25 აპრილი საქართველოს თავდაცვის ძალების ლოჯისტიკის დღეა

17:37 - 25/04/2023

საქართველოს თავდაცვის ძალები 25 აპრილს ლოჯისტიკის დღეს აღნიშნავს. ინფორმაციას საქართველოს თავდაცვის სამინისტრო ავრცელებს.

უწყების ცნობით, პროფესიული დღე ოსიაურში, ჯარების ლოჯისტიკური უზრუნველყოფის სარდლობის დაცვის ბატალიონის ბაზაზე აღინიშნა.

თავდაცვის სამინისტროს ინფორმაციით, პირად შემადგენლობას ლოჯისტიკის დღე საქართველოს თავდაცვის ძალების მეთაურმა, გენერალ-მაიორმა, გიორგი მათიაშვილმა, თავდაცვის მინისტრის მოადგილემ, გიორგი ხაინდრავამ და ლოჯისტიკური უზრუნველყოფის სარდალმა, ბრიგადის გენერალმა, კახა ტაბატაძემ მიულოცეს.

სიტყვით მიმართვისას ყურადღება თავდაცვის ძალებში ლოჯისტიკური უზრუნველყოფის მნიშვნელობაზე და საბრძოლო მზადყოფნის მაღალ დონეზე გამახვილდა.

„ღონისძიება დაჯილდოების ცერემონიით გაგრძელდა. ლოჯისტიკოსებს სამსახურებრივი მოვალეობის შესრულებისას გამოვლენილი მაღალი პროფესიონალიზმისთვის სამსახურებრივი – საშტატო იარაღი გადაეცათ, საბრძოლო მომზადებაში მიღწეული წარმატებისა და ჯარების მაღალი საბრძოლო მზადყოფნის შენარჩუნებისთვის მედლით “გენერალი კვინიტაძე” დაჯილდოვდნენ, ქვეყნის თავდაცვისუნარიანობის განმტკიცების საქმეში გამოჩენილი დამსახურებისთვის კი, მედლები “სამშობლოსთვის თავდადებული” გადაეცათ. ასევე, სამხედროებს დაკისრებული მოვალეობის მაღალხარისხიანად შესრულებისთვის ფასიანი საჩუქრები გადაეცათ და თავდაცვის ძალების მეთაურის მადლობა გამოეცხადათ.

სტუმრებმა ბაზაზე გამოფენილი შეიარაღებაც დაათვალიერეს. ღონისძიებას თავდაცვის მინისტრის მოადგილეები და თავდაცვის ძალების ხელმძღვანელი პირები დაესწრნენ“, – აღნიშნულია ინფორმაციაში.

“ამ ჭიდაობაში ივანიშვილი კი არა, ქვეყანა ზარალდება” – როგორ აფასებს IRI-ის კვლევის შედეგებს ვაჟა ბერიძე

17:23 - 25/04/2023

საერთაშორისო რესპუბლიკური ინსტიტუტის (IRI) დღეს, გამოქვეყნებული საზოგადოებრივი აზრის კვლევა (Center for Insights in Survey Research) აჩვენებს, რომ გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას.

კვლევის თანახმად, უახლოეს შაბათს არჩევნები, რომ იყოს, გამოკითხულთა 19% ხმას „ქართულ ოცნებას“ მისცემდა, 14% – „ნაციონალურ მოძრაობას“.

გამოკითხულთა 39% აცხადებს, რომ არავითარ გარემოებაში ხმას არ მისცემდა „ნაციონალურ მოძრაობას“, 34 34% “ქართულ ოცნებას”

ამერიკის ეროვნულ-დემოკრატიული ინსტიტუტის (IRI) მიერ გამოქვეყნებული საზოგადოებრივი აზრის კვლევის მიხედვით, საჯარო ფიგურების რეიტინგში მოწონების ყველაზე მაღალი მაჩვენებელი თბილისის მერს, კახა კალაძეს აქვს.

კითხვაზე, თითოეულ საჯარო ფიგურაზე დაასახელეთ, დადებითი აზრის ხართ, მეტ-ნაკლებად დადებითის, მეტ-ნაკლებად უარყოფითის თუ ძალიან უარყოფითის:
კახა კალაძის მიმართ 52% დადებითად არის განწყობილი, ხოლო 44% უარყოფითად
სალომე ზურაბიშვილის მიმართ 48% დადებითად არის განწყობილი, 47% კი უარყოფითად
ირაკლი ღარიბაშვილის მიმართ დადებითად განწყობილია 43%, უარყოფითად კი 53%
გიორგი გახარიას დადებითი რეიტინგი 36%-ია, უარყოფითი კი 56%
მიხეილ სააკაშვილის მიმართ დადებითად განწყობილია 36%, უარყოფითად კი 59%
ბიძინა ივანიშვილის მიმართ 35% დადებითად არის განწყობილი, 58% კი უარყოფითად
შალვა ნათელაშვილი მიმართ 35% დადებითად არის განწყობილი, ხოლო 58% უარყოფითად

„საერთაშორისო რესპუბლიკური ინსტიტუტის (IRI)“ ახალი კვლევა „ჯორჯიან თაიმსთან“ საუბარში პოლიტოლოგმა ვაჟა ბერიძემ შეაფასა.

მისი თქმით, სოციოლოგიური კვლევების შედეგები საქართველოში სანდო არ არის.

„ასეთი კვლევებით ხდება საზოგადოების განწყობებისა და საზოგადოებრივი აზრის მონიტორინგი. ვინც ამ კვლევებს ატარებს ქართული კომპანიის მეშვეობით, კარგად აქვთ დამუშავებული სათანადო მეთოდოლოგია და შედეგებს იღებენ დასაშვებ ცდომილებასთან ახლოს. ძირითადად ეს კვლევები სანდოა და ამ კვლევებით სარგებლობენ ველზე მომუშავე ორგანიზაციებიც, “კავკასიის რესურს ცენტრი” და მორე მხარეს “აიპიემი”. ამ კვლევებით იღებენ ისეთ მონაცემებს, რაც მეტ-ნაკლებად რეალობას ასახავს. სოლიდური ამერიკული ორგანიზაციები „ენდიაი“ და „აირაი“ იღებენ ზუსტ მონაცემებს, ხოლო შემდეგ, ჩემი ღრმა რწმენით, ქართულ საზოგადოებას კორექტირებულს აწვდიან, რაც შედის ჩვენი სტრატეგიული პარტნიორის აშშ-ს ინტერესებში საქართველოსთან მიმართებით. ამ შედეგებში, მაგალითად, ორი მონაცემი შეიძლება ადეკვატური იყოს და ერთი – ისეთი, რომელიც დამკვეთ ორგანიზაციას საზოგადოებრივი აზრის მართვის თვალსაზრისით ხელს აძლევს.

აქედან გამომდინარე, ჩვენ ჭეშმარიტების დასადგენად უნდა დავიწყოთ ბნელ ოთახში ხელების ფათურით სიარული. მათი თამაში ვითამაშოთ, ანუ დავეხმაროთ საზოგადოებრივი აზრის მართვაში და პოპულარიზაცია გავუწიოთ იმ შედეგებს, რომელიც მათ გასასაჯაროებლად მიზანშეწონილად მიიჩნიეს. ამის გათვალისწინების გარეშე კი მონაცემების ანალიზი მცდარი და არასერიოზული იქნება, რასაც ბევრი მედია საშუალება აკეთებს,“– აცხადებს ვაჟა ბერიძე.

როგორც ის აცხადებს, კვლევის შედეგებში, რაღაც რეალობასთან ახლოსაა და რაღაც კორექტირებულია.

„მაგალითად, მიშას რეიტინგმა გადაასწრო ბიძინას რეიტინგს. ეს მიშას მხარდასაჭერად გაკეთებული მონაცემია, რადგან საქართველოში ბიძინას რეიტინგს სააკაშვილის რეიტინგი ვერასდროს გადაასწრებს, სულ რომ ამოტრიალდეს ქვეყანა. იმიტომ კი არა, რომ ბიძინა „ფრთოსანი ანგელოზია“, მასაც ბევრი შეცდომა აქვს დაშვებული. დღესაც ბევრი ხარვეზი აქვს მის არაფორმალურ მმართველობას. ის ცდილობს თანაშემწეების მეშვეობით ქვეყნის მართვას. ბევრი უარყოფითი მომენტი აქვს სხვა დადებითებთან ერთად, რაც მან გააკეთა 2012 წელს ხელისუფლებაში მოსვლით, ქველმოქმედებით და ა.შ. მიშას პოზიტივი რეფორმატორობით, პატრულის ჩამოყალიბებით, თბილისისა და ბათუმის მოწესრიგებით, დეკლარირებული საგარეო პოლიტიკის ჩამოყალიბებით სრულდება. ამის შემდეგ იწყება ნეგატივი, რომელიც ავტორიტარიზმის ქართული ნაირსახეობაა – ე.წ. „ყბადაღებული 9 წლიანი მმართველობა“ დიდი ნეგატივის შემცველია. როგორ შეიძლება ამ სისტემის შემოქმედმა აჯობოს ბიძინას,“– განმარტავს ვაჟა ბერიძე.

„საერთაშორისო რესპუბლიკური ინსტიტუტის (IRI)” ახალი კვლევის თანახმად, გამოკითხულთა 43% მტკიცედ უჭერს მხარს მიხეილ სააკაშვილის სამკურნალოდ სხვა ქვეყანაში გადაყვანას.

კერძოდ, კითხვაზე: „მხარს უჭერთ თუ ეწინააღმდეგებით მიხეილ სააკაშვილის სამკურნალოდ სხვა ქვეყანაში გადაყვანას?“, 43 % – მა უპასუხა, რომ მტკიცედ უჭერს მხარს, 26% – კატეგორიულად ეწინააღმდეგება, 18 % – ნაწილობრივ უჭერს მხარს, 7% – ნაწილობრივ ეწინააღმდეგება, 6% – კითხვაზე პასუხი არ აქვს, ან არ სურს, უპასუხოს.

აღნიშნულს პოლიტოლოგი ეხმაურება და აცხადებს, რომ ივანიშვილმა სააკაშვილი უნდა გაუშვას საზღვარგარეთ სამკურნალოდ. ამ ჭიდაობაში ივანიშვილი კი არა, ქვეყანა ზარალდება.

„როდესაც სააკაშვილი შემოიჭრა ქვეყანაში არეულობის მოსაწყობად, ივანიშვილი იძულებული გახდა დაეკავებინა ის. რამდენიმე მედია გამოსვლაში ვთხოვე ივანიშვილს, რომ მიუხედავად ყველაფრისა, სააკაშვილი გაეშვა. იმიტომ კი არა, რომ სააკაშვილი არ იმსახურებს პასუხისგებას… იმიტომ, რომ ბიძინას არ აქვს იმის რესურსი, რომ ეს ამბავი სტრატეგიულ პარტნიორებთან, დასავლეთში სათანადოდ მიიტანოს. ყველა შემთხვევაში მარტო ბიძინა კი არა, საქართველო დარჩებოდა წაგებული. მესმის, რომ ბიძინას აქვს ვალდებულებები იმ ქვეყანასთან და მის პირველ პირთან, სადაც მან მილიარდები იშოვა. ის ბოლო დრომდე “გაზპრომის” 1% -ის მფლობელი იყო. ეს ფაქტორი ამ ვალდებულებას განაპირობებს. ამიტომ ვეღარ გაუშვა სააკაშვილი, რომელიც მისთვის უკვე ზედმეტი თავის ტკივილია. მიუხედავად ამისა, მიხეილ სააკაშვილი უნდა გაუშვას მან საზღვარგარეთ სამკურნალოდ. ამ ჭიდაობაში ივანიშვილი კი არა, ქვეყანა ზარალდება. ჩვენი პროდასავლური იმიჯი სერიოზულად შეილახა და აქედან გამომდინარე, სხვა თვალსაზრისითაც არ დაგვრჩება სხვა გზა, გარდა რუსეთთან პარტნიორობისა. იძულებული დავრჩებით, რომ მათთან ვითანამშრომლოთ.

კულუარულად ვრცელდება ინფორმაცია, რომ ანაკლიის პორტს ჩინელები ააშენებენ. ჩინეთი, ჩვენი მეგობარი ქვეყანაა, მაგრამ ამერიკელები, ამის კატეგორიული წინააღმდეგები არიან. რუსები კი ამაზე წინააღმდეგობას არ გამოთქვამენ. ჩინელებმა, რომ აიღონ კონტროლი ანაკლიის მშენებარე პროექტზე ან პორტზე, ამაზე რა რეაქცია ექნება დასავლეთს?!“- აღნიშნავს ვაჟა ბერიძე.

„საერთაშორისო რესპუბლიკური ინსტიტუტის (IRI)” ახალი კვლევის თანახმად, გამოკითხულთა 62% მიიჩნევს, რომ ქვეყანა არასწორი მიმართულებით ვითარდება.

კერძოდ, კითხვაზე, „ქვეყანა სწორი მიმართულებით მიდის თუ არასწორი მიმართულებით?“, რესპონდენტთა 62%-მა განაცხადა, რომ არასწორი მიმართულებით, 30%-მა განაცხადა, რომ სწორი მიმართულებით, 7%-მა კი არ იცოდა პასუხი, ან უარი განაცხადა პასუხის გაცემაზე.

ამ საკითხთან დაკავშირებით პოლიტოლოგი ფიქრობს, რომ ქვეყანა სწორი მიმართულებით ვითარდება,მაგრამ საშინაო და საგარეო პოლიტიკური ასპექტები, ამ განვითარების ხარვეზიანია.

„მაშინ 62% -მა გვითხრას რას მიიჩნევს სწორ და არასწორ მიმართულებად. სწორი მიმართულება რა არის?- სუვერენიტეტის განმტკიცება, ქვეყნის აღმშენებლობა, საქართველოს ომში ჩართვის არ დაშვება, პროდასავლური კურსი, ღია ეკონომიკისა და ეროვნული ინტერესების ერთგულება. თუ ყველაფერს შევკრებთ, ამ მიმართულებით მმართველი პარტია ჯერჯერობით არაფერს არ ცვლის. რუსეთისკენ მიხედვას ვერც ეს ხელისუფლება და ვერც მომდევნო ვერ შეძლებს, ვიდრე სიტუაცია არ ამოტრიალდება. ზევით ჩამოთვლილს ეს ხელისუფლება აკეთებს და არასწორი მიმართულებით რატომ ვვითარდებით?! ქვეყანა სწორი მიმართულებით ვითარდება, მაგრამ ჩვენ შედეგები არ გვაკმაყოფილებს და არა მიმართულება. მიმაჩნია, რომ კითხვა არ არის სპეციალისტების თვალით კარგად დანახული, ჩამოყალიბებული და პასუხიც არარელევანტური და არაადეკვატურია. მიმაჩნია, რომ ქვეყანა სწორი მიმართულებით ვითარდება, მაგრამ საშინაო და საგარეო პოლიტიკური ასპექტები, ამ განვითარების ხარვეზიანია და მმართველი პოლიტიკური ძალის მხრიდან სერიოზულ კორექტირებას საჭიროებს.

ამდენ რამეს მოიცავს ეს კვლევა, რომელიც გამოქვეყნდა არა იმიტომ, რომ ჩვენ გავიგოთ ხალხი რას ფიქრობს ამა თუ იმ საკითხზე, არამედ იმის გამო, რომ ვიღაცის ინტერესები დავაკმაყოფილოთ საზოგადოებრივი აზრის მართვის თვალსაზრისით,“ – აცხადებს „ჯორჯიან თაიმსთან“ საუბარში ვაჟა ბერიძე.

/ ნინო ოთარაშვილი /

“IRI-ის კვლევა ჩატარდა იმ ცხელ დღეებში, როდესაც დასავლეთმა ტყუილებით ქუჩა აადუღა” – თამარ ჩიბურდანიძე

17:21 - 25/04/2023

IRI-ის კვლევები ვერ იქნება სანდო თუნდაც ამ გარემოების გათვალისწინებით, და თუ გავითვალისწინებთ ამერიკის დღევანდელ სააკაშვილისეულ პოლიტიკას ხელისუფლების მიმართ, ის 19%-იც როგორ გაიმეტეს, გასაკვირია, – ასე გამოეხმაურა IRI-ის კვლევების შედეგებს სოციალურ ქსელში „ხალხის ძალის“ წევრი თამარ ჩიბურდანიძე.

მისი თქმით, ეს კვლევები იმ დღეებში იყო ჩატარებული, როდესაც ცრუ პიარკამპანიით საზოგადოება შეცდომაში შეიყვანეს და ის პროცენტიც გასაკვირია, რაც მოქმედ ხელისუფლებას დაუწერეს.

„4-25 მარტის დღეები იყო ის პერიოდი, როდესაც ამერიკის ელჩის ხელმძღვანელობით, „გამჭვირვალობის შესახებ“ ამერიკულ კანონზე ხალხს ტყუილებით ტვინი აურიეს, კანონი არ წააკითხეს და ისე გამოიყვანეს ქუჩაში. მათ ძლიერი პროპაგანდით, საკუთარი ამერიკული კანონის რუსულად მონათვლით, შეძლეს საზოგადოებაში გარკვეული აგრესიის დათესვა ხელისუფლების და „ხალხის ძალის“ მიმართ. მოგვიანებით კი, როდესაც ემოცია დაცხრა და ხალხმა სიმართლე გაიგო, განწყობებიც შეიცვალა. გამომდინარე აქედან, IRI-ის კვლევები ვერ იქნება სანდო თუნდაც ამ გარემოების გათვალისწინებით, და თუ გავითვალისწინებთ ამერიკის დღევანდელ სააკაშვილისეულ პოლიტიკას ხელისუფლების მიმართ, ის 19%-იც როგორ გაიმეტეს, გასაკვირია. ზოგადად, დღევანდელი სამთავრობო პოლიტიკიდან გამომდინარე, ამერიკის არცერთი ორგანიზაციის კვლევა არ იქნება სანდო, რადგან ყველა პოლიტიკურ მიზნებს ემსახურება და ამით ცდილობენ მათთვის სასურველი საზოგადოებრივი აზრის ჩამოყალიბებას. რაც შეეხება სოციოლოგიური კვლევის სტანდარტებს, ყველამ იცის, რომ არჩევნებამდე წელიწად-ნახევრით ადრე საზოგადოების განწყობები ვერ იქნება ისეთი, როგორიც არჩევნების დროს. ის გადაუწყვეტელი 40% კი სტანდარტია ყველა ქვეყანაში და იცვლება მხოლოდ წინასაარჩევნო დღეებში”, -წერს საკუთარ Facebook გვერდზე თამარ ჩიბურდანიძე.

საერთაშორისო რესპუბლიკური ინსტიტუტი (IRI) საზოგადოებრივი აზრის კვლევის შედეგებს აქვეყნებს აქვეყნებს.

1 აშშ დოლარის ოფიციალური ღირებულება 2.5046 ლარი გახდა

17:16 - 25/04/2023

1 აშშ დოლარის ოფიციალური ღირებულება 2.5046 ლარი გახდა. ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.5046 ლარი გახდა. კურსი, რომელიც დღეს მოქმედებდა, 2.5069 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0023 ლარი შეადგინა.

რაც შეეხება ევროს, მისი კურსი 2.7618 ლარია. მაშინ, როცა დღეს მოქმედი კურსი 2.7603 ლარს შეადგენდა. შესაბამისად, ევროს ცვლილებამ 0.0015 ლარი შეადგინა. დღევანდელი ვაჭრობის შედეგად მიღებული კურსები ძალაში ხვალ შევა.

2008 წელს, საქართველოსთვის მშვიდობის იძულების ოპერაციის ჩატარება ჩემთვის, როგორც პრეზიდენტისთვის, რთული გადაწყვეტილება იყო-მედვედევი

17:11 - 25/04/2023

რუსეთის უსაფრთხოების საბჭოს თავმჯდომარის მოადგილის, დიმიტრი მედვედევის განცხადებით, პრეზიდენტის პოსტზე ყოფნის დროს მას გარკვეული რთული გადაწყვეტილებების მიღება უწევდა და ერთ-ერთი ასეთი რთული გადაწყვეტილება იყო „საქართველოსთვის მშვიდობის იძულების სამხედრო ოპერაციის“ ჩატარება 2008 წელს.

„ძალიან მნიშვნელოვანი იყო უშიშროების საბჭოს გადაწყვეტილება, რომელსაც მოგვიანებით ფედერაციის საბჭომ დაუჭირა მხარი – ჩაგვეტარებინა საქართველოსთვის მშვიდობის იძულების სამხედრო ოპერაცია, ე.წ. ხუთდღიანი ომი. ეს, რა თქმა უნდა, იმ მომენტში პირადად ჩემთვის, როგორც პრეზიდენტისთვის რთული გადაწყვეტილება იყო“, – განაცხადა მედვედევმა.

მისი თქმით, იყო სხვა გადაწყვეტილებები, მაგალითად, “სამხრეთ ოსეთისა და აფხაზეთის დამოუკიდებელ სახელმწიფოებად აღიარების შესახებ, რომელიც ასევე რთული გადაწყვეტილება იყო”.

„ესეც არ იყო იოლი გადაწყვეტილებები. მოითხოვდა დისკუსიას, დადებითი და უარყოფითი მხარეების აწონვას, მაქსიმალურ ყურადღებას მოითხოვდა“, – აღნიშნა მედვედევმა.

“ნაყოფიერი შეხვედრა გავმართე ევროპული საბჭოს პრეზიდენტთან” – ირაკლი ღარიბაშვილი

16:56 - 25/04/2023

ნაყოფიერი შეხვედრა გავმართე ევროპული საბჭოს პრეზიდენტთან, – ამის შესახებ საქართველოს პრემიერ-მინისტრი ირაკლი ღარიბაშვილი სოციალურ ქსელ „ტვიტერში” წერს.

მთავრობის მეთაურის თქმით, საქართველო მზადაა დაასრულოს 12 რეკომენდაციის შესრულების პროცესი და იმსახურებს კანდიდატის სტატუსს.

„ჩვენს შორის არსებული ურთიერთობები სულ უფრო ძლიერდება. საქართველო მზადაა დაასრულოს 12 რეკომენდაციის შესრულების პროცესი და იმსახურებს კანდიდატის სტატუსს. საქართველოსა და ევროკავშირის ერთობლივი ძალისხმევით, ჩვენ ხელს შევუწყობთ რეგიონში მშვიდობას, დემოკრატიასა და ეკონომიკურ ზრდას”, – აღნიშნავს პრემიერი.

ირაკლი ღარიბაშვილი შარლ მიშელს შეხვდა

16:45 - 25/04/2023

საქართველოს პრემიერ-მინისტრი ირაკლი ღარიბაშვილი ევროპული საბჭოს პრეზიდენტს შარლ მიშელს ბრიუსელში ვიზიტის ფარგლებში შეხვდა.

მთავრობის ადმინისტრაციის ინფორმაციით, შეხვედრაზე განხილვის მთავარი თემა იყო საქართველოს ევროკავშირში გაწევრიანების პროცესი.

„ირაკლი ღარიბაშვილმა ევროპული საბჭოს პრეზიდენტს გაუზიარა საქართველოს მიერ ევროკომისიის 12 პრიორიტეტის შესრულების მიმართულებით გაწეული ძალისხმევა და აღნიშნა, რომ ამ პროცესში ხელისუფლება მუდმივ კონსულტაციებს მართავს ევროკავშირის ინსტიტუტებთან და წევრ ქვეყნებთან, აგრეთვე ვენეციის კომისიასთან და ეუთოს დემოკრატიული ინსტიტუტებისა და ადამიანის უფლებების ოფისთან (OSCE/ODIHR).

პრემიერ-მინისტრმა განსაკუთრებით გაამახვილა ყურადღება წლის ბოლოს საქართველოსთვის ევროკავშირის წევრობის კანდიდატის სტატუსის მინიჭების მნიშვნელობაზე.

პრემიერ-მინისტრის თქმით, რეკომენდაციების დიდი ნაწილი შესრულებულია და მიღწეული პროგრესის შესაბამისად, წლის ბოლოს საქართველო კანდიდატის სტატუსს იმსახურებს.

ირაკლი ღარიბაშვილმა აღნიშნა, რომ ასოცირების ხელშეკრულება, ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმება, უვიზო მიმოსვლა და ევროპული პერსპექტივის მონიჭება, ეს არის ის პროგრესი, რომელსაც საქართველომ დღევანდელი ხელისუფლების პირობებში ევროინტეგრაციის გზაზე მიაღწია.

მხარეებმა ისაუბრეს უკრაინაში მიმდინარე ომზე და მის გავლენაზე რეგიონში არსებულ უსაფრთხოების გარემოზე“, – ნათქვამია ინფორმაციაში.

ეროვნულმა ბიბლიოთეკამ ფოთსა და ქუთაისში სკვერის ბიბლიოთეკები გახსნა

16:33 - 25/04/2023

საქართველოს პარლამენტის ეროვნული ბიბლიოთეკის დირექტორმა, გიორგი კეკელიძემ, დირექტორის მოადგილემ, მირიან ხოსიტაშვილმა და ბიბლიოთეკის წარმომადგენლებმა ფოთსა და ქუთაისში სკვერის ბიბლიოთეკები გახსნეს.

ეროვნული ბიბლიოთეკის ინფორმაციით, სკვერის ბიბლიოთეკები რამდენიმე ასეული წიგნით მომარაგდა.

„ჩვენ მსოფლიოში საუკეთესო წიგნის ბუდეებს ვაწყობთ. ფოთში ნიკო ნიკოლაძისეული კოშკის ფორმის #სკვერისბიბლიოთეკა გავხსენით. სკვერის ბიბლიოთეკა განთავსდა ქუთაისშიც. ქუთაისში შეზღუდული შესაძლებლობის მქონე ბავშვების დღის ცენტრს – „ჯადოსნური სამყარო” – ბიბლიოთეკა მოვუწყვეთ, კვიცარიძის სახელობის საქალაქო ბიბლიოთეკას კი 200 ახალი გამოცემა შევმატეთ”, – განაცხადა ეროვნული ბიბლიოთეკის დირექტორმა, გიორგი კეკელიძემ.

„ეროვნული ბიბლიოთეკა უკვე წლებია საქართველოს სხვადასხვა რეგიონში სკვერის ბიბლიოთეკებს აწყობს. ამ მინიბიბლიოთეკის (წიგნის ბუდის) პრინციპი ასეთია: ნებისმიერ მსურველს შეუძლია წიგნის ბუდიდან მისთვის სასურველი გამოცემის აღება, წაკითხვა და შემდეგ დაბრუნება ან სხვა ახალი გამოცემით ჩანაცვლება. ბიბლიოთეკები დროდადრო ახალი გამოცემებითაც ივსება.

საინტერესოა თავად წიგნის ბუდეების დიზაინი, რომლის ავტორი ეროვნული ბიბლიოთეკის თანამშრომელი თენგიზ მოდუა. წიგნის ბუდის ფორმა რეგიონის, ქალაქისა თუ სოფლის სპეციფიკის გათვალისწინებით იცვლება. მაგალითად, ფოთში წიგნის ბუდეს ნიკოლაძისეული მეგრული კოშკის ფორმა აქვს, ბათუმში – გემის, სამტრედიაში – ველოსიპედის, თელავში – კასრის და ასე შემდეგ.

სკვერის ბიბლიოთეკების რეგიონებში განთავსება მოსახლეობის, განსაკუთრებით ახალგაზრდების წიგნით და ზოგადად, განათლების მიღებით დაინტერესებაა, მათთვის ახალი ლიტერატურის მიწოდების საშუალება. პატარა ბიბლიოთეკები არანაკლებ საინტერესოა უფროსი თაობის წარმომადგენლებისთვისაც.

წლების მანძილზე ეროვნულმა ბიბლიოთეკამ სხვადასხვა ქალაქსა თუ სოფლებში უკვე რამდენიმე ათეული სკვერის ბიბლიოთეკა განათავსა. პროექტი გრძელდება და მას კერძო ბიზნესიც აქტიურად მხარს უჭერს“, – ნათქვამია გავრცელებულ განცხადებაში.

„აშშ-ის მოკავშირეები – G-7-ის წევრები – ვაშინგტონის გეგმებს ეწინააღმდეგებიან” – ფაინენშელ თაიმსი

16:31 - 25/04/2023

„ევროკავშირი და იაპონია ეწინააღმდეგება აშშ-ის ინიციატივას, რომლის მიხედვით, „დიდი შვიდეულის“ ქვეყნებს რუსეთში ყველა ტიპის ექსპორტი ეკრძალებათ“, – ნათქვამია ბრიტანული გაზეთის „ფაინენშელ თაიმსის“ (Financial Times) მიერ გამოქვეყნებულ სტატიაში სათაურით „აშშ-ის მოკავშირეები – G-7-ის წევრები – ვაშინგტონის გეგმებს ეწინააღმდეგებიან რუსეთში ექსპორტის სრული აკრძალვის შესახებ“ (ავტორები – ჰენრი ფოი, კანა იგანაკი და დემეტრი სევასტოპულო).

Financial Times-ის მიერ მოპოვებული დოკუმენტების მიხედვით, მომავალ თვეში, ჰიროშიმაში შეხვედრის წინ, „დიდი შვიდეულის“ ქვეყნების ლიდერები, აშშ-ის ინიციატივით, მუშაობენ განცხადების მომზადებაზე, რომლის თანახმად, რუსეთის წინააღმდეგ დაწესებული სექტორული სანქციების სისტემა ექსპორტის სრული (რამდენიმე გამონაკლისის გარდა) აკრძალვით ჩანაცვლდება. გამონაკლისი შეეხება სასოფლო-სამეურნეო, სამედიცინო და ზოგიერთ სხვა პროდუქციას.

თუმცა, Financial Times-ის სხვა წყაროების ცნობით, გასულ კვირას გამართულ სამუშაო შეხვედრაზე იაპონიის და ევროკავშირის ქვეყნების წარმომადგენლები აშშ-ის ინიციატივის საწინააღმდეგოდ გამოვიდნენ. „ჩვენი გადმოსახედიდან, ეს უბრალოდ შეუძლებელია”, – განუცხადა გამოცემას ერთ-ერთმა ანონიმურმა მაღალჩინოსანმა.

ოფიციალური პირები შიშობენ, რომ აშშ-ის ინიციატივა ექსპორტის აკრძალვის შესახებ საფრთხეს უქმნის ევროკავშირის წევრ ქვეყნებს შორის ისედაც გაჭიანურებული დებატების განახლებას, რომლებიც ეხება, მაგალითად, რუსეთის წინააღმდეგ დაწესებული სანქციების მე-10 პაკეტს და უკვე მიღებული ზომების პოტენციურად შესუსტებას.

თეთრი სახლის ეროვნულმა უშიშროების საბჭომ გამოცემა Financial Times-თან „დიდი შვიდეულის“ პარტნიორებთან მოლაპარაკებების შესახებ კომენტარის გაკეთებისგან თავი შეიკავა და განაცხადა, რომ აშშ „აგრძელებს რუსეთზე პასუხისმგებლობის დაკისრების გზების ძიებას“.

ევროკავშირსა და აშშ-ს შორის ანტირუსული სანქციებისა და ემბარგოს გაგრძელების საკითხში შექმნილი უთანხმოება ადასტურებს იმას, რომ „დიდი შვიდეულის ქვეყნებს“ მოსკოვთან მიმართებით სხვა დამატებითი სამოქმედო ვარიანტები აღარ აქვთ, ანუ, რაც ასაკრძალავი იყო, ის უკვე აიკრძალა. ახლა უფრო მეტად ყურადღება უნდა მიექცეს ადრე გამოცხადებული სანქციების აღსრულებას და მათ გაკონტროლებას.

როგორც ცნობილია, რუსეთი ცდილობს მესამე ქვეყნების მეშვეობით დაიკმაყოფილოს თავისი მოთხოვნები დასავლურ პროდუქციაზე – მაგალითად, თურქეთის, ცენტრალური აზიის ქვეყნების, არაბთა გაერთიანებული საემიროების დახმარებით.

„დიდი შვიდეულის“ ქვეყნების ლიდერები ერთმანეთს 19 მაისს, იაპონიის ქალაქ ჰიროშიმაში უნდა შეხვდნენ, სამდღიან სამიტზე, რომლის დროსაც უკრაინა-რუსეთის ომით გამოწვეული შედეგები უნდა განიხილონ, აგრეთვე ეკონომიკური უსაფრთხოების, „მწვანე ინვესტიციებისა“ და ინდოეთ-წყნარი ოკეანის რეგიონის საკითხები.

ევროკავშირი, რომელიც აშშ-სთან, დიდ ბრიტანეთთან, საფრანგეთთან, გერმანიასთან, იტალიასთან, იაპონიასთან და კანადასთან ერთად, „დიდი შვიდეულის“ წევრია, ითხოვს, რომ მისმა ყველა 27 წევრმა ანტირუსული სანქციების საკითხები ერთმანეთთან შეათანახმონ.

წყარო

„უკრაინა იბრძვის ომის მოსაგებად, რუსეთი უკან დაიხევს და ბრძოლებში ბევრს დაკარგავს” – სქაი ნიუსი

16:16 - 25/04/2023

ბრიტანულმა ტელეარხმა „სქაი ნიუსმა“ (Sky news) თავის ვებ-გვერდზე გამოაქვეყნა სამხედრო ანალიტიკოსის შონ ბელის სტატია სათაურით „უკრაინა იბრძვის ომის მოსაგებად, რუსეთი უკან დაიხევს და ბრძოლებში ბევრს დაკარგავს. გაიზრდება ზეწოლა სამშვიდობო მოლაპარაკების დაწყებისათვის“.

გთავაზობთ პუბლიკაციას მცირე შემოკლებით:

დასავლეთმა ვალდებულება აიღო, რომ უკრაინას რუსეთის აგრესიის მოგერიებაში დაეხმაროს, მაგრამ რას უნდა ველოდოთ რეალურად უკრაინის არმიის მოახლოებული კონტრშეტევით? გააგრძელებს თუ არა დასავლეთი კიევისადმი მხარდაჭერას საბოლოო გამარჯვებამდე, თუ მოსალოდნელი შეტევა მხოლოდ მცდელობა იქნება ფრონტის ხაზის ისეთი სახით შესაცვლელად, რომელიც ბიძგს მისცემს ცეცხლის შეწყვეტას და სამშვიდობო მოლაპარაკების დაწყებას, წლის ბოლომდე მაინც?

სამხედრო თვალსაზრისით, უკრაინის არმიის შეტევა შეიძლება სამი მიმართულებით განვითარდეს: ჩრდილოეთით – დონბასისკენ, სამხრეთით – ყირიმისკენ და ცენტრში – ყირიმ-დონბასის დამაკავშირებელი „სახმელეთო დერეფნის – ხიდის შუაზე გასაჭრელად“. მაგრამ რომელია ამ სამი მიმართულებიდან კიევისათვის პრიორიტეტული, უკრაინის შეზღუდული რესურსების გათვალისწინებით? სად ელოდება უკრაინის სამხედრო სარდლობა ყველაზე მეტ პროგრესს?
დონბასი 2014 წლიდან სისხლისმღვრელი ბრძოლების კერას წარმოადგენს და თუ გავითვალისწინებთ მის გეოგრაფიულ მდებარეობას, რუსეთთან არსებულ უშუალო სახმელეთო საზღვარს, ამ რეგიონის ოკუპანტებისაგან გათავისუფლება უკრაინის არმიისათვის ძალიან ძვირადღირებული და შრომატევადი გამოცდა იქნება. უკრაინელებმა დონბასიდან რუსეთის არმიას უკან რომც დაახევინონ, ბევრი ადგილობრივი მცხოვრები ეროვნებით რუსია და ბუნებრივია, რუსეთის მხარდამჭერია, რაც საფუძველს ქმნის ანტიუკრაინული სეპარატისტული მოძრაობის ხანგრძლივად გაგრძელებისათვის.
ყირიმი საერთაშორისო დონეზე უკრაინის სახელმწიფოს კუთვნილ ტერიტორიად არის აღიარებული. ეს რეგიონი რუსეთს ჯერ კიდევ 1783 წლიდან ჰქონდა დაკავებული, ხოლო საბჭოთა პერიოდში, 1954 წელს, იმდროინდელი ლიდერის ნიკიტა ხრუშჩოვის ადმინისტრაციული გადაწყვეტილებით, უკრაინას გადაეცა. ყირიმი რუსეთის სასიცოცხლოდ მნიშვნელოვან აქტივად ითვლება, იქ ბევრი რუსი ეროვნების მოქალაქე ცხოვრობს. ამ გარემოებების გათვალისწინებით, დასავლელი ანალიტიკოსები თვლიან, რომ ყირიმის გათავისუფლება უკიდურესად რთული ამოცანა იქნება.

ყირიმ-დონბასის დამაკავშირებელი სახმელეთო დერეფნის „გასაჭრელად“ უკრაინის არმიას რუსეთის წინა ხაზის პოზიციების გადალახვა და აზოვის ზღვის ნაპირისაკენ შეტევის განვითარება დაჭირდება. ამ მიმართულებით კიევმა შეიძლება მართლაც მნიშვნელოვან წარმატებას მიაღწიოს, მაგრამ არსებობს საბრძოლო მასალების დიდი ხარჯვისა და გამოფიტვის რისკი. საეჭვოა, დასავლეთი რამდენად დროულად მოახერხებს დიდი დანაკარგების სწრაფად შევსებას.
ვლადიმერ პუტინისათვის განსაკუთრებული მნიშვნელობა აქვს პირველ და მეორე მიმართულებას. რადგანაც ყირიმი კარგად არის დაცული, ამ მიმართულებით რაიმე დიდი საფრთხე მოსალოდნელი არ არის. დონბასი რუსეთისათვის ამჟამად „ბუფერული ზონის“ როლს ასრულებს და კრემლისათვის პრიორიტეტულია – იმის გამოც, რომ ნატოში უკრაინის სავარაუდო მიღების შემთხვევაში დონბასი ალიანსის აღმოსავლეთი ფლანგი იქნება. რაც შეეხება ყირიმ-დონბასის დერეფანს: რასაკვირველია, მოსკოვისათვის ის მნიშვნელოვანია, მაგრამ არც მაინცდამაინც სასიცოცხლოდ მნიშვნელოვანი. პირველი ორის შესანარჩუნებლად ვლადიმერ პუტინმა, უკიდურეს შემთხვევაში მესამე შეიძლება დათმოს.

ასე რომ, ყველაფერი მზადაა საზაფხულო შემტევი მოქმედებებისათვის, რომლებშიც ორივე მხარეს სხვადასხვა მიზნები აქვს. მოსალოდნელია, რომ ზაფხულის ბოლოს უკრაინისა და რუსეთის არმიები ძალაგამოცლილები დარჩებიან, მათ საბრძოლო მასალების მწვავე დეფიციტი ექნებათ და გარკვეული დრო დასჭირდებათ „სულის მოსათქმელად“, ანუ გაჩნდება პირობები და წინამძღვრები მოლაპარაკების დასაწყებად.

დონბასის დიდი ნაწილის გაკონტროლებით რუსეთს შეუძლია ეს ფაქტი თავის გამარჯვებად წარმოაჩინოს საკუთარი მოსახლეობის წინაშე – ასე ვთქვათ, „შიდა აუდიტორიისათვის“. კრემლს შეუძლია განაცხადოს, რომ „სპეცოპერაციის მიზანი ძირითადად მიღწეულია“. უფრო რთული ამოცანა დგას ვლადიმერ ზელენსკის წინაშე – იგი ტერიტორიის დათმობას უნდა შეეგუოს. სწორედ აქ უნდა გაიმარჯვოს ამერიკულ დიპლომატიამ.

წყარო

“ქართული ოცნების” ევროკავშირის საწინააღმდეგო კამპანია სრულიად ჩავარდა” – ვიოლა ფონ კრამონი

15:58 - 25/04/2023

Viola VON CRAMON-TAUBADEL in the EP in Strasbourg

სასიამოვნო სიახლე საქართველოდან! „ქართული ოცნებისა“ და მისი სატელიტების ევროკავშირის საწინააღმდეგო კამპანია სრულიად ჩავარდა. ქართველების თითქმის 90% ახლა ევროკავშირში გაწევრიანებას უჭერს მხარს, – ასე ეხმაურება ევროპარლამენტარი ვიოლა ფონ კრამონი IRI-ს კვლევის შედეგებს, რომელიც აჩვენებს, რომ გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას.

„ისტორიული მაქსიმუმი. ხალხმა მშვენივრად იცის, ვინ არის ნამდვილი მეგობარი და ვინ არა!“ – წერს ევროპარლამენტარი.

საერთაშორისო რესპუბლიკური ინსტიტუტის კვლევის თანახმად, საქართველოს ევროკავშირში გაწევრიანებას მტკიცე მხარდაჭერა აქვს, ასევე გამოკითხულთა უმრავლესობა პოლიტიკური პარტიების მიმართ ნდობის ნაკლებობას გამოხატავს და უკმაყოფილოა ქვეყანაში რუსეთის მოქალაქეების ყოფნის გამო.

უფრო კონკრეტულად, გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას.

ორგანიზაციის ცნობით, მხარდაჭერა წინა კვლევასთან შედარებით, 4%-ით არის გაზრდილი და ისტორიულ მაქსიმუმს აღწევს.

როგორია ჯო ბაიდენის წინასაარჩევნო კამპანია – გამოწვევები და მოლოდინები

15:50 - 25/04/2023

როგორც ცნობილი გახდა, დღეს, 25 აპრილს, აშშ-ის მოქმედმა პრეზიდენტმა ჯო ბაიდენმა ოფიციალურად განაცხადა, რომ 2024 წლის საპრეზიდენტო არჩევნებში მეორე ვადით ბალოტირებას აპირებს. ამასთან დაკავშირებით გთავაზობთ ბრიტანული „როიტერის“ (Reuters) მიერ გუშინ, 24 აპრილს გამოქვეყნებულ სტატიას სათაურით „ახლა უკვე 2020 წელი აღარ არის“: ჯო ბაიდენის წინასაარჩევნო კამპანია – გამოწვევები და მოლოდინები“ (ავტორი – ჯეფ მეისონი).

„ეს წინასაარჩევნო კამპანია სარდაფში აღარ გაიმართება“ – მიმომხილველთა ნაწილი ასე 2020 წელს, პრეზიდენტ ჯო ბაიდენის წინასაარჩევნო კამპანიას ეხმიანება, როცა მათი თქმით, პანდემიის ფონზე, ბაიდენმა კამპანია მეტწილად ვილმინგტონში მდებარე საკუთარი სახლის სარდაფიდან წარმართა. ეს იმ ფონზე, როცა იმჟამინდელი მოქმედი პრეზიდენტი, დონალდ ტრამპი, მხარდამჭერების შეკრებებზე სიტყვით გამოდიოდა.

მიმომხილველთა ნაწილი ფიქრობს, რომ პოსტპანდემიური წინასაარჩევნო კამპანია, ბაიდენისთვის ახალ გამოწვევებს ქმნის. ორ წყაროზე დაყრდნობით, საინფორმაციო სააგენტო „როიტერი“ იტყობინება, რომ არჩევნებში მონაწილეობის შესახებ, პრეზიდენტ ბაიდენის ფორმალური ვიდეო განცხადება მიმდინარე კვირის სამშაბათს გაკეთდება.

წინასწარი ინფორმაციით, ჩიკაგოში დემოკრატიული პარტიის კონვენცია ონლაინ ღონისძიების ნაცვლად, პირისპირ შეხვედრით გაიმართება. ანალიტიკოსთა ნაწილი მიიჩნევს, რომ ამგვარი კამპანია, 80 წლის ბაიდენისთვის, რომელიც ამერიკის ისტორიაში ყველაზე მხცოვანი პრეზიდენტი უკვე არის, დამატებით გამოწვევებს შექმნის.

2020 წელს, ჯო ბაიდენმა დონალდ ტრამპი ამომრჩეველთა კოლეგიის 306 ხმით დაამარცხა. ტრამპის შემთხვევაში, კოლეგიის ხმათა რაოდენობა 232-იყო. ბაიდენმა გაიმარჯვა მერყევ შტატებში, პენსილვანიასა და ჯორჯიაში, ეროვნული მასშტაბით კენჭისყრაში კი, ტრამპის მიღებულ ხმათა რაოდენობას, 7 მილიონით გადააჭარბა. მოსახლეობის ხმების 51,3 პროცენტი ბაიდენმა მიიღო, ტრამპის მიერ მიღებულმა ხმებმა კი 46,8% შეადგინა.

ასაკის ფაქტორი მიმომხილველების მოლოდინით, რესპუბლიკელები ყურადღებით მიადევნებენ თვალს ბაიდენის კამპანიის შემცირებული გრაფიკის ნიშნებს. მისი ოპონენტები ფიქრობენ, რომ ასაკი ბაიდენს კამპანიის რთული ბილიკისთვის და თეთრი სახლისთვის, ნაკლებად შესაფერისს ხდის.

„შოკისმომგვრელია, როცა ბაიდენი ფიქრობს, რომ მეორე ვადის დასრულებას შეძლებს. რომ აღარაფერი ვთქვათ მიმდინარე ვადის დასრულებაზეც კი“ – ამბობს რესპუბლიკელი სტრატეგი, სკოტ რიდი.

დონალდ ტრამპი, რომელიც თეთრი სახლის მეორე ვადით დასაკავებლად, ჯერ პარტიული ნომინაციის, შემდეგ კი არჩევნების მოგებას გეგმავს, 76 წლისაა.

„აბა მიყურეთ“ – ასე უპასუხა ბაიდენმა მის ასაკთან დაკავშირებით გამოთქმულ შეშფოთებას. თეთრი სახლი კი, პრეზიდენტის ეფექტურობის ნიშნად, მის საკანონმდებლო მიღწევებზე მიუთითებს.

„კანდიდატის შესაძლებლობების უნარის საზომი, მოგზაურობის ვრცელი განრიგი არ არის“ – ამბობს დემოკრატი სტრატეგი, კარენ ფინი. მისი თქმით, „არ არსებობს სცენარი, როცა რესპუბლიკელები არ ცდილობენ, ბაიდენის ასაკი პრობლემად წარმოაჩინონ. ჩვენ ეს ვიცით. ამიტომ, აქცენტი უნდა იყოს იმაზე… რა არის ყველაზე ეფექტური გზა, ამერიკელ ხალხთან მისასვლელად. ეს მოიაზრებს მოგზაურობას და საჯარო შეხვედრებს, ღონისძიებებს. მაგრამ, ასევე შეიძლება იყოს სხვა ინოვაციებიც.“

კამპანია 2020 – 2024

ბაიდენის კამპანიის წარმომადგენლებმა, 2020 წელს, კოვიდ-19-ის გავრცელების ფონზე, პანდემიურ რეალობას მოარგეს.
ზოგიერთი ინოვაცია წარმატებულად შეფასდა, მათ შორის ვირტუალურად, მოგზაურობის გარეშე გამართული ფანდრაიზინგი.

მაგრამ, სხვა ინოვაციური მიდგომების წარმატებულობა, სადაო იყო. მათ შორის, მოხალისეების მიერ, კარდაკარის პრინციპით ჩატარებული კამპანიის ერთთვიანი აკრძალვა. ასევე, საკუთარი სახლის სარდაფიდან მიმართვები, რომელიც მემარჯვენე ამომრჩევლების მხრიდან, გაშარჟების საბაბადაც კი იქცა.

მეგ ბოსტორმი, სტრატეგიული კომუნიკაციების ფირმის, „ტოპოს პარტნერშიპის“ თანადამფუძნებელი ამბობს, რომ მომავალი კამპანია, რომელიც ბაიდენისგან მეტ საჯარო აქტივობას მოითხოვს, მისთვის შესაძლოა სარგებლის მომტანიც კი იყოს.

„თუ გავიხსენებთ კონგრესში მის ერისადმი მიმართვას, ეს საუკეთესო იყო, რაც აქამდე მინახავს, როცა რესპუბლიკელები მას დაუპირისპირდნენ, ის კიდევ უფრო მეტად აენთო“ – ამბობს ბოსტორმი. თებერვალში, კონგრესში სიტყვით გამოსვლისას რესპუბლიკელ ოპონენტებს ბაიდენი წარმატებით ეპაექრებოდა.

თუმცა, არის სხვა საკითხები, რამაც შესაძლოა მოქმედ პრეზიდენტს, კამპანიის განმავლობაში სირთულეები შეუქმნას, მათ შორის, ეკონომიკის მართვა.

„2020 წელს, ბაიდენისთვის ხმის მიცემა, ერთგვარად უცნაურ ცნებას, ნორმალურობასთან ერის დაბრუნებას უკავშირდებოდა“ – ამბობს რესპუბლიკელი სტრატეგი, ფორდ ოკონელი. ამით ის ტრამპის მმართველობის დროს შექმნილ გარკვეულ ქაოსს გულისხმობდა.

„ბაიდენის პრობლემა ის არის, რომ ის ახლა ხელისუფლებაშია და ახლა ვითარება ყველანაირია, გარდა ნორმალურისა, განსაკუთრებით მაშინ, როცა საქმე ეკონომიკასა და ინფლაციას ეხება“ – ამბობს ოკონელი.

შეშფოთებები რეცესიასთან დაკავშირებით

ბაიდენმა თეთრი სახლის ოვალური კაბინეტი 2021 წლის იანვარში დაიკავა. ზუსტად მაშინ, როცა კოვიდ-19-ის საწინააღმდეგო ვაქცინები ხელმისაწვდომი გახდა და ეკონომიკური პირობები თანდათან ნორმალურ ჩარჩოებს დაუბრუნდა. შეერთებული შტატები, ახლა 3.2 მილიონი სამუშაო ადგილის შექმნით ამაყობს.

მაგრამ, ამერიკელებს პოტენციური რეცესია აშფოთებთ. ექსპერტების პროგნოზით, რეცესიის შემთხვევაში, უმუშევრობა სავარაუდოდ მოიმატებს, საპროცენტო განაკვეთები და ინფლაცია კი მაღალი დარჩება. ამან, 2024 წლისთვის, ბაიდენის კამპანია შესაძლოა რთულ ვითარებაში ჩააგდოს.

ანალიტიკოსები მოელიან, რომ დონალდ ტრამპი, რომელმაც არჩევნებში მონაწილეობის სურვილი უკვე გამოთქვა, 2016-20 წლების გამოცდილებას გამოიყენებს და საკუთარი საამომრჩევლო ბაზის გააქტიურებას ხალხმრავალი საჯარო შეკრებებით შეეცდება. თუმცა, მანამდე მან პრეზიდენტობის კანდიდატობისთვის, პარტიის ნომინაცია უნდა მოიპოვოს. პარტიის ნომინაციისთვის ბრძოლა, როგორც მოქმედ პრეზიდენტს, რომელსაც საკუთარ პარტიაში დიდი ოპოზიცია არ ჰყავს, ბაიდენს არ მოუწევს.

„ჩვენ არ გვჭირდება ცეცხლი, ჩვენ არ გვჭირდება ხალხმრავალი შეკრებები. ჩვენ გვჭირდება ჩვენი ღირებულებების სიმტკიცე, მათში დარწმუნება და სტაბილურობა იმისთვის, რომ მათი ერთგულნი დავრჩეთ“ – ამბობს დემოკრატი სტრატეგი, ჯო ლესტინგი. მისი თქმით, ბაიდენი ამ სტაბილურობას უზრუნველყოფს.