„ნაციონალური მოძრაობის“ მომავლის განხილვა არ არის ჩემი კომპეტენცია, მოგეხსენებათ, დავტოვე ეს პარტია და, შესაბამისად, მათი გადაწყვეტილებაა, როგორ ჩაატარებენ არჩევნებს, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

მისი თქმით, ნებისმიერ პარტიაში შიდა დემოკრატია თუ არ იქნება, პარტიის განვითარებისთვის ეს მძიმე იქნება.

„რაც შეეხება პოლიტსაბჭოს არჩევნებს, თავიდანვე ჩემი პოზიცია იყო მკვეთრი, რომ შიდაპარტიული დემოკრატიისთვის ისეთი პოლიტსაბჭოს არჩევნები, როგორიც ყრილობაზე ჩატარდა, არ უნდა ჩატარებულიყო. რაც შეეხება სხვა პროცესებს, „ნაციონალურ მოძრაობაში“, და ნებისმიერ პარტიაში, შიდა დემოკრატია თუ არ იქნება, მაშინ, რა თქმა უნდა, ეს იქნება ძალიან მძიმე, მათ შორის, პარტიის განვითარებისთვის. თვითონ პარტიის არჩევანია, როგორ გააგრძელებს ის მუშაობას. პოლიტსაბჭოს არჩევნები როგორც ჩატარდა იმ ყრილობაზე, მე ეს ვთქვი ერთ-ერთ მიზეზად, რატომაც დავტოვე პარტია. ამიტომ, შესაბამისად, არ ვთვლი, რომ ეს იყო დემოკრატიული და არ ვთვლი, რომ პარტიაში მიდის დემოკრატიული პროცესები. დანარჩენი მათი გადასაწყვეტია, როგორ განვითარებას და რა კალაპოტს ჰპოვებს „ერთიანი ნაციონალური მოძრაობა“, – განაცხადა დეკანოიძემ.

ჩვენ არც დიპლომატიური ურთიერთობა გვაქვს რუსეთთან და ოკუპირებულია ქვეყნის დიდი ნაწილი, განსხვავებით ევროპული ქვეყნებისგან, რომლებსაც დიპლომატიური ურთიერთობაც გააჩნიათ და მასშტაბურ სავაჭრო ურთიერთობებსაც ინარჩუნებენ, – ასე ეხმიანება პარლამენტის პირველი ვიცე-სპიკერი გია ვოლსკი ჟურნალისტებთან ევროკავშირის წევრი ქვეყნების ელჩების დემარშს რუსეთთან ფრენებთან დაკავშირებით.

ვოლსკის თქმით, უმჯობესია შეხვედრის შემდეგ ისაუბრონ, შეიძლება თუ არა ამის დემარშად მონათვლა, თუ ეს იქნება საქმიანი განხილვა.

“უმჯობესია შეხვედრის შემდეგ ვილაპარაკოთ, რას იტყვიან ელჩები, ვიცე პრემიერი რა პასუხს გასცემს და საერთოდ, შეიძლება თუ არა, მისვლის და განცხადების დემარშად მონათვლა, თუ განხილვა იქნება საქმიანი? მე ვფიქრობ, ერთი რამ უნდა გვახსოვდეს ყველას: ფრენების აღდგენა, ისევე როგორც შეჩერება არის ცალმხრივი გადაწყვეტილება და შენი მხრიდან გარკვეული რეჟიმის დაწესებას, როცა ფრენების აღდგენის შემდეგ, ფრენები წყდება, ჰქვია კონკრეტული სახელი, ეს არის სანქციები და მას შეიძლება შედეგები მოჰყვეს. ასე რომ, ისედაც ურთულეს მდგომარეობაში სანქციების რეჟიმში შესვლა… ჩვენ არც დიპლომატიური ურთიერთობა გვაქვს და ოკუპირებულია ქვეყნის დიდი ნაწილი, განსხვავებით ევროპული ქვეყნებისგან, რომლებსაც დიპლომატიური ურთიერთობაც გააჩნიათ და სერიოზულ და მასშტაბურ სავაჭრო ურთიერთობებსაც ინარჩუნებენ. ასე რომ ამ თემის განხილვა აუცილებელია და ვფიქრობ, პროცესია, რომლის განმავლობაში, მუდმივი კონსულტაციები უნდა გვქონდეს მათ შორის ევროპელ პარტნიორებთან, როგორ დამთავრდება, მერე ვიმსჯელოთ”, – განაცხადა ვოლსკიმ.

რუსეთთან პირდაპირი ფრენების აღდგენის გამო დემარშის მიზნით, ევროკავშირის ელჩი პაველ ჰერჩინსკი, ევროკავშირის ყველა ელჩთან ერთად, საქართველოს ვიცე-პრემიერს, ეკონომიკის მინისტრს  ხვდება.

საქართველოში ევროკავშირის წარმომადგენლობის ინფორმაციით, დემარში ევროკავშირის 27 ქვეყნის სახელით ხორციელდება.

საქართველოს პრეზიდენტი სალომე ზურაბიშვილი რეჯეფ თაიფ ერდოღანს თურქეთის პრეზიდენტად ხელახლა არჩევას ულოცავს.

„ვულოცავ პრეზიდენტ რეჯეფ თაიფ ერდოღანს ხელახლა არჩევას! საქართველო და თურქეთი ახლო მეგობრები არიან. მათ ძლიერი ურთიერთობები აკავშირებთ, რომელიც აგრძელებს განვითარებას და მოუთმენლად ველი ჩვენს შემდგომ თანამშრომლობას საქართველოსა და თურქეთს შორის ამ პარტნიორობის გასაძლიერებლად“, – დაწერა ზურაბიშვილმა „ტვიტერზე“.

თურქეთის უმაღლესმა საარჩევნო საბჭომ (YSK) განაცხადა, რომ რეჯეფ თაიფ ერდოღანმა საპრეზიდენტო არჩევნების მეორე ტურში გაიმარჯვა და იგი ხელახლა აირჩიეს თურქეთის პრეზიდენტად. ერდოღანმა საპრეზიდენტო არჩევნების მეორე ტურში ხმათა 52.14 პროცენტი მიიღო.

„ნაციონალური მოძრაობა“ მუშაობის განსაკუთრებულ რეჟიმზე გადადის, – ამის შესახებ პარტია „ნაციონალური მოძრაობის“ თავმჯდომარე ლევან ხაბეიშვილმა პარტიის პოლიტსაბჭოს სხდომის დასრულების შემდეგ ჟურნალისტებს ყვარელში განუცხადა.

როგორც ხაბეიშვილმა აღნიშნა, „ნაციონალური მოძრაობა“ არ აპირებს ზაფხულში დასვენებას.

პოლიტიკურმა საბჭომ დღეს გადაწყვიტა, რომ „ნაციონალური მოძრაობა“ გადადის მუშაობის განსაკუთრებულ რეჟიმზე. ჩვენ ვაპირებთ ყველა ქალაქსა და რაიონში მოსახლეობასთან შეხვედრას, მათ შორის იქნება რეგიონული კონფერენციები, სადაც ასევე დაყენებული იქნება პრეზიდენტ სააკაშვილის გათავისუფლების საკითხი. მნიშვნელოვანია, რომ მთელი საქართველოს მასშტაბით იქნება ეს ღონისძიებები, მათ შორის საპროტესტო აქციები. „ნაციონალური მოძრაობა“ არ აპირებს ზაფხულში დასვენებას, არ აპირებს, მოსვენება მისცეს რუსულ რეჟიმს, აპირებს განსაკუთრებული რეჟიმით მუშაობას.

პოლიტსაბჭომ მიიღო გადაწყვეტილება, რომ „ნაციონალური მოძრაობის“ ყველა სტრუქტურულმა ერთეულმა, იმ კონკრეტულმა წარმომადგენლობამ, რომელიც მუშაობს მათ შორის ჩვენს პარტნიორებთან ქვეყნის შიგნით და გარეთ, უზრუნველყოს მაქსიმალურად კანდიდატის სტატუსის მიღებისთვის პოზიტიური გადაწყვეტილებები. გავაკეთებთ ყველაფერს, რომ ქართველმა ხალხმა რუსული რეჟიმისა და ბიძინა ივანიშვილის გამო, კანდიდატის სტატუსი არ დაკარგოს.

ასევე იცით, რომ 50-მდე რეგიონული საქალაქო ოფისები გაიხსნა და დამატებით სხვადასხვა ქალაქში, მუნიციპალიტეტში, სოფლების დონეზეც კი, ვეცდებით მაქსიმალურად, რომ ჩამოვაყალიბოთ ლოჯისტიკური ცენტრები, სადაც „ნაციონალური მოძრაობის“ მომხრეებს შეეძლებათ აქტიურობა. რუსული ოლიგარქიული რეჟიმის წინააღმდეგ ყველა ადამიანის ჩართვა მნიშვნელოვანია და ჩვენ მუშაობის განსაკუთრებულ რეჟიმზე გადავდივართ. გვექნება სულ მცირე 10 რეგიონული კონფერენცია, შეხვედრები ასობით სოფელში, ქალაქსა თუ რაიონში, მთელი ზაფხულის განმავლობაში ვიმუშავებთ მოსახლეობასთან. პარალელურად გვექნება საპროტესტო აქციებიც, რომელიც ცხადია, მიეძღვნება პრეზიდენტ სააკაშვილის უპირობო გათავისუფლებას“, – განაცხადა ლევან ხაბეიშვილმა.