“თავისი გამოსვლით ზურაბიშვილმა კიდევ ერთხელ დაადასტურა, რომ როგორც პრეზიდენტი, ის საერთოდ გასულია საკონსტიტუციო სივრციდან”, – ასე გამოეხმაურა მმართველი გუნდის წევრი, ირაკლი ქადაგიშვილი საკონსტიტუციო სასამართლოს გადაწყვეტილებასთან დაკავშირებით პრეზიდენტის მიმართვას.

მისივე თქმით, პრეზიდენტის განცხადება ამბიციებს შეწირული ადამიანის განცხადებაა.

„მოსამართლეებს, რომლებმაც ეს გადაწყვეტილება მიიღეს, აბულინგებს. ეს არის სწორედ უსაფუძვლო ამბიციებს შეწირული ადამიანის განცხადება, რომელიც აღარც კონსტიტუციას ცნობს, აღარც სახელმწიფოს და მხოლოდ თავისი ამბიციების ანაბარაა მიბარებული „ნაციონალურ მოძრაობას“, – აღნიშნა ირაკლი ქადაგიშვილმა.

შიდასახელმწიფოებრივი მნიშვნელობის შეკვეთილი-ქობულეთი-ჩაქვი-მახინჯაურის საავტომობილო გზის კმ0+400 მონაკვეთზე, შეკვეთილში, მდინარე ნატანებთან არსებული დაზიანებული ხიდის აღდგენის სამუშაოები დასრულდა, – ამის შესახებ ინფორმაციას საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტი ავრცელებს.

მათივე ცნობით, ხიდზე ავტოტრანსპორტის მოძრაობა ორმხრივ რეჟიმში აღდგა.

აღნიშნულ მონაკვეთზე ძლიერი წვიმის გამო 3 ოქტომბერს ხიდის სავალი ნაწილი დაზიანდა და ავტოტრანსპორტის მოძრაობა აკრძალული იყო.

საკონსტიტუციო სასამართლოს გადაწყვეტილების სამართლებრივ შეფასებას ნამდვილად არ ვაპირებ – ყველას, პირველ რიგში, უმაღლესი თანამდებობის პირების მოვალეობა და ვალდებულებაა, რომ დაიცვას კანონი, – ამის შესახებ გარემოს დაცვისა და სოფლის მეურნეობის მინისტრმა, ოთარ შამუგიამ პრეზიდენტის საიმპიჩმენტო წარდგინებასთან დაკავშირებით საკონსტიტუციო სასამართლოს გადაწყვეტილებაზე საუბრისას განაცხადა.

მისივე თქმით, კანონის უზენაესობა არის ის მთავარი პრინციპი, რომლითაც ქვეყანამ ევროპის გზაზე უნდა იაროს.

„საკონსტიტუციო სასამართლომ მიიღო გადაწყვეტილება კონსტიტუციის დარღვევასთან დაკავშირებით, რაც, რა თქმა უნდა, სამწუხაროა, ვინაიდან, ჩვენ ვაშენებთ სამართლებრივ სახელმწიფოს და ყველას, მათ შორის, რა თქმა უნდა, პირველ რიგში, უმაღლესი თანამდებობის პირების მოვალეობა და ვალდებულებაა, რომ დაიცვას კანონი. კანონის უზენაესობა არის სწორედ ის მთავარი პრინციპი, რომლითაც ჩვენ უნდა ვიაროთ ევროპის გზაზე და ევროინტეგრაციის პროცესში ეს არის მნიშვნელოვანი“, – განაცხადა შამუგიამ.

ახლა მუქარებს ჯობდა, [სალომე ზურაბიშვილს] ცოტა წინდახედულობა გამოეჩინა, როდესაც „გაბედულ გადაწყვეტილებას” იღებდა, რომ კონსტიტუციასთან წინააღმდეგობაში დამდგარიყო, – ამის შესახებ საპარლამენტო უმრავლესობის დეპუტატმა, მიხეილ სარჯველაძემ საკონსტიტუციო სასამართლოს გადაწყვეტილებასთან დაკავშირებით პრეზიდენტის მიმართვის შეფასებისას განაცხადა.

მისივე თქმით, ასეთი განცხადება და საკონსტიტუციო სასამართლოზე და მის მოსამართლეებზე უსაფუძვლო თავდასხმა, პრეზიდენტს არ შეშვენის და ზურაბიშვილს “მცირედი პატივისცემა მაინც უნდა ჰქონდეს, საკუთარი თავისადმი, საკუთარი ინსტიტუტისადმი და ქვეყნისადმი, რომელსაც ის წარმოადგენს”.

როგორც სარჯველაძემ აღნიშნა, სალომე ზურაბიშვილს ძალიან კარგად ესმის, რომ ის მართალი არ იყო და აბსოლუტურად მართებულია ის გადაწყვეტილება, რაც საკონსტიტუციო სასამართლომ მიიღო.

“რასაკვირველია, არავითარ შემთხვევაში არ შეიძლება მისაღები იყოს ასეთი ტიპის რიტორიკა. ამასთან, უნდა გვესმოდეს, რომ თვითონ პრეზიდენტმა გადასარევად იცის, რომ ამ კონკრეტულ შემთხვევაში ის მართალი ნამდვილად არ ყოფილა, რომ საკონსტიტუციო სასამართლოს განსხვავებული გადაწყვეტილება მიეღო. ამიტომ, რა თქმა უნდა, მეტად თავშეკავებული უნდა იყოს იმ ფონზე, როდესაც ცოტა მეტი წინდახედულობაც მართებდა, როდესაც იმ გადაწყვეტილებას იღებდა, რამაც საბოლოო ჯამში იმპიჩმენტის პროცედურების დაწყება გვაიძულა. არაფერი მოულოდნელო ასეთ თავდასხმაში არ ყოფილა, იმიტომ, რომ სხვა აღარაფერი დარჩენია თუ არა ასეთი განცხადებების კეთება, რომელიც ზედმიწევნით პოლიტიკურია,” – განაცხადა სარჯველაძემ.

რაც შეეხება პრეზიდენტის განცხადების იმ ნაწილს, რომ პარლამენტშიც მივა, “იმ პატარა კაცებთან” რომ დადგეს, სარჯველაძის შეფასებით, ეს ერთ-ერთი ყველაზე მდაბიო განცხადება იყო, რაც პრეზიდენტმა გააკეთა.

“ეს განცხადება არის ყველაზე მდაბიო და პრეზიდენტის ინსტიტუტთან შეუფერებელი. ახლა მუქარებს ჯობდა ცოტა წინდახედულობა გამოეჩინა, როდესაც “გაბედულ გადაწყვეტილებას” იღებდა, რომ კონსტიტუციასთან წინააღმდეგობაში დამდგარიყო,” – განაცხადა სარჯველაძემ.

„აშკარად ეტყობოდა ტონალობაში პრეზიდენტ ზურაბიშვილს, რომ ისეთ ჰონორზე ვეღარ იყო, როგორც ერთი თვის წინ“, – ამის შესახებ მედიასთან „ხალხის ძალის“ ერთ-ერთმა ლიდერმა, დეპუტატმა გურამ მაჭარაშვილმა განაცხადა, იმპიჩმენტთან დაკავშირებით სალომე ზურაბიშვილის განცხადების შეფასებისას.

გურამ მაჭარაშვილმა ასევე თქვა, რომ სალომე ზურაბიშვილი რეალობას ნელ-ნელა შეეგუება.

„არსად არ მივდივარ, სადაც მთელი ცხოვრება ვიყავი, იქ უნდა ვიყოო – მე მგონი, ჰგონია, რომ მთელი ცხოვრება პრეზიდენტი იყო და ასე ყოფნა უნდა სულ. რეალობას ნელ-ნელა შეეგუება. აშკარად ეტყობოდა ტონალობაში, რომ ისეთ ჰონორზე ვეღარ იყო, როგორც ერთი თვის წინ. რას ნიშნავს, ახლა ნახოს „ოცნებამ“, რომელი სალომე ზურაბიშვილი ჯობდაო? იარაღს აიღებს ხელში და პარლამენტში შემოვარდება? თუ იმ უფლებამოსილებებს არ იყენებდა, რაც აქამდეც ჰქონდა ან ახლა, როგორც უნდა, ისე გამოიყენებს?“, – განაცხადა გურამ მაჭარაშვილმა.