ფადი ასლი არის უსამშობლო ადამიანი, მისი აზროვნება კი – მონური – კახა კალაძე

13:28 - 21/05/2023

დედაქალაქის მერი კახა კალაძე ბიზნესმენ ფადი ასლის მიერ სოციალურ ქსელში გაკეთებულ განცხადებას გამოეხმაურა.

ჟურნალისტის კითხვაზე, თუ რას ემსახურება მისი განცხადება, სადაც ამბობს, რომ
ორი არჩევანია – ან საქართველომ მიიღოს ევროკავშირის წევრობის კანდიდატის
სტატუსი ორი ოკუპირებული რეგიონის გარეშე, ან დაიბრუნოს ეს ორი რეგიონი და უარი თქვას სტატუსზე, კახა კალაძე უპასუხებს, რომ ეს არის მონური აზროვნება.

“ეს არის მონური აზროვნება, აგენტების აზროვნება. ამ ადამიანს სამშობლო არ გააჩნია და ცხადია, მე არ მიკვირს მსგავსი განცხადებები. ეს არის უსამშობლო ადამიანი. ვისაც ჩვენი ქვეყანა გვიყვარს, ვისაც საქართველო მიგვაჩნია სამშობლოდ, სადაც დავიბადეთ, გავიზარდეთ, ვისწავლეთ. გვიყვარს ჩვენი თითოეული კუთხე, რაიონი, ქალაქი, სოფელი, როგორ შეიძლება, ასეთმა ადამიანმა უარი თქვას ჩვენი ქვეყნის გაერთიანებაზე. მე კიდევ ერთხელ ვიმეორებ, ჩემთვის, როგორც ქართველისთვის, ამ ქვეყანაში დაბადებულისთვის, ყველაზე მთავარი და მნიშვნელოვანი არის საქართველოს ტერიტორიული მთლიანობის აღდგენა“, – აღნიშნა თბილისის მერმა.

ცნობისთვის, ბიზნესმენმა ფადი ასლიმ სოციალურ ქსელში სტატუსი გამოაქვეყნა, სადაც წერს, რომ “კითხვა რომელიც თითოეულმა ქართველმა პატიოსნად უნდა დაუსვას საკუთარ თავს, არის: მინდა გავერთიანდე ორ სეპარატისტულ რეგიონთან და ვიცხოვრო მათთან, როგორც რუსეთის მონამ,თუ მინდა ვიცხოვრო დამოუკიდებლად და თავისუფლად, როგორც ევროკავშირის წევრმა ამ ორი რეგიონის გარეშე?”

„ფადი ასლის ანტისახელმწიფოებრივი განცხადება უეცრად ნათქვამი სიტყვები არ ყოფილა“- ჩიბურდანიძე (ფოტო)

13:01 - 21/05/2023

„ფადი ასლის ანტისახელმწიფოებრივი განცხადება უეცრად ნათქვამი სიტყვები არ ყოფილა“, – ასე გამოეხმაურა სოციალურ ქსელში „ხალხის ძალის“ წევრი თამარ ჩიბურდანიძე, ფადი ასლის Facebook სტატუსს.

როგორც ჩიბურდანიძე აღნიშნავს, ფადი ასლის განცხადება მიმართულია, იმისკენ რომ საზოგადოებაში ახალი აზრის ჩამოყალიბებას შეუწყონ ხელი.

„აფხაზეთი და სამხრეთ ოსეთი რომ დიდი თავის ტკივილია ჩვენი დასავლელი პარტნიორებისთვის, ახალი არ არის. მართალია, საერთაშორისო თანამეგობრობა 30 წელია ჩვენთან ერთად ცდილობს კონფლიქტების დარეგულირებას, მაგრამ უშედეგოდ. ყველასათვის ცხადია, რომ ოკუპირებული ტერიტორიების დაბრუნება ვერ მოხდება რუსეთთან მათი დაპირისპირების გარეშე. რუსეთთან კონფლიქტში კი ჩვენი პარტნიორი სახელმწიფოები არ შევიდნენ და არც შევლენ. სულ სხვაა უკრაინის თემა, რომელიც ევროპის საზღვარია რუსეთთან და ეს ომი სწორედაც რომ მათი ომია. ვინ უნდა დაგვეხმაროს დროებით ოკუპირებული ტერიტორიების დაბრუნებაში? ვისი იმედი შეიძლება გვქონდეს? ვხედავთ, რომ თანდათან აფხაზეთის და სამაჩაბლოს თემები ოპოზიციის და მათი მხარდამჭერი უცხოელი პოლიტიკოსების სალაპარაკო ლექსიკიდან ქრება. ფადი ასლის ანტისახელმწიფოებრივი განცხადება უეცრად ნათქვამი სიტყვები არ ყოფილა. მან თქვა ის, რაც სურთ ოპოზიციის დიდ ნაწილს და მათ მხარდამჭერ უცხოელ პოლიტიკოსებს – საქართველო აფხაზეთის და სამაჩაბლოს გარეშე. ნატოშიც შესაძლოა მიგვიღონ, თუკი ჩვენს ძირძველ ტერიტორიებზე უარს ვიტყვით, მაგრამ არსებობს კი საქართველოში თუნდაც ერთი ქართველი, ვინც ამის თქმას ხმამაღლა გაბედავს? ამის თქმა ღიად რომ ვერ გაბედეს, ამიტომ შემოაგდებინეს ფადი ასლის აზრი, რომელზედაც დაიწყება ჩვეული ტექნოლოგიებით საზოგადოებრივი აზრის შექმნა. მაგრამ, იმდენად ჩიხში არიან, რომ ვერ იაზრებენ, თუ რა ბომბი აუფეთქდებათ ხელში“, – წერს თამარ ჩიბურდანიძე.

,,ელენე ხოშტარია სწორედ ამ სანქცირებული ბიუჯეტიდან იღებს მილიონობით რუსულ რუბლს” – ირაკლი კობახიძე

12:58 - 21/05/2023

“ქართული ოცნების” თავმჯდომარემ, ირაკლი კობახიძემ განაცხადა, რომ გუშინდელი პროტესტის ერთ-ერთი ლიდერი ელენე ხოშტარია სწორდ სანქცირებული, რუსული ბიუჯეტიდან იღებს თანხებს.

მისი თქმით, სწორედ გუშინდელი მოვლენებია რადიკალური ოპოზიციის რეალური სახე.

“ვინ იყო გუშინდელი პროტესტის ერთ-ერთი ლიდერი, ეს არის ელენე ხოშტარია, თუ რამეა დასანქცირებული დასავლეთის მხრიდან რუსეთში, ეს პირველ რიგში თვითონ სახელმწიფოა და მისი ბიუჯეტი, ელენე ხოშტარია, რომელიც თითქოს აღგზნებული და აღელვებული იყო იმის გამო, რომ ვიღაც იყო ჩამოსული საქართველოში, სწორედ ამ სანქცირებული ბიუჯეტიდან იღებს მუდმივად მილიონობით რუსულ რუბლს.

ასევე, მინდა, შეგახსენოთ, რომ სამი წელი არ იყო გასული ჩვენი ქვეყნის 20%-ის ოკუპაციიდან მას შემდეგ, რაც სააკაშვილმა თავისი ავანტიურისტული ქმედებებით რუსეთის ფედერაციას ჩააბარა ჩვენი ორი ისტორიული რეგიონი, სამი წელიც არ იყო გასული, რაც დაიღუპა ამ ოკუპაციის გამო რუსული სამხედრო აგრესიის გამო 500 ქართველი, 30 000 ადამიანი იქცა დევნილად და აქედან სამი წელიც არ იყო გასული, როდესაც სააკაშვილი პირადად ესტუმრა მიხალკოვს, რომელიც გამოირჩევა რუსეთის ხელისუფლების პროპაგანდაში აქტიური მონაწილეობით.

ეს არის მათი მორალური სახე დღეს. იმ ე.წ. პროტესტს, რომელიც ვიხილეთ გუშინ აქვს ერთადერთი მიზანი, ეს არის ესკალაცია, ეს არის ქვეყანაში არეულობის შექმნა პროვოკაციების მოწყობა და საბოლოო მიზანი არის მეორე ფრონტი. მე საზოგადოებას მინდა, მოვუწოდო, რომ სათანადოდ დააკვირდნენ ამ მოვლენებს და სწორი შეფასება მისცენ,” – განაცხადა კობახიძემ.

,,ასეთი ბნელებისთვის დაწერა ვაჟა ფშაველამ “სტუმარ-მასპინძელი” – კობახიძე

12:54 - 21/05/2023

“ქართული ოცნების” თავმჯდომარის ირაკლი კობახიძის განცხადებით, როდესაც თვითონ პრეზიდენტი აქეზებს ქსენოფობიურ კამპანიას, როდესაც ქორწილის მეორე დღის ჩაშლას აფასებს, ვითომ ხალხის გამარჯვებად ეს არის სამარცხვინო. კობახიძის თქმით, ის რუსეთის მოქალაქე, რომელსაც ქორწილი ჰქონდა, რუსეთის აგრესიას უკრაინაში გმობს და ასეთი ადამიანის ქორწილის ჩაშლა, საქართველოს კულტურასთან შეუთავსებელი მოვლენაა. “ვინ ეკითხება სალომე ზურაბიშვილს, მე რაზე ვისაუბრებ. მან, თავის უფლებამოსილებებს მიხედოს ის ჯობია. მე მინდა გავიხსენო მისი გუშინდელი განცხადება, ქორწილთან დაკავშირებით, მან თქვა, რომ ქორწილის მეორე დღე ჩაიშალა და ეს არის ქართველი ხალხის ერთგვარი გამარჯვებაო. ჯერ ერთი, სალომე ზურაბიშვილს არ აქვს უფლება ქართველი ხალხის სახელით ისაუბროს, როდესაც საქმე ეხება ნებისმიერ თემას, ერთი მარტივი მიზეზის გამო, საქართველოში ხალხმა პოლიტიკის განსაზღვრის ლეგიტიმაცია, “ქართულ ოცნების” ხელისუფლებას მიანიჭა, პარლამენტს, მთავრობას – ეს არის რეალობა. პრეზიდენტს არ აქვს უფლება, ხალხის სახელით ისაუბროს, მითუმეტეს, ის არის ბოლომდე აცდენილი იმ ხალხის ნებას, რომელმაც მას დაუჭირა მხარი 2018 წელს. როდესაც თვითონ პრეზიდენტი აქეზებს ქსენოფობიურ კამპანიას, როდესაც ქორწილის მეორე დღის ჩაშლას აფასებს, ვითომ ხალხის გამარჯვებად ეს არის სამარცხვინო. მე ერთი რამე მინდა გითხრათ, აქ იყო კონკრეტული ადამიანის ქორწილი, რომელიც თავად გამოირჩევა ომის საწინააღმდეგო გზავნილებით და ამ კონკრეტულ რუსეთის მოქალაქეს ბანერი უდევს საკუთარ “ფეისბუკ” გვერდზე, რითაც ის გმობს რუსეთის სამხედრო აგრესიას უკრაინაში. ამ კაცის ქორწილის ჩაშლა, საქართველოში, მან განიხილა როგორც ქართველი ხალხის გამარჯვება. ქორწილის ჩაშლა, მითუმეტეს იმ ადამიანის ქორწილის ჩაშლა, რომელსაც არც დანაშაული მიუძღვის, საქართველოში უბრალოდ ჩვენს კულტურასთან შეუთავსებელი მოვლენა. თავის დროზე, სტუმარ-მასპინძელი ვაჟა ფშაველამ დაწერა მე-19 საუკუნეში.მაშინ მსოფლიოში ნაკლებად ცივილიზებული იყო საზოგადოება და ეს ეხებოდა საქართველოსაც. ბევრად უფრო მეტი სალომე ზურაბიშვილი და ელენე ხოშტარია ცხოვრობდა მაშინ საქართველოში. ასეთი ბნელებისთვის დაწერა ვაჟა ფშაველამ “სტუმარ-მასპინძელი”, – განაცხადა ირაკლი კობახიძემ.

ჰიროსიმაში, ჯო ბაიდენი ზელენსკის შეხვდა

12:51 - 21/05/2023

ჰიროსიმაში დიდი შვიდეულის ქვეყნების სამიტზე აშში-ის და უკრაინის პრეზიდენტების ჯო ბაიდენის და ვოლოდიმირ ზელენსკის შეხვედრა შედგა. ამის შესახებ ინფორმაციას CNN ავრცელებს.

შეხვედრის შემდეგ, ჯო ბაიდენმა უკრაინისთვის სამხედრო დახმარების ახალი პაკეტი გამოაცხადა.

„შეერთებული შტატები რაც შეუძლია ყველაფრის გაკეთებას აგრძელებს იმისთვის, რომ გააძლიეროს უკრაინის თავდაცვის უნარი“, – განაცხადა ბაიდენმა.

მისი თქმით, ახალი, 375 მილიონი აშშ დოლარის ღირებულების პაკეტი საბრძოლო მასალას, არტილერიასა და სატრანსპორტო საშუალებებს მოიცავს.

,,აგენტოკრატებს ახალი დავალება მისცეს” -ქართველიშვილი (ფოტო)

12:29 - 21/05/2023

„აფხაზებთან და ოსებთან თანაცხოვრება – „გოიმობაა“, სოხუმისა და ცხინვალის გარეშე ევროკავშირის წევრობა – „რეალისტური პერსპექტივა“, – ამის შესახებ სოციალურ ქსელში წერს „ხალხის ძალის“ წევრი, ანალიტიკოსი დავით ქართველიშვილი, რომელიც ბიზნესმენ ფადი ასლის მიერ Facebook-ზე გამოქვეყნებულ სტატუსს გამოეხმაურა.

როგორც ქართველიშვილი აღნიშნავს, აგენტოკრატებს ახალი დავალება მისცეს, რომ ამ ლოზუნგებით კვლავ მოხდეს ახალგაზრდების ქუჩაში გამოყვანა და არეულობის მოწყობა.

„აი ისიც! როგორი პროგნოზირებადები ხართ. ოღონდ ამავდროულად ლაჩრები – გადამთიელის პირით ახმოვანებთ, თქვენ ამისთვის ჯერჯერობით მზად არ ხართ. თუმცა, აგენტოკრატების თქვენზე მიცემული ეს დავალება უმარტივესად იკითხება: ქვეყნის ტერიტორიული მთლიანობის აღდგენა – „რუსული პროექტია“. აფხაზებთან და ოსებთან თანაცხოვრება – „გოიმობაა“. სოხუმისა და ცხინვალის გარეშე ევროკავშირის წევრობა – „რეალისტური პერსპექტივა“. ესეც ახალი გზავნილი ჩვენს „გულანთებულ“ ახალგაზრდებს, რომლებსაც ჩვენი ეს ძირძველი რეგიონები არც ახსოვთ: „სოხუმი და ცხინვალი არის ბალასტი, რომელიც მოსაცილებელია, თუ გვინდა ევროპული პერსპექტივა. სოხუმი და ცხინვალი – არის კრემლის პროექტი, რათა დააშორონ საქართველო დასავლურ ცივილიზაციას! არა – სოხუმსა და ცხინვალს!“ არც ისე შორსაა ის დრო, როდესაც ამ ლოზუნგით ქართველ ბავშვებს კვლავ გამოიყვანენ რუსთაველზე. როდესაც სამიოდე წლის წინ აფხაზეთის ინტერნეტ გამოცემისთვის მიცემულ 2-საათიან ინტერვიუში დავით ბერძენიშვილი დაწვრილებით ხსნიდა, თუ რატომ არაა აფხაზეთი საქართველოს ნაწილი – ის ამ დღეს გვიახლოვდება თურმე. და როდესაც დღეს ამ მორიგმა უჯიშო არა-ადამი-ანმა ამ ბრენდის გავრცელება უკვე დაიწყო, ესე იგი რეალობასთან ახლოსაა ჩვენი 30-წლიანი მოლოდინი. საკითხავია კი ერთია როგორც ყოველთვის: რა გზას ავირჩევთ – ბარაბა თუ იესო?“, – წერს Facebook-ზე დავით ქართველიშვილი.

,„ასეთი იდიოტი და უპასუხისმგებლო როგორ უნდა იყო, ასეთი თანამდებობის მქონე ადამიანი”- ქადაგიძე

12:26 - 21/05/2023

„ასეთი იდიოტი და უპასუხისმგებლო როგორ უნდა იყო, ასეთი თანამდებობის მქონე ადამიანი, რომ ავიაკომპანიამ პერსონა ნონ გრატად გამოგაცხადოს?!”, – ამის შესახებ სოციალურ ქსელში „ხალხის ძალის” წევრი ზურაბ ქადაგიძე წერს.

მისი თქმით, პრეზიდენტს ეგონა, რომ მორალურად დაასანქცირებდა ავიაკომპანიას, მაგრამ პირიქით მოხდა.

„რა სამარცხვინო ბრძანდებით, ქალბატონო პრეზიდენტო ატყობთ? ასეთი იდიოტი და უპასუხისმგებლო როგორ უნდა იყო, ასეთი თანამდებობის მქონე ადამიანი, რომ ავიაკომპანიამ პერსონა ნონ გრატად გამოგაცხადოს?! ამ საცოდავს ეგონა, მორალურად დაასანქცირებდა კერძო კომპანიას და თავი სასაცილო მდგომარეობაში ჩაიგდო. სალომე ზურაბიშვილი, თავი რომ ბადრიჯანი გგონია და ყაბაყადაც არ ვარგიხარ, ეგ მაგის ბრალია. ზურგი აქციე საკუთარ ამომრჩეველს და გარედან მოთრეულ „ნარატივებზე” დასკუპდი… ვერც საზოგადოებრივ ამინდს ქმნი და პოლიტიკურ კარიკატურად იქეცი!”, – წერს ზურაბ ქადაგიძე.

,,ჩემთვის, როგორც მოქალაქისთვის სრულიად გასაგებია ის, რაც გუშინ მოხდა” – იოსელიანი

12:04 - 21/05/2023

ჩემთვის, როგორც მოქალაქისთვის სრულიად გასაგებია ის, რაც მოხდა გუშინ ქორწილის თუ შეკრების ირგვლივ, – ამის შესახებ სახალხო დამცველმა, ლევან იოსელიანმა განაცხადა. იოსელიანის თქმით, მისაღები და გასაგებია ის პროტესტი, რომელიც 20 მაისს მოქალაქეების მიერ იყო გამოთქმული. „როდესაც შენი ქვეყანა არის ოკუპირებული, ასეთი ვიზიტები, განსაკუთრებით, როდესაც მაღალი თანამდებობის პირების შვილები ჩამოდიან, სენსიტიურობით აღიქმება. სრულიად გასაგები არის იმ ადამიანების აღშფოთება, რომელიც მივიდნენ და პროტესტი გამოხატეს“, – აღნიშნა იოსელიანმა. გუშინ სასტუმრო „ყვარლის ტბასთან“ აქციაზე ადმინისტრაციული წესით 16 პირი დააკავეს.

21 მაისს სოფიკო ჭიაურელის დაბადების დღეა

11:13 - 21/05/2023

ლეგენდარული მსახიობი სოფიკო ჭიაურელი 1937 წლის 21 მაისს დაიბადა თბილისში, “ფიქრის გორაზე”, ლეგენდარული მსახიობის, ვერიკო ანჯაფარიძისა და ცნობილი რეჟისორის, მიხეილ ჭიაურელის ოჯახში.

დედა – ვერიკო ანჯაფარიძე, ინგლისის ხელოვნების აკადემიამ XX საუკუნის ათ საუკეთესო მსახიობს შორის დაასახელა.

მამა _ საბჭოთა კავშირის სახალხო არტისტი და სტალინის საყვარელი რეჟისორი მიხეილ ჭიაურელი მრავალი ტალანტით დაჯილდოვებული ადამიანი იყო _ მხატვარი, სკულპტორი, პოლიგლოტი, უკრავდა თითქმის ყველა ინსტრუმენტზე.

მან ასზე მეტი როლი ითამაშა ქართულ თეატრსა და კინოში. ერთადერთია საბჭოთა მსახიობებს შორის, რომელიც შვიდჯერ დაჯილდოვდა სხვადასხვა საერთაშორისო კინოფესტივალზე ქალის როლის საუკეთესოდ შესრულებისთვის. თენგიზ აბულაძის 1976 წელს გადაღებულ ფილმში “ნატვრის ხე” სოფიკო ჭიაურელმა “ფუფალას” როლი ითამაშა და ფილმის ბრწყინვალე სამსახიობო ანსამბლში გამორჩეული ადგილი დაიკავა. ფილმმა არაერთ საერთაშორისო კინოფესტივალზე მიიღო ჯილდო. გამორჩეული იყო “ნატვრის ხის” ჩვენება აშშ-ში, ჩიკაგოს საერთაშორისო კინოფესტივალზე, სადაც სცენაზე ასული სოფიკო ჭიაურელი მაყურელმა ვერ იცნო. თავად მსახიობი ასე იხსენებდა ამ ისტორიას: ნატვრის ხე გვქონდა წაღებული თენგიზ აბულაძეს და მე ჩიკაგოში, კინოფესტივალზე. ფილმის ჩვენების შემდეგ წარმადგინეს, გამოვედი სცენაზე, მაშინ გამხდარი ვიყავი ძალიან… ტაში დაგვიკრეს, თავი დავუკარი და მერე ეკითხებიან თენგიზს – ის ქალი, ფუფალას რომ თამაშობს არ ჩამოვიდაო? თენგიზმა უთხრა – ეს ის ქალიაო. მიყურებდნენ გაკვირვებულები, ვერ დაიჯერეს რომ მე ის ქალი ვიყავი”… “ნატვრის ხის” გადაღებიდან რამდენიმე წლის შემდეგ, როდესაც თენგიზ აბულაძე ტრილოგიის მესამე ფილმს – “მონანიებას” იღებდა, ფილმში სოფიკო ჭიაურელს შესთავაზა როლი, თუმცა მსახიობმა ამ როლზე რეჟისორს დედის, ვერიკო ანჯაფარიძის კანდიდატურა შესთავაზა. “როცა მონანიებას იღებდა, თენგიზ აბულაძეს სურდა რომ ის ქალი, რომელიც ბოლო სცენაში ტაძრისაკენ მიმავალ გზას ეძებს, მე მეთამაშა. ის ფიქრობდა, რომ ეს ქალი არის დაბერებული ფუფალა, ეს ფუფალას ბოლოა… მახსოვს დამირეკა და მითხრა – სოფიკო, ასე ვფიქრობ და მოდი მოვემზადოთ, გრიმზე წავიმუშაოთ, შენ რაღაცნაირად დაგაბეროთ… ვუთხარი: ბატონო თენგიზ, რად გინდათ რომ ეხლა ჩვენ გრიმზე ვიმუშაოთ, ხომ იქნება რაღაც არაესთეტიკური ამაში, რა საჭიროა ეს ყველაფერი, როდესაც არსებობს ვერიკო?! მითხრა, რას ამბობ, მე როგორ ვაკადრებ ამ პატარა ეპიზოდს ვერიკოსო. მე კი ვუპასუხე – მე ვაკადრებ, მე ვეტყვი-მეთქი. მართლაც ვუთხარი და დავითანხმე, დედა, აქვე გადაგიღებენ, აქვე ჩვენს ქუჩაზე მოვლენ და უცებ გადაგიღებენ – მეთქი. ასეც მოხდა და როგორ ჩაჯდა ეს ეპიზოდი ამ ფილმში იცით, მგონი მონანიებიდან ერთ-ერთი საუკეთესო ეპიზოდია…” – იხსენებდა სოფიკო ჭიაურელი.

ვერიკო ანჯაფარიძე, ფილმი “მონანიება” 1984 წელი

,,რუსეთს ბევრი ინსტრუმენტი აქვს საქართველოს ასაფეთქებლად, რაც, მაგალითად, აზერბაიჯანში არ აქვს”- საყვარელიძე

11:03 - 21/05/2023

რუსეთმა, რომელიც ომშია ჩართული, ამდენი ხნის ჩაჟანგული ვიზებისა და ფრენების საკითხი რატომ ამოიტანა? უკრაინის მჩაგვრელ ოკუპანტ რუსეთს აუკრძალეს ტვირთების გადატანა და ეს ხაზები უნდა გადმოვიდეს კავკასიაზე. ჯერ არ გაფორმებულა. შესაბამისად, დღეს რუსეთს აწყობს კავკასიის აფეთქება, მით უმეტეს, საქართველოსი, – ამის შესახებ პოლიტოლოგმა რამაზ საყვარელიძემ მედიასთან განაცხადა. მისი თქმით, რუსეთს ბევრი ინსტრუმენტი აქვს საქართველოს ასაფეთქებლად, რაც, მაგალითად, აზერბაიჯანში არ აქვს. „ჩვენ ვხედავთ, რა ოპერატიულად იგებენ საქართველოში ოპოზიციის წარმომადგენლები, ვინ ჩამოდის, როდის ჩამოდის, სად ჩერდება და ა.შ. აქედან უნდა გავაკეთოთ დასკვნა, რომ არის მეხუთე კოლონა და არ უნდა ამას ბევრი ლაპარაკი. რუსეთის ინტერესზე მუშაობს, ყველაფერს აკეთებს იმისთვის, რომ ჩაიშალოს კანდიდატის სტატუსი და მეტი რაღა უნდა ქნან? რუსეთის პასპორტიანი მოქალაქეები ჰყავთ პარტიაში, ბიოგრაფიებზე აღარ ვლაპარაკობ და სხვა რა უნდა მოხდეს, როდემდე უნდა გავიკვირვოთ მათი რუსეთთან სიახლოვე, მათი ინტერესი?“ – განაცხადა საყვარელიძემ. როგორც პოლიტოლოგმა აღნიშნა, ყველაფერი კეთდება, რომ საქართველო ამოვარდეს იმ ქვეყნების რიგიდან, სადაც ყოფნა უსაფრთხოა. „რა იყო გავრილოვის ღამეს? იგივე იყო; მერე პოზნერი რომ ჩამოვიდა, იგივე იყო. ანუ, ყველაფერი კეთდება იმისთვის, რომ საქართველო ამოვარდეს იმ ქვეყნების რიგიდან, რომლებშიც ყოფნა უსაფრთხოა. შესაბამისად, მოაკლდეს ტრანზიტი, მოაკლდეს ტურისტი და ა.შ. ავტობუსში მყოფი ადამიანების შეურაცხყოფა ხომ უკვე იმის ნაბიჯია, რომ, აი, ჩვენთან ყოფნა სახიფათოა. მეტი ხომ არაფერია?! ძალადობაა წასული წინა პლანზე და თუ ჩვენთან ყოფნა სახიფათოა, ეს მესიჯი მარტო რუსისთვის კი არ იქნება, არამედ ყველასთვის, ვინც უცხოეთიდან მოდის“, – განაცხადა საყვარელიძემ. ამასთან, საყვარელიძემ თქვა, რომ, სამწუხაროდ, პატრიოტულ თემებზე გულანთებული მოსახლეობის ნაწილი გარბის და აქციაზე იცავს საქართველოს, მაგრამ ასეთი დაცვით საქართველოს ცუდ საქმეს რომ უკეთებენ, ამას დაფიქრება სჭირდება.

21 მაისს იოანე ღვთისმეტყველის ხსენების დღეა

10:42 - 21/05/2023

დღეს, 21 მაისს მართლმადიდებელი ეკლესია „სიყვარულის მოციქულ” – წმინდა იოანე ღვთისმეტყველის ხსენების დღეს აღნიშნავს. ამასთან დაკავშირებით, ტაძრებში წირვა-ლოცვა შესრულდება. წმინდა იოანე ღვთისმეტყველი, წინდა მოციქულ იაკობის ძმა იყო. იგი იაკობ და პეტრე მოციქულებთან ერთად, უფლის ერთ-ერთი ერთგული მოწაფე გახდა. შეშინებული გამოვარდა საკურთხევლიდან …- სასწაული, რომელიც მოძღვარმა ზიარების წინ იხილა 2020-05-19 შეშინებული გამოვარდა საკურთხევლიდან …- სასწაული, რომელიც მოძღვარმა ზიარების წინ იხილა ჯვარზე გაკრულმა მაცხოვარმა, სწორედ, წმინდა იოანე ღვთისმეტყველს მიანდო ყოვლადწმინდა ღვთისმშობელზე ზრუნვა. თავად ღვთისმშობელსაც, მოციქულის სახით სამყაროზე ზრუნვა ჩააბარა. იოანე მახარებელი უპირატესად, სიყვარულის მოციქულია. ვერც მხცოვანებამ, ვერც ხორციელმა უძურებამ, ვერ შეძლო დაეცხრო მასში საოცარი მოშურნეობა. იოანე მახარებელი სიცოცხლის უკანასკნელ დღემდე, მოწაფეებს იკრებდა ირგვლივ და მოუწყინებლად შეაგონებდა, ურთიერთს შორის მშვიდობა დაეცვათ და ერთმანეთი ყვარებოდათ. იოანე მახარებელი ას წელს იყო გადაცილებული, როცა სასუფეველს შეერთო. ზედწოდება „ღვთისმეტყველი” წმიდა ეკლესიამ ქრისტეს მოციქულებიდან, მხოლოდ წმიდა იოანეს – ღვთაებრივი განგების ფარულ მჭვრეტელს მიაკუთვნა. „შვილნო, გიყვარდეთ ერთმანეთი”, – წმინდა იოანეს ამ სიტყვებს კიდევ ერთხელ მოისმენენ მორწმუნენი, ახლა უკვე ბოლო ჟამს. „აღდგომის სასწაული“ – ორი წლის ბიჭი აპარატიდან გამორთეს და აი, რა მოხდა შემდეგ 2020-04-18 „აღდგომის სასწაული“ – ორი წლის ბიჭი აპარატიდან გამორთეს და აი, რა მოხდა შემდეგ როგორც ბრძანებს წმინდა ანდრია, „ნეტარ არს, რომელი არა იპოვოს მბრძოლ ღმრთისა მათ დღეთა შინა, არამედ დაიმარხოს სარწმუნოება იესუ ქრისტესი”. “ღმერთი სიყუარულია” – წერს სახარებაში იოანე მახარებელი. მაშ, ყური ვუგდოთ ღვთის რჩეულს – შევიყვაროთ ერთმანეთი, რათა მივუახლოვდეთ უფლის არსს, შევიგრძნოთ ჭეშმარიტი სიხარული და მარადისობის დღესასწაული – დღესასწაული სიყვარულისა! უფლის სიტყვა წმინდა მახარებელმა იერუსალიმში, სამარიაში, ეფესოსა და კუნძულ პატმოსზე იქადაგა. წმინდა იოანე ღვთისმეტყველმა, მოციქულთაგან, ყველაზე მეტხანს იცოცხლა და ღრმად მოხუცი მშვიდად მიიცვალა. წმინდა იოანე მახარებელი გეწეოდეთ, უფლისმიერ სიყვარულს დაევანოს ჩვენს გულებში!

,,ჩვენმა ხალხმა, განსაკუთრებით ახალგაზრდებმა, უნდა იცოდნენ ამ გმირთა სახელები”- პატრიარქის წერილი

10:37 - 21/05/2023

საპატრიარქოს საზოგადოებასთან ურთიერთობის სამსახური 1923 წლის 20/21 მაისისა და საქართველოს დამოუკიდებლობის დღესთან დაკავშირებით სრულიად საქართველოს კათოლიკოს-პატრიარქის ილია მეორის წერილს ავრცელებს.

„გვიახლოვდება ყველა ქართველისათვის და საქართველოს ყველა მოქალაქისათვის გამორჩეული თარიღი, ჩვენი ქვეყნის დამოუკიდებლობის აღდგენის დღე, – 26 მაისი.

ეს მოვლენა 1918 წელს მოხდა და მას ერთი წლით უსწრებდა საქართველოს მართლმადიდებელი ეკლესიის ავტოკეფალიის გამოცხადება.

ამ ორი უმნიშვნელოვანესი ფაქტით საქართველომ 100 წელზე მეტი ხნის წინ გაუქმებული ჩვენი ეკლესიისა და ქვეყნის სუვერენიტეტი დაიბრუნა და დამოუკიდებელი, თვითმმართველი სახელმწიფო გახდა.

ეს იყო ჟამი საერთო-სახალხო დიდი სიხარულისა და ზეიმისა, რომელსაც ჩვენც ამ გრძნობით აღვნიშნავთ, მაგრამ დღეს გვინდა გავიხსენოთ სხვა მოვლენებიც.

როგორც ცნობილია, ქვეყნის დამოუკიდებლობამ მხოლოდ 1921 წლამდე გასტანა, თუმცა ხალხს დიდი მუხტი მისცა და თავისუფლებისათვის ბრძოლის სულისკვეთებით განმსჭვალა; ამიტომაც იყო, რომ, როდესაც ბოლშევიკებმა ძალაუფლება ხელში ჩაიგდეს, ჩვენი საზოგადოება, მთელი საქართველო მათ ძალმომრეობით რეჟიმს თავიდანვე დაუპირისპირდა და მისგან გათავისუფლებას მთელი მონდომებით ცდილობდა.

ხალხის მხედრულ დარაზმვასა და აჯანყებისათვის მზადებას ქაქუცა ჩოლოყაშვილთან და სხვებთან ერთად უძღვებოდა შესანიშნავი მამულიშვილი, საქართველოს დამოუკიდებლობის აქტის ტექსტის ავტორი, თბილისის უნივერსიტეტის ერთ-ერთი დამფუძნებელი, საქართველოს ეკლესიის ავტოკეფალიის აღდგენის თანამონაწილე, ეროვნულ-დემოკრატიული პარტიის თავმჯდომარე, წმინდა ილია მართლის (ჭავჭავაძე) დისშვილი, კოტე (კონსტანტინე) აფხაზი (შერვაშიძე). მაგრამ მოღალატემ შეთქმულნი გასცა.

ზუსტად 100 წლის წინ თბილისში, ვაკის პარკის ტერიტორიაზე, ჩეკისტებმა დახვრიტეს ჩვენი ხალხის საუკეთესო ნაწილის გამორჩეული წარმომადგენლები, სამშობლოს დამოუკიდებლობისათვის მებრძოლი სამხედრო ცენტრის 15-ვე წევრი.

ესენი იყვნენ: . ეროვნულ-დემოკრატიული პარტიის თავმჯდომარე, სამხედრო ცენტრების ხელმძღვანელი, გენერალი კოტე აფხაზი 2. გენერალური შტაბის წევრი, გენერალი ალექსანდრე ანდრონიკაშვილი 3. გენერალი ვარდენ წულუკიძე 4. პოლკოვნიკი როსტომ მუსხელიშვილი 5. პოლკოვნიკი გიორგი ხიმშიაშვილი 6. პოლკოვნიკი ელიზბარ გულისაშვილი; 7. პოლკოვნიკი ალექსანდრე მაჭავარიანი 8. პოლკოვნიკი დიმიტრი ჩრდილელი 9. როტმისტერი სვიმონ (სიმონიკა) ბარგატიონ-მუხრანელი 10. როტმისტერი ფარნაოზ ყარალაშვილი 11. ლეიტენანტი ლევან (ლელო) კლიმიაშვილი 12. სამხედრო მოხელე ნიკოლოზ ზანდუკელი 13. იასონ კერესელიძე 14. სვიმონ ჭიაბრიშვილი 15. ივანე ქუთათელაძე.

კოტე აფხაზის ბოლო სიტყვები იყო: „ვკვდები სიხარულით, რადგან ღირსი გავხდი საქართველოს სამსხვერპლოზე ზვარაკად მიტანისა. ჩემი სიკვდილი გამარჯვებას მოუტანს საქართველოს.”

ჩვენმა ხალხმა, განსაკუთრებით ახალგაზრდებმა, უნდა იცოდნენ ამ გმირთა სახელები, საბჭოთა ათეისტური რეჟიმის წინააღმდეგ საქართველოსთვის შეწირულთა ისტორია, რადგან ეს წარსული ჩვენი დამოუკიდებლობის, ჩვენი დღევანდელობის საფუძველია.

ღმერთმა ცათა სასუფეველი დაუმკვიდროს კონსტანტინე შერვაშიძეს (კოტე აფხაზს) და მის თანამებრძოლთა უკვდავ სულებს და საქართველოსთვის თავდადებულ ყველა მამულიშვილს, ხოლო მათი შთამომავალნი მშვიდობით აკურთხოს.

მინდა დღესვე წინასწარ მოგილოცოთ საქართველოს დამოუკიდებლობის დღე. ღმერთმა თვისი მოწყალებით დაიცვას სრულიად საქართველო, ყოველი თქვენგანი, – როგორც საქართველოში მცხოვრებნი, ისე სამშობლოს საზღვრებს გარეთ მყოფნი. ღმერთმა მშვიდობა და სულიერი სიხარული მოგმადლოთ“, – აცხადებს პატრიარქი.

1...2,0882,0892,090...2,305 Page 2,089 of 2,305