პარტია „საქართველოსთვის“ დეპუტატის ანა ბუჩუკურის განცხადებით, საქართველო კანდიდატის სტატუსს მიიღებს, თუმცა ამ საქმეში თავად “ქართული ოცნების” ხელისუფლების დამსახურება ნულის ტოლფასია.

ბუჩუკურის განცხადებით, საქართველოს მიერ ევრორეკომენდაციების შესრულება “საკმაოდ მძიმედ გამოიყურება”.

“ის, რისთვისაც ქვეყანა სტატუსს მიიღებს, არის ქართველი ხალხის ბოლო 30-წლიანი ბრძოლა ევროპული მომავლისთვის და დასავლური ღირებულებებისთვის. თუ არ ჩავთვლით ბოლო ორ წელიწადს, საქართველო წლების განმავლობაში რეგიონში, განსაკუთრებით „ასოცირებული ტრიოს” ფარგლებში მოწინავე, ლიდერი ქვეყანა იყო, როცა საქმე დემოკრატიულ რეფორმებს ეხებოდა.

კიდევ ერთი ძალიან მნიშვნელოვანი ფაქტორი, გეოპოლიტიკური პროცესებია – ჩვენს პარტნიორებს ძალიან კარგად ესმით, რომ საქართველოს მარტო დატოვება ქვეყნის იზოლირებას და რუსეთის გავლენების გაზრდას ნიშნავს. ეს არის ის მიზეზები, რის გამოც საქართველო კანდიდატი ქვეყნის სტატუსს აუცილებლად მიიღებს, რაშიც “ქართული ოცნების” დამსახურება არის ნული.

გამობრძანდნენ ხელისუფლების წარმომადგენლები და განმარტონ, თუ რას აპირებენ იმისთვის, რომ საქართველო დაეწიოს მაგალითად მოლდოვას, რომელიც უკვე მზად არის დაიწყოს მოლაპარაკებები ევროკავშირთან გაფართოებაზე და ჩვენ კანდიდატის სტატუსის მიღება გვიხარია”, – განაცხადა ანა ბუჩუკურმა.

ჩვენ წლის ბოლოს მივულოცავთ საქართველოს კანდიდატის სტატუსის მიღებას, ოპოზიციას მივუსამძიმრებთ, – ამის შესახებ „ხალხის ძალის“ წევრმა გურამ მაჭარაშვილმა განაცხადა.

მაჭარაშვილის თქმით, კანდიდატის სტატუსი ქვეყანას ობიექტურად ეკუთვნის თუ რეფორმებს ატარებს და წელს ევროკავშირი შარშანდელისგან განსხვავებით, “სამართლიან გადაწყვეტილებას” მიიღებს.

„წლის ბოლოს აშშ და ევროკავშირი, სადაც გადაწყვეტილება უნდა იქნას მიღებული, მიიღებენ რაციონალურ, სწორ და სამართლიან გადაწყვეტილებას, რაც ისედაც ეკუთვნოდა შარშან საქართველოს, ეს არის კანდიდატის სტატუსის მინიჭება. ყველამ ვიცით, კანდიდატის სტატუსი ობიექტურად რა შემთხვევაში ენიჭება ქვეყანას: უნდა ტარდებოდეს რეფორმები, სახელმწიფო ინსტიტუტები უნდა მუშაობდნენ და მათი მუშაობა საერთაშორისო სტანდარტებთან შესაბამისობაში უნდა იყოს. ბუნებრივია, ამ შემთხვევაში შარშანაც ეკუთვნოდა საქართველოს. თუმცა, პოლიტიკური გადაწყვეტილება იყო არასამართლიანი. წელს დარწმუნებული ვართ, სამართლიანად იქნება შეფასებული საქართველოს როლი თანამედროვე მსოფლიოში და ევროკავშირი სწორ, ღირსეულ და რაც მთავარია, სამართლიან გადაწყვეტილებას მიიღებს.

ოპოზიციას გლოვა აქვს გამოცხადებული, რადგან მათ დღის წესრიგშია სტატუსის არმიღება და არეულობის მცდელობა ქვეყანაში, მაგრამ მე შემიძლია მათ ვუთხრა, რომ ჩვენ წლის ბოლოს მივულოცავთ საქართველოს და მივუსამძიმრებთ მათ კანდიდატის სტატუსის მიღებას,”- განაცხადა მაჭარაშვილმა.ა

არ მგონია, რომ მელიას გარჩევები ახლა მნიშვნელოვანია – 2024 წლის არჩევნებში თუ „ქართულმა ოცნებამ“ მოახერხა ძალაუფლების შენარჩუნება, მეც, მელიასაც, ხაბეიშვილსაც და თქვენც ამ ქვეყანაში დარჩენის შესაძლებლობა არ გვექნება, – ასე პასუხობს „ნაციონალური მოძრაობის“ დეპუტატი ანა წითლიძე ჟურნალისტებთან ნიკა მელიას განცხადებას.

