„განვითარებით, მშვიდობით, ევროპულობით უნდა გავხდეთ ჩვენ ევროპული ოჯახის სრულფასოვანი წევრები, მაგრამ პირველ რიგში, ჩვენ დაკარგული ტერიტორიები უნდა დავიბრუნოთ. უბრალოდ, ასე უნდა გავმთლიანდეთ“, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ „იმედის კვირას“ განუცხადა.

მან ქვეყანაში მშვიდობის შენარჩუნების აუცილებლობასა და ამავე დროს ქვეყნის მშვიდობიანად გამთლიანების აუცილებლობაზე ისაუბრა.

„შანტაჟი გვახსოვს ბიძინა ივანიშვილზეც, მისი პოლიტიკაში დაბრუნებისა და ქვეყნის ომში ჩართვის მოთხოვნით. ჩვენ პირდაპირი მოწოდებები გვახსოვს უკრაინის ხელისუფლების კონკრეტული პირებისგან, რომ მეორე ფრონტი უნდა გაიხსნას. ბოლოს საითაც არ უნდა ვიაროთ, რა ლოგიკაც არ უნდა განვავითაროთ, რაც უნდა მოვყვეთ ან ვერ მოვყვეთ, მაინც იქით მივდივართ – საქართველოს მადლობას ეტყვიან მხოლოდ ერთ შემთხვევაში, თუ ის ჩაერთვება ომში და გაწირავს თავს გლობალური მიზნებისთვის.

 დიდმა ქვეყნებმა შეიძლება იბრძოლონ და შესაძლოა, დიდი მსხვერპლი გაიღონ, მაგრამ ფიზიკურად მაინც გადარჩნენ და ამ დიდ საოკუპაციო ომში, დიახ, უკრაინის სუვერენიტეტის, დამოუკიდებლობის, ნატოს გაფართოების, ერთად ამ ყველაფრის წინააღმდეგ მიმდინარეობს, საქართველო ვერ, არ ჩაერთვება, რადგან გარდა ადამიანური მსხვერპლისა, შესაძლოა ქვეყნის ფიზიკური განადგურების საფრთხე იყო. ჩვენ ამას არ და ვერ გავრისკავთ და ეს მშვიდობა არის ძნელად გადასატანი, რადგან ომის გარდა, ზუსტად ვიცით, არაფერს დაგვიფასებენ“, – განაცხადა მდინარაძემ.

მისივე თქმით, ქვეყნის გაერთიანება მშვიდობიანი გზითაა შესაძლებელი.

„სირთულეც ამაში მდგომარეობს, რომ შენ გაკისრია მისია – ამ გლობალურ კონტექსტში ფიზიკურად გადარჩე და რუსეთის მიერ საოკუპაციო ომის წარმოების პარალელურად, მეორე ნაწილი არ გახდე და ომში არ ჩაგითრიონ. ამავდროულად უზრუნველყო, რომ გზა იყოს ევროპული, რაც არ უნდა სპეკულაციური მესიჯები, შანტაჟი, პროვოკაციები იყოს, ევროპის გზაზე იარო. ამავდროულად, ეს გზა თავსებადი გახადო მთავარ მიზანთან, რომელსაც ჰქვია ტერიტორიების დეოკუპაცია. მშვიდობით უნდა დავიბრუნოთ ეს ხალხი და ტერიტორიები. ჩვენი მესიჯი, რაც უნდა ხდებოდეს, უნდა იყოს ერთი ჩვენი აფხაზი და ოსი დებისა და ძმების მიმართ, რომ არასდროს საქართველო არ იფიქრებს მათ დაბრუნებას ომით. არასდროს! ამ სიტყვას არასდროს უნდა გადავიდეთ. უნდა ვიფიქროთ, რომ განვითარებით, მშვიდობით, ევროპულობით უნდა გავხდეთ ჩვენ ევროპული ოჯახის სრულფასოვანი წევრები, მაგრამ პირველ რიგში, ჩვენ ეს ადამიანები, ტერიტორიები, უნდა დავიბრუნოთ. უბრალოდ, ასე უნდა გავმთლიანდეთ“, – განაცხადა მდინარაძემ.

ეს არის ბრძოლა ძალაუფლებისთვის, ბრძოლა ამ ჯგუფის – ქვეყნის შიგნით და ქვეყნის გარეთ, რომ დააბრუნონ ხელისუფლებაში „ნაციონალური მოძრაობა“. ამიტომ ხდება საბაბების მოძიება და ამ საბაბად ძირითადად გამოყენებულია ევროკავშირის თემა და რუსეთის საკითხი, – ამის შესახებ შალვა პაპუაშვილმა მედიასთან პრემიერ-მინისტრის ნატოს შესახებ კომენტარის ინტერპრეტაციაზე საუბრისას განაცხადა. პარლამენტის თავმჯდომარემ აღნიშნა, რომ საქართველოზე იქმნება გარკვეული ყალბი აღქმები, რომლებსაც ფაქტები უნდა დაუპირისპირდეს. „ეს ზუსტად რომ სასკოლო მაგალითია იმისა თუ როგორ ხდება საქართველოზე ყალბი აღქმების შექმნა და როგორ ხდება შემდეგ ამ აღქმებით გარკვეული პოლიტიკური გადაწყვეტილებისკენ მიყვანა ამა თუ იმ ინსტიტუციის, პოლიტიკოსისა თუ სახელმწიფოსი. ზუსტად ამაზე ვსაუბრობთ, როდესაც ვამბობთ, რომ აღქმებს უნდა დავუპირისპიროთ ფაქტები. ფაქტები საბოლოო ჯამში იმარჯვებს, თუმცა ეს ყალბი და მანიპულაციური კამპანიები თავის ნალექს ტოვებს“, – მიიჩნევს პარლამენტის თავმჯდომარე. ბრატისლავის უსაფრთხოების ფორუმზე ირაკლი ღარიბაშვილმა რუსეთის მიერ უკრაინაში შეჭრის მიზეზებზე ისაუბრა და ერთ-ერთ ასეთ ფაქტორად უკრაინის ნატოში გაწევრიანებისკენ სწრაფვა დაასახელა. მის ამ განცხადებას რადიკალური ოპოზიციის კრიტიკა მოჰყვა. თუმცა, იმაზე, რომ უკრაინაში ომის დაწყების ერთ-ერთი მიზეზი სწორედ ნატოს გაფართოების პერსპექტივაა, მსოფლიო ლიდერები მუდმივად საუბრობენ.

ნიკა გვარამიას გზავნილი არის ძალიან ზუსტი, ახლა არ არის დაპირისპირების დრო, პირიქით, რუსი ოლიგარქის ავტოკრატიული რეჟიმის წინააღმდეგ უნდა გავერთიანდეთ, – ამის შესახებ საკრებულოს ფრაქცია „ერთიანი ნაციონალური მოძრაობის“ თავმჯდომარემ, ირაკლი ნადირაძემ განაცხადა.

მისივე თქმით, ყველა პროდასავლური ოპოზიცია უნდა გაერთიანდეს და ერთიანი ძალებით „რუს ოლიგარქ ბიძინა ივანიშვილს უნდა შეებრძოლონ“.

„ნიკა გვარამიას გზავნილი არის ძალიან სწორი და ზუსტი, მაშინ, როდესაც რუსი ოლიგარქი ივანიშვილის სახით, ფაქტობრივად, შენ კრემლის ფილიალს საქართველოში ებრძვი. ახლა დაყოფის, დაპირისპირების, წარსული კომპლექსების დრო არ არის, ყველა პროდასავლური ოპოზიცია უნდა გავერთიანდეთ და ერთად რუს ოლიგარქ ივანიშვილს უნდა შევებრძოლოთ, რომ ის სინერგია შევქმნათ, რომელიც მისი ავტოკრატიული რეჟიმის დასამარცხებლად საჭირო იქნება“, – განაცხადა ირაკლი ნადირაძემ.

საქართველოს გენერალური პროკურატურის პასიურობის გამო, ზურაბ ადეიშვილი ამოღებულია ინტერპოლის ძებნიდან იმიტომ, რომ ქართულმა მხარემ არ მოინდომა მისი ექსტრადიცია საქართველოში – განაცხადა “ქართული ოცნების” ყოფილმა წევრმა ლევან გოგიჩაიშვილმა  რადიო “ჯორჯიან-თაიმსი”-ს ეთერში სტუმრობისას.

“ექსტრადიციის პოლიტიკას ატარებს იუსტიციის სამინისტრო. გახსოვს როდისმე, თეა წულუკიანი ჩასულიყო უკრაინაში და ოფიციალურად ეთქვას, რომ გამატანეთ დამნაშავე სააკაშვილი, ადეიშვილი და ეს ჯალათები, ვინც აქ არიან? – ერთხელ მაინც ჩასულა?, არა, რატომ?

რამდენჯერაც დავაყენე ეს საკითხი უმრავლესობაში, იმდენჯერ შემავიწროვეს იმიტომ, რომ არასდროს არ ნდომებია ივანიშვილს სააკაშვილის ყოფნა ციხეში.

სააკაშვილი მაწვნის მანქანით რომ არ ჩამოსულიყო, არასდროს არ მოუნდებოდა ივანიშვილს, რომ სააკაშვილი ჰყოლოდა ციხეში, არ იყო ეს მისი ამოცანა და არასდროს არ ყოფილა სააკაშვილის პატიმრობა ივანიშვილის თვითმიზანი

თვითმიზანი აისახება სამთავრობო ქმედებაში, როდესაც იუსტიციის მინისტრი დადის ქვეყანა-ქვეყანა და ეუბნება ადამიანებს – ეს დამნაშავე ხალხი გამატანეთ, იმიტომ, რომ მათ ხალხის წინაშე დანაშაული აქვთ ჩადენილი.

სულ ვეუბნებოდი, “ნაციონალური მოძრაობა” რომ ერთვებოდა უკრაინულ არხებზე, მოდი ჩვენც ჩავერთოთ და ავუხსნათ ამ საზოგადოებას, ვინ არიან ეს ხალხი – არა, არა, არა და ეს გაუთავებელი არა, საბოლოო ჯამში აისახა ამ პოლიტიკაში”- განაცხადა ლევან გოგიჩაიშვილმა.

მისივე თქმით, სიმართლეს არ შეესაბამება, თითქოს სააკაშვილს დიდი მხარდაჭერა აქვს უკრაინაში, ეს არიან ცალკეული ადამიანები, სხვა დანარჩენებს კი მის მიმართ ნეგატიური დამოკიდებულება აქვთ.

გოგიჩაიშვილი ამბობს, რომ ძირითადი მხარდაჭერა პოლონეთიდან აქვს მას კაჩინსკის ფლანგიდან, ისიც პირადი ურთიერთობებიდან და ფაქტორებიდან გამომდინარე.

ადამიანები, ვისაც კარგად ახსოვთ რა ტიპის მმართველობასთან გვქონა საქმე, როდესაც „ნაციონალურ მოძრაობას“ ვაფასებთ, მგონი ნათელია, რომ ეს იყო ძალიან რბილად გაკეთებული შეფასება, თუმცა, აღიარება, – ასე გამოეხმაურა პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძე პარტია „ნაციონალური მოძრაობის“ ყოფილი თავმჯდომარის, ნიკა მელიას განცხადებებს.

„ყველასთვის კარგად ცნობილია, რომ ეს იყო პოლიტიკური პარტია, რომელიც მართავდა სახელმწიფოს, მოგვიანებითაც იგივე ინსტრუმენტებით, რომ მათ არსენალში რა იარაღებიც მოიძებნება, ეს არის რეპრესიული, ძალადობრივი და ადამიანის უფლებების ფეხქვეშ გამთელავი მეთოდების ერთობლიობა. იგივე ტიპის მმართველობაა დღეს „ნაციონალური მოძრაობის“ შიგნით. გადაჭრით შეიძლება ითქვას, რომ „ნაციონალური მოძრაობისთვის“ პოლიტიკური აღსასრული გარდაუვალია. ერთმნიშვნელოვნად შეგვიძლია ვთქვათ, რომ ეს პარტია აღარ არსებობს“, – აცხადებს სარჯველაძე.

„ნაციონალურ მოძრაობაში“ შიდა დაპირისპირების ახალი ტალღა ღვივდება – პარტიის ყოფილი თავმჯდომარე ნიკა მელია დავით კეზერაშვილისა და ვანო მერაბიშვილის კრიტიკას საჯაროდ აღარ ერიდება.

„ვანო მერაბიშვილმა რომ გამოაცხადოს, რომ „ქართულ ოცნებას” უჭერს მხარს, დაგანახებთ რა მხარდაჭერა დაემატება ენმ-ს და რა დააკლდება „ქართულ ოცნებას”, – აცხადებს მელია. მისი განცხადებიდან ისმის ერთგვარი აღიარებაც, რომ წინა ხელისუფლების პერიოდში მნიშვნელოვნად ირღვეოდა ადამიანების უფლებები და მოსახლეობა იჩაგრებოდა. „ნაცმოძრაობის“ ყოფილი თავმჯდომარე ამბობს, რომ მოსახლეობა „ნაციონალური მოძრაობის“ უკან ისევ იმ ადამიანებს ხედავს, ვის გამოც პარტიამ 2012 წლის არჩევნები წააგო.