ისრაელის თავდაცვის ძალების ცნობით, ღაზის სექტორზე ღამით განხორციელებული დარტყმის შედეგად, დაჯგუფება „ჰამასის“ ერთ-ერთი მეთაური მოკლეს. კერძოდ, თავდაცვის ძალების ცნობით, დარტყმის სამიზნე დაჯგუფების შტაბი გახდა, საიდანაც „ჰამასი“ თავის საჰაერო მოქმედებებს მართავს. იერიშის შედეგად მოკლულია „ჰამასის“ საჰაერო ძალების მეთაური მურად აბუ მურადი.

ისრაელის თავდაცვის ძალების ცნობით, აბუ მურადი აქტიურად მონაწილეობდა ისრაელზე განხორციელებული თავდასხმისას ტერორისტების ხელმძღვანელობაში, მათ შორის იმ თავდამსხმელების, რომლებიც ისრაელში საჰაერო გზით დელტაპლანებით შეიჭრნენ.

ამას გარდა, ისრაელის თავდაცვის ძალების ინფორმაციით, ღამით ღაზაში „ჰამასის“ ათობით ობიექტი დაბომბეს.

აშშ-ის სახელმწიფო მდივანი ენტონი ბლინკენი საუდის არაბეთში ჩავიდა. ამის შესახებ BBC წერს.

გამოცემის ინფორმაციით, ეს მეხუთე არაბული ქვეყანაა, რომელიც ბლინკენმა ბოლო დღეებში მოინახულა და მისი მიზანი „ჰამასსა“ და ისრაელის კონფლიქტის რეგიონის სხვა ქვეყნებში გაფართოების პრევენციაა. ბლინკენს სურს არაბულმა ქვეყნებმა დაგმონ „ჰამასის“ ქმედებები და თავშეკავება გამოიჩინონ ისრაელის პასუხთან დაკავშირებით.

თუმცა, საუდის არაბეთის საგარეო საქმეთა სამინისტროში ისრაელს აკრიტიკებენ და ამბობენ, რომ ისინი ღაზაში დაუცველ მშვიდობიან მოსახლეობას ესხმიან თავს.

საუდის არაბეთის შემდეგ ბლინკენი ეგვიპტეში ჩავა, სადაც ადგილობრივ მთავრობასთან ღაზას მოსახლეობისთვის ჰუმანიტარული დერეფნის გახსნასა და უსაფრთხო ზონების დაწესებაზე იმსჯელებს.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.

ღაზის სექტორში 7 ოქტომბრის შემდეგ ისრაელის ავიაიერიშებს 1 900 ადამიანი ემსხვერპლა, 7 696 კი, დაშავდა. ამის შესახებ ინფორმაციის ღაზის სექტორის ჯანდაცვის სამინისტრო ავრცელებს.

გავრცელებული ცნობით, დაღუპულთა შორის 614 ბავშვი და 370 ქალია.

ამასთან, ისრაელის თავდაცვის ძალებში განაცხადეს, რომ ისრაელის ტერიტორიაზე 1 500-მდე პალესტინელი ტერორისტი მოკლეს.

ასევე ვრცელდება ინფორმაცია, რომ მდინარე იორდანეს დასავლეთ ნაპირზე მსხვერპლთა რიცხვი 49-ს აღწევს, დაშვებულების რაოდენობა კი, 950-ს აჭარბებს.

ჯანდაცვის მსოფლიო ორგანიზაცია უერთდება გაერთიანებული ერების ორგანიზაციას და მოუწოდებს ისრაელს, დაუყოვნებლივ გააუქმოს ბრძანება ღაზის სექტორიდან 1 მილიონზე მეტი ადამიანის ევაკუაციის შესახებ, – ამის შესახებ ინფორმაციას ჯანდაცვის მსოფლიო ორგანიზაცია ავრცელებს.

როგორც გავრცელებულ ინფორმაციაშია აღნიშნული, მასობრივი ევაკუაცია დამღუპველი იქნება პაციენტებისთვის, ჯანდაცვის მუშაკებისთვის და მშვიდობიანი მოსახლეობისთვის, რომლებიც დარჩებიან ან დაკავებულები არიან.

„მოსახლეობის თითქმის ნახევარი 18 წლამდე ასაკისაა. საკვების, სუფთა წყლის, ჯანდაცვის სერვისების და თავშესაფრის გარეშე მარაგების შემცირებით ბავშვები, მოზარდები, ხანდაზმულები დაავადებების გაზრდილი რისკის ქვეშ იქნებიან.

