2023 წლის პირველი კვარტალში საქართველოში რძის წარმოება შემცირდა, ხორცის კი – გაიზარდა- საქსტატი

11:37 - 17/05/2023

სტატისტიკის ეროვნული სამსახურის წინასწარი მონაცემებით, 2023 წლის პირველი კვარტალის ბოლოსათვის მსხვილფეხა რქოსანი პირუტყვის სულადობა წინა წლის შესაბამის მაჩვენებელთან შედარებით 8.4 პროცენტით შემცირდა და 929.8 ათასი სული შეადგინა. აქედან, ფურისა და ფურკამეჩის ჯამური რაოდენობა 448.2 ათასი სულით განისაზღვრა, რაც წინა წლის შესაბამის მაჩვენებელს 4.3 პროცენტით ჩამორჩება. ღორის რაოდენობა 159.5 ათასი სულით განისაზღვრა, რაც 6.3 პროცენტით ნაკლებია წინა წლის შესაბამის მაჩვენებელზე. ფრინველის რაოდენობა წინა წლის ანალოგიურ მაჩვენებელთან შედარებით 10.5 პროცენტით შემცირდა და 9.2 მილიონი ფრთა შედგინა.

საქსტატის ცნობით, მიმდინარე წლის პირველ კვარტალში რძის წარმოებამ 105.7 მილიონი ლიტრი შეადგინა, რაც წინა წლის ანალოგიურ მაჩვენებელზე 5.8 პროცენტით ნაკლებია. ხორცის წარმოებამ 18.1 ათასი ტონა შეადგინა, რაც 2022 წლის შესაბამის პერიოდის მაჩვენებელზე 8.4 პროცენტით მეტია. საანგარიშო პერიოდის განმავლობაში წარმოებულია 169.9 მილიონი კვერცხი, რაც წინა წლის ანალოგიურ მაჩვენებელს 2.7 პროცენტით აღემატება.

“საქართველოს მთავრობა უხეშად არღვევს ღია მმართველობის პარტნიორობის პრინციპებს” – არასამთავრობო ორგანიზაციები

11:18 - 17/05/2023

არასამთავრობო ორგანიზაციების ნაწილის განცხადებით, საქართველოს მთავრობა უხეშად არღვევს ღია მმართველობის პარტნიორობის (OGP) პრინციპებს.

როგორც მათ მიერ გავრცელებულ განცხადებაშია ნათქვამი, ბოლო წლებში საქართველოს მთავრობამ არაერთხელ ღიად დაადასტურა OGP-ის ფუნდამენტურ ღირებულებებთან შეუსაბამობა ე.წ აგენტების რუსული კანონის მხარდაჭერით, სასამართლო სისტემის დამოუკიდებლობის შელახვით, სამოქალაქო საზოგადოების ორგანიზაციებზე, უფლებადამცველებსა და კრიტიკული მედიის წარმომადგენლებზე ღია თავდასხმით და ა.შ.

„ღია მმართველობის პროცესში ჩართული არასამთავრობო ორგანიზაციები შეშფოთებას გამოვთქვამთ საქართველოს მთავრობის მიერ OGP-ის ძირითადი ღირებულებებისა და პრინციპების უხეშად დარღვევის გამო. ბოლო წლებში საქართველოს მთავრობამ არაერთხელ ღიად დაადასტურა OGP-ის ფუნდამენტურ ღირებულებებთან შეუსაბამობა ე.წ აგენტების რუსული კანონის მხარდაჭერით, სასამართლო სისტემის დამოუკიდებლობის შელახვით, სამოქალაქო საზოგადოების ორგანიზაციებზე, უფლებადამცველებსა და კრიტიკული მედიის წარმომადგენლებზე ღია თავდასხმითა და მათი საქმიანობის შეზღუდვის მცდელობებით, პირადი ცხოვრების ხელშეუხებლობის პრინციპის დაცვის ვერ უზრუნველყოფით, საჯარო ინფორმაციაზე ხელმისაწვდომობის შეზღუდვით.

შეჩერებულია OGP-ის ეროვნული პროცესიც. ქვეყანას უკვე მეოთხე წელია OGP-ის ფარგლებში ეროვნულ დონეზე არცერთი რეფორმა არ განუხორციელებია. საქართველოს OGP სამოქმედო გეგმა 2019 წლის შემდეგ არ აქვს, რითაც ორჯერ დაარღვია OGP-ის მონაწილეობისა და თანა-შექმნის სტანდარტები. სამწუხაროდ, ახალი სამოქმედო გეგმის შემუშავების თითქმის სამწლიანი პროცესი კვალავ ჩიხში შევიდა. მთავრობა კვლავ ეცადა OGP პროცესი ეროვნულ დონეზე მხოლოდ ფორმალურად შეენარჩუნებინა და უარი თქვა სამოქალაქო საზოგადოების მიერ შეთავაზებულ ყველა მნიშვნელოვან და შინაარსით ტრანსფორმაციულ (ე.წ ვარსკვლავური) ვალდებულების განხორციელებაზე. ამასთან, მთავრობის მეთაური საჯაროდ დაესხა თავს სამოქალაქო სექტორს, მათ შორის ღია მმართველობის პარტნიორობის პროცესში ჩართულ არასამთავრობო ორგანიზაციებს.

არსებული ვითარებიდან გამომდინარე, საქართველოს ღია მმართველობის უწყებათაშორისი საკოორდინაციო საბჭოს/ფორუმის წევრმა არასამთავრობო ორგანიზაციებმა ღია მმართველობის პარტნიორობის (OGP) მმართველ კომიტეტს მივმართეთ წერილით „რეაგირების პოლიტიკის“ ამოქმედების მოთხოვნასთან დაკავშირებით. აღნიშნული მექანიზმი მიზნად ისახავს OGP საერთაშორისო სამდივნოს, პარტნიორი დონორი თუ საერთაშორისო ორგანიზაციების გაზრდილ ჩართულობას შექმნილი კრიზისის მოგვარებაში. ხელმომწერი ორგანიზაციები მივმართავთ OGP მმართველ კომიტეტს, მოუწოდოს საქართველოს მთავრობას: შეწყვიტოს თავდასხმები სამოქალაქო საზოგადოების ორგანიზაციებსა და მედიის წარმომადგენლებზე, მათ შორის შეწყვიტოს სასამართლოს ინსტრუმენტალიზაცია კრიტიკული მედია-საშუალებების (მედიის მენეჯერები, მფლობელები ან/და მათი ოჯახის წევრები) წინააღმდეგ; უზრუნველყოს მედიის თავისუფლება და ხელი შეუწყოს მის ფუნქციონირებას; საფუძვლიანად გამოიძიოს და პასუხისგებაში მისცეს 2021 წლის 5 ივლისის მასობრივი ძალადობის ორგანიზატორები; უზრუნველყოს საჯარო ინფორმაციაზე ხელმისაწვდომობა და ხელი შეუწყოს სამოქალაქო საზოგადოების მიერ საზედამხედველო ფუნქციის შესრულებას; აღადგინოს OGP-ის თანა-შექმნის რეალური პროცესი (OGP ცო-ცრეატიონ პროცესს) და უზრუნველყოს ამბიციური ხასიათის ვალდებულებების განხორციელება; დაიცვას OGP ღირებულებები და პრინციპები.

ხაზგასმით აღვნიშნავთ, რომ არასამთავრობო ორგანიზაციების ერთადერთ მიზანს, საქართველოში დემოკრატიული რეფორმების განხორციელება და OGP-ის ეროვნული პროცესის ტრანსფორმაციული რეფორმების დაგეგმვის პლატფორმად გამოყენება წარმოადგენს”, – ნათქვამია განცხადებაში.

განცხადებას ხელს აწერენ შემდეგი არასამთავრობო ორგანიზაციები: „ეკონომიკური პოლიტიკის კვლევის ცენტრი“; „ინფორმაციის თავისუფლების განვითარების ინსტიტუტი“; „მწვანე ალტერნატივა“; „პარტნიორობა საგზაო უსაფრთხოებისთვის“; „საერთაშორისო გამჭვირვალობა – საქართველო“; „სამოქალაქო საზოგადოების ინსტიტუტი“; „საქართველოს ახალგაზრდა იურისტთა ასოციაცია“; „სოციალური სამართლიანობის ცენტრი“ და „ფონდი პარტნიორობა საგზაო უსაფრთხოებისთვის“.

“ახლა, რუსეთთან ურთიერთობის გაღრმავების დრო არ არის” – აშშ-ის სახელმწიფო დეპარტამენტი

11:17 - 17/05/2023

აშშ-ის სახელმწიფო დეპარტამენტის პრესსპიკერის მოადგილე ვედანტ პატელი რუსეთ-საქართველოს შორის პირდაპირ ფრენებთან დაკავშირებით ჟურნალისტის მიერ დასმულ კითხვაზე პასუხად აცხადებს, რომ „ახლა, რუსეთთან ურთიერთობის გაღრმავების დრო არ არის“.

მისი თქმით, ამერიკა სიტუაციის მონიტორინგს გააგრძელებს და საჭიროების მიხედვით გადადგამს დამატებით ნაბიჯებს.

„თუ რუსეთსა და საქართველოს შორის პირდაპირი რეისები განხორციელდება, ეს არა მხოლოდ აშშ-ის და სხვა დასავლური ქვეყნების მზარდ შეშფოთებას გამოიწვევს, არამედ იმ კომპანიების, რომლებიც საქართველოს აეროპორტებში მუშაობენ, თუ მოემსახურებიან თვითმფრინავებს, რომლებიც რეგულაციებს ექვემდებარებიან. დასავლეთის ყველა სახელმწიფო დისტანცირდა რუსეთის ფედერაციისგან და ვთვლით, რომ ახლა არ არის რუსეთთან ურთიერთობის გაღრმავების დრო არ არის.

