მივიღეთ გადაწყვეტილება, „ნაციონალური მოძრაობის“, პროდასავლური პატიების პლატფორმაზე გაკეთდეს გამარჯვების პლატფორმა. „სტრატეგია აღმაშენებელთან“ ერთად გვექნება საერთო სტრატეგია, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა გიორგი ვაშაძესთან ერთად განაცხადა.

მისივე თქმით, გააგრძელებენ ბრძოლას ერთიანი საქართველოსთვის.

„უკრაინაში შეჭრის შემდეგ მთელ მსოფლიოს მოუწია კონკრეტული გადაწყვეტილების მიღება. ცივილიზებული სამყარო დადგა ისტორიულ გზაგასაყარზე. შესაბამისად, ძალიან მარტივი არჩევანი გააკეთა ყველამ მშვიდობასა და ბოროტებას შორის, ტერორიზმსა და მშვიდობას შორის, პუტინის ტერორისტულ ზრახვებსა და უკრაინის ტერიტორიულ მთლიანობას შორის. ყველამ კარგად ვიცით, რომ ტერორისტი პუტინი ემუქრება არა მარტო უკრაინას, არამედ მშვიდობას ცივილიზებულ სამყაროში. შესაბამისად, ეს დილემა დადგა საქართველოშიც. სამწუხაროდ, ამას იმიტომ ვამბობ, რომ საქართველოს ჰყავს „რუსული პარტია“ და ამ ომის დაწყებისთანავე გაჩნდა კითხვა – ვის მხარეს დაიჭერს პუტინის კარის ოლიგარქი, ვგულისხმობ ივანიშვილს. სამწუხარო რეალობა აღმოჩნდა ისიც, რომ პუტინის კარის ოლიგარქმა აირჩია კონკრეტული მხარე და ესაა პუტინის რუსეთი. მან მთელ სახელმწიფოს განუსაზღვრა ეს კურსი. ქართველ ხალხს უკვე პირდაპირ, ღიად განუცხადეს, რომ საქართველო ადგას პუტინიზაციის, რუსეთიზაციის გზას და შესაბამის გადაწყვეტილებებსაც იღებენ, დაწყებული რუსული კანონით, გაგრძელებული ლავროვის და მათი ოჯახის წევრების მასპინძლობით, ფრენების აღდგენით. საქართველო, როგორც „შავი ხვრელი“, ბიძინა ივანიშვილმა შესთავაზა პუტინს. შესაბამისად, საქართველოშიც დადგა აბსოლუტურად სხვა პოლიტიკური რეალობა და პროდასავლურ ფლანგზე, ვგულისხმობ ოპოზიციას, კონკრეტული ნაბიჯები, ქმედითი ნაბიჯები გახდა საჭირო. რუსული ხელისუფლების, ეკონომიკური სიდუხჭირის, სოციალური პრობლემების პირობებში საზოგადოების, ხალხის დაკვეთა არის ერთობა. აბსოლუტურად ყველა კვლევაში, საზოგადოებრივი აზრის გამოკითხვაში, ყველა შეხვედრაზე ქალაქებში, მუნიციპალიტეტებში, სოფლებში, უბნებში ხალხი ერთ რამეს საუბრობს – რუსულ პარტიას დაამარცხებთ მხოლოდ ერთობითო. „ნაციონალური მოძრაობა“ არის ყველაზე დიდი ევროპული პარტია და ჩვენ, ცხადია, მივიღეთ კონკრეტული გადაწყვეტილება, რომ „ნაციონალური მოძრაობის“, პროდასავლური პარტიების პლატფორმაზე გაკეთდეს გამარჯვების პლატფორმა.

კონკრეტული კონსულტაციების შემდეგ მივაღწიეთ შეთანხმებას პარტიასთან, რომელიც ყველა გამოკითხვით, კვლევით ასევე ყველაზე დიდი პარტიაა პროდასავლურ პარტიებს შორის. ვგულისხმობ „სტრატეგია აღმაშენებელს“. შესაბამისად, დღეიდან, ხალხის დაკვეთით, „სტრატეგია აღმაშენებელთან“ ერთად გვექნება საერთო სტრატეგია რუსული პარტიის, ივანიშვილის დამარცხების. ჩვენ ასევე ვაპირებთ ყველაზე დიდი კოალიციის გაკეთებას ხალხთან. მინდა, მადლობა გადავუხადო „სტრატეგია აღამაშენებელს“ და მისი გუნდის თითოეულ წევრს. ცხადია, მიხეილ სააკაშვილის პასუხისმგებლიანი პარტია სხვანაირად ვერ მოიქცეოდა. ჩვენ გადავდგით კონკრეტული ნაბიჯი და გავაგრძელებთ ბრძოლას თავისუფალი, ერთიანი საქართველოსთვის“, – განაცხადა ლევან ხაბეიშვილმა.

დავუშვათ და ჰქონდა პოლონელ ექიმს ფეხსაცმელში თმა, რა ვიცით, სააკაშვილის თმა რომაა, იქნება ბებიამისის თმაა?! – ამის შესახებ საქართველოს მესამე პრეზიდენტის ადვოკატმა, შალვა ხაჭაპურიძემ „პალიტრანიუსის“ გადაცემა „რეზიუმეში“ განაცხადა, რითაც “ვივამედში” მომხდარ ინციდენტს გამოეხმაურა.

„მიხვდნენ პოლონელი ექიმები რა დასკვნასაც დადებდნენ, სააკაშვილს რომ შეხედავ რა მდგომარეობაშია, გასაგებია, რა დასკვნასაც დადებენ, ეს დასკვნა რომ რამენაირად გააბათილონ და ფასი დაუკარგონ, ამიტომ აკეთებენ ამ განცხადებებს, რომ ჩვენ აწი აღარ შევუშვებთ, აღარ შევამოწმებინებთ და ეს დასკვნა უკვე ყალბია. რატომ არის ყალბი? დავუშვათ და ჰქონდა იმ კაცს ფეხსაცმელში თმა, რა ვიცი სააკაშვილის თმა რომაა, იქნება ბებიამისის თმაა, ამ კაცის ბებიის. საიდან ვიცით, რა მტკიცებულებებით?

არეულია აბსოლუტურად ყველაფერი. შეუძლებელია ამას სერიოზული სამართლებრივი შეფასება მისცე. მე პირადად ერთადერთი შემიძლია ვთქვა, რომ ჩვენთვის ეს ყველაფერი დამაჯერებელი არ არის.“, – განაცხადა შალვა ხაჭაპურიძემ.

სპეციალურმა პენიტენციურმა სამსახურმა 14 ივლისს მიხეილ სააკაშვილთან პოლონელი ექიმების ვიზიტის შესახებ განცხადება გაავრცელა, სადაც აღნიშნულია, რომ მსჯავრდებულ სააკაშვილისგან აღებული ნიმუში ერთ-ერთმა პოლონელმა ექიმმა ქაღალდში გადაახვია და ფეხსაცმლის მეშვეობით ცდილობდა მის მალულად გატანას.

პენიტენციურმა სამსახურმა ინციდენტის ამსახველი კადრებიც გაავრცელა.

არსებობს რევოლუციური კომიტეტი და ეს ადამიანები კვიპროსში ჩავიდნენ, რომ კეზერაშვილს თავიანთი მოსაზრებები უთხრან, რამდენად კარგები არიან რევოლუციურ კომიტეტში, – ამის შესახებ საქართველოს პარლამენტის ვიცე-სპიკერმა, გია ვოლსკიმ განაცხადა.

გია ვოლსკის კითხვა დაუსვეს გავრცელებულ ინფორმაციაზე, რომლის მიხედვითაც, ელენე ხოშტარია, გიგი უგულავა და გოკა გაბაშვილი კეზერაშვილთან შესახვედრად კვიპროსზე გაემგზავრნენ.

როგორც გია ვოლსკიმ აღნიშნა, მათი მიზანია კეზერაშვილის სქემაში ჩაერთონ და თავისი თავი წარმოაჩინონ პოლიტიკურ ლიდერებად.

„უგულავასა და გაბაშვილს რა კონფიგურაცია აქვთ, ვერ გეტყვით, რადგან დიდი ხანია, არ მინახავს, მაგრამ ელენე ხოშტარიას რეიტინგი მაღალი არ არის და ალბათ კვიპროსში თავის მოსაწონებლად ჩავიდნენ, რათა იმ სქემიდან არ ამოვარდნენ, რომელსაც კეზერაშვილი აფინანსებს. მათი მიზანია, ამ სქემაში ჩაერთონ და თავისი თავი წარმოაჩინონ იმ პოლიტიკურ ლიდერებად, რაც რევოლუციურ კომიტეტს სჭირდება და გაერთიანებულია ხაბეიშვილის გარშემო. არსებობს რევოლუციური კომიტეტი და ეს ადამიანები კვიპროსში ჩავიდნენ, რომ კეზერაშვილს თავიანთი მოსაზრებები უთხრან, რამდენად კარგები არიან რევოლუციურ კომიტეტში. არ მგონია, მათ მოგზაურობას სხვა დანიშნულება ჰქონდეს – ისინი სალაროში ჩავიდნენ, შეყვეს თავი და ეუბნებიან, რომ მათაც აქვთ გარკვეული პრეტენზიები, დაფინანსება ჰქონდეთ, კონკრეტული საქმიანობისთვის. გვახსოვს, ხოშტარია როგორ ახტებოდა მანქანებს. მაშინ, შეიძლება, რუსეთიდან მომდინარე დაფინანსება საკმარისი იყო, ახლა კი დამატება უნდა. სექტა მასაც გააჩნია. თავის დროზე გაბაშვილი და უგულავა სააკაშვილს ჯართში გადაგდებულს ეძახდნენ, მათ რა ამოცანა და რა როლი აქვთ, არ ვიცი, მაგრამ მათაც უნდათ, იმავე სალაროს ფანჯარაში თავის შეყოფა. ეს ფანჯარა რამდენად ფართოა, ამაზე პასუხი არ მაქვს“, – განაცხადა ვოლსკიმ.

მოსალოდნელია, რომ ამ გაერთიანების შედეგად დიდი პრობლემები უფრო გაუჩნდეთ, – ასე აფასებს პარლამენტის ადამიანის უფლებათა დაცვის კომიტეტის თავმჯდომარე, მიხეილ სარჯველაძე „ნაციონალური მოძრაობისა“ და „სტრატეგია აღმაშენებლის“ გაერთიანებას.

„მეჩვენება, რომ შეცდომაა, როდესაც ამ გაერთიანებას გამარჯვების პლატფორმას არქმევენ. ორი მიზეზითაა შეცდომა : პირველი – ახალი ენერგიაო და ამას მარკეტინგულად ბრენდავენ. ყველა კარგად უნდა ხვდებოდეს, რომ ამით საზოგადოებაში აჩენენ იმის განცდას, რომ ამ დრომდე რაც იყო, ის იყო ცუდი და ახლა ამ ცუდის მკეთებლებისგან მიღებული დაპირება საზოგადოებისთვის, რომ ამიერიდან სუპერ ენერგიული და გადასარევი გავხდებიო, რასაკვირველია დამაჯერებელი არ არის და მეორე, რაც მნიშვნელოვანია – გამარჯვების რა გითხრათ – „ღატაკი და ქილა ერბოსავით“ არ გამოუვიდეთ ეს ყველაფერი. გამარჯვებაზე დიდ განაცხადებს აკეთებენ და მერე შეიძლება ეს ყველაფერი უკუღმა აღმოჩნდეს“, – აღნიშნა მიხეილ სარჯველაძემ „ქრონიკაში“ საუბრისას.

„სტრატეგია აღმაშენებელი“ და „ნაცმოძრაობა“ დიალოგის რეჟიმში რჩებიან და „გამარჯვების პლატფორმის“ შესახებ ინფორმაციას საზოგადოებას სავარაუდოდ კვირის ბოლოს მიაწვდიან.

საბედნიეროდ, მათი მავნებლური საქმიანობის მოსალოდნელი ზიანი ალბათ მინიმიზებული იქნება, რადგან მოხერხდა და სწრაფ გამოირკვა, ვინ რას აკეთებდა და რას „ჩალიჩობდა“, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძემ „ქრონიკაში“ FARA-ს მიერ გასაჯაროებულ დოკუმენტებზე საუბრისას განაცხადა.

„მაგრამ იქნება შემთხვევები, სადაც ეს ვერ გაირკვევა. რეალურად ჩვენი ოპონენტები დაკავებულები არიან მავნებლური საქმიანობით. ეს არის ხალხი, რომელიც კადრულობს იმას, რაც არც ერთ შემთხვევაში არავისთვის საკადრისი არ უნდა იყოს. ჩემთვის წითელი ხაზია ის, როცა პოლიტიკოსი კადრულობს საკუთარ ქვეყანას ავნოს მარტო იმიტომ, რომ ეს გააფორმოს, როგორც ხელისუფლების შეცდომა. ანუ, ქვეყანა უკან წავიდეს მარტო იმიტომ, რომ თვითონ წინ წავიდეს პოლიტიკაში“, – განაცხადა სარჯველაძემ.

აშშ-ის იუსტიციის დეპარტამენტის ვებგვერდზე გიული ალასანიასა და მიხეილ სააკაშვილის მიერ დაქირავებული ლობისტური კომპანიის აქტივობების შესახებ ახალი ინფორმაცია გამოქვეყნდა.

ფულის გადახდა საქართველოს დასანქცირების სტრატეგიის შემუშავების მიზნით არის უკიდეგანო ბოროტება ჩვენი ქვეყნის მიმართ, – ამის შესახებ იუსტიციის მინისტრი, რატი ბრეგაძე სოციალურ ქსელში წერს.

მისივე თქმით, „ნაციონალური მოძრაობა“ საქართველოს უკეთესი მომავლის წინააღმდეგ მებრძოლ რეინკარნირებულ ბოლშევიკთა გაერთიანებაა.

„ერთ-ერთი ამონარიდი სააკაშვილის მიერ ლობისტური კომპანიებისთვის გადახდილი თანხების დანიშნულებიდან:
Strategy on persuading U.S. Senators to pursue sanctions against the Republic of Georgia – „ამერიკელი სენატორების დარწმუნების სტრატეგია საქართველოს რესპუბლიკის წინააღმდეგ სანქციების გატარებაში”.

ფულის გადახდა საქართველოს დასანქცირების სტრატეგიის შემუშავების მიზნით არის უკიდეგანო ბოროტება ჩვენი ქვეყნის მიმართ. ამაზრზენად მავნებლური ქმედება განახორციელა ჩვენი სამშობლოს ინტერესების წინააღმდეგ მოქმედმა “ერთიანმა ბოლშევიკურმა მოძრაობამ”. ძალაუფლების მოპოვების მანიაკური წყურვილით შეპყრობილმა პოლიტიკურმა კერპთაყვანისმცემლებმა მკაფიოდ აჩვენეს ჩვენს ძვირფას ხალხს თუ რაზე არიან წამსვლელი საკუთარი ავხორცი ვნებების დასაკმაყოფილებლად. ნაციონალური მოძრაობა საქართველოს უკეთესი მომავლის წინააღმდეგ მებრძოლ რეინკარნირებულ ბოლშევიკთა გაერთიანებაა. საქართველო გაიმარჯვებს“, – წერს ბრეგაძე.

აშშ-ის იუსტიციის დეპარტამენტის ვებგვერდზე გიული ალასანიასა და მიხეილ სააკაშვილის მიერ დაქირავებული ლობისტური კომპანიის აქტივობების შესახებ ახალი ინფორმაცია გამოქვეყნდა.

იმ პოლიტიკურ ძალას რა ვუთხარი, ვაშაძის გადასარჩენი რომ გახდება, მაგრამ ეს კარგია. ვაშაძე ყველას კარგად ახსოვს – შემოვიდა პარლამენტში 4 ადამიანით და ახლა დარჩნენ ორნი, – ამის შესახებ „ხალხის ძალის“ ერთ-ერთმა ლიდერმა, გურამ მაჭარაშვილმა განაცხადა.

„ადამიანი, რომელსაც ოპოზიციურ მიტინგზე ხალხმა მიკროფონი წაართვა და აქციებზე დარბოდნენ, სადაა, ვაშაძე გამოვიდესო, ასეთ პოლიტიკოსს ნიშნავენ პლატფორმის ლიდერად. იმ პოლიტიკურ ძალას რა ვუთხარი, ვაშაძის გადასარჩენი რომ გახდება, მაგრამ ეს კარგია. ვაშაძე ყველას კარგად ახსოვს – შემოვიდა პარლამენტში 4 ადამიანით და ახლა დარჩნენ ორნი.

რაც უფრო მეტი ძველი სახე წარმოჩინდება „ნაციონალურ მოძრაობაში“, მით უფრო კარგად იქნება საქმე 2024 წელს. საზოგადოება კიდევ ერთხელ გაიხსენებს, რომ უარესს უქადიან საქართველოს, ვიდრე 2012 წლამდე იყვნენ“, – განაცხადა მაჭარაშვილმა.

„სტრატეგია აღმაშენებელსა“ და „ერთიან ნაციონალურ მოძრაობას“ შორის კონსულტაციები დასრულდა. პოლიტიკური გაერთიანების შესახებ ერთობლივ განცხადებას პარტიები დღეს გააკეთებენ. „ნაციონალური მოძრაობის“ თავმჯდომარე გაერთიანებისკენ სხვა ოპოზიციურ პარტიებსაც მოუწოდებს.