საქართველოს პრეზიდენტი სალომე ზურაბიშვილი RFI-თან ინტერვიუში საქართველოში რუსეთის მოქალაქეების შემოსვლასთან დაკავშირებით დასმულ კითხვას პასუხობს და ამბობს, რომ რუსების ჩამოსვლით მოსახლეობა შეწუხებულია.

„ამ მონეტას ორი მხარე აქვს. დიდი ნაწილი, დაახლოებით, 100 000 დარჩა საქართველოში, მიუხედავად იმისა, რომ ეს მოძრავი ტალღაა, რადგან ისინი შემდეგ სავარაუდოდ, სხვა ქვეყნებში გადადიან. ეს ეკონომიკური წვლილია, ისინი მონაწილეობენ ეკონომიკურ ცხოვრებაში.

საქართველოში ბიზნესის კეთება ძალიან ადვილია, 24 საათში შესაძლებელია კომპანიის გახსნა. ისინი ხსნიან პატარა ინდივიდუალურ კომპანიებს. მოსახლეობა შეწუხებულია, რადგან ეს რუსულენოვანი მოსახლეობა ჩამოდის, რომელიც არ გამოხატავს ნამდვილ ინტერესს ინტეგრაცია მოახდინოს ქვეყნის კულტურაში.

გვაქვს განცდა, რომ ისინი იქცევიან ისე, თითქოს თავიანთ სახლში არიან, შესაძლოა, ახსოვთ, თუ როგორ იყო ადრე. და განსაკუთრებით არის განცდა, რომ [მათი შემოსვლა] არ არის კარგად კონტროლირებული და ამ მასებში, არ ვიცით ვინ შეიძლება შემოვიდეს ქვეყანაში. და არის თუ არა ეს ზედამხედველობის ქვეშ…“, – აცხადებს სალომე ზურაბიშვილი.

მომავალი არჩევნები მონოპარტიული სისტემიდან გამოსვლის შანსია ,- ამის შესახებ საქართველოს პრეზიდენტმა, სალომე ზურაბიშვილმა RFI -სთან (Radio France Internationale) ინტერვიუში განაცხადა.

პრეზიდენტის თქმით, 2014 წლის არჩევნები შანსია ქვეყანა გადავიდეს დემოკრატიისათვის დამახასიათებელ სისტემაზე, რომელიც ემსგავსება კოალიციას.

„საქართველო დღემდე, მისი დამოუკიდებლობის 30 წლის განმავლობაში, არასოდეს გამოსულა ერთპარტიული სისტემიდან. მიუხედავად მეტნაკლებად დემოკრატიული, თავისუფალი არჩევნებისა, რომელიც საერთო ჯამში, უფრო დადებითად იყო შეფასებული, ვიდრე უარყოფითად. ყოველი რეჟიმის შემთხვევაში, რომლებიც ცვლიდნენ ერთმანეთს, ვბრუნდებოდით უფრო და უფრო მონოპარტიულ რეჟიმზე, რომელიც უფრო და უფრო აკონტროლებს ინსტიტუციებს. მომავალი არჩევნები ამ სისტემიდან გამოსვლის შანსია და შანსი იმისა, რომ გადავიდეს სხვა, დემოკრატიისათვის დამახასიათებელ სისტემაზე, რომელიც უფრო ემსგავსება კოალიციას, ვიდრე ერთი პარტია, რომელიც იმარჯვებს ყველგან და შემდეგ თვლის, რომ მარტოა ხელისუფლებაში”, – აცხადებს სალომე ზურაბიშვილი.

პარტია „გირჩის“ დეპუტატის, სანდრო რაქვიაშვილის განცხადებით, „ქართული ოცნების“ პირობებში შეუძლებელია წარმოვიდგინოთ, რომ ევროკომისიის მიერ დაწესებული 9 რეკომენდაცია შესრულდეს.

მისივე თქმით, არჩევნებამდე 9 რეკომენდაციების შესრულების ნებისმიერი მცდელობა „ძალიან კომიკური“ იქნება.

„ის გადაწყვეტილება, რაც ევროკომისიამ მიიღო, ცხადია, უმეტესწილად არის შეფასება მთავრობის საქმიანობის, იმ გაგებით, რამდენადაც მთავრობის პასუხისმგებლობა იყო 12 პუნქტის 90%-ი. ის, რომ ეს 12 პუნქტი არ არის შესრულებული, ასევე, მთავრობის დამსახურება და ის, რომ ევროინტეგრაცია ფაქტობრივად, ამით გაჩერებულია, რადგან შემდგომი ნაბიჯები მხოლოდ არჩევნების შემდეგ შეიძლება მოხდეს.