პალესტინის ჯანდაცვის სამინისტრომ WHO-ს აცნობა, რომ შეუძლებელია საავადმყოფოებიდან დაუცველი პაციენტების ევაკუაცია. დაუცველ პაციენტებს მიეკუთვნებიან ისინი, ვინც მძიმედ არიან დაშავებულები და სიცოცხლის გადასარჩენად გადაუდებელს სერვისს საჭიროებენ.

საომარი მოქმედებების ფონზე პაციენტების გადაადგილება მათ სიცოცხლეს რისკის ქვეშ აყენებს. ღაზის ჩრდილოეთით ნაწილში ორ საავადმყოფოში, რომლებიც აგრძელებენ ფუნქციონირებას, მნიშვნელოვნად გადააჭარბა 760-საწოლზე გათვლილ შესაძლებლობებს. საუბარია ათასობით პაციენტზე, რომლებიც მკურნალობენ საავადმყოფოებში, ასობით არის მძიმედ დაჭრილი და 100-ზე მეტი, რომლებიც საჭიროებენ კრიტიკულ მკურნალობას.

ევაკუაციის შეკუმშული ვადები, რთული სატრანსპორტო ლოგისტიკა, დაზიანებული გზები და უპირველეს ყოვლისა, ტრანსპორტირების დროს დამხმარე ძალის ნაკლებობა ზრდის მათ გადაადგილების სირთულის ხარისხს. სამედიცინო საშუალებების ნაკლებობა უკვე საფრთხეს უქმნის პაციენტებს და აფერხებს ჯანდაცვის მუშაკებს. მარაგის ძირითადი ნაწილი, რომელიც ჯანდაცვის მსოფლიო ორგანიზაციის მიერ წინასწარ იყო ღაზაში გაგზავნილი, უკვე გამოყენებულია.

9 ოქტომბერს, ჯანმოს გენერალური დირექტორი, ტედროს ადანომ გებრეიესუსი შეხვდა ეგვიპტის პრეზიდენტს, აბდელ ფატაჰ ელ-სისის. ჯანდაცვის მსოფლიო ორგანიზაციამ მოამზადა სამედიცინო მარაგი დუბაიში მდებარე ლოგისტიკურ ცენტრში და მზად არის მიაწოდოს ეგვიპტეს, არეშში – რაფაჰიდან სულ რაღაც 20 წუთის სავალზე დაშვების ნებართვის მიღებისთანავე. მარაგი საკმარისი იქნება 300000-ზე მეტი დაჭრილი და სხვადასხვა დაავადების მქონე პაციენტებისთვის.

ჯანდაცვის მსოფლიო ორგანიზაცია მოითხოვს დაუყოვნებლივ შეიქმნას ჰუმანიტარული დერეფანი მედიკამენტების შემდგომი და უსაფრთხო მიწოდებისთვის ღაზის ჯანდაცვის დაწესებულებებისთვის. ძალაშია მოწოდება ჰუმანიტარული ხელმისაწვდომობის შესახებ სიცოცხლის გადარჩენის მარაგებისა და საწვავის, წყლისა და საკვების მიწოდების შესახებ, სამოქალაქო პირების, ჯანდაცვის მუშაკებისა და ჯანდაცვის ინფრასტრუქტურის საერთაშორისო ჰუმანიტარული სამართლის მიხედვით დაცვის მიზნით და საბოლოოდ, საომარი მოქმედებებისა და ძალადობის დასასრულებლად“, – აღნიშნულია გავრცელებულ ინფორმაციაში.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.

სამხრეთ ლიბანში სააგენტო Reuters-ის ჟურნალისტი მოკლეს. ამის შესახებ Reuters-ი საგანგებო განცხადებაში წერს.

„დიდ მწუხარებას გამოვთქვამთ ჩვენი ვიდეო ოპერატორის, ისამ აბდალას გარდაცვალების გამო. ისამი „როიტერსის“ ჯგუფის წევრი იყო ლიბანში, რომელიც პირდაპირ სიგნალს გვაწვდიდა ეპიცენტრიდან. ამ საშინელ დროს ჩვენი ფიქრები მის ოჯახთანაა“, – აღნიშნულია Reuters-ის განცხადებაში.

გამოცემის ცნობით, ასევე დაშავებულია Reuters-ის ორი ჟურნალისტი, რომელთაც სამედიცინო დახმარება დასჭირდათ.