დიდი ბრიტანეთის მეფე ჩარლზ მესამემ საქართველოს დამოუკიდებლობის დღე მიულოცა.

მეფის მილოცვა საქართველოში გაერთიანებული სამეფოს საელჩომ გაავრცელა.

„მსურს, ჩემი თბილი მილოცვა გავუგზავნო მის აღმატებულებას და ქართველ ხალხს ამ თქვენი ქვეყნისთვის განსაკუთრებულ დღეს, რომელიც დამოუკიდებლობის დღეს აღნიშნავს.

მოუთმენლად ველი ჩვენს ორ ქვეყანას შორის ჩვენი თბილი მეგობრობის და ძლიერი პარტნიორობის გაგრძელებას ამ გამოწვევებით სავსე დროში“, – აღნიშნულია მეფის მისალოც წერილში.

აშშ ამაყია იმ შესაძლებლობით, რომ აღნიშნავს ამ დღეს ქართველებთან ერთად, რომ ვდგავართ საქართველოს გვერდით და გეხმარებით ძლიერი, აყვავებული, ევროპული დემოკრატიის მშენებლობაში, – ამის შესახებ საქართველოში აშშ-ის ელჩმა, კელი დეგნანმა განაცხადა.

ელჩის თქმით, დღეს არის შესანიშნავი ზეიმი, რომელიც ფოკუსირებულია საქართველოს თავდაცვის ძალებზე.

„ეს ძალიან შთამბეჭდავია. ისინი ძალიან აქტიურად მუშაობენ იმის უზრუნველსაყოფად, რომ საქართველომ შეძლოს საკუთარი საზღვრების დაცვა, რათა შეაკავოს ეს საშინელი აგრესია, რომელსაც ვხედავთ თქვენს რეგიონებში. ეს საქართველოს მოსახლეობის დამოუკიდებლობისა და თავისუფლების ერთგულების ძალიან შთამბეჭდავი ჩვენებაა, რაც საუკუნეებს ითვლის. არა წლებს ან ათწლეულებს, არამედ საუკუნეებს. აშშ ამაყია იმ შესაძლებლობით, რომ აღნიშნავს ამ დღეს ქართველებთან ერთად, რომ ვდგავართ საქართველოს გვერდით და გეხმარებით ძლიერი, აყვავებული, ევროპული დემოკრატიის მშენებლობაში“, – განაცხადა კელი დეგნანმა.

დღევანდელი დღე გამორჩეულია ჩვენი ქვეყნის ისტორიაში. 26 მაისი თითოეულ ჩვენგანს გვახსენებს, რამდენად მნიშვნელოვანია, ღირებულია დამოუკიდებლობა, რამდენად გასაფრთხილებელია, სათუთია და რამდენად პასუხისმგებლობით უნდა მოვეპყროთ ამ მონაპოვარს, – ამის შესახებ საქართველოს ეკონომიკის მინისტრმა, ლევან დავითაშვილმა განაცხადა.

მისივე თქმით, ბევრი რამ არის გასაკეთებელი, რომ ქვეყანა, მათ შორის, ეკონომიკურად დამოუკიდებელი იყოს.

„ჩვენ 30 წლის განმავლობაში ვცდილობთ, დავამკვიდროთ ჩვენი ქვეყნის დამოუკიდებლობა. რეალური დამოუკიდებლობა მხოლოდ იმ შემთხვევაშია, თუ ქვეყანა არის ძლიერი, მათ შორის, ეკონომიკურად. ამ შემთხვევაში ქვეყანას ექნება რეალური აღიარება. ჩვენ ბევრი რამ გვაქვს გასაკეთებელი, რომ ქვეყანა, მათ შორის, ეკონომიურად ძლიერი და ეკონომიკურად დამოუკიდებელი იყოს, რეალურად მივიღოთ ის სიკეთე, რასაც თავისუფლების სიკეთე ჰქვია. ამ შემთხვევაში ჩვენი სამინისტროს როლი ძალიან მნიშვნელოვანია. აქ ხედავთ ძალიან ბევრ ბენეფიციარს –  წარმოდგენილია „აწარმოე საქართველოში“. მათთვის ასეთ ღონისძიებებში მონაწილეობა ძალიან მნიშვნელოვანია. ჩვენთვისაც მნიშვნელოვანია არა მხოლოდ ის, რომ ქვეყანაში შეიქმნას ახალი პროდუქცია, არამედ ამ პროდუქციის შესახებ საქართველოს მოსახლეობამ, ასევე უცხოელმა მომხმარებლებმა გაიგონ. ამიტომ ყველანაირად ვცდილობთ, კომპანიებს მივეხმაროთ პრეზენტაციებში, გამოფენებში, მათ შორის ასეთ ღონისძიებებში მონაწილეობაში, რათა მათი პროდუქციის პოპულარიზაცია მოხდეს და ქართული პროდუქცია მეტად მოთხოვნადი, დაფასებული იყოს ჩვენი ქვეყნის მოქალაქეებში“, – განაცხადა ლევან დავითაშვილმა.

ალბანეთის საგარეო საქმეთა სამინისტრო საქართველოს მთავრობას და ქართველ ხალხს დამოუკიდებლობის დღეს ულოცავს.

„გილოცავთ დამოუკიდებლობის დღეს ჩვენს კოლეგებს საქართველოს საგარეო საქმეთა სამინისტროში და საქართველოს მოსახლეობას. გისურვებთ კეთილდღეობას და წარმატებებს. მოუთმენლად ველოდებით ჩვენს ორ ქვეყანას შორის ურთიერთობების გაღრმავებას“, – აღნიშნულია ალბანეთის საგარეო საქმეთა სამინისტროს განცხადებაში.

„ნაციონალური მოძრაობის“ და „სტრატეგია აღმაშენებლის“ ახალგაზრდულმა ორგანიზაციამ მშვიდობის ხიდზე საქართველოს და ევროკავშირის დროშები გადმოფინეს. ამის შესახებ ინფორმაციას „ნაციონალური მოძრაობის“ პრესსამსახური ავრცელებს.

„ჩვენ ვნახეთ საკმაოდ ანტისახელმწიფოებრივი და ანტიდასავლური აქტი „ქართული ოცნების“ მხრიდან, როდესაც მათ დამოუკიდებლობის დღეს არ გამოკიდეს ევროკავშირის დროშა. ეს არის მათი სიმბოლური ქმედება, რომ ისინი ახდენენ კანდიდატის სტატუსის საბოტაჟს, რასაც ჩვენ არ დავუშვებთ არავითარ შემთხვევაში. ჩვენთვის, სამოქალაქო საზოგადოებისთვის, ახალგაზრდებისთვის ძალიან პრიორიტეტულია ევროკავშირის და მისი სიმბოლიკა, მითუმეტეს „ნაციონალური მოძრაობისთვის“, რადგან მე წარმოვადგენ იმ პარტიას, რომელმაც პირველად მიხეილ სააკაშვილის თაოსნობით აღმართა ქართულ უწყებებზე ევროკავშირის დროშა. ამიტომ მნიშვნელოვანია ის ევროპული მომავლის მემკვიდრეობა, რაც დაგვიტოვა წინა ხელისუფლებამ და ჩვენ აუცილებლად ვიბრძოლებთ იმისთვის, რომ საქართველო იყოს ევროკავშირის ნაწილი, საქართველოში იყოს ევროპის სიმბოლიკები და „ქართული ოცნების“ ის ქმედება, რომ მოსპოს ევროპული მომავალი, არ დავუშვებთ ამას“, – განაცხადა „ერთიანი ნაციონალური მოძრაობის“ ახალგაზრდული ბორდის თავმჯდომარემ, ტიტე გედენიძემ.