ფაქტობრივად, ირიბად მიგვითითეს, რომ ამ მთავრობის პირობებში შეუძლებელია, რომ ევროინტეგრაცია გაგრძელდეს, ესეც მთავრობის დამსახურებაა. საბოლოო ჯამში, ცუდიც და კარგიც, ასე თუ ისე მთავრობის, თუ მმართველი გუნდის დამსახურებაა, მაგრამ ისიც არ უნდა დაგვავიწყდეს, ზოგადად ჩვენი ქვეყნის აღქმა ბევრ სხვა გარე ფაქტორზეც არის დამოკიდებული. მიუხედავად იმისა, რომ 12 პუნქტი არ არის შესრულებული, სტატუსის ფაქტობრივად მოგვანიჭეს, ერთი ფორმალური ნაბიჯი დარჩა და იმედია, მოგვანიჭებენ. ეს იმ გარემოებიდან არის განპიროვნებული, რომელიც შეიქმნა ამ მთელი წელიწადნახევრის განმავლობაში.

მე მგონი, ნებისმიერი მცდელობა არჩევნებამდე ამ 9 რეკომენდაციის შესრულების იქნება ძალიან კომიკური, რადგან პარლამენტში, სადაც „ქართული ოცნების“ დეპუტატები, სუს-ის უფროს ხელი რომ ჩამოართვან ან გაუღიმონ რიგში დგებიან და ამ პარლამენტარებს, რომ დაავალო სუს-ი გააკონტროლონ, მე მგონი, უბრალოდ ძალიან სასაცილო იქნება. ჩემი აზრით, მთელი ეს პუნქტები შინაარსობრივად ეხება ოპოზიციას, რომელიც უნდა წარმოიდგინოს, როგორ გააკონტროლებს სუს-ს, ეროვნულ ბანკს, ცენტრალურ საარჩევნო კომისიას და ა.შ. თუ არჩევნები ნორმალურად ჩატარდება და მმართველი გუნდი შეიცვლება, თორემ ამ მმართველი გუნდის პირობებში უბრალოდ შეუძლებელია წარმოვიდგინოთ, რომ ის რაც იქ, 9 პუნქტში წერია, შესრულებული იყოს“, – განაცხადა რაქვიაშვილმა.

ასევე, რაქვიაშვილი ჟურნალისტებთან საუბრისას 2024 წლის საპარლამენტო არჩევნებისთვის საარჩევნო ბარიერის დაწევას გამოეხმაურა და აღნიშნა, რომ „დაბალი ბარიერი ქართული პოლიტიკურ სისტემაში ძალიან კარგი იქნებოდა“.

„პირველ რიგში, ევროპელებს ზუსტად არ უთქვამთ გულისხმობენ, თუ არა ბარიერის დაწევას, მაგრამ ნამდვილად ბარიერის დაწევა, ყველაზე უკეთესად შეესაბამება იმ ჩანაწერს, რაც გაკეთებულია. ზოგადად, დაბალი ბარიერი ჩვენ პოლიტიკურ სისტემაში ძალიან კარგი იქნებოდა, რადგან, უბრალოდ, ბევრად კონკურენტული პოლიტიკური გარემო გვექნებოდა და ბევრად ადეკვატური წარმომადგენლობა პარლამენტში. ახლა 5%-იანი ბარიერით სულ რამდენიმე პარტიას აქვს ბარიერის გადალახვის შესაძლებლობა და უამრავი ხმა ჩვენი ამომრჩევლის დაიკარგება, ამიტომ, რა თქმა უნდა, კარგია, რომ ბარიერი დაიწიოს, თუმცა მე მგონი, „ქართული ოცნება“ ამას გააკეთებს მხოლოდ მაშინ, თუ მისთვის მომგებიანი იქნება და მე არ მეგულება ამ მომენტში ისეთი კონფიგურაცია, პოლიტიკური ველი, სადაც „ქართული ოცნებისთვის“ შეიძლება ბარიერის დაწევა მომგებიანი იყოს, ამიტომ ჩვენ ზოგადად 5%-თვის ვემზადებით, მაგრამ თუ ოპოზიციურ მხარის რაღაც კოორდინაცია მოხდება და მართლა ევროპელებმა ეს იგულისხმეს, დარწმუნებული ვარ, ბარიერის დაწევა რეალისტური გახდება“, – აღნიშნა რაქვიაშვილმა.