სააკაშვილი ცდილობს, მისი პოლიტიკაში დაბრუნებით პარტიის რღვევის პროცესი დროებით მაინც შეაჩეროს. მათი პატრონების მიზანია, რადიკალური ოპოზიცია რამენაირად გადაარჩინონ, – ამის შესახებ პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა საქართველოს პირველ არხს განუცხადა.

მისივე თქმით, „ნაციონალური მოძრაობა“ განულებისკენ არის წასული

„მიხეილ სააკაშვილი საქართველოში შემოაპარეს და ეს არ იყო მხოლოდ მისი განზრახვა. ეს იყო გლობალური „ომის პარტიის“ ერთ-ერთი ჩანაფიქრი. სააკაშვილის საქართველოში შემოპარვით უნდა მომხდარიყო ქვეყანაში არეულობის, პოლიტიკური კრიზისის შექმნა, ხელისუფლებაში დაბრუნება, რათა მას განეხორციელებინა ქმედებები, რაც ქვეყანას მეორე ფრონტის გახსნამდე მიიყვანდა. პირველ ეტაპზე როცა ეს არ გამოუვიდათ, სააკაშვილის პატიმრობიდან თავის დაღწევის მიზნით, უდიდესი ფეიკკამპანია წამოიწყეს, თითქოს საქართველო სააკაშვილს წამლავს, არ მკურნალობენ, აწამებენ და ასე შემდეგ. ვიხილეთ, როგორ იხარჯებოდა მილიონები, როგორ იყო ჩართული ამ პროცესებში ლამის ნახევარი ევროპარლამენტი. სტრასბურგის სასამართლომ თქვა, რომ ეს არის „ფეიკი“, ტყუილი, მანიპულაცია, რისი დაშვებაც ევროპულმა სასამართლომ არც კი წარმოიდგინა, რადგან მსოფლიოს მასშტაბით ეს გამოიწვევდა საპატიმრო სისტემის ჩამოშლას. ვინაიდან ეს გზა არ გამოუვიდათ, ახლა დაიწყო იმ რეალობის დაბრუნება, რისთვისაც სააკაშვილი ჩამოიყვანეს. სააკაშვილის შიმშილობა არ გამოუვიდათ და ახლა პოლიტპატიმრის სტატუსი უნდათ, მიანიჭონ. ამისთვისაა საჭირო გამოცხადება, რომ ის ქართულ პოლიტიკაშია. ტყუილი იყო, რომ სააკაშვილი ქართულ პოლიტიკას თავს ანებებდა, არ აინტერესებდა, უკრაინაზე იყო კონცენტრირებული. რა უნდა მისგან „ნაციონალურ მოძრაობას“? – პარტია განულებისკენ არის წასული, ამიტომ მათი პატრონები ფიქრობენ, იქნებ, სააკაშვილის ფაქტორმა პარტიის განულებისკენ მიმავალი კრახი დროებით შეაჩეროს და პარტიის შიგნით დესტრუქცია შეაჩერონ. სააკაშვილი ცდილობს, მისი პოლიტიკაში დაბრუნებით პარტიის რღვევის პროცესი დროებით მაინც შეაჩეროს. მათი პატრონების მიზანია, რამენაირად გადაარჩინონ რადიკალური ოპოზიცია. ხედავენ, რომ ხელისუფლებას რადიკალური ოპოზიციის სახით არანაირი კონკურენტი აღარ ჰყავს“, – განაცხადა ირაკლი ქადაგიშვილმა.

რადიკალური ოპოზიციის თავდასხმა BBC-ზე კომიკურია – ეს ის ხალხია, ვინც საქართველოში მედიაზე განახორციელა რეიდები, დააპატიმრა ჟურნალისტები, უმკაცრესი რეგულაციები შემოიღო და პირდაპირ პოლიტიკური პროდიუსერები დაუნიშნა მედიას,- ასე ეხმიანება პარლამენტის ვიცე- სპიკერი დავით კეზერაშვილის განცხადებას, რომლის თანახმად, მან საჩივარი შეიტანა ” BBC-ის წინააღმდეგ.

თალაკვაძის განცხადებით, ოპოზიციას სურს დავით კეზერაშვილიდან ყურადღება სხვებზე გადაიტანოს და ამას ემსახურება “ქოლ-ცენტრებზე” საგამოძიებო კომისიის მოთხოვნაც.

„მათი ბიოგრაფია ყოველთვის გვახსენდება, როცა ასეთ განცხადებებს აკეთებენ. დღესაც, ოპოზიციაში ყოფნისას, თავს ესხმიან მედიას, ცდილობენ არალეგალური ფულით დააფინანსონ და კონტროლი მოიპოვონ მედიაზე, ამოეფარონ ჟურნალისტებს და უკვე ვხედავთ, რომ კომიკური თავდასხმებია BBC-ზე მხოლოდ იმიტომ, რომ მათ სიმართლე დაანახეს საზოგადოებამ. ეს მცდელობები საგამოძიებო კომისიის მოთხოვნა, თავდასხმა საერთაშორისო მედიაზე, ტყუილები რომ ტელევიზიას გადაუფორმებენ თანამშრომლებს, ემსახურება იმას, რომ კეზერაშვილიდან ყურადღება გადაიტანონ”, – განაცხადა თალაკვაძემ.

ჩვენ ვცდილობთ ჩვენი ქვეყნის გადარჩენას. ჩვენი ქვეყნის ეროვნული ინტერესების დაცვას და გაძლიერებას, – ამის შესახებ პრემიერ-მინისტრმა ჟურნალისტებს განუცხადა.

 მისივე თქმით, ბოლო ორი წლის განმავლობაში თითქმის 10 მლრდ დოლარით გაიზარდა ქვეყნის ეკონომიკა, სიღარიბე არის ისტორიულ მინიმუმზე, ქვეყნის რეზერვები კი  ისტორიულ მაქსიმუმზე.

 „დღეს ქვეყანა მდიდრდება, გესმით თქვენ? ბოლო ორი წლის განმავლობაში თითქმის 10 მლრდ დოლარით გაიზარდა ჩვენი ქვეყნის ეკონომიკა. დღეს უმუშევრობა, სიღარიბე არის ისტორიულ მინიმუმზე, ჩვენი ქვეყნის რეზერვები არის ისტორიულ მაქსიმუმზე. ქვეყანას აქვს 5 მლრდ დოლარზე მეტი რეზერვები. გაიზარდა ხელფასები, პენსიები, სოციალური დახმარები, ყველაფერი ეს საიდან შევძელით? შევძელით ჩვენი სწორი პოლიტიკის შედეგად. დღეს ბიზნესი რომ ვითარდება, ეკონომიკა რომ იზრდება, არავის რომ არ აქვს, რამდენიმე ქვეყანას აქვს დღეს მსოფლიოში ჩვენნაირი ეკონომიკური ზრდა, ბოლო ორი წელი ზედმიწევნით. ომამდე სხვათა შორის, ომამდეც იყო 10%-იანი ეკონომიკური ზრდა. ეს ყველაფერი თანდათანობით აისახება ჩვენი ქვეყნის მოსახლეობაზე. თქვენ როგორ ფიქრობთ, 700 მლნ ლარი, რომელიც ახლა ჩვენ გამოვყავით და ვუშენებთ დევნილებს სახლებს, საიდან ვუშენებთ, ეს ფული ჩვენ დავბეჭდეთ, ციდან ცვივა, თუ როგორ ხდება ეს? ან პენსიებისა და ხელფასების გაზრდა, ან უამრავი პროექტი, რომელიც ჩვენ დავაფინანსეთ, ამას ხომ სჭირდება დაფიქრება, მეგობრებო. მთავარი მინდა გითხრათ, ევროპას გასაგებია რომ ძალიან მკაცრი მიდგომა აქვს. ჩვენ, ჩვენს პარტნიორებს, კოლეგებს ვუთხარით, რომ ჩვენ ვერ გამოგყვებით ამ პოლიტიკაში. კიდევ ვიმეორებ, ჩვენ არ ვართ არც ნატოს წევრი, არც ევროკავშირის წევრი ქვეყანა, ჩვენ ვართ ოკუპირებული – 20 % არის ოკუპირებული, რუსული ჯარი დგას ჩვენს ტერიტორიაზე, გვაქვს პირდაპირი საზღვარი რუსეთთან და გვაქვს ჩვენი გამოწვევები. დაანებეთ თავი თქვენ სხვა ქვეყნების ინტერესებზე ფიქრს და მუშაობას. ისინი თავად მიხედავენ საკუთარ ინტერესებს, თქვენი პირადად და გინდა ხოშტარიას, გინდა სააკაშვილის დახმარება არ დასჭირდებათ, დამერწმუნეთ, ისინი კარგად ფიქრობენ. აქვე შეგახსენებთ, რომ ევროპამ 300 მლრდ დოლარი გადაუხადა შარშან რუსეთს. ეს გააშუქეთ, ხალხს უთხარით, რომ თურმე მარტო საქართველო კი არ ვაჭრობს რუსეთთან 1 მლრდ დოლარით წელიწადში, არამედ 300 მლრდ დოლარს უხდის რუსეთს, შარშან ომის დროს. იგივე ამერიკას, მე გითხარით, რომ ვაჭრობა არ შეუწყვიტავს. იმ პროდუქციაზე, რაზეც მათ სჭირებათ, არ შეუჩერებია. ეს ესაუბრეთ ხალხს და არა ეს თქვენი დეზინფორმაციული და დამახინჯებული, მიკერძოებული კითხვები არ უნდა დაუსვათ პოლიტიკოსებს,”- აღნიშნა პრემიერ-მინისტრმა.

საკმაოდ დეტალურად განვმარტეთ, რომ არცერთი სანქცირებული ავიაკომპანია, თვითმფრინავი არ იფრენს საქართველოში, ამით ყველაფერია ნათქვამი, ვისაც არ უნდა, ქვეყანამ დაძლიოს სიღარიბე, უმუშევრობა და იყოს ეკონომიკა, ის არის ამ ქვეყნის მტერი, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებს განუცხადა.

ერთ-ერთი ტელეკომპანიის ჟურნალისტმა პრემიერ-მინისტრს მიმართა კითხვით, „ქვეყანა როდესაც კანდიდატის სტატუსის მოლოდინშია, რამდენად რელევანტურია ფრენების აღდგენა“, რაზეც ირაკლი ღარიბაშვილმა უპასუხა:

„თქვენ ხართ საქართველოს მოქალაქე. წესით, ყველა მოქალაქე უნდა ზრუნავდეს ჩვენი ქვეყნის ინტერესების დაცვაზე. თქვენ რომ იყოთ ობიექტური ჟურნალისტი, მაგ კითხვას დაუსვამდით იგივე ხოშტარიას, სააკაშვილის პარტიის წევრებს. მაშინ მეტად დამაჯერებელი იქნებოდა თქვენი კითხვა. თქვენ წარმოადგენთ „ნაციონალური მოძრაობის“ ტელევიზიას. მე გისვამთ კითხვას, რატომ არ უსვამთ კითხვას იგივე ხოშტარიას, რომელიც 10 წლის წინ ამბობდა, რომ ფრენები კარგია, უვიზო რეჟიმი კარგია, ვაჭრობა კარგია. თქვენ მაგ კითხვით ნუ მოდიხართ ჩემთან“, – განაცხადა ღარიბაშვილმა.

ამასთან, როგორც პრემიერ-მინისტრმა აღნიშნა, ყველაფერი შესაბამისობაშია ეროვნულ პოლიტიკასთან და საერთაშორისო სანქციებთანაც.

„ერთი რამ მინდა, გითხრათ, დასავლეთის ქვეყნებში, ჩვენი ომის შემდეგ, როცა ჩვენი ქართველი ბიჭები დაიღუპნენ და ჩვენ სისხლი დავღვარეთ და არა მარტო საქართველოში, არამედ ნატო-ს მისიებში – ავღანეთში, ერაყში, ყველგან ვიყავით ღირსეულად წარმოჩენილი. სისხლი დავღვარეთ, სიცოცხლე გავიღეთ. მივიღეთ სანაცვლოდ რა, ის, რომ აგვისტოს ომის შემდეგ არავის გადაუხედავს არავითარი ცვლილება არ შეუტანიათ პოლიტიკაში რუსეთთან მიმართებით. ჩემი მიზანია, ჩვენი ქვეყნის გადარჩენა და მისი დაცვა, ქვეყნისა და ჩვენი მოსახლეობის ინტერესების დაცვა.

ჩვენ საკმაოდ დეტალურად განვმარტეთ, რომ არცერთი სანქცირებული ავიაკომპანია, თვითმფრინავი არ იფრენს საქართველოში, ამით ყველაფერია ნათქვამი. ისლანდიაში შეხვედრებზე პირადად მქონდა საუბარი ჩვენს ევროპელ მეგობრებთან, ლიდერებთან. ავუხსენი, რომ ეს არის ჩვენი ეროვნული ინტერესების შესაბამისი. აქ ახალი და უცხო არაფერი არ არის. განვმარტე, რომ ეს არის შემადგენელი ეკონომიკური-სავაჭრო ურთიერთობების. ვისაც არ უნდა, რომ ქვეყანამ დაძლიოს სიღარიბე, უმუშევრობა, ვაჭრობა და იყოს ეკონომიკა, ძალიან მარტივად უნდა ითქვას, რომ ის არის ამ ქვეყნის მტერი. მთავარი არის შედეგი. ჩვენ უნდა ვიფიქროთ შედეგზე, საქმეზე. საქმე არის ის, რომ ყველაფერი, რაც ჩამოვთვალე, ემსახურება ჩვენი ქვეყნის ინტერესების დაცვას. უმარტივებს ჩვენს მოქალაქეებს გადაადგილებას, კიდევ უფრო განავითარებს ვაჭრობას. ყველაფერი შესაბამისობაშია ჩვენს ეროვნულ პოლიტიკასთან და ასევე საერთაშორისო სანქციებთანაც. ასე რომ, აქ კითხვები არ არსებობს“, – განაცხადა ირაკლი ღარიბაშვილმა.