ბრიტანული გაზეთის „ფაინენშელ თაიმსის“ (Financial Times) მიერ გამოქვეყნებულ სტატიაში სათაურით „ევროკავშირი აქტიურდება, რომ ხელი შეუშალოს რუსეთის მცდელობებს სანქციებისაგან თავის არიდებაში“ (ავტორი – ლაურა დიუბუა) განხილულია საკითხი ჩინური კომპანიებისათვის (პირველად რუსეთ-უკრაინის ომის დაწყების შემდეგ) სავარაუდო სანქციების შემოღების თაობაზე.

გთავაზობთ პუბლიკაციის შინაარსს: ევროკომისიამ პირველად შეიტანა სანქციების სიაში ჩინეთის შვიდი კომპანია, რომლებიც რუსეთს მოწყობილობებსა და დანადგარებს აწვდიან – ისეთების, რომლებიც შეიძლება სამხედრო სფეროში იქნეს გამოყენებული. კომპანიების ჩამონათვალს, რომელიც ჯერ-ჯერობით არ მჟღავნდება, ევროკავშირის წევრი ქვეყნები უახლოეს დღეებში განიხილავენ. სხვათა შორის, ევროკომისიის მიერ „სადამსჯელო“ სიაში შეტანილი ჩინური ფირმებიდან რამდენიმე უკვე აშშ-ის მიერ არის უკვე „დასჯილი“, მაგრამ ევროკავშირი ერიდებოდა პეკინთან კონფრონტაციას და ამიტომ თავს იმართლებდა განცხადებით – მოსკოვისათვის ჩინეთის მხრიდან იარაღის მიწოდების ფაქტები გამოვლენილი არ არის და ამიტომ სანქციების დაწესება მცდარი იქნებოდა..

იმის გათვალისწინებით, რომ დღეს რუსეთის სამხედრო-სამრეწველო კომპლექსის ქარხნებს ჰაერივით სჭირდებათ ელექტრონული კომპონენტები („ჩიპები“, ანუ ინტეგრალური სქემები) რაკეტული და სხვა სახის იარაღის საწარმოებლად, ამიტომ უკრაინისათვის კარგი მხარდაჭერა იქნება, თუ სანქცირების სიაში მესამე ქვეყნების კომპანიებიც იქნებიან შეტანილნი, რომლებიც თავს არიდებენ სავაჭრო შეზღუდვებს და აკრძალულ კომპონენტებით რუსულ საწარმოებს ამარაგებენ. გარდა ამისა, სანქციები შეიძლება სატრანზიტო ქვეყნებსაც შეეხოს. თუმცა არსებობს განსხვავებული აზრიც – კრიტიკოსების თქმით, შეიძლება ის ქვეყნები ევროკავშირს განუდგნენ, რომელთა მეშვეობითაც, ტრანზიტით, ასეთი პროდუქცია რუსეთში შედის. „არ არის გამორიცხული, რომ ისინი რუსეთისაკენ ან ჩინეთისაკენ უფრო მეტად გადაიხარონ“, – ამბობს ერთ-ერთი ევროპელი დიპლომატი. რა თქმა უნდა, გადაწყვეტილება ევროკავშირის ყველა წევრმა – 27 სახელმწიფომ – უნდა მოიწონოს და დაეთანხმოს. იმ შემთხვევაში, თუ კონსენსუსი მიღწეული იქნება, ევროკავშირის მიერ მესამე ქვეყნების „დასჯა“ უკვე ტრადიციული გახდება. განსაკუთრებით ჩინეთისა, საიდანაც რუსეთში ბევრი აკრძალული პროდუქცია შედის. იყო წინადადება, რომ სანქციების სიაში შეტანილიყო აკრძალვები რუსეთის ატომური სექტორის წინააღმდეგ, მაგრამ ბოლო ეტაპზე აღარ გადაწყვიტეს. რასაკვირველია, მოსალოდნელია ცხარე დისკუსიები. როგორც გამოცდილება გვიჩვენებს, მსგავსი წინადადებები დეტალურად უნდა იქნეს შესწავლილი და აწონილ-დაწონილი“, – ამბობს ევროკავშირის დიპლომატიური მაღალჩინოსანი, რომელმაც ვინაობის გამხელა არ ისურვა.

წყარო

გერმანული რადიოსადგური „დოიჩე ველე“ (Deutsche Welle – „გერმანული ტალღა“) აქვეყნებს ამერიკულ გაზეთ „ვაშინგტონ პოსტში“ (The Washington Post) გამოქვეყნებული სტატიის მიმოხილვას სათაურით „კიევი შიშობს, რომ შეიძლება დასავლეთს უკრაინის არმიის შეტევის „იმედები გაუცრუვდეს“.

უკრაინას წარმატებული კონტრშეტევა ჭირდება, რომ დასავლეთს აჩვენოს – კიევი ღირსია იმისა, რომ დახმარება გაუგრძელდეს და თავი აარიდოს მოსკოვთან იძულებით მოლაპარაკებას“, – ნათქვამია ამერიკული გაზეთის პუბლიკაციაში.

უკრაინის არმიის სავარაუდო დარტყმების მიმართულებებია განხილული, თუმცა იქვე აღნიშნულია, რომ დასავლეთის მხრიდან კონტრშეტევის მოლოდინს თან გადაჭარბებული აჟიოტაჟი ახლავს.

