,,ჯეო სქაის“ განცხადებით, ავიაკომპანიამ საქართველო საგარეო საქმეთა სამინისტროს დახმარებით განახორციელა ეკიპაჟის წევრების მშვიდობიანი ევაკუაცია ეგვიპტის საზღვრამდე.

ავიაკომპანიის ცობით, ეკიპაჟის სრული შემადგენლობა 27 აპრილს იქნება საქართველოში.

„ავიაკომპანია „ჯეო სქაის“ ეკიპაჟის 20 წევრი სამუშაო ვიზიტით იმყოფებოდა სუდანში, კერძოდ, დედაქალაქ ხარტუმში. მიმდინარე პროცესებიდან გამომდინარე, თანამშრომელთა უსაფრთხოებისათვის გარდაუვალ აუცილებლობას წარმოადგენდა მათი უსაფრთხო დაბრუნება საქართველოში. ავიაკომპანია „ჯეო სქაიმ“ საგარეო საქმეთა სამინისტროს დახმარებით მოახდინა მათი მშვიდობიანი ევაკუაცია სახმელეთო გზით ეგვიპტის საზღვრამდე, სადაც მათ ეგვიპტის არაბთა რესპუბლიკაში საქართველოს საგანგებო და სრულუფლებიანი ელჩი მიხეილ თიგიშვილი დახვდათ. ეკიპაჟის სრული შემადგენლობა 27 აპრილს იქნება საქართველოში.

სუდანში 14 აპრილს დაწყებული სამხედრო დაპირისპირების დროს, ავიაკომპანიის ეკიპაჟის 20 წევრი იმყოფებოდა დედაქალაქ ხარტუმში. მას შემდეგ ავიაკომპანია „ჯეო სქაი“ უწყვეტ რეჟიმში იმყოფებოდა კომუნიკაციაში საქართველოს საგარეო საქმეთა სამინისტროსთან და მათი დახმარებითა და ჩართულობით ეკიპაჟის წევრები უვნებლები დაუბრუნდებიან თავიანთ ოჯახებს“, – ნათქვამია ავიაკომპანიის განცხადებაში.

საქართველოს განათლებისა და მეცნიერების მინისტრმა გიორგი ამილახვარმა მედიასთან განაცხადა, რომ მასწავლებელთა პროფესიული განვითარების სქემის გაუმჯობესებასთან დაკავშირებით, მასწავლებელთა პორტფოლიოს წარდგენის ვადა გაახანგრძლივეს.

„ვინაიდან მასწავლებლის პორტფოლიო წარმოადგენს პედაგოგის ინდივიდუალური, პრაქტიკული საქმიანობის ამსახველ ინსტრუმენტს, რაც ძალიან მნიშვნელოვანია რეალური სურათის დასანახად და მხოლოდ გამოცდის ფორმით შეუძლებელია მასწავლებლის პროფესიული საქმიანობის შეფასება, ჩვენი სამუშაო ჯგუფის ფორმატში, რომელიც სულ ერთი კვირის წინ შევქმენი, გადავწყვიტეთ, რომ პორტფოლიოს წარდგენის ვადა, რომელიც განსაზღვრული იყო პირველ მაისამდე, გადავწიეთ კიდევ ერთი თვით და განვსაზღვრეთ პირველ ივნისამდე, ვინაიდან მასწავლებლებმა მშვიდად, წყნარად, გააგრძელონ მუშაობა აღნიშნულ საკითხზე და ეს არის სწორედ ის გონივრული ვადა, სადაც ისინი უპრობლემოდ შეძლებენ თავიანთი ე.წ. პრაქტიკული საქმიანობის დამამტკიცებელი სხვადასხვა მტკიცებულების წარმოდგენას კომისიისთვის, რომ განვსაზღვროთ მათი კვალიფიკაციის ხარისხი. მიუხედავად იმისა, რომ პორტფოლიოს წარდგენის ვადამ გადაიწია, მასწავლებლებს შეეძლებათ გაზრდილი სტატუსის დანამატით 2023-2024 სასწავლო წლიდან ისარგებლონ“, – განაცხადა განათლების მინისტრმა.

გიორგი ამილახვარის თქმით, ძალიან კარგი გამოხმაურება აქვს ვადების გადაწევის გადაწყვეტილებას.

„ძალიან კარგი გამოხმაურება აქვს ამ გადაწყვეტილებას რაც აქამდე მე მომივიდა, ჩემს ხელთ არსებული ინფორმაციით, მასწავლებელთა კორპუსში, ვინაიდან ყველა ინდივიდუალური თუ სხვა ჯგუფის ინტერესები გავითვალისწინეთ. ერთადერთი, რის კომპრომისზეც არ წავალთ, ეს არის ხარისხი. შესაბამისად, რაც სჭირდება ჩვენი შვილებისთვის უკეთესი განათლების შექმნას, ამის საფუძველზე იქნება ნებისმიერი გადაწყვეტილება მიღებული პირველ რიგში მასწავლებლების ინტერესების გათვალისწინებით“, – განაცხადა მინისტრმა.

უკრაინაში კიდევ ერთი ქართველი მებრძოლი, ზურაბ ოდიშვილი დაიღუპა. ამის შესახებ ინფორმაციას სოციალურ ქსელში კავკასიური ლეგიონის მეთაური ლადო გამსახურდია ავრცელებს. ქართველი გმირი სწორედ ამ ლეგიონის წევრი იყო.

უცნობია დაღუპვის მიზეზი და ადგილი. ცხედარი ექსპერტიზაზეა გადასვენებული. მეომრების თქმით,  ზურაბ ოდიშვილი არაერთ ქიმიურ დაბომბვაში მოყვა და შესაძლოა, გარდაცვალებაც სწორედ ამან გამოიწვია.

ზურაბ ოდიშვილი 43-ე ქართველი გმირია, რომელიც უკრაინაში რუსეთის აგრესიას შეეწირა.

ორგანიზაცია „რუსეთის მამები“ ითხოვენ, რომ რუსეთის სახალხო არტისტს თამარ გვერდწითელს რუსეთის ფედერაციის მოქალაქეობა ჩამოერთვას. ამის შესახებ ტელეგრამ არხი „მეში“ იტყობინება.

ამავე ინფორმაციით, მათ უკვე მიმართეს საგამოძიებო კომიტეტს და მთავარ პროკურატურას.

„რუსეთის მამების“ აქტივისტი ანდრეი ზგონიკოვი ამბობს, რომ „რუსული საზოგადოების საყვარელი ვარსკვლავი „ლამაზად არ იქცევა“.

მისივე თქმით, უკრაინაში „სპეციალური სამხედრო ოპერაციის“ დაწყების შემდეგ გვერდწითელმა რუსეთის ფედერაციაში დაგეგმილი კონცერტები გააუქმა.

ინფორმაციისთვის, „რუსეთის მამები“ რუსეთის ხელისუფლების მხარდამჭერი ორგანიზაციაა.