„ერთიანი საქართველოს“ ლიდერი ნინო ბურჯანაძე თანამოქალაქეებს საქართველოს დამოუკიდებლობის დღეს ულოცავს.

„დღეს საქართველო დამოუკიდებლობის დღეს აღნიშნავს. ეს ჩვენი ქვეყნის ერთ-ერთი უმნიშვნელოვანესი დღესასწაულია.

დღევანდელი დღე თითოეულ ჩვენგანს სიამაყით აღავსებს, მაგრამ ეს დღე ამავდროულად სევდიანი და ტკივილიანია.

სანამ საქართველო არ იქნება ერთიანი, სანამ არ გადავდგამთ ნაბიჯებს დიდი სახალხო შერიგებისკენ ჩვენს აფხაზ და ოს თანამემამულეებთან, 26 მაისი ვერ იქნება სრულყოფილი, როგორც საზეიმო თარიღი.

ძალიან დასანანია, რომ დღესაც იგივე პრობლემებით ვხვდებით საქართველოს დამოუკიდებლობის დღეს, როგორც ბოლო 30 წლის განმავლობაში.

ვულოცავ სრულიად საქართველოს დღევანდელ დღეს და თითოეულ თანამოქალაქეს ვუსურვებ, რომ მომავალი 26 მაისს საქართველო იყოს ერთიანი, ნამდვილად სუვერენული, წარმატებული და განვითარებული, სადაც ყველა მოქალაქე თავს იგრძნობს ღირსეული ქვეყნის ღირსეულ შვილად“, – ნათქვამია „ერთიანი საქართველოს” ლიდერის ნინო ბურჯანაძის განცხადებაში.

დღეს პრეზიდენტმა თქვა საქართველოს ათასობით მოქალაქის სათქმელი, რომელსაც ხელისუფლება არ ამბობს და გაგონებაც არ უნდა, – ასე შეაფასა პარტია “ლელოს” დეპუტატმა, ანა ნაცვლიშვილმა საქართველოს პრეზიდენტის, სალომე ზურაბიშვილის საქართველოს დამოუკიდებლობის დღისადმი მიძღვნილ ღონისძიებაზე სიტყვით გამოსვლა.

მისივე თქმით, დღეს პასუხისმგებლიანი ლიდერი სიმართლეს უნდა ამბობდეს და პრეზიდენტმა ეს სიმართლე თქვა.

“ვნახე გამოხმაურებები, გარკვეული კრიტიკა ისმოდა, მათ შორის აბსოლუტურად მიუღებელი სამთავრობო ტრიბუნიდანაც. მე ამ ღონისძიებაზე არ ვყოფილვარ და არც საღამოს ვაპირებ ფუნიკულიორზე ღონისძიებაზე წასვლას. 26 მაისი ჩემთვის ეს არის პასუხისმგებლობის დღე. დიახ, პრეზიდენტს ჰქონდა კრიტიკული და მწვავე გზავნილები, მაგრამ ეს არის რეალობა და პასუხისმგებლობა ქვეყნის წინაშე, რომელიც ნიშნავს იმას, რომ რეალობას თვალი უნდა გავუსწოროთ, კი არ უნდა დავუხუჭოთ, შევფუთოთ და შევეცადოთ, რომ ის შევალამაზოთ ან თვალს მოვარიდოთ. დამოუკიდებელი სახელმწიფოს პასუხისმგებლობა გულისხმობს, რომ თვალი გაუსწოროს იმ პრობლემებს, რაც დღეს აქვს. ვთქვათ, რა გვჭირს, საით გვინდა, რომ ვიაროთ და იქითკენ ვიაროთ. დღეს პრეზიდენტმა თქვა საქართველოს ათასობით მოქალაქის სათქმელი, რომელსაც ხელისუფლება არ ამბობს და გაგონებაც არ უნდა. დიახ, პასუხისმგებლიანი ლიდერი დღეს სიმართლეს უნდა ამბობდეს და პრეზიდენტმა ეს სიმართლე თქვა. ვისურვებდი, მისი ეს დღევანდელი გზავნილები ასევე მალე გადაიზარდოს კონკრეტულ ქმედებებში და კიდევ უფრო აქტიურ ქმედებებში, რის უფლებამოსილებასაც მას საქართველოს კონსტიტუცია ანიჭებს”, – განაცხადა ნაცვლიშვილმა.

ევროკავშირის დროშა კიდია საქართველოს პარლამენტის წინ. ვისაც უნდა, რომ დაინახოს, დაე, გაახილოს თვალები, – ამის შესახებ პარლამენტის თავმჯდომარე, შალვა პაპუაშვილმა ჟურნალისტებს განუცხადა.

ის კრიტიკას გამოეხმაურა იმასთან დაკავშირებით, რომ პარლამენტის შენობაზე, დამოუკიდებლობის დღესთან დაკავშირებით, საქართველოს დროშასთან ერთად ევროკავშირის დროშა არ არის გამოფენილი და აღნიშნა, რომ „ვისაც არ უნდა, რომ დაინახოს, მას რაც არ უნდა დროშები უფრიალო წინ, მაინც ვერ დაინახავს“.

„ეს არის ხალხი, რომელსაც არ აქვს აღქმა, რა არის დამოუკიდებლობა, რა არის თავისუფლება, რა არის სამშობლო, რა არის იყო პასუხისმგებლობიანი მოქალაქე, პოლიტიკოსი. ეს არის პასუხისმგებლობისგან და სამშობლოს განცდისგან დაცლილი ადამიანები. ამიტომ, არც კი ღირს ამ ადამიანებთან კამათში შესვლა. დღეს ჩვენი ქალაქი სავსეა ქართული დროშებით. ეს უხარია ქართველ ხალხს. რაც შეეხება ევროკავშირის დროშას, ევროკავშირის დროშა კიდია საქართველოს პარლამენტის წინ. ვისაც უნდა, რომ დაინახოს, დაე, გაახილოს თვალები. ვისაც არ უნდა რომ დაინახოს, მას რაც არ უნდა დროშები უფრიალო წინ, მაინც ვერ დაინახავს. მთავარი საკითხია, რომ მათ უნდათ რამენაირად ეს დღე ჩააშხამონ ქართულ საზოგადოებას. კიდევ ერთხელ, ყველას ვულოცავ ამ დღეს. ბოლომდე ვიზეიმოთ, ეს დღე ჩვენია, არავის წავართმევინებთ“, – განაცხადა პაპუაშვილმა.

ევროკავშირი გააგრძელებს თქვენს გვერდით დგომას სრული დამოუკიდებლობის მიღწევამდე გასავლელ გზაზე. ეს არ არის ადვილი იმ დროს, როდესაც შინაგანი და გარეგანი საფრთხეები საქართველოს კვლავ სხვა მიმართულებით უბიძგებენ, – ამ სიტყვებით ულოცავს ევროპარლამენტარი, ვიოლა ფონ კრამონი საქართველოს დამოუკიდებლობის დღეს.

„გილოცავთ, საქართველო! დამოუკიდებლობის აღდგენიდან 32 წელი გავიდა. როგორც საქართველოს დიდი მეგობარი და დიდი გულშემატკივარი, ჩვენ შეგვიძლია მხოლოდ ტაში დაგიკრათ და მოგილოცოთ. ევროკავშირი გააგრძელებს თქვენს გვერდით დგომას სრული დამოუკიდებლობის მიღწევამდე გასავლელ გზაზე. ეს არ არის ადვილი იმ დროს, როდესაც შინაგანი და გარეგანი საფრთხეები საქართველოს კვლავ სხვა მიმართულებით უბიძგებენ. მაგრამ თქვენ შეგიძლიათ დარწმუნებულები იყოთ, რომ ჩვენ ევროპის პარლამენტში გავაგრძელებთ თქვენს მხარდაჭერას ევროპისკენ მიმავალ გზაზე. გილოცავთ!” – აცხადებს ვიოლა ფონ კრამონი.