სამწუხაროდ, ირაკლი კობახიძე საქართველოში არის რუსული პროპაგანდის ერთ-ერთი სპიკერი, მეორე ფრონტთან დაკავშირებით ადგილი აქვს ბოდვას, რაც საქართველოს უსაფრთხოებას და ევროპულ პერსპექტივას აზიანებს, – ამის შესახებ ოპოზიციონერმა დეპუტატმა, თეონა აქუბარდიამ განაცხადა.

აქუბარდია გამოეხმაურა ირაკლი კობახიძის დღევანდელ განცხადებას, სადაც მან კიდევ ერთხელ შეაფასა ოპოზიციის რეაქცია პრიგოჟინის მიერ ბახმუტში ამბოხის მოწყობის მცდელობაზე.

„მაშინ, როცა სრულიად დასავლეთი აანალიზებს სამხედრო გადატრიალების მცდელობას, როგორც პუტინის რეჟიმის სისუსტეს და ისინი პროგნოზირებენ, რომ ეს დამატებითი შესაძლებლობაა უკრაინის გამარჯვების, ამ მოცემულობაში „ქართული ოცნება“ ისევ შიდა პროპაგანდით ცდილობს, რუსეთის სიძლიერის მითის გაძლიერებას და ოპოზიციისკენ ისრების გადატანას. სრული სიყალბეა და „ქართული ოცნების“ მხრიდან მოსახლეობის შეცდომაში შეყვანის მცდელობაა ე.წ. მშვიდობის მითის შექმნა, რადგან მშვიდობას ქვეყნის შიგნით ერთიანობა სჭირდება, რომელსაც ირაკლი კობახიძე და მისი გუნდი ებრძვის. ვხედავთ, როგორ საზიანო პოლიტიკას ეწევა „ქართული ოცნება“,- განაცხადა თეონა აქუბარდიამ.

საქართველოს მოქალაქეებისგან ქვეყანა როცა იცლება, „ქართული ოცნება“ ცდილობს, გამოგონილი თემებით გადაფაროს მნიშვნელოვანი თემები და პროპაგანდით ადამიანების ინტოქსიკაცია მოახდინოს, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

მისივე თქმით, ირაკლი კობახიძის განცხადებაში ჩანს, რომ „ქართული ოცნება“ რუსეთის დასუსტებას არ გულშემატკივრობს.

„დიდი ბოდიში, მაგრამ ყველაზე მნიშვნელოვანია რუსეთის და პუტინის დასუსტებაა. „ქართული ოცნება“ რომ არ გულშემატკივრობს რუსეთის დასუსტებას, კობახიძის განცხადებაში სწორედ ეს გამოჩნდა. კობახიძის მიერ გავრცელებული პროპაგანდით ქარის წისქვილებს ებრძვიან – „სამ გოჭს“ და „წითელქუდას მაშინ“, როცა ქვეყანას სერიოზული გამოწვევები და პრობლემები აქვს“, – განაცხადა ხატია დეკანოიძემ.

პარტია „ქართული ოცნების“ თავმჯდომარე ირაკლი კობახიძემ სოციალურ ქსელში დაწერა, რომ დაუშვებელია, ქართველებმა და აფხაზებმა, ქართველებმა და ოსებმა ერთმანეთის სისხლი კიდევ ერთხელ დაღვარონ. ეს იქნებოდა უდიდესი დანაშაული მომავალი თაობების წინაშე.

„ჯარის ბანაკის“ პროექტი ბევრ ახალგაზრდას, ჩვენს შვილებს, მომვალ თაობას დააინტერესებს. ეს ძალიან მნიშვნელოვანი წამოწყებაა, – ამის შესახებ საქართველოს პრემიერ-მინისტრმა, ირაკლი ღარიბაშვილმა გიორგი ანწუხელიძის სახელობის სერჟანტთა აკადემიაში თავდაცვის სამინისტროს ახალი პროექტის – „ჯარის ბანაკის“ გახსნის ღონისძიებაზე სიტყვით გამოსვლისას განაცხადა.

მისივე თქმით, ჯარის როლი საზოგადოების განვითარების საქმეში ძალიან დიდია.

„დავიწყეთ მასშტაბური პროექტი, „ჯარის ბანაკის“ პროექტი, რომელიც, ვფიქრობ, ძალიან ბევრ ახალგაზრდას, ჩვენს შვილებს, მომვალ თაობას დააინტერესებს. ამ პროექტის მიმართ ინტერესი ძალიან მაღალი იყო თავიდანვე, როცა პროექტზე მუშაობა დავიწყეთ. ეს პროექტი ხორციელდება ორი სამინისტროს, თავდაცვისა და განათლების სამინისტროს ჩართულობით. ვფიქრობ, ეს ძალიან მნიშვნელოვანი წამოწყებაა. ეს ბანაკი წელს პირველად იმართება. ბანაკში, ჯამში, 800 მოსწავლე მიიღებს მონაწილეობას – თითო როტაციაში დაახლოებით 100 მოსწავლე. პროექტი აგვისტოს ბოლოს დასრულდება.

ჯარის მნიშვნელობა და, ზოგადად, ჩვენი საამაყო ჯარის როლი საზოგადოების განვითარების საქმეში ძალიან დიდია. მიმაჩნია, რომ აუცილებელია ჩვენი ახალგაზრდების ჩართულობა თავიდანვე, სკოლიდან. ბაღებშიც უნდა შევიტანოთ სწავლება, მეტი ინფორმირებულობა უნდა იყოს, რომ ცნობიერება ამაღლდეს ახალგაზრდებში, თავად გაიგონ, როგორ იმართება ჯარი. თავად ექნებათ ეს უნიკალური შანსი, გაეცნონ სამხედრო საქმიანობას, მიიღონ მონაწილეობა. ამით ჩვენ ხელს შევუწყობთ, ერთი მხრივ, ინტერესის გაზრდას ჯარის მიმართ. თქვენ პირადად შეხვდებით ჩვენი ომების გმირ ჯარისკაცებს, ცოცხალ გმირებს, რომლებიც თავად მოგიყვებიან ჩვენი ჯარის საგმირო საქმეებს. არა მხოლოდ წარსულში მომხდარ საგმირო საქმეებს, არამედ ჩვენს აწმყოში, სულ რამდენიმე წლის წინ მომხდარ საგმირო საქმეებს. ამასთან, მიმაჩნია, რომ ეს ბანაკი ხელს შეუწყობს ჩვენს ახალგაზრდებში ჯანსაღი, სწორი ღირებულებების პოპულარიზაციას. დღევანდელ მსოფლიოში ძალიან ბევრი საცდური არის ახალგაზრდებისთვის. ბუნებრივია, საქართველო არის გლობალიზაციის ნაწილი, ამიტომ ჩვენს ახალგაზრდებს სჭირდებათ თავიდანვე სწორი ორიენტირების განსაზღვრა. ამ პროცესში სახელმწიფოს როლი არის მნიშვნელოვანი.

ცხოვრების ჯანსაღი წესის პოპულარიზაცია, სწორი ღირებულებების, ოჯახის ღირებულებების პოპულარიზაცია უნდა დავიწყოთ ბაღებიდან, სკოლებიდან. რამდენიმე ხნის წინ შევიტანეთ სამხედრო სწავლება, „თავდაცვა და უსაფრთხოება“ სკოლებში, რაც, მიმაჩნია, რომ ძალიან მნიშვნელოვანი გადაწყვეტილება იყო. დღითი დღე იზრდება ინტერესი. ბევრი მოსწავლისგან გადმოცემით ვიცი, რომ ინტერესი არის ძალიან დიდი და ჩვენ ეს პროექტი უნდა გავაფართოოთ. ეტაპობრივად უნდა შევიდეთ ყველა სკოლაში და ბაღებშიც აუცილებელია ამ ელემენტის შეტანა.

როგორც აღვნიშნეთ, სწორი ორიენტირები უნდა განვუსაზღვროთ მომავალ თაობას. მიმაჩნია, რომ ეს პროექტი და ამ ბანაკში თქვენი ჩართულობა მოგცემთ საშუალებას, თავად მიიღოთ მონაწილეობა ძალიან საინტერესო საქმიანობაში, სამხედრო საქმეს გაეცნოთ. მათ შორის ალბათ საცეცხლე მომზადებაშიც მიიღებენ მონაწილეობას, გარკვეულ ტრენინგებს გაივლიან. ამასთანავე, მნიშვნელოვანია, გავზარდოთ პატრიოტული სულისკვეთება ახალგაზრდებში, მეტი ინფორმაცია არის საჭირო ამისთვის. მიმაჩნია, რომ, ზოგადად, არა მხოლოდ ოჯახის როლი, არამედ განათლების სამინისტროს, ჯარის, ეკლესიის როლი არის ძალიან მნიშვნელოვანი ახალგაზრდების აღზრდაში, სწორი ორიენტირების განსაზღვრაში“, – განაცხადა ირაკლი ღარიბაშვილმა.