საქართველოს პრემიერ-მინისტრი ირაკლი ღარიბაშვილი ამერიკის შეერთებული შტატების სახელმწიფო მდივნის მოადგილის თანაშემწეს ერიკა ოლსონს შეხვდა.

მთავრობის ადმინისტრაციაში გამართულ შეხვედრაზე ორ ქვეყანას შორის არსებული სტრატეგიული პარტნიორობა განიხილეს. ხაზი გაესვა სხვადასხვა სფეროში თანამშრომლობის განმტკიცების მნიშვნელობას.

ირაკლი ღარიბაშვილმა და ერიკა ოლსონმა ასევე მიმოიხილეს რეგიონსა და მსოფლიოში არსებული უსაფრთხოების გარემო. ამ მიმართულებით ხაზი გაესვა პრემიერ-მინისტრის მიერ ინიციირებული სამხრეთ კავკასიის სამშვიდობო-სამეზობლო ინიციატივის მნიშვნელობას.

საუბარი ასევე შეეხო ევროინტეგრაციის გზაზე საქართველოს მიერ მიღწეულ ხელშესახებ პროგრესს.

შეხვედრას ესწრებოდნენ საქართველოში ამერიკის შეერთებული შტატების მისიის ხელმძღვანელის მოადგილე რაიან ჰარისი, საქართველოს საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი რევაზ ჯაველიძე.

„ქართული ოცნების“ თავმჯდომარის ირაკლი კობახიძის განცხადებით, მმართველ გუნდში აქვთ ინფორმაცია, რომ „ნაციონალურ მოძრაობაში“ პარტიის თავმჯდომარის, ლევან ხაბეიშვილის შემცვლელს ეძებენ.

კობახიძის თქმით, რაც უფრო მეტად დასუსტდება და დაიშლება „ნაციონალური მოძრაობა“, მით უკეთესი იქნება „ქართული ოცნებისთვის“.

„ჩვენც გვაქვს ინფორმაცია, რომ იძებნება ხაბეიშვილის შემცვლელი. ეს სხვადასხვა წყარომ დაადასტურა. ეს მათი შიდა საქმეა, ბუნებრივია, ჩვენთვის საინტერესო არ არის. „ნაციონალური მოძრაობა“ რაც უფრო მეტად დასუსტდება და დაიშლება, მით უკეთესი იქნება ჩვენი პოლიტიკური სისტემისთვის. შესაბამისად, სჯობს, ეს პროცესი ასე გაგრძელდეს“, – განაცხადა კობახიძემ.

„ნაციონალურ მოძრაობაში“ თავმჯდომარის თანამდებობაზე ლევან ხაბეიშვილის ლეგიტიმაცია ისევ კითხვის ნიშნის ქვეშ დგება. ორად გაყოფილ პარტიაში ახალი თავმჯდომარის საქმიანობით უკმაყოფილო მელიას გუნდი ღიად მიანიშნებს, რომ ლევან ხაბეიშვილი საარჩევნოდ გაცემულ დაპირებებს ვერ ასრულებს, რაც შესაძლოა პარტიაში ახალი არჩევნების ჩატარების საფუძველი გახდეს.

„წაგიკითხავთ მუხლს რეგლამენტიდან, თუ რის გამო იქმნება დამოუკიდებელი საგამოძიებო კომისია. 61-ე მუხლის მე-3 პუნქტი- „დროებითი საგამოძიებო კომისია იქმნება მხოლოდ კონკრეტული საკითხის შესასწავლად და უქმდება რეგლამენტით დადგენილი წესით საკითხის შესწავლისთანავე,“ – ამის შესახებ საპარლამენტო უმრავლესობის წევრმა, „ხალხის ძალის“ ერთ-ერთმა ლიდერმა გურამ მაჭარაშვილმა პარლამენტის პლენარული სხდომის შემდეგ მედიასთან განაცხადა.

მაჭარაშვილმა პარლამენტში საგამოძიებო კომისიის საკითხზე საუბრისას აღნიშნა, რომ ამ კომისიის შექმნა ოპოზიციას არ უნდა არანაირი გამოძიებისთვის.

მან ასევე, დეპუტატებს შეახსენა რეგლამენტის 61-ე მუხლი და განაცხადა, რომ ასეთ შემთხვევაში კომისია ვერ შეიქმნება.

„დღეს კიდევ ერთხელ დადასტურდა ის, რასაც ბოლო დღეების განმავლობაში ვამბობდით, რომ ამ კომისიის შექმნა ოპოზიციას არ უნდა არანაირი გამოძიებისთვის იმიტომ, რომ ამ ტრიბუნასთან მდგომმა მომხსენებელმა, ხათუნა სამნიძემ, არც ძირითად და არც დამაზუსტებელ კითხვებს არ უპასუხა. მისი ერთადერთი პასუხი იყო, რომ ეს თქვა ამერიკის შეერთებულმა შტატებმა და სახელმწიფო დეპარტამენტმა. დამოუკიდებელი ქვეყნის პარლამენტის წევრი ტრიბუნასთან რომ დგახარ და პარტნიორი ქვეყნის ელჩის განცხადებაზე – „მაქვს მტკიცებულება მაგრამ არ გეტყვით და არ ვითანამშრომლებ არავითარ უწყებასთან“, კითხვა არ გიჩნდება თუ სად არის ეს მტკიცებულება და უბრალოდ ამბობ, რომ უნდა შეიქმნას დამოუკიდებელი კომისია, [უბრალოდ სირცხვილია]. ჩვენ კარგად გვახსოვს, სახელმწიფო დეპარტამენტმა რატომ მიიღო ეს გადაწყვეტილება. იქ არ იყო მითითებული, რეფორმები არ ჩაატარა ამ მოსამართლემ და იმიტომ ვუწესებთ სანქციებსო, პირდაპირ წერია, რომ კორუფციაში ედებოდა ბრალი ამ ოთხ მოსამართლეს და კონკრეტული ამ ბრალდების გამო დაუწესეს სავიზო სანქციები.

ფაქტი ის არის, რომ კონკრეტულ საკითხთან დაკავშირებით უნდა შეიქმნას ეს კომისია და ამასთან დაკავშირებით, ერთი, რომ მტკიცებულებები არ არსებობს საჯარო სივრცეში, მეორე, რომ ელჩი არ აპირებს თანამშრომლობას და მესამე, რომ მომხსენებელს ტრიბუნიდან არაფერი კონკრეტული არ უთქვამს კორუფციასთან დაკავშირებით ამ კონკრეტულ მოსამართლეებთან მიმართებაში. მაშინ კითხვა ისმის, თუ არც ელჩს იბარებთ, არც ის იცით ვინ უნდა დაკითხოთ და არც ის იცით მტკიცებულებები საიდან უნდა მოიპოვოთ, აბა, კომისია რისთვის იქმნება?! ჩახედეთ 61-ე მუხლს და ნახავთ, რომ ასეთ შემთხვევაში კომისია ვერ შეიქმნება. მე მინდა, რომ იუსტიციის უმაღლეს საბჭოში იყოს ამა და ამ სახელისა და გვარის არასამთავრობო ორგანიზაციის წარმომადგენელი – ამის გამო კომისიები არ იქმნება,“ – განაცხადა გურამ მაჭარაშვილმა.

„ნაციონალური მოძრაობის“ წევრის კობა ნაყოფიას განცხადებით, პარტიის ახალი მენეჯმენტი ბრძოლის ტემპებით კმაყოფილი არ არის.

„პოლიტიკური ოფისში შეკრებილები თავს ენმ-ის წევრებად ასაღებენ და ამავდროულად ესხმიან მას“ – „ნაციონალური მოძრაობის“ განცხადება

„პირდაპირ გეტყვით, რომ კმაყოფილი არ ვარ და არა მგონია ვინმე იყოს კმაყოფილი, რადგან ჩვენ გვახსოვს წინასაარჩევნო დაპირებები, თუნდაც, პარტიის აქტივობები რეგიონებსა და დედაქალაქში და ერთი დაპირება ისიც იყო, რომ ახალი თავმჯდომარე მოახდენდა მთელი ძალების კონსოლიდაციას და მოახერხებდა, რომ პარტიიდან არავინ არ წასულიყო. ჯერჯერობით ამ მხრივ დიდ წარმატებებზე საუბარი ზედმეტია“, – განაცხადა კობა ნაყოფიამ TV პირველის ეთერში.

კობა ნაყოფიას თქმით, ნიკა მელიას და მისი მომხრეების მიერ ცალკე ოფისის გახსნის გამო, არავინ არ უნდა იქნეს გარიცხული.

„ეს იქნება ალბათ ყველაზე სულელური გადაწყვეტილება, თუ ოფისის გახსნის გამო, პარტიიდან ვიღაცას გარიცხავენ. არა მგონია, ასე მოხდდეს. იმის გამო, რომ ის ოფისს ხსნის, დააბრალო, რომ არის სეპარატისტი ან სუს-ის აგენტი, არასერიოზულია. მე ვაპირებ იმ ოფისში მისვლას, ნიკა მელიასთან შეხვედრას“, – განაცხადა კობა ნაყოფიამ.