ჩვენ ძალიან მკაფიოდ ვისაუბრეთ ჩვენს შეშფოთებასთან დაკავშირებით და ძალიან მკაფიოდ ვისაუბრეთ იმ ფაქტზეც, რომ მივიღეთ ნაბიჯები რუსული თვითმფრინავების ჩვენს საჰაერო სივრცეში შეღწევის აკრძალვის მიზნით, ისევე როგორც ბევრმა დასავლურმა ქვეყანამ. ასე რომ, ჩვენ გავაგრძელებთ სიტუაციის მჭიდრო მონიტორინგს და საჭიროებისამებრ გადავდგამთ დამატებით ნაბიჯებს“, – აცხადებს ვედანტ პატელი.

სუს-მა „ისლამური სახელმწიფოს“ ექვსი მხარდამჭერი დააკავა

11:14 - 17/05/2023

სახელმწიფო უსაფრთხოების სამსახურის კონტრტერორისტულმა ცენტრმა მასშტაბური სპეციალური ოპერაციის შედეგად, სასამართლო განჩინების საფუძველზე, ტერორისტული ორგანიზაცია „ისლამური სახელმწიფოს“ მხარდამჭერები დააკავა.

სუს-ის ინფორმაციით, კონტრტერორისტული ოპერაცია ერთდროულად ოთხ ადგილზე ჩატარდა, დაკავებულია საქართველოს ექვსი მოქალაქე.

„კონტრტერორისტული ცენტრის, საქართველოს გენერალური პროკურატურისა და შინაგან საქმეთა სამინისტროს ერთობლივი ღონისძიებების შედეგად მოპოვებული მტკიცებულებებით დადგინდა, რომ აღნიშნულ პიროვნებებს კავშირი ჰქონდათ ტერორისტული ორგანიზაცია „ისლამური სახელმწიფოს“ ერთ-ერთ გავლენიან ლიდერთან და მისი მეთაურობით გეგმავდნენ სხვადასხვა სახის ტერორისტულ აქტივობას რამდენიმე ქვეყანაში.

საგამოძიებო მოქმედებების შედეგად ამოღებულია ტერორისტული ორგანიზაციის სიმბოლიკა, ელექტრონული ინფორმაციის მატარებელი მოწყობილობები, საბრძოლო მასალა, ფეთქებადი ნივთიერებები და გამოძიებისათვის მნიშვნელოვანი სხვადასხვა მტკიცებულება.

საქმეზე გამოძიება საქართველოს სისხლის სამართლის კოდექსის 328-ე და 236-ე მუხლებით მიმდინარეობს, რაც გულისხმობს უცხო ქვეყნის ტერორისტულ ორგანიზაციაში გაერთიანებას, ტერორისტულ საქმიანობაში დახმარებას, ცეცხლსასროლი იარაღის, საბრძოლო მასალის და ფეთქებადი ნივთიერების მართლსაწინააღმდეგო შეძენა-შენახვას. გამოძიებას აწარმოებს სახელმწიფო უსაფრთხოების სამსახურის კონტრტერორისტული ცენტრი.

აღნიშნული გამოძიების ფარგლებში, კონტრტერორისტულმა ცენტრმა, მოპოვებული მტკიცებულებების საფუძველზე გამოავლინა გარკვეული ტერორისტული აქტივობები სხვადასხვა უცხო ქვეყნის ტერიტორიაზე და მომეტებული საფრთხის გათვალისწინებით ინფორმაცია ოპერატიულად იქნა გაზიარებული პარტნიორ ქვეყნებთან. აქვე აღვნიშნავთ, რომ ამავე საქმის ფარგლებში სისხლის სამართლებრივი დევნა დაიწყო უცხო ქვეყნის ერთი მოქალაქის მიმართ, რომელიც სასამართლოს ბრძანებით მოთავსებულია შინაგან საქმეთა სამინისტროს მიგრაციის დეპარტამენტის დროებითი განთავსების ცენტრში“, – აცხადებენ სახელმწიფო უსაფრთხოების სამსახურში.

2022 წელს მსოფლიოში სიკვდილით 883 ადამიანი დასაჯეს

11:04 - 17/05/2023

საერთაშორისო უფლებადამცველი ორგანიზაციის – Amnesty International-ის მონაცემით, 2022 წელს სხვადასხვა ქვეყანაში 883 სასიკვდილო განაჩენი იქნა აღსრულებული.

სიკვდილით დასჯილთა შორის არ შედის “ათასობით” ადამიანი, რომელთა წინააღმდეგ განაჩენი ჩინეთში იქნა გამოტანილი, რადგან პეკინი ასეთ სტატისტიკას მკაცრად ასაიდუმლოებს.

საუდის არაბეთში მხოლოდ ერთ დღეში 81 ადამიანი იქნა სიკვდილით დასჯილი, რასაც ორგანიზაცია “გამაოგნებელ ფაქტს” უწოდებს.

როგორც აღნიშნულია, მიუხედავად იმისა, რომ ჩინეთის სტატისტიკა არ საჯაროვდება, ტრადიციულად, ბოლო წლებში ის გლობალურ “რეიტინგში ლიდერის პოზიციებს ინარჩუნებს”.

