ევროპაში ჩვენ ვდგავართ ჩვენს სამეზობლოში საშინელი ომის წინაშე, მინდა, მადლობა გადავუხადო თქვენი ქვეყნის მოქალაქეებს, რომლებიც სოლიდარობას გამოხატავენ უკრაინელებისადმი არა მხოლოდ სიტყვით, არამედ ყოველდღიური საქმით, მადლობა, ეს არის აღსანიშნავი და შესანიშნავია, – ამის შესახებ გერმანიის პარლამენტის საგარეო საქმეთა კომიტეტის თავმჯდომარემ, მიხაელ როტმა განაცხადა.

როგორც მიხაელ როტმა თბილისში გამართული პრესკონფერენციისას განაცხადა, „საქართველო არის ქვეყანა, რომელიც ევროპის გულს ეკუთვნის“.

„თქვენ ხართ ევროპაში მრავალი ქვეყნისთვის მაგალითი, რადგან უკრაინელ ხალხს სჭირდება ჩვენი სოლიდარობა, ჩვენი ფინანსური, ეკონომიკური პოლიტიკური და ასევე სამხედრო მხარდაჭერა. საქართველო არის ქვეყანა, რომელიც ევროპის გულს ეკუთვნის. მე აქ ვარ იმისთვის, რომ თქვენს ხალხს გადავცე მკაფიო გზავნილი – ევროკავშირის კარი ღიაა. გასულ წელს, ივნისში იყო ყველა ჩვენგანისთვის გარდამტეხი მომენტი. პირველად ევროკავშირის ისტორიაში ევროკავშირმა გადაწყვიტა, გაუღოს თავისი კარი აღმოსავლეთ ევროპას. ევროკავშირმა გადაწყვიტა კანდიდატის სტატუსის მინიჭება მოლდოვისa და უკრაინისთვის. მე, ზოგადად, მხარს ვუჭერ კანდიდატის სტატუსის მინიჭებას საქართველოსთვის, თუმცა ჯერ ბევრია გასაკეთებელი. ჩემთვის უკიდურესად შთამბეჭდავია, რომ ქართველების აბსოლუტური უმრავლესობა ძლიერ უჭერს მხარს ევროკავშირს, ევროკავშირში გაწევრიანება არის თქვენს ქვეყანაში ბევრი ადამიანისთვის ნამდვილი ოცნება. ეს არ არის მხოლოდ ვალდებულება თქვენს ქვეყანაში პოლიტიკოსებისთვის, თუმცა ეს ასევე არის ვალდებულება ჩვენთვის, ევროკავშირში, რომ გავაკეთოთ მაქსიმუმი თქვენ დასახმარებლად, თუმცა არის გარკვეული შეშფოთებები, რომელთა თქვენთან გაზიარებაც მსურს“, – განაცხადა მიხაელ როტმა.

გერმანიის პარლამენტის საგარეო საქმეთა კომიტეტის თავმჯდომარის განცხადებით, საქართველომ კანდიდატის სტატუსის მისაღებად რეკომენდაციების შესრულება უნდა განაგრძოს.

„ბოლო რამდენიმე თვის განმავლობაში ჩვენ მივიღეთ რამდენიმე უცნაური გზავნილი თბილისისგან და მე არ ვარ მთლად დარწმუნებული, რომ ჩემ მიერ მიღებული ