NATO-ს ყოფილი გენერალური მდივნის ანდერს ფოგ რასმუსენის განცხადებით, უკრაინა უნდა მიიღონ ჩრდილოატლანტიკურ ალიანსში, ოღონდ, ოკუპირებული ტერიტორიების გარეშე. The Guardian-ის ცნობით, რასმუსენი აქვე დასძენს, რომ ეს არა კონფლიქტის გაყინვას, არამედ კრემლისთვის იმის ჩვენებას უნდა ემსახურებოდეს, რომ ომი ვერ შეაჩერებს უკრაინის დაახლოებას დასავლეთთან.

„შემდეგი ნაბიჯის გადადგმის და უკრაინა ნატოში მიწვევის დრო მოვიდა. ჩვენ უსაფრთხოების ახალი, ევროპული არქიტექტურა გვჭირდება, რომელშიც უკრაინა ნატოს ცენტრში იქნება“, – აცხადებს რასმუსენი.

თუმცა, როგორც რასმუსენი ამბობს, მთელი უკრაინისთვის NATO-ს წევრობის შეთავაზება რუსეთისთვის იქნებოდა გზავნილი, რომ ჩრდილოატლანტიკური ალიანსი მზად არის მოსკოვთან ომისთვის. მისივე თქმით, რუსეთის მიერ დაპყრობილი ტერიტორიების გამოკლების შემთხვევაში კი, ნატო-რუსეთის კონფლიქტის საფრთხე შემცირდება.

„მე-5 მუხლის გარანტიები რუსეთს შეაკავებს, რომ თავს არ დაესხას უკრაინის იმ ტერიტორიებს, რომლებიც NATO-ს საფარველქვეშ შევა და ამ გზით, უკრაინულ ძალებს ძალებს, ფრონტის ხაზზე გასასვლელად“, – ამბობს რასმუსენი.

ღაზაში ცეცხლის შეწყვეტის მოთხოვნით ლონდონში პალესტინელთა მხარდამჭერი მრავალათასიანი აქცია გაიმართა.

პოლიციის მონაცემებით, დემონსტრაციაში 300 ათასი ადამიანი მონაწილეობდა.

აქციის პარალელურად ბრიტანეთის დედაქალაქში ასევე დემონსტრაცია გამართეს ულტრამემარჯვენე დემონსტრანტებმა, რომლებიც პოლიციას დაუპირისპირდნენ. ვითარება მას შემდეგ გამწვავდა, რაც კონტრაქციის მონაწილეებმა სცადეს პოლიციის ხაზის გარღვევა პროპალესტინური აქციის მახლობლად. მოგვიანებით, ლონდონის პოლიციამ განაცხადა, რომ კონტრაქციის 82 მონაწილე დააკავა მშვიდობის უზრუნველყოფის მიზნით.

ჰეზბოლა ახლოსაა მძიმე შეცდომის დაშვებასთან, – ამის შესახებ ისრაელის თავდაცვის მინისტრმა იოავ გალანტმა ჩრდილოეთ საზღვართან მდებარე სამხედრო ბაზაზე ვიზიტისას განაცხადა.

მისი თქმით, ჰეზბოლა “ახლოსაა მძიმე შეცდომის დაშვებასთან,” რომელიც ბეირუთის მაცხოვრებლების მიერ საკუთარი სახლებიდან გაქცევით დასრულდება.

“ახლა ლიბანის მოქალაქეებს ვეუბნები, უკვე ვხედავ ღაზას მოქალაქეებს, რომლებიც თეთრი დროშებით სანაპიროს გასწვრივ მიდიან და სამხრეთით მიემართებიან… ჰეზბოლა ლიბანს ითრევს ომში, რომელიც შეიძლება მოხდეს, და ის შეცდომებს უშვებს. თუ ის ასეთ შეცდომებს უშვებს, ისინი, ვინც პირველ რიგში გადაიხდიან ფასს, არიან ლიბანის მოქალაქეები. რასაც ახლა ღაზაში ვშვრებით, ვიცით როგორ გავაკეთოთ ბეირუთში”, – განაცხადა გალანტმა.

მან აღნიშნა, რომ ისრაელის სამხედრო-საჰაერო ძალები თავისი რესურსების მეათედზე ნაკლებს იყენებენ ღაზას სექტორში.

.

ბოლო ოთხი წლის განმავლობაში ჩინეთ-ევროკავშირის პირველი სამიტი, სავარაუდოდ, 7-8 დეკემბერს გაიმართება. ინფორმაციას ამის შესახებ გამოცემა „პოლიტიკო“ საკუთარ წყაროებზე დაყრდნობით ავრცელებს.

როგორც მედიასაშუალებას ევროპელმა დიპლომატმა განუცხადა, ეს არის თარიღი, რომელზეც ორივე მხარე მუშაობს, ის ჯერ საბოლოო არ არის და ოფიციალურად უნდა გამოცხადდეს.

ჩინეთში დაგეგმილ სამიტში მონაწილეობას მიიღებენ ევროკომისიის პრეზიდენტი ურსულა ფონ დერ ლაიენი და ევროპული საბჭოს პრეზიდენტი შარლ მიშელი. როგორც მოსალოდნელია, სამიტის თავმჯდომარე ჩინეთის პრემიერი ლი ციანი იქნება. ამასთან, დაგეგმილია ჩინეთის პრეზიდენტის, სი ძინპინის ევროკავშირის ლიდერებთან შეხვედრა.

მნიშვნელოვანია, დავიცვათ ის, რაც სხვებს ვუთხარით, ეს ეხება როგორც დასავლეთ ბალკანეთის ქვეყნებს, ასევე მოლდოვას, უკრაინას და, ვფიქრობ, საქართველოს, რომ ვართ მათი პარტნიორები, – ამის შესახებ გერმანიის კანცლერმა, ოლაფ შოლცმა ესპანეთში, სოციალისტების კონგრესზე სიტყვით გამოსვლისას განაცხადა.

გერმანიის მთავრობის ხელმძღვანელის თქმით, მნიშვნელოვანია ამ ქვეყნების დახმარება, რომ მათ შეძლონ ევროპულ ოჯახში შესვლა.

ამასთან, ოლაფ შოლცმა უკრაინის წინააღმდეგ რუსეთის ომზეც ისაუბრა.

„საზღვრების ძალით შეცვლა აღარ უნდა იყოს ევროპის რეალობის ნაწილი. უკრაინის წინააღმდეგ განხორციელებული აგრესიით კი რუსეთის ლიდერმა გადაწყვიტა, შეცვალოს ეს შეთანხმება, იბრძოლოს სხვა ქვეყნის წინააღმდეგ და, უბრალოდ, სცადოს, მისი ტერიტორია რუსული გახდეს. ჩვენ არ შეგვიძლია ამის მიღება და უნდა მოვახდინოთ რეაგირება ამ ძირითადი პოლიტიკის ცვლილებაზე. ეს ნიშნავს უკრაინის მხარდაჭერას და საკუთარი ქვეყნის დაცვას. პუტინმა არ უნდა გაიმარჯვოს, მაგრამ ასევე მნიშვნელოვანია, მივყვეთ იმას, რაც ვუთხარით სხვებს, განსაკუთრებით, დასავლეთ ბალკანეთის ქვეყნებს, რომლებმაც მიიღეს დაპირება, რომ გახდებოდნენ ევროკავშირის ნაწილი 20 წლის წინ. უკვე 20 წელია, რაც ეს ითქვა. ეს იგივეა მოლდოვასთან, იგივეა უკრაინასთან და, ვფიქრობ, საქართველოსთანაც, რომ ჩვენ მათი პარტნიორები ვართ, რომ ჩვენ შესაძლებელს გავხდით მათთვის, მიიღონ გადაწყვეტილებები თავიანთი ქვეყნების გასაუმჯობესებლად, განახორციელონ რეფორმები და შემდეგ შეუერთდნენ ჩვენს ძლიერ ევროპულ ოჯახს. ვფიქრობ, ჩვენ გვაქვს კარგი შანსი, რომ ეს იმუშავებს, თუ ჩვენ შევასრულებთ ჩვენს ამოცანას, თუ დავუჭერთ მხარს მათ, ვისაც მხარდაჭერა სჭირდება ამისთვის“, – განაცხადა ოლაფ შოლცმა.

საფრანგეთის პრეზიდენტი ემანუელ მაკრონი აცხადებს, რომ რუსეთი თუ გაიმარჯვებს უკრაინაში ომში, ევროპაში იქნება ახალი იმპერიალისტური ძალა, რომელიც, შესაძლოა, დაემუქროს სხვა ყოფილ საბჭოთა ქვეყნებს, როგორებიც არიან საქართველო და ყაზახეთი, ასევე მთელ კონტინენტს. ამის შესახებ ემანუელ მაკრონმა „ბიბისისთვის“ მიცემულ ექსკლუზიურ ინტერვიუში განაცხადა.

„ცხადია, რომ ის, რასაც რუსეთი უკრაინაში აკეთებს, არის იმპერიალიზმი და კოლონიალიზმი“, – აღნიშნა მაკრონმა.

საფრანგეთის პრეზიდენტის თქმით, მისი და ყველა ქვეყნის მოვალეობაა უკრაინის მხარდაჭერა. მან ასევე თქვა, რომ შემდეგი თვე იქნება კრიტიკული.

ემანუელ მაკრონის განცხადებით, უკრაინისთვის მოლაპარაკებების მაგიდასთან დაჯდომის დრო ჯერ არ არის. მან აღნიშნა, რომ მოლაპარაკებების გამართვის გადაწყვეტილება მხოლოდ კიევის მისაღებია.

ამასთან, საფრანგეთის ლიდერმა დასძინა, რომ, შესაძლოა, „სამართლიანი და კარგი მოლაპარაკებებისთვის და მოლაპარაკებების მაგიდასთან დაბრუნებისა და რუსეთთან გამოსავლის პოვნის დრო დადგეს“.