ევროპაშიც კარგად უნდა ესმოდეთ, რომ საქართველოს ევროინტეგრაცია მნიშვნელოვანი და ღირებულია არა მხოლოდ საქართველოსთვის, არამედ ევროკავშირისთვისაც, რადგან ჩვენ შემდგარი, ღირსეული ერი ვართ, რომელსაც შეუძლია ევროკავშირი ყველა თვალსაზრისით გაამდიდროს, – ამის შესახებ საპარლამენტო უმრავლესობის წევრმა მიხეილ სარჯველაძემ ჟურნალისტებს კანდიდატის სტატუსის მიღების საკითხზე საუბრისას განუცხადა.

„კანდიდატის სტატუსთან მიმართებით, პოზიტიური მოლოდინი მაქვს. არა პიარული შეფასებებისა და ანგაჟირებული, არასწორი, მცდარი აღქმების საფუძველზე, არამედ შინაარსობრივად ვიცნობ იმ რეფორმებს, რომლებიც განხორციელებულია და რეალურად მაქვს მოლოდინი, რომ გადაწყვეტილება უნდა იყოს პოზიტიური. ამას მაფიქრებინებს არა მხოლოდ შარშან ევროპული პერსპექტივის მონიჭების გადაწყვეტილების შემდეგ განხორციელებული რეფორმები, არამედ ის გარემოება, რომ თუ მოლდოვამ იმ კონდიციით, რომელშიც იმყოფებოდა, დაიმსახურა კანდიდატის სტატუსი, საქართველო, ბუნებრივია, იმ დროსაც იმყოფებოდა უკეთეს მდგომარეობაში ვიდრე მოლდოვა. უკრაინაზე, გასაგები მიზეზების გამო, აღარ ვიტყვი. ასეთ ფონზე ნათელია, რომ საქართველო იმსახურებს კანდიდატის სტატუსს. ერთადერთი ის განსხვავებაა, რომ ალბათ, მოლდოვასა და უკრაინაში არაა ოპოზიცია, რომელიც მუდმივად და დაუღალავად, არანორმალური ტემპით იბრძვის, რათა ქვეყანას კანდიდატის სტატუსის მოპოვებაში ხელი შეეშალოს. ერთადერთი განმასხვავებელი უპირატესობა, რაც იმ სახელმწიფოებს აქვთ, ესაა. იქ არავის უთქვამს, ხალხი იმსახურებს და ქვეყანა არაო.

ბუნებრივია, მცირე ალბათობით უნდა დავუშვათ იმ შეცდომის გამეორების რისკი, რომელიც დაშვებული იყო. საბედნიეროდ, ევროპაშიც კარგად აღიქვამენ, ერთი მხრივ, შარშან დაშვებული შეცდომის არსს, მეორე მხრივ კი ინტერესს, რომელიც ევროპას აქვს საქართველოს მხრიდან კანდიდატის სტატუსის მოპოვებაში. კარგად უნდა გავიაზროთ და ევროპაშიც კარგად უნდა ესმოდეთ, რომ საქართველოს ევროინტეგრაცია მნიშვნელოვანი და ღირებულია არა მხოლოდ საქართველოსთვის, არამედ ევროკავშირისთვისაც, რადგან ჩვენ შემდგარი, ღირსეული ერი ვართ, რომელსაც შეუძლია ევროკავშირი ყველა თვალსაზრისით გაამდიდროს“, – განაცხადა მიხეილ სარჯველაძემ.

ისრაელში საქართველოს საელჩოს ცნობით, ინფორმაცია, თითქოს ისრაელის საერთაშორისო აეროპორტი იკეტება უსაფუძვლოა, რადგან აეროპორტი განაგრძობს მუშაობას.

მათივე განცხადებით, რამდენიმე სიახლეა საქართველოს მიმართულებით ფრენებთან დაკავშირებით. ავიაკომპანია “ჯორჯიან ეარვეისი” 22-ი ოქტომბრიდან ისრაელის მიმართულებით, ფრენებს აჩერებს.

კომპანია რეისების შეწყვეტას ისრაელში უსაფრთხოების ზომების არარსებობას და საერთაშორისო სადაზღვევო კომპანიების გადაწყვეტილებას უკავშირებს, თუმცა საელჩოს ცნობით, თბილისის მიმართულებით პირდაპირ ფრენებს ინარჩუნებენ და რეგულარულად ახორციელებენ ისრაელის ავიაკომპანიები.

ჩვენ სრულად ვაგრძელებთ საქართველოს ტერიტორიული მთლიანობის, სუვერენიტეტისა და ქვეყნის ევროატლანტიკური პერსპექტივის მხარდაჭერას, – ამის შესახებ ნათქვამია აშშ-ევროკავშირის სამიტის ერთობლივ განცხადებაში.

განცხადებაში ხაზგასმულია, რომ აშშ და ევროკავშირის წევრი სახელმწიფოები ადასტურებენ ერთგულებას ტრანსატლანტიკური პარტნიორობის მიმართ.

„აშშ, ევროკავშირი და მისი წევრი სახელმწიფოები, რომლებიც დაახლოებით 800 მილიონ მოქალაქეს წარმოადგენენ, გაერთიანებულნი არიან ღირებულებებით, დაკავშირებულნი არიან დედამიწაზე ყველაზე დინამიკური ეკონომიკური ურთიერთობებით. კიდევ ერთხელ ვადასტურებთ ერთგულებას ტრანსატლანტიკური პარტნიორობის მიმართ. 2021 წლის ივნისში გამართული აშშ-ევროკავშირის ბოლო სამიტის შემდეგ, მსოფლიო უპრეცედენტოდ შეიცვალა და ჩვენ საპასუხოდ ამბიციური ნაბიჯები გადავდგით. ჩვენ ერთად ვმუშაობთ მშვიდობის, სტაბილურობის, კეთილდღეობის უზრუნველსაყოფად რეგიონში, მთელ მსოფლიოში, მათ შორის უკრაინის ურყევი მხარდაჭერით“, – აღნიშნულია განცხადებაში.

აშშ-ევროკავშირის სამიტის ერთობლივ განცხადებაში, რომელშიც საქართველოზეც არის საუბარი, ნათქვამია, რომ ყველა პარტნიორმა უნდა გააგრძელოს ევროპული გზაზე წინსვლისთვის აუცილებელი რეფორმების განხორციელება.

„ჩვენ სრულად ვაგრძელებთ საქართველოს ტერიტორიული მთლიანობის, სუვერენიტეტისა და ქვეყნის ევროატლანტიკური პერსპექტივის მხარდაჭერას. ვადასტურებთ ჩვენს საერთო ვალდებულებას დასავლეთ ბალკანეთში სტაბილურობისადმი, ჩვენს მხარდაჭერას რეგიონის ევროკავშირის პერსპექტივისადმი. ყველა პარტნიორმა უნდა გააგრძელოს ევროპული გზაზე წინსვლისთვის აუცილებელი რეფორმების განხორციელება“, – ნათქვამია განცხადებაში.