ჯერ 2 კვირის წინ საქეიფოდ შემოსული ხალხი „კადიროველებად“ გაასაღეს, ახლა კი ბომბების შეტყობინებებით გააგრძელეს თემა. აგერ მე და აგერ თქვენ – საღამოს „ნაცმედიამ“ თუ არ დააკავშიროს ეს ყველაფერი ერთმანეთს, – ასე ეხმაურება ექსპერტი ნინო ფოჩხუა ბოლო დღეების განმავლობაში ოპოზიციის მიერ გააქტიურებულ თემებს.

„ანტიქართველების მორიგი „სპეცოპერაცია”? გუშინ ნაცმოძრაობის სიცრუის მანქანას მთელი დღე ჰქონდა თემა, აქ რომ „კადიროველები“ შემოვიდნენ ეს არის სახიფათო ჩვენი ქვეყნისთვისო. დღეს რა ხდება? სხვადასხვა ობიექტებზე შედის ანონიმური ზარები, თითქოს შენობაშია ბომბი… ეს ახლა არ არის საეჭვო დამთხვევა? ეს არ არის ორგანიზებული კამპანია ქვეყნის წინააღმდეგ? ჯერ 2 კვირის წინ საქეიფოდ შემოსული ხალხი „კადიროველებად“ გაასაღეს, ახლა კი ბომბების შეტყობინებებით გააგრძელეს თემა. აგერ მე და აგერ თქვენ – საღამოს ნაცმედიამ თუ არ დააკავშიროს ეს ყველაფერი ერთმანეთს… ეს მავნებელი არაადამიანები! – წერს ნინო Facebook-ზე.

„ნაცმოძრაობის“ კლასტერის შიგნით ცდილობენ სახელებს და გვარებს დაუკავშირონ წარსული ცოდვები, რაც მრავლად აქვთ თავისი პოლიტიკური ე.წ. მოღვაწეობის პერიოდში. 2012 წლამდე თანაბრად უნდა დავაკისროთ პასუხისმგებლობა ყველას, იმიტომ, რომ ყველა იმ ბოროტი, მკვლელი სისტემის შემოქმედი იყო, – ამის შესახებ „ქართული ოცნების“აღმასრულებელმა მდივანმა მამუკა მდინარაძემ ჟურნალისტებს განუცხადა, კეზერაშვილ-ადეიშვილთან ოპოზიციის ერთობის შესახებ დასმული კითხვის პასუხად. მისი თქმით, დღესაც, ვინც ნაცმოძრაობის პოლიტიკას იზიარებს, 2012 წლამდე იმ ცოდვებსაც იზიარებს და თანაავტორი ხდება იმ ყველაფრის, რაც მათ ჩადენილი ჰქონდათ თავის დროზე.

„სახელებს და გვარებს არანაირი მნიშვნელობა არ აქვს. ისინი ნაცმოძრაობის კლასტერის შიგნით ცდილობენ სახელებს და გვარებს დაუკავშირონ ის წარსული ცოდვები, რაც მრავლად აქვთ თავისი პოლიტიკური ე.წ. მოღვაწეობის პერიოდში. 2012 წლამდე თანაბრად უნდა დავაკისროთ პასუხისმგებლობა ყველას, იმიტომ, რომ ყველა იმ ბოროტი, მკვლელი სისტემის შემოქმედი იყო და ცალკე აღებული ერთი ან ორი სახელი და გვარი იმ ყველაფერს ვერ უზრუნველყოფდა. დღესაც, ვინც „ნაცმოძრაობის“ პოლიტიკას იზიარებს, 2012 წლამდე იმ ცოდვებსაც იზიარებს და თანაავტორი ხდება იმ ყველაფრის, რაც მათ ჩადენილი ჰქონდათ თავის დროზე“, – განაცხადა მდინარაძემ.

ვაღიაროთ რეალობა – „ნაციონალური მოძრაობის“ გარეშე ოპოზიცია არჩევნებში გამარჯვებას ვერ მიაღწევს, ისევე როგორც პირიქით, – ამის შესახებ „სტრატეგია აღმაშენებლის“ გენერალურმა მდივანმა, დეპუტატმა პაატა მანჯგალაძემ განაცხადა.

მისი თქმით, დროა, ოპოზიციამ მიაღწიოს შეთანხმებას, რა ტიპის კაბინეტს ჩამოაყალიბებს ხელისუფლებაში მოსვლის შემთხვევაში.

