ვინც ჰყავს ამ ყველაფერს ერთი დირიჟორი როგორც პირველ შემთხვევაში შეცდომაში შეიყვანა და სამარცხვინოდ წარმოაჩინა პირველი დემარშის ავტორები, ანალოგიურად გვაქვს საქმე მეორე დემარშთან დაკავშირებითაც, – ამის შესახებ „ქართული ოცნების“ წევრმა, ირაკლი ზარქუამ განაცხადა.

ზარქუას განცხადებით, ევროკავშირის ელჩმა ამ ქმედებით მორიგი შეცდომა დაუშვა.

„მე მგონი, რომ ევროკავშირის ელჩმა ამ ქმედებით მორიგი შეცდომა დაუშვა, რადგან, როგორც იცით, ეს დემარში ნომერი ორია. პირველს შეგახსენებთ, როდესაც სააკაშვილთან დაკავშირებით ხელი მოაწერინეს ელჩებზე. არ ვიცი, სავარაუდოდ, ერთი დირიჟორი ჰყავს ამ ქმედებებს და შემოატანინეს ეს განცხადება დემარშის, სადაც ეწერა, თურმე სააკაშვილს წამლავს ხელისუფლება, არ აძლევს რეაბილიტაციას, ცუდ პირობებში ამყოფებს და ექვემდებარება გადაყვანას სხვა ქვეყანაში. გახსოვთ თქვენ ეს პირველი დემარშის შინაარსი. მერე რა მივიღეთ, სტრასბურგის სასამართლომ თქვა, არც მოწამლული არ არის და არათუ ქვეყნიდან გაყვანის სააკაშვილის, არამედ კლინიკიდან კლინიკაში გადაყვანის საფუძველიც არ არსებობსო. ანუ ამით ის პირველი დემარში გააქარწყლა და თქვა, რომ ამაზე მოდით შეცდომაში ხართ შეყვანილი.

რახ შეეხება მეორე დემარშს, შემოიტანეს განცხადება და მისი სულის კვეთება რა არის, რომ, ე.ი. ჩვენს მოქალაქეებს, ეთნიკურად ქართველებს, რომლებიც რუსეთში ცხოვრობენ, მიეცეთ შესაძლებლობა ვიზის გარეშე დამატებითი ხარჯების გარეშე დაბრუნდნენ სამშობლოში და ჩვენ გვთხოვენ, რომ სანქციები დავუწესოთ? ეს არის არსი? აბა, დანარჩენი რუსეთის მოქალაქეები ისედაც შემოდიან ლარსიდან, სომხეთიდან, აზერბაიჯანიდან, თურქეთიდან. პრობლემა რაშია. ვინც ჰყავს ამ ყველაფერს ერთი დირიჟორი როგორც პირველ შემთხვევაში შეცდომაში შეიყვანა და სამარცხვინოდ წარმოაჩინა პირველი დემარშის ავტორები, ანალოგიურად გვაქვს საქმე მეორე დემარშთან დაკავშირებითაც. საფუძველი არ არსებობს. ჩვენი მოქალაქეებისთვის სანქციებს არ დავაწესებთ. ჩვენი ქვეყანა და ჩვენი მოქალაქეები პირველი საზრუნავია, ამას ჩვენ აქამდეც ვაკეთებდით და მომავალშიც გავაკეთებთ“, – განაცხადა ზაქრუამ.

გუშინ ევროკავშირის ქვეყნების ელჩები ეკონომიკისა და მდგრადი განვითარების მინისტრს, ლევან დავითაშვილს შეხვდნენ. შეხვედრის შემდეგ საქართველოში ევროკავშირის ელჩმა, პაველ ჰერჩინსკიმ განაცხადა: „საქართველოს ვიცე-პრემიერს გადავეცი ევროკავშირის 27-ვე წევრი ქვეყნისგან, რომ ვწუხვართ საქართველოს მთავრობის გადაწყვეტილების გამო, მიიღოს პირდაპირი ფრენები რუსეთიდან“.

პრემიერ-მინისტრის ირაკლი ღარიბაშვილის განცხადებით, ევროკავშირის 12 რეკომენდაციიდან ერთის, დეოლიგარქიზაციის კანონის მიღებით ამ საკითხის ირგვლივ ყველა ბრალდება და მისტიკა მოიხსნება.

„მე არ მინდა საქართველოს პოლიტიკაზე აქ ვისაუბრო, მაგრამ რეალური ოლიგარქი არის თავდაცვის ყოფილი მინისტრი“, – განაცხადა ღარიბაშვილმა.

ბრატისლავაში გლობსეკის უსაფრთხოების კონფერენციაზე წამყვანი დაინტერესდა, რატომ ფიქრობს, რომ თავდაცვის ყოფილი მინისტრი ოლიგარქია, რადგან მას გაუჩნდა ასოციაცია, რომ საქართველოს ყოფილ პრემიერ-მინისტრზე საუბრობდა.

„ასე მოიხსენიებენ [კეზერაშვილს] და არ არის სწორი? როგორც კი მივიღებთ ამ კანონს [დეოლიგარქიზაციის შესახებ] ყველაფერი იქნება გარკვეული და მისტიკას მოვხსნით ამ საკითხს და ბრალდებებს. უსაფუძვლოა, არგუმენტების გარეშეა ეს ბრალდებები. რადგან იკითხეთ დამფუძნებლის, ბატონი ბიძინა ივანიშვილის საკითხი, ძალიან ბევრი საქველმოქმედო ინიციატივა აქვს განხორციელებული. ადამიანი, რომელმაც ეს ცვლილება მოახდინა ქვეყანაში 2012 წელს, რომელმაც შეცვალა ბრუტალური, დიქტატორული რეჟიმი სააკაშვილის. სააკაშვილის პერიოდში არ არსებობდა დემოკრატიის ნიშანი, ხალხს აწამებდნენ, აუპატიურებდნენ, ციხეებში კლავდნენ, ქუჩებში კლავდნენ. 300 ათასზე მეტი ადამიანი იყო გასამართლებული. არ იყო არც თავისუფალი მედია, არც რეალური სამართალი, არც კანონის უზენაესობა. ჩვენ დრამატული ცვლილებები მოვახდინეთ ბოლო 10 წლის განმავლობაში და ეს ცვლილება იყო დრამატული. დღე და ღამე რომ განსხვავდება, ისეთი განსხვავებაა [ახლანდელ სიტუაციას და ყოფილი ხელისუფლების დროინდელს შორის]“, – განაცხადა ღარიბაშვილმა.

ბრატისლავაში, გლობალური უსაფრთხოების ფორუმზე პანელის ერთ-ერთმა მონაწილემ საქართველოს პრემიერ-მინისტრ ირაკლი ღარიბაშვილს კითხვით მიმართა, რომელიც საქართველოში პოლარიზაციის დასრულებას შეეხებოდა.

კერძოდ, ფრანგმა ჟურნალისტმა პრემიერს ჰკითხა: „თქვენ ბრძანეთ პოლარიზაციის დასრულების საკითხი, როგორც იმ 12 რეკომენდაციიდან ერთ-ერთი. თუ შეიძლება, გვითხარით მეტი ამის თაობაზე“.

როგორც ირაკლი ღარიბაშვილმა განაცხადა, საქართველოში პოლარიზაციას დაასრულებს კანდიდატის სტატუსის მიღება.

„თუ გვინდა, თავიდან ავიცილოთ შემდეგ GLOBSEC-ის სამიტზე მსგავსი კითხვები და მსგავსი პოლარიზაცია, მოგვანიჭეთ მაშინ სტატუსი. სტატუსი დაასრულებს პოლარიზაციას საქართველოში“, – განაცხადა ირაკლი ღარიბაშვილმა.