შინაარსობრივ დატვირთვას 52-ე მუხლთან კავშირში. იმავდროულად, საკონსტიტუციო სასამართლო არ დაუშვებს, რომ საქართველოს პრეზიდენტი იყოს უუნარო პრეზიდენტი საგარეო ურთიერთობებში და მძევალი იყოს მთავრობის ნებართვის. წარმოუდგენელია, სახელმწიფოს მეთაური ელოდებოდეს მთავრობის გადაწყვეტილებას. ჩვენ დღეს გერმანიის პრეზიდენტის მაგალითიც მოგვიყვანეს, რომლის მიხედვითაც, თურმე ქვეყნის შიგნითაც ვერ მიიღებს ვერავის მთავრობის თანხმობის გარეშე. თქვენ ახლა რომ დაადგინოთ საქართველოს პრეზიდენტის მხრიდან კონსტიტუციის დარღვევა, თქვენი ეს დასკვნა ვერანაირად ვერ მოიპოვებს დასაბუთებას, ან ნდობას საზოგადოებაში. თქვენ შეიძლება ძალიან ასიამოვნოთ პოლიტიკურ უმრავლესობას ამ საკითხში, მაგრამ ნდობა თქვენ დასკვნას ვერ ექნება, რადგან ეს არ არის ის კონკრეტული დარღვევა, უხეში დარღვევა, რაც გინდათ ის დაარქვით, რომელმაც კონსტიტუციური წესრიგი არია“, – განაცხადა მაია კოპალეიშვილმა.

მისივე თქმით, პრეზიდენტს კონსტიტუციის დარღვევას ედავებიან, რადგან კონკრეტულად არ მოსწონთ საქართველოს პრეზიდენტი სალომე ზურაბიშვილი, არ მოეწონათ მისი განცხადება.

„ჩვენ ეს კარგად დავინახეთ დღეს, რომ პოლიტიკური უმრავლესობა თუ იქნება გაბრაზებული საქართველოს პრეზიდენტზე, მას შეუძლია, მანიპულირება მოახდინოს კონსტიტუციის ნორმებით. პიროვნული შეუთავსებლობის გამო სხვა გზა ვერ მონახეს პრეზიდენტის წინააღმდეგ და გამოიყენეს იმპიჩმენტის პროცედურა. დიდი იმედი მაქვს, რომ საკონსტიტუციო სასამართლო არ მოექცევა პოლიტიკური პროცესში. საკონსტიტუციო სასამართლოში როდესაც გადმოვიდა ეს საკითხი, შეიძინა სამართლებრივი სივრცე, სადაც არსებობს მოლოდინი, რომ ჯეროვანი პროცედურის დაცვით გამოიკვლევს ამ ყველა სამივე ფაქტს, ფაქტობრივ გარემოებას, შეაფასებს კონსტიტუციის შესაბამისი ნორმებთან მიმართებით და ისე მიიღებს გადაწყევტილებას“, – განაცხადა კოპალეიშვილმა.

როცა მიანიჭეს სტატუსი მოლდოვას, უკრაინას და ბოსნია ჰერცოგოვინას და არა საქართველოს, ამით ყველაფერი არის ნათქვამი, – ამის შესახებ საქართველოს პრემიერ-მინისტრმა ირაკლი ღარიბაშვილმა ესპანეთში, ჟურნალისტებთან საუბრისას განაცხადა.

პრემიერის თქმით, საქართველო წინ უსწრებს იმ ქვეყნებს, რომლებიც დღეს არიან სტატუსის ქვეშ.

„მე ვისაც შევხვდი და ვისაც ვესაუბრე, მინდა აღვნიშნო, რომ თუნდაც ამ პანელურ დისკუსიაში ჩვენს მიმართ ძალიან მკაფიოდ გამოვიდნენ ევროპული ქვეყნები და მკაფიოდ დაგვიჭირეს მხარი, რომ არ შეიძლება იმ შეცდომის განმეორება, რომელიც შარშან დაუშვეს. არ შეიძლება გაყოფა. მითუმეტეს, საქართველო მართლაც არის თვალსაჩინო მაგალითი რეფორმების განვითარების კუთხით. მე აღარ მინდა გავიმეორო, რომ ქვეყანა წინ უსწრებს იმ ქვეყნებს, რომლებიც დღეს არიან სტატუსის ქვეშ. უფრო მეტიც, ბევრი მიმართულებით ჩვენ ევროკავშირის წევრებსაც კი ვუსწრებთ ჩვენი მიღწევებით. ასე, რომ მე ამაზე აღარ მინდა სპეკულირება.

ჩვენ ვიზიარებთ, რომ დამსახურებაზე დამოკიდებული შეიძლება იყოს დასაბუთება, მაგრამ მთავარი ჩვენ კარგად ვიცით, ეს არის პოლიტიკური გადაწყვეტილება. კიდევ ვიმეორებ – როცა მოლდოვას და უკრაინას მიანიჭეს სტატუსი და ბოსნია ჰერცოგოვინას და არა საქართველოს, ამით ყველაფერი არის ნათქვამი. აიღეთ პერფორმანსი, ანუ ჩვენი მიღწევები და შესრულება, ნებისმიერ სფეროში, აიღეთ ამ ჩამოთვლილი ქვეყნების შესრულება ნებისმიერ სფეროში და შეადარეთ ჩვენი ქვეყანა და ეს ქვეყნები. თუ დამსახურებაზეა საუბარი.

პოლიტიკური თვალსაზრისით რა თქმა უნდა, ეს არის გამართლებული და ეს უნდა იყოს პოლიტიკური გადაწყვეტილება. მე ამიტომ ვამბობ და ვიმეორებ – ეს დიახაც, არის პოლიტიკური გადაწყვეტილება”, – განაცხადა პრემიერმა.