ამავდროულად, გასულ წელს ირანში სიკვდილით დასჯის 576 განაჩენი იქნა გამოტანილი; საუდის არაბეთში -196, რაც ყველაზე მაღალი მაჩვენებელია ბოლო 30 წლის განმავლობაში; ეგვიპტეში – 24 და აშშ-ში – 18.

ორგანიზაცია აღნიშნავს, რომ სიკვდილით დასჯა ფართოდ არის გავრცელებული ჩრდილოეთ კორეასა და ვიეტნამში, სადაც, ჩინეთის მსგავსად, სტატისტიკა გასაიდუმლოებულია.

Amnesty International-ის ანალიტიკოსები ამბობენ, რომ, დისიდენტების წინააღმდეგ რეპრესიების ზრდასთან ერთად, სასიკვდილო განაჩენის დიდი ნაწილი მოდის ნარკოტიკებით ვაჭრობისა და ნარკოტიკებთან დაკავშირებულ სხვა დანაშაულებებზე. მაგალითად, სინგაპურში ნარკომანიასთან დაკავშირებული დანაშაულისთვის 11 პირი დასაჯეს.

ავარია ქარელში – დაიღუპა საპატრულო პოლიციის 2 თანამშრომელი

11:01 - 17/05/2023

ქარელში ავტოსაგზაო შემთხვევა მოხდა.

არსებული ცნობით, გაჩერებულ საპატრულო ეკიპაჟს ნასვამ მდგომარეობაში მყოფი პირი შეეჯახა. საპატრულო პოლიციის 2 თანამშრომელი ადგილზე დაიღუპა.

ავტოსაგზაო შემთხვევის შედეგად დაღუპულია საპატრულო პოლიციის 2 თანამშრომელი, ვანო ბასანიძე და გურამ ქარელი.

მომხდარის შესახებ სხვა დეტალები უცნობია.

რუსულმა საოკუპაციო ძალებმა უკრაინის ტერიტორიაზე 57 ავიადარტყმა განახორციელეს – ბოლო ცნობები ცხელი წერტილიდან

10:52 - 17/05/2023

რუსეთ – უკრაინის ომის 448-ე დღე – ბოლო ცნობები ცხელი წერტილიდან

უკრაინის შეიარაღებული ძალები ომში რუსეთის საბრძოლო დანაკარგების შესახებ განახლებულ ინფორმაციას ავრცელებს.

გენშტაბის ცნობით, გასული წლის 24 თებერვლიდან ოკუპანტების პირადი შემადგენლობის დანაკარგებმა 200 590 შეადგინა. მათგან 610, გასულ დღე-ღამეშია ლიკვიდირებული.

რაც შეეხება განადგურებულ სამხედრო ტექნიკას და საბრძოლო მასალას:

◾ ტანკები – 3 771 (+9)

◾ ჯავშანმანქანები – 7 365 (+17)

◾ საარტილერიო სისტემები – 3 166 (+16)

◾ მრავალჯერადი სარაკეტო სისტემა – 562 (+0)

◾ საჰაერო თავდაცვა – 318 (+2)

◾ თვითმფრინავები – 308 (+0)

◾ ვერტმფრენები – 294 (+0)

◾ უპილოტო საფრენი აპარატი – 2 748 (+16)

◾ ფრთოსანი რაკეტები – 982 (+9)

◾ გემები/კატერები 18 (+0)

◾ საავტომობილო ტექნიკა და ავტოცისტერნები – 6 067 (+19)

◾ სპეციალური ტექნიკა – 417 (+7)

რუსეთმა, წუხელ, ქალაქ მიკოლაივის სამოქალაქო ინფრასტრუქტურას „კალიბრის“ ტიპის ორი რაკეტით დაარტყა. ინფორმაციას უკრაინის შეიარაღებული ძალების გენერალური შტაბი ავრცელებს.

გარდა ამისა, უწყებაში აცხადებენ, რომ რუსულმა ძალებმა S-300 ტიპის ორი რაკეტით დონეცკის ოლქის ქალაქ კონსტანტინოვკას სამოქალაქო ინფრასტრუქტურას დაარტყეს.

გენშტაბის ცნობით, გასული დღის განმავლობაში, რუსულმა საოკუპაციო ძალებმა უკრაინის ტერიტორიაზე 57 ავიადარტყმა განახორციელეს და უკრაინის ჯარების პოზიციები და დასახლებები მრავალჯერადი სარაკეტო სისტემებიდან 96-ჯერ დაბომბეს.

“რუსებმა სარაკეტო დარტყმისთვის „კინჟალის“ აერობალისტიკური 6 რაკეტა, „კალიბრის“ ფრთოსანი 13 რაკეტა და „ეს-400“ და „ისკანდერ-ემ“ ტიპის სახმელეთო ბაზირების 10 რაკეტა გამოიყენეს. „მათგან 25 ჩვენმა დამცველებმა გაანადგურეს“, – აცხადებენ გენშტაბში.

უწყების ცნობით, რუსების მიერ გასული დღის განმავლობაში განხორციელებული თავდასხმების შედეგად განადგურდა სამოქალაქო ინფრასტრუქტურა, დაიღუპნენ და დაშავდნენ მშვიდობიანი მოქალაქეები, განადგურდა კერძო სახლები, საავადმყოფო და სხვა სამოქალაქო ინფრასტრუქტურა.

„უკრაინის მთელ ტერიტორიაზე სარაკეტო და საჰაერო თავდასხმების ალბათობა კვლავ მაღალია“, – აცხადებენ გენშტაბში.

მანამდე გავრცელდა ინფორმაცია, რომ 16 მაისს საღამოს უკრაინის რამდენიმე ოლქში საჰაერო განგაში გამოცხადდა. განგაშის დროს მიკოლაივში აფეთქებების ხმა გაისმა. ქალაქის მერის ინფორმაციით, თავდასხმებმა ხანძარი გამოიწვია. ერთ-ერთ ობიექტზე ხანძარი ლოკალიზებულია, ამ დროისთვის ცნობილია ერთი დაშავებულის შესახებ.

უკრაინის არმიის ადგილობრივი კონტრშეტევების ფონზე რუსული ჯარები, სავარაუდოდ, აძლიერებენ შეტევას ბახმუტის რაიონში. მაგრამ ეს, სავარაუდოდ, გავლენას მოახდენს ოკუპანტების უნარზე, მოიგერიონ უკრაინის კონტრშეტევა. ამის შესახებ ომის შესწავლის ინსტიტუტი იუწყება.

როგორც ომის შესწავლის ინსტიტუტი აღნიშნავს, ოთხი რუსული ბატალიონის ბახმუტის მიმართულებით გადაყვანის შესახებ რამდენიმე რუდმა „ბლოგერმა“ ერთი დღით ადრე გაავრცელა ინფორმაცია.

ეს განცხადებები, ISW-ის ანგარიშის მიხედვით, შეესაბამება თავდაცვის მინისტრის მოადგილის ანა მალიარის განცხადებას, რომ რუსეთის ფედერაციას ამ ტერიტორიაზე გადაჰყავს მედესანტეების ქვედანაყოფები. 16 მაისს ოკუპანტებმა მცირე წარმატებებს მიაღწიეს თავად ბახმუტში.

„რუსებმა ძირითადი ძალისხმევა ბახმუტზე გაამახვილეს, უკრაინა კი არაერთხელ ხაზს უსვამს, რომ მიზნად ისახავს შეზღუდული ოპერაციების განხორციელებას“, – განმარტავენ ექსპერტები.

ამავდროულად, კრემლი აპირებს ბახმუტის დაკავება წარმოადგინოს, როგორც „გამარჯვება“ უკრაინის კონტრშეტევის დროს შესაძლო წარუმატებლობის ფონზე.

ამავდროულად, უკრაინის შეიარაღებულმა ძალებმა ცოტა ხნის წინ მიაღწიეს შეზღუდულ წარმატებას თავად ქალაქში. 16 მაისის გეოლოკაციის კადრებში ჩანს, რომ უკრაინის შეიარაღებულმა ძალებმა მცირე წინსვლა მოახდინეს ორეხოვო-ვასილივკას აღმოსავლეთით (ბახმუტის ჩრდილო-დასავლეთით 11 კმ), თუმცა 16 მაისის მდგომარეობით ISW-ს არ დაუფიქსირებია უკრაინული ძალების შემდგომი წინსვლა ბახმუტის გარშემო.

გაერთიანებული სამეფოს პრემიერ-მინისტრი, რიში სუნაკი და ნიდერლანდების პრემიერ-მინისტრი მარკ რუტე საერთაშორისო კოალიციისშესაქმნელად იმუშავებენ, რათა უკრაინას, პუტინის შეჭრისთვის წინააღმდეგობის გაწევის ამ გადამწყვეტ მომენტში F-16 ტიპის მოიერიშე თვითმფრინავების მოპოვებაში დაეხმარონ, – ამის შესახებ დაუნინგ სთრითის მიერ გავრცელებულ ინფორმაციაშია აღნიშნული.

მათივე ინფორმაციით, პრემიერ-მინისტრები შეთანხმდნენ, რომ უკრაინას საჰაერო შესაძლებლობებით უზრუნველყოფის მიზნით მხარდაჭერას გაუწევენ.

„პრემიერ-მინისტრები რიში სუნაკი და მარკ რუტე შეთანხმდნენ, რომ იმუშავებენ საერთაშორისო კოალიციის შექმნაზე, რათა უკრაინა საბრძოლო საჰაერო შესაძლებლობებით უზრუნველყონ, ყველაფერში მხარდაჭერის აღმოჩენით : წვრთნებიდან დაწყებული, F16 საბრძოლო თვითმფრინავების მოპოვებით დამთავრებული“, – აღნიშნულია ინფორმაციაში, რომელიც დაუნინგ სთრითმა რიში სუნაკისა და მარკ რუტეს ისლანდიაში მიმდინარე ევროსაბჭოს სამიტის ფარგლებში გამართული შეხვედრის შემდეგ გაავრცელა.

“ევროპის საბჭოს სახელმწიფოებისა და მთავრობების მეთაურების სამიტისადმი ჩვენი მთავარი გზავნილია” – პრემიერი

10:50 - 17/05/2023

ჩვენთვის დიდი პატივია, რომ ვმონაწილეობთ ამ ძალიან მნიშვნელოვან სამიტში. რა თქმა უნდა, ჩვენ წარვდგებით ჩვენი ქვეყნის სახელით, – ამის შესახებ საქართველოს პრემიერ-მინისტრმა ირაკლი ღარიბაშვილმა რეიკიავიკში განაცხადა, სადაც პრემიერი ევროპის საბჭოს სახელმწიფოებისა და მთავრობების მეთაურების სამიტში მონაწილეობს.

ირაკლი ღარიბაშვილის თქმით, საუბარი იქნება იმ გამოწვევებზე, რომლებიც მთელი ევროპის კონტინენტზეა შექმნილი.

„მე მექნება პატივი, რომ ჩვენი ქვეყნის სახელით კიდევ ერთხელ აღვნიშნო ყველა იმ რეფორმის, ყველა იმ წარმატებული საქმიანობის შესახებ, რომელიც ჩვენმა მთავრობამ ბოლო 10 წლის განმავლობაში განახორციელა. ამას გარდა, რა თქმა უნდა, ჩვენ გვექნება კიდევ ერთხელ საუბარი იმ გამოწვევებზე, რომლებიც არის შექმნილი მთელი ევროპის კონტინენტზე. ჩვენ გვექნება შიდა გამოწვევებზე საუბარი და ვფიქრობ, რომ იქნება ძალიან წარმატებული შეხვედრებიც.

გარდა სიტყვით მიმართვისა, მე მექნება ძალიან ბევრი შეხვედრა, ორმხრივი შეხვედრები. ჩვენი მთავარი გზავნილი არის შემდეგი, რომ საქართველო, ჩვენი ქვეყანა და ჩვენი ქართველი ხალხი, იმსახურებს კანდიდატის სტატუსს. ეს არის ჩვენი არჩევანი, რომელიც არის შეუცვლელი, რომელიც არის ჩვენი ხალხისა და ჩვენი ქვეყნის არჩევანი. შესაბამისად, ჩემი გზავნილი კიდევ ერთხელ იქნება შემდეგი, რომ აუცილებელია ჩვენმა ქვეყანამ მიიღოს დამსახურებული სტატუსი, ვინაიდან ეს იქნება გზავნილი ევროპის მხრიდან, ჩვენი მოსახლეობის, ჩვენი ხალხის მისამართით, ჩვენი ქვეყნის მისამართით, და ჩვენ სხვა, ასე ვთქვათ, გადაწყვეტილებას არ ველოდებით, თუმცა, რა თქმა უნდა, ჩვენ უნდა ვიმუშაოთ ძალიან ბევრი, დავარწმუნოთ ჩვენი ევროპელი მეგობრები, რომ სხვა ალტერნატივა უბრალოდ არ არსებობს. თუ რეალურად ჩვენს ევროპელ მეგობრებს, ჩვენს ევროპელ პარტნიორებს სურთ, რომ ქვეყანაში დასრულდეს პოლარიზაცია, იყოს მშვიდობა, სტაბილურობა და ქვეყანამ გააგრძელოს წინსვლა ევროპის მიმართულებით, რა თქმა უნდა, მე ველი, რომ წლის ბოლოს ჩვენ გვექნება კანდიდატის სტატუსი. ეს არის ჩემი პასუხი“,- განაცხადა პრემიერმა.

ირაკლი ღარიბაშვილი მონაწილეობს ევროპის საბჭოს სახელმწიფოებისა და მთავრობების მეთაურების მე-4 სამიტში, რომელიც რეიკიავიკში იმართება.

საკონფერენციო ცენტრ Harpa-ში, სადაც ღონისძიება ტარდება, საქართველოს პრემიერ-მინისტრს და სამიტის მონაწილე სახელმწიფოებისა და მთავრობების მეთაურებს ისლანდიის პრემიერ-მინისტრმა კატრინ იაკობსდოტირიმ და ევროპის საბჭოს გენერალურმა მდივანმა მარია პეიჩინოვიჩ ბურიჩმა უმასპინძლეს.

ირაკლი ღარიბაშვილი სამიტის მონაწილე მსოფლიო ლიდერებთან ერთად გახსნით სესიას დაესწრო.

პრემიერ-მინისტრი რეიკიავიკში დელეგაციასთან ერთად იმყოფება.

პრემიერ-მინისტრმა ირაკლი ღარიბაშვილმა ევროპის საბჭოს სამიტის ფარგლებში მრგვალი მაგიდის ფორმატით გამართულ დისკუსიაში მიიღო მონაწილეობა

10:39 - 17/05/2023

საქართველოს პრემიერ-მინისტრმა ირაკლი ღარიბაშვილმა მონაწილეობა მიიღო ევროპის საბჭოს სახელმწიფოებისა და მთავრობების მეთაურების მე-4 სამიტის ფარგლებში მრგვალი მაგიდის ფორმატით გამართულ დისკუსიაში თემაზე: „როგორ უზრუნველყოფთ დემოკრატიას, როცა სამყარო გამოცდას გვიწყობს რისკებზე, მედეგობასა და ერთგულებაზე”.

მთავრობის მეთაურმა მსოფლიოს წინაშე არსებულ გამოწვევებსა და მათი გადაჭრის აუცილებლობაზე ისაუბრა.

როგორც პრემიერ-მინისტრმა აღნიშნა, მიუხედავად არსებული გამოწვევებისა, დემოკრატია საქართველოში მდგრადია, რადგან ქვეყანა იმ ღირებულებების ერთგულია, რომლებიც საფუძვლად უდევს დემოკრატიას, – თავისუფლება, თანასწორობა და კანონის უზენაესობა.

ირაკლი ღარიბაშვილმა დემოკრატიული ინსტიტუტებისა და ადამიანის უფლებების დაცვის მიმართულებით მთავრობის მიერ გაწეულ ძალისხმევაზე ისაუბრა და აღნიშნა, რომ ეს ძალისხმევა სრულად ემთხვევა საქართველოსთვის კანდიდატის სტატუსის მინიჭებისთვის განსაზღვრულ 12 პრიორიტეტს და განსაკუთრებული პროგრესი, რომელსაც საქართველომ უკვე მიაღწია ამ მხრივ, მოითხოვს ევროკავშირის შესაბამის რეაგირებას.

“მოლდოვის ფრთხილ პოლიტიკას, არავინ საყვედურობს, ყველა გაგებით ეკიდება” – ირაკლი კობახიძე

10:28 - 17/05/2023

გვაქვს ფრთხილი პოლიტიკა, ამიტომ ხშირად გვსაყვედურობენ რატომ ვართ ფრთხილები და პრაგმატულები. ეს ყველაფერი სინამდვილეში რომ „გადაითარგმნოს“, გულისხმობს იმას, რომ გვსაყვედურობენ, თუ რატომ არ ვსჯით საკუთარ ქვეყანას და საკუთარ ხალხს. ამას სხვადასხვა ფორმით გვსაყვედურობენ, თუმცა, ბუნებრივია, პირდაპირი ტექსტით ვერ ამბობენ, – ამის შესახებ „ქართული ოცნების“ ლიდერმა, ირაკლი კობახიძემ განაცხადა.

როგორც კობახიძემ აღნიშნა, საქართველოს ხელისუფლება პრაგმატულ და ფრთხილ პოლიტიკას ატარებს, რომლის მთავარი მიზანია, არ დაზარალდეს ქვეყანა და საზოგადოება.

მისი თქმით, მოლდოვა, რომელიც საქართველოს მსგავს სიტუაციაშია, რუსეთთან მიმართებით ასევე ფრთხილ პოლიტიკას ატარებს, თუმცა, მისი მისამართით კრიტიკა არ ისმის, რაც იმაზე მიუთითებს, რომ „გლობალური ომის პარტია“ საქართველოსგან სხვა როლის შესრულებას ელოდება.

„ჩვენ ვაწარმოებთ პრაგმატულ პოლიტიკას, რომლის მთავარი მიზანია, არ დაზარალდეს ჩვენი ქვეყანა და მოსახლეობა.

მოლდოვა არის დაახლოებით ჩვენს მსგავს ვითარებაში, არის დღემდე დსთ-ის წევრი ქვეყანა, მოლდოვას კონსტიტუციაში უწერია, რომ არასდროს გახდება ნატო-ს წევრი, მას არ დაუწესებია სანქციები რუსეთისთვის. მოლდოვას რომ აქვს ფრთხილი პოლიტიკა, არავინ საყვედურობს, ყველა გაგებით ეკიდება. არცერთი ევროპარლამენტარი არ გამოსულა და არ უთქვამს, რომ მოქმედი ხელისუფლება მოლდოვაში არის პრორუსული. თქვენ იცით საქართველოზე რას ლაპარაკობენ- ათას სისულელეს, ათას აბსურდს და ტყუილს.

მოლდოვის სიფრთხილე და პრაგმატულობა როცა ყველას ესმის და ჩვენი ამის ნახევარიც არ ესმით, აქ საზოგადოებამ უნდა ამოიკითხოს რა არის ამის მიზეზი. მგონი, მიზეზი არის ერთი რაღაც: საქართველოსგან, სამწუხაროდ, ელოდებიან სხვა რამეს, მოლდოვისგან განსხვავებით. არსებობს გლობალური ომის პარტია, რომელსაც საქართველოსგან აქვს სხვა რამის მოლოდინი“, – განაცხადა ირაკლი კობახიძემ “საზოგადოებრივი მაუწყებლის” გადაცემაში „თავისუფალი ხედვა“.

,,ჩვენ სრულად ვუჭერთ მხარს ჩვენს წევრ ქვეყნებს – უკრაინას, საქართველოს, მოლდოვას”- ტინი კოქსი

23:56 - 16/05/2023

ჩვენი ორგანიზაციის წევრების პოზიცია უცვლელი უნდა იყოს, რომ ჩვენ არ მივცემთ უფლებას აგრესორ ქვეყანას დაანგრიოს სისტემატური მულტილატერალიზმი ევროპაში, რომ ჩვენ სრულად ვუჭერთ მხარს ჩვენს წევრ ქვეყნებს – უკრაინას, საქართველოს, მოლდოვას, – ამის შესახებ ევროსაბჭოს საპარლამენტო ასამბლეის პრეზიდენტმა ტინი კოქსმა რეიკიავიკის სამიტზე განაცხადა. „ვფიქრობ, კრემლში მიღებული გზავნილი მკაფიო იქნება, რომ არ არსებობს გზა, რომელიც პოზიციის ცვლილებას გვაიძულებს. რუსეთმა უნდა დატოვოს ყველა ოკუპირებული ტერიტორია ევროპაში, რადგან რუსეთისთვის ეს არის მსოფლიო საზოგადოებაში ოდესმე დაბრუნების ერთადერთი გზა. ვფიქრობ, ძლიერი განცხადება გვექნება სოლიდარობაზე და იმ კუთხით, რომ ვინც დაიწყო აგრესიული ომი, ადრე თუ გვიან პასუხს აგებს თავის მოქმედებებზე და მათ შორის რუსეთის ლიდერები. მაგრამ როდესაც ომი დასრულდება, ჩვენ უნდა გადავწყვიტოთ, როგორ ვითანამშრომლოთ რუსეთთან. რადგან რუსეთი არსად გაქრება. რუსეთში მილიონობით მოქალაქეა, რომლებიც იმსახურებენ დაცვას ევროსაბჭოს მექანიზმებით“, – განაცხადა კოქსმა.

,,სჯობს თვითონ გადადგან ისეთი ნაბიჯები, რაც უკავშირდება სავიზო რეჟიმის გამარტივებას” -კობახიძე

23:34 - 16/05/2023

„ქართული ოცნების“ თავმჯდომარემ ირაკლი კობახიძემ საზოგადოებრივი მაუწყებლის ეთერში, გადაცემაში „თავისუფალი ხედვა“ ამერიკის ვიზებთან დაკავშირებით საუბრისას აღნიშნა, რომ ანსამბლი „მართვე“, რომელიც ამერიკის შეერთებულ შტატებში მიემგზავრებოდა, დატოვეს საქართველოში. მისი თქმით, მსგავს საკითხებს უნდა აქცევდეს ყურადღებას ამერიკის ელჩი და სჯობს თვითონ გადადგან ისეთი ნაბიჯები, რაც უკავშირდება სავიზო რეჟიმის გამარტივებას. „ანსამბლი „მართვე“ მიდიოდა ამერიკის შეერთებულ შტატებში. ყველაფერი შეთანხმებული იყო თავიდან ბოლომდე. მათ შორის, ბილბორდები იყო ადგილზე გამოკრული, რომელ ოჯახებში უნდა ყოფილიყვნენ გადანაწილებული. ბავშვებზეა საუბარი, 12, 11 და 14 წლის ბავშვი ამერიკაში ხომ არ დარჩება მარტო. ყველაფერი დაორგანიზებული იყო ამერიკული მოწვევით. სტანდარტულად შეავსეს ერთბაშად განაცხადები და როცა ჯგუფია მარტივად ხდება ეს ყველაფერი 2 კვირაში, მაქსიმუმ ერთ თვეში უნდა ჩაურტყან ვიზები. ივლისში უნდა ყოფილიყო ეს გასტროლები და საბოლოო ჯამში უთხრეს, რომ ერთბაშად არ მოხდებოდა ვიზების გაცემა სათითაოდ უნდა შეეტანათ, აბსურდია და ვადები უთხრეს ნოემბრის ჩათვლით, როცა ივლისში იყო გასტროლები. 50 ბავშვი, მთელი „მართვე“ დატოვეს საქართველოში. არ ვიცი ახლა, ასეთ რაღაცებს უნდა მიხედოს ამერიკის ელჩმა და არა იმას, რომ სხვა ქვეყანა კონკრეტულ ნაბიჯებს დგამს. მე მგონი ჯობია, რომ თვითონ გადადგან ასეთი ნაბიჯები, რაც უკავშირდება იგივე სავიზო რეჟიმის გამარტივებას, პირდაპირ ფრენებს და თავისუფალი ვაჭრობის შეთანხმების ხელმოწერას, თუმცა, გავიდა 30 წელი და ამაზე სამწუხაროდ საუბარიც არ არის,“ – განაცხადა ირაკლი კობახიძემ.