როგორც წითლიძემ აღნიშნა, ახლა ქვეყანაში ორი მთავარი გამოწვევაა, ეს არის კანდიდატის სტატუსი და არჩევნები და ნებისმიერი უთანხმოება ამ საკითხებთან შედარებით, უმნიშვნელოა.

„ვნახე მისი ეს „ფეისბუქ პოსტი“. მე არ მგონია, რომ ეს გარჩევები და მისი ეს პოზიციები არის ახლა მნიშვნელოვანი, როცა ძალიან ცოტა დრო გვაქვს დარჩენილი იმისთვის, რომ გავერკვიოთ მივიღებთ თუ არა კანდიდატის სტატუსს, ქვეყანა დგას ბევრი გამოწვევის წინაშე და ძალიან კარგად უნდა გვესმოდეს ყველას, რომ ნებისმიერი უთანხმოება, დაპირისპირება, კინკლაობა უმნიშვნელოა იმასთან შედარებით, რაც წინ გველის. წინ გველის კანდიდატის სტატუსის მიღების პროცესი და უმნიშვნელოვანესი 2024 წლის არჩევნები, ხოლო 2024 წლის არჩევნებში თუ “ქართულმა ოცნებამ” კიდევ მოახერხა ძალაუფლების შენარჩუნება, დამიჯერეთ, მეც, ნიკა მელიასაც, ლევან ხაბეიშვილსაც და ჟურნალისტებსაც ვინც ახლა აქ ხართ, განსაკუთრებით კრიტიკული მედიის წარმომადგენლებს, ამ ქვეყანაში დარჩენის შესაძლებლობა არ გვექნება ნამდვილად და უკან მოგვრჩება ნებისმიერ ასეთი უთანხმოება,”- განაცხადა წითლიძემ.

ინფორმაციისთვის, „ნაციონალური მოძრაობის“ წევრი ნიკა მელია კვლავ საუბრობს პარტიაში არაფორმალურ მმართველობაზე და აცხადებს, რომ არ და ვერ იქნება იქ, “სადაც იქნება არაფორმალური მმართველობა, სადაც იქნება ვანო მერაბიშვილისა და დავით კეზერაშვილის მავნე გავლენა“.

მისივე თქმით, ის იმ ხალხთან ერთად იქნება, „ვისთან ერთადაც ბრძოლა და გამარჯვება შესაძლებელია“.

მედია არის სარკე და არ მგონია, სარკეზე რაიმეს გადაფარებით რეალობა შეიცვალოს – თუ ვინმე სიძულვილის და პოლიტიკური უხამსობის ტირაჟირებას ახდენს ქვეყანაში, ეს „ქართული ოცნებაა“, –  ასე ეხმაურება “სტრატეგია აღმაშენებლის“ დეპუტატი პაატა მანჯგალაძე  „მაუწყებლობის შესახებ“ კანონში ცვლილებებს .

მისი თქმით, ცვლილებები „ქართულ ოცნებას” საარჩევნოდ, ცენზურისთვის სჭირდება.

„ცვლილებები, რომელიც შემოტანილია სიძულვილის ენასთან დაკავშირებით „ქართულ ოცნებას“ სჭირდება იმისთვის, რომ არჩევნების დროს დამატებით ბერკეტი ჰქონდეს მედიაზე ზემოქმედების. ბექაურის კომისიის მიმართ, რომელმაც უნდა გადაწყვიტოს ის საკითხები, რაც მაუწყებლების შიდა რეგულირების სფერო იყო, არაერთი შენიშვნაა გამოთქმული პოლიტიკურ მიკერძოებასთან დაკავშირებით. ცვლილებები საშუალებას იძლევა მედიაზე ცენზურის განხორციელების. მედია არის სარკე და არ მგონია, სარკეზე რაიმეს გადაფარებით რეალობა შეიცვალოს, თუ ვინმე სიძულვილის და პოლიტიკური უხამსობის ტირაჟირებას ახდენს ქვეყანაში, ეს არის „ქართული ოცნება“ და მასთან დაკავშირებული ჯგუფები. ამბობენ, რომ რეგულაცია ევროპულია და უნდა ვიცოდეთ, რომ როცა „ქართული ოცნება“ დაჩქარებით ახორციელებს ცვლილებებს და ამბობს, რომ ევროპული და ამერიკულია, იცოდეთ, რომ სინამდვილეში მავნებლობა აქვს ჩაფიქრებული, რაღაცას იპარავს, აფუჭებს და ანადგურებს,”- განაცხადა მანჯგალაძემ.