მისივე თქმით, ყველაფერი წინასწარ უნდა იცოდნენ.

„მიხეილ სააკაშვილთან დაკავშირებული საკითხი პოლიტიკაში აქტიურად უნდა იყოს თუ არა, ეს თავად მიხეილ სააკაშვილმა და „ნაციონალურმა მოძრაობამ“ უნდა გადაწყვიტონ. ამაზე სხვა ოპოზიციური პარტია ვერაფერს იტყვის, ჩვენი გადასაწყვეტი არ არის. სრულად ვიზიარებ ხაბეიშვილის განცხადების იმ ნაწილს, რომ კოალიციური მთავრობა გვჭირდება. ჩვენ არა მარტო უნდა ვაჩვენოთ ჩვენი უპირატესობა, რომ ევროპა, უსაფრთხოება, მშვიდობა, კომფორტი დაკავშირებულია ოპოზიციასთან, არამედ ხალხმა ზუსტად უნდა იცოდეს, ვინ მოდის ხელისუფლებაში. ამიტომ უკვე დროა, ოპოზიციამ მიაღწიოს შეთანხმებას, რა ტიპის კაბინეტს ჩამოაყალიბებს ხელისუფლებაში მოსვლის შემთხვევაში, გამარჯვების შემთხვევაში. ჩვენ უნდა ვიცოდეთ, ვინ არის პრემიერ-მინისტრი, ვინ არის ვიცე-პრემიერი, შს მინისტრი, იუსტიციის მინისტრი, ვინ იქნება პროკურორი. ყველაფერი წინასწარ უნდა ვიცოდეთ, რათა „ქართულ ოცნებას“ არ მივცეთ რუსული ოპერატიული ლეგენდის გავრცელების შესაძლებლობა, რომელზეც „ქართული ოცნების“ პიარი მუშაობს, რომ დაბრუნდება ისეთი ხალხი, რომ დაიწყება რევანში, შურისძიება. ქართულ პოლიტიკაში ჩემთვის მთავარი ფაქტორია, სად მიმყავს საქართველო – კადიროვის ჩეჩნეთის გზაზე, რომელსაც „ქართული ოცნება“ აპირებს, თუ ევროპის გზაზე. ეს იქნება წყალგამყოფი. „ქართულ ოცნებას“ არ დავუტოვებთ სივრცეს, თან რუსეთში წაიყვანოს ქვეყანა, თან აქ საზოგადოება მოატყუოს, შექმნას შირმა, თითქოს „ქართული ოცნება“ არის ევროპული ძალა“, – განაცხადა პაატა მანჯგალაძემ.

მანჯგალაძემ ასევე აღნიშნა, რომ ოპოზიციურ პარტიებთან თანამშრომლობის პრობლემა არ აქვს. მისივე თქმით, ოპოზიციას კონსულტაციები ჯერ არ დაუწყია.

„არ მჯერა ლეგენდების, რომ იმის უკან ის დგას, ამის უკან ეს დგას. მე ველაპარაკები ლევან ხაბეიშვილს და ვიცი, რომ ის უფლებაუნარიანია, გადაწყვეტილებისუნარიანია. ვინმე თუ აპირებს „ქართული ოცნების“ დამარცხებას „ნაციონალურ მოძრაობასთან“ კოალიციის გაფორმების გარეშე, მე არ ვიცი ისეთი ოპოზიციური ძალა, რომელიც მარტო აიღებს 51 პროცენტს. ღმერთმა ქნას, იყოს, მაგრამ ასეთი ძალა არ არსებობს. დახმარება არ გვჭირდება არავისი, ჩვენ უნდა გავაკეთოთ წყალგამყოფი – კადიროვის, როსგვარდიას საქართველო გვინდა და „იქაური დემოკრატია“, „კადიროვის დემოკრატია“ თუ ევროპული დემოკრატია; ჩვენ ნატო-თი და ევროკავშირით განმტკიცებული მშვიდობა გვინდა თუ კადიროვით განმტკიცებული მშვიდობა. ეს არჩევანი გვაქვს გასაკეთებელი. შესაბამისად, პერსონალიებზე ლაპარაკი უადგილოა.

სამწუხაროდ, კონსულტაციები ჯერ არ დაგვიწყია, მაგრამ „სტრატეგია აღმაშენებლის“ პოზიციაა, რომ ადამიანები ხმას არ აძლევენ გაურკვევლობას. ჩვენ სამი რამ ნათლად უნდა ვუთხრათ მოქალაქეებს: პირველი, ეს არ არის გემოვნების არჩევნები, ეს იქნება საქართველოს პოლიტიკური მომავლის არჩევანი, მათ შორის ისტორიულ ჭრილში – გვინდა ევროპა, ევროპული დემოკრატია თუ გვინდა რუსეთი და კადიროვული დემოკრატია; მეორე – რაში მდგომარეობს ოპოზიციის უპირატესობა, რომ მშვიდობა, უსაფრთხოება დაკავშირებულია ნატო-სთან, ევროკავშირთან და არა – კადიროვთან; მესამე საკითხი – იმისთვის, რომ „ქართული ოცნების“ რუსულ პროპაგანდას არ შეესხას ფრთები, უნდა შევქმნათ ნათელი წარმოდგენა, ვინ მოდის ხელისუფლებაში. ეს არის ძალიან მნიშვნელოვანი. ამ სიცხადეში ოპოზიცია 10:0-ს მოუგებს ხელისუფლებას, არა იმიტომ, რომ ოპოზიცია ძლიერია, არამედ იმიტომ, რომ საქართველომ ასეთი არჩევანი ბევრჯერ გააკეთა და სწორედ ასეთი არჩევანის პირობებში დაამარცხა ზვიად გამსახურდიამ კომუნისტური პარტია. საბოლოო ჯამში, უნდა გავაკეთოთ არჩევანი, ვის უნდა თავისუფლება და ვის უნდა მონობა“, – განაცხადა პაატა მანჯგალაძემ.

„ნაციონალური მოძრაობის“ თავმჯდომარემ, ლევან ხაბეიშვილმა განაცხადა: „ჩვენთან უნდა ისაუბროს ყველამ, მოვიდნენ და თუ უნდათ, მივეხმარებით, რომ 5-7 პროცენტი მიიღონ, რათა ხვალ, ზეგ იყოს კოალიციური მთავრობა“.

პოლიტიკიდან წასული ბიძინა ივანიშვილის ფაქტორი იმდენად დიდია, რომ ერთ-ერთი მთავარი გარანტიაა მშვიდობისა და სტაბილურობის და ხაბეიშვილი საუბრობს ბიძინა ივანიშვილის დამარცხებაზე. სერიოზული კომენტარის გაკეთება ამასთან დაკავშირებით რთული იქნება, – ამის შესახებ ჟურნალისტებს „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებს ლევან ხაბეიშვილზე საუბრისას განუცხადა.

მისი თქმით, ბიძინა ივანიშვილის მიერ გამოქვეყნებულ ერთ წერილს გაცილებით მეტი რეზონანსი ჰქონდა, ვიდრე უამრავ ფეიკ-რეზოლუციასა თუ განცხადებას.

„ჯერ ისაა სასაცილო, რომ ივანიშვილის დამარცხებაზე ხაბეიშვილი საუბრობს. რა მაგალითი მოვიყვანო?! წელიწად-ნახევარზე მტია, რაც ბიძინა ივანიშვილის წერილი გამოქვეყნდა და იმ წერილს გაცილებით მეტი ძალა ჰქონდა, ვიდრე იმის შემდეგ გამოქვეყნებულ ფეიკ-რეზოლუციებს, ათობით, ასობით, ათასობით განცხადებას! ბიძინა ივანიშვილის ერთ წერილს გაცილებით მეტი ძალა ჰქონდა და გაცილებით მეტია ბიძინა ივანიშვილის ფაქტორი ქართულ პოლიტიკაში. პოლიტიკიდან წასული ადამიანის მხოლოდ ფაქტორი იმდენად დიდია, რომ ერთ-ერთი მთავარი გარანტიაა მშვიდობისა და სტაბილურობის და ხაბეიშვილი საუბრობს ბიძინა ივანიშვილის დამარცხებაზე, ნუ, სერიოზული კომენტარის გაკეთება ამასთან დაკავშირებით რთული იქნება. როდესაც უკვე რეიტინგი ნულზე დავიდა, ახლა შესთავაზა და გაუწოდა დახმარების ხელი სხვა ოპონენტებს“, – განაცხადა მდინარაძემ.