ტერორისტული ორგანიზაციის „ჰამასის“ სპიკერი ღაზი ჰამადი მძევლების გათავისუფლების სანაცვლოდ პირობებს აყენებს.

მისი თქმით, ღაზას სექტორში აგრესია უნდა შეწყდეს და დახმარება უნდა შევიდეს.

„ჩვენ მზად ვართ პოზიტიურად გადავჭრათ მძევლებისა და პატიმრების პრობლემა. ჩვენ მზად ვართ გავათავისუფლოთ ისინი, მაგრამ ამისთვის ხელსაყრელი პირობები უნდა არსებობდეს. ღაზას სექტორში აგრესია უნდა შეწყდეს და დახმარება უნდა შემოვიდეს ღაზაში.

ჩვენ მჭიდრო კონტაქტები გვაქვს კატართან მათ დიდი როლი ითამაშეს წინა დღით ორი მძევლის გათავისუფლებაში.

[სახმელეთო ოპერაციის შემთხვევაში] ღაზა იქცევა სრულ ჯოჯოხეთად, სასაფლაოდ ისრაელისთვის. არ ვიცი, რა ბედი ეწევა მძევლებს, რადგან სიტუაცია უფრო გართულდება. მე არ შემიძლია ამ ადამიანების უსაფრთხოების გარანტიაზე საუბარი“, – აცხადებს ღაზი ჰამადი. 

თურქეთის პრეზიდენტი რეჯეფ თაიფ ერდოღანი ტელეფონით ესაუბრა ჰამასის პოლიტბიუროს ხელმძღვანელს ისმაილ ჰანიეს.

მედიის ცნობით, საუბარი შეეხებოდა დაჭრილების თურქეთში სამკურნალოდ ჩაყვანას.

„პრეზიდენტმა ერდოღანმა განაცხადა, რომ თურქეთი მუშაობს იმისთვის, რომ ჰუმანიტარული დახმარება ღაზას სექტორამდე მივიდეს, დაშავებულებს თურქეთში უმკურნალონ საჭიროების შემთხვევაში და რაც შეიძლება მალე მოხდეს ცეცხლის შეწყვეტა რეგიონში“, – წერს ერდოღანის ოფისი.

დიდი ბრიტანეთის საგარეო საქმეთა მინისტრი ჯეიმს კლევერლი ისრაელს დისციპლინური ქმედებისკენ მოუწოდებს. ამის შესახებ მან ეგვიპტეში სამშვიდობო სამიტზე განაცხადა.

ბრიტანეთის საგარეო საქმეთა მინისტრის თქმით, მიუხედავად იმისა, რომ ისრაელს აქვს თავდაცვის უფლება, მან ასევე უნდა იმუშაოს „ღაზაში პალესტინელი ხალხის ტანჯვის შესამსუბუქებლად“.

„წარმოუდგენლად რთული გარემოებების მიუხედავად, მე ისრაელის სამხედროებს მოვუწოდე დისციპლინის, პროფესიონალიზმისა და თავშეკავებისკენ”, – თქვა მან.

კლევერლიმ ხაზგასმით აღნიშნა, რომ ლიდერებმა უნდა იმუშაონ ერთად, რათა თავიდან აიცილონ შემდგომი კონფლიქტი, რადგან „ეს არის ზუსტად ის, რაც „ჰამასს“ სურს“.

ისრაელის თავდაცვის ძალების მეთაური, გენერალ-ლეიტენანტი ჰერცი ჰალევი გოლანის ქვეითთა ბრიგადის ჯარისკაცებს შეხვდა.

ისრაელის თავდაცვის ძალების მეთაურმა სამხედროებს განუცხადა, რომ უნდა ელოდონ ტერორისტული ჯგუფების მიერ მომზადებულ სიურპრიზებს, როდესაც ისინი შევლენ ღაზას სექტორში მოახლოებული სახმელეთო შეტევის დროს.

„ჩვენ შევალთ ღაზას სექტორში. ჩვენ დავიწყებთ ოპერატიულ და პროფესიონალურ მისიას „ჰამასის“ ინფრასტრუქტურის განადგურების მიზნით და გონებაში გვექნება ორი კვირის წინ შაბათის სურათები, სცენები და დაღუპულები. ღაზა რთულია, ღაზა მჭიდროა, მტერი ბევრ რაღაცას ამზადებს იქ, მაგრამ ჩვენც ვამზადებთ რაღაცებს მათთვის“, – აცხადება ჰალევი.

პალესტინელების ძალადობრივი ან შიდა გადასახლება ომის დანაშაული იქნება. როგორც Reuters-ი წერს, ამის შესახებ იორდანიის მეფემ ეგვიპტეში მიმდინარე სამშვიდობო სამიტზე სიტყვით გამოსვლისას განაცხადა.

ამასთან, აბდულა მეორე ღაზის სექტორში ომის დაუყოვნებლივ დასრულებისა და სწრაფი ჰუმანიტარული დახმარების მოწოდებით გამოვიდა.

მანამდე ეგვიპტემ და სხვა არაბულმა ქვეყნებმა არაერთხელ განაცხადეს, რომ პალესტინელი დევნილების მასობრივი გადინება სხვა ქვეყნებში მიუღებელი იქნებოდა.

ეგვიპტეში ისრაელსა და „ჰამასს“ შორის ომის შესახებ სამშვიდობო სამიტი მიმდინარეობს, რომელსაც მსოფლიოს 20-ზე მეტი სახელმწიფოს ლიდერი ესწრება.

მოსკოვის წითელი მოედანი გადაკეტილია, ტერიტორიაზე უშიშროების ძალებისა და ეროვნული გვარდის წარმომადგენლები იმყოფებიან – ინფორმაციას რუსული მედია ავრცელებს.

ვრცელდება ინფორმაცია, რომ მოძრაობა გადაკეტილია ვასილიევსკის სპუსკის მოედანზეც.

„ტერიტორია შემოღობილია რკინის ღობეებით“, – წერს მედია

ისრაელ-„ჰამასის“ ომის გამო, ღაზის სექტორში დაახლოებით 1,4 მილიონი ადამიანი იძულებული გახდა სახლები დაეტოვებინა. როგორც BBC წერს, ამის შესახებ გაეროს ჰუმანიტარული საკითხების კოორდინაციის სამმართველოში განაცხადეს.

ეს ანკლავის მოსახლეობის დიდი ნაწილია, რადგან იქ სულ დაახლოებით 2 მილიონი ადამიანი ცხოვრობს. პალესტინის ჯანდაცვის სამინისტროს ბოლო მონაცემებით, ღაზაში გარდაცვლილთა რაოდენობამ 4 300-ს გადააჭარბა.