„ჩვენი კონტრშეტევის მიმართ მსოფლიოში მოლოდინები ძალიან გადაჭარბებულია… ადამიანთა უმრავლესობა ჩვენგან რაღაც გრანდიოზულს ელოდება“, – ამბობს თავდაცვის უწყების მეთაური ალექსი რეზნიკოვი ინტერვიუში, რომელიც მას აშშ-ის გაზეთის კორესპონდენტებმა ჩამოართვეს, „ასეთი აჟიოტაჟური მოლოდინების ფონზე ოპერაციის შედეგებმა შეიძლება ზოგიერთები ემოციურ იმედგაცრუებამდე შეიძლება მიიყვანოს“.

დაგეგმილი კონტრშეტევა, რომელიც დასავლეთის მიერ უკრაინისათვის გადაცემული იარაღის წყალობით უნდა განხორციელდეს, შეიძლება ომის ყველაზე მნიშვნელოვნად ეტაპად იქცეს იმდენად, რამდენადაც კიევი ომის ფინალურ სტადიაზე გადავა – შეეცდება უკან დაიბრუნოს რუსეთის მიერ ოკუპირებული ტერიტორიები და, შესაბამისად, უკრაინა ღირსია მხარდაჭერა ჰქონდეს.

შემტევი სამხედრო ოპერაციები, როგორც წესი, ცოცხალი ძალისა და ტექნიკის უპირატესობას გულისხმობს, მაგრამ თუ გავითვალისწინებთ იმას, რომ რუსებს კარგად გამაგრებული პოზიციები აქვთ თითქმის 1400-კილომეტრიან ფრონტზე, ძნელია იმის განსაზღვრა, თუ რამდენად წინ წაიწევს უკრაინის არმია.

შტურმის წინ ძალების კონცენტრირების, უკრაინელი მაღალჩინოსნები რთული საკითხის წინაშე დგანან: კონტრშეტევის როგორ შედეგი იქნება საკმარისი, რომ უკრაინის არმიამ დასავლეთზე შთაბეჭდილება მოახდინოს, განსაკუთრებით ვაშინგტონზე?

ზოგიერთები შიშობენ, რომ თუ უკრაინელთა შეტევა წარუმატებელი იქნება, კიევმა შეიძლება დასავლეთის მხარდაჭერა დაკარგოს, ანდა მოიმატებს ზეწოლა, რომ უკრაინა რუსეთთან რაღაც საერთო ენა გამონახოს და მოლაპარაკების მაგიდასთან დაჯდეს. რასაკვირველია, ასეთ სიტუაციაში მოლაპარაკება კიევის სასარგებლოდ არ იქნება და მოსკოვი, ალბათ, უკრაინისაგან ტერიტორიების იურიდიულ გადაცემას მოითხოვს, რაც, თავის მხრივ, კიევისათვის მიუღებელია.

„ვფიქრობ, რომ რაც უფრო მეტ გამარჯვებას მივაღწევთ ბრძოლის ველზე, მით უფრო მეტ ადამიანს ექნება ჩვენდამი ნდობა – ეს კი მეტ დახმარებას ნიშნავს“, – თქვა პრეზიდენტმა ვოლოდიმირ ზელენსკიმ „ვაშინგტონ პოსტთან“ საუბარში ორშაბათს, პირველ მაისს, თავის საკმაოდ კარგად გამაგრებულ შენობაში შეხვედრის დროს.

კიევი ცდილობს სწრაფი გარღვევა განახორციელოს იმ დროს, როცა აღმოსავლეთის ფრონტზე გაჭიანურებული ბრძოლები მიდის და ვერცერთი მხარე ჯერ-ჯერობით მნიშვნელოვან ტერიტორიულ წარმატებას ვერ აღწევს. როგორც ექსპერტების ამბობენ, უკრაინის არმიისათვის ძალიან ძნელი იქნება (ან შეუძლებელიც კი) რუსებს იმ პოზიციებამდე დაახევინონ, რომლებიც მათ 2023 წლის 24 თებერვლამდე ჰქონდათ დაკავებული – მხოლოდ ყირიმი და დონეცკ- ლუგანსკის ოლქების ნაწილი.

უკრაინას თავდაცვისა და კონტრშეტევის კარგი გამოცდილება აქვს – გასული წლის გაზაფხულზე მთავრობამ მოახერხა კიევის შენარჩუნება, ხოლო შემოდგომაზე რუსეთისათვის მოულოდნელი ოპერაციის შედეგად უკრაინამ სამხრეთში ხერსონი დაიბრუნა, ხოლო ჩრდილო-აღმოსავლეთში – ხარკოვის ოლქში – რიგი მნიშვნელოვანი ქალაქები.

„დღესაც დასავლელი პარტნიორები ჩვენგან მსგავს წარმატებას ელოდებიან“, – ამბობს ალექსი რეზნიკოვი, – მათ გვითხრეს, რომ ამჟამად სურთ დაინახონ წარმატების კიდევ ერთი მაგალითი. მათ გვითხრეს, რომ ჩვენი წარმატების შესაძლებლობა უკრაინელ ხალხს უნდა ვაჩვენოთ… მაგრამ მე არ შემიძლია იმის თქმა, როგორი იქნება წარმატების მასშტაბები – 10 კილომეტრი, 30 კილომეტრი, 100 ან 200 კილომეტრი“.

თუ უკრაინა მნიშვნელოვან წარმატებას მიაღწევს, ეს იქნება იმის საწინდარი, რომ დასავლეთი კიევის გამარჯვების უნარში დარწმუნდება და მას იარაღს და საბრძოლო მასალებს უხვად მიაწვდის. გარდა ამისა, არსებობს წარმატების მორალური მხარეც – გაძლიერდება უკრაინის სამოქალაქო მოსახლეობის სულისკვეთება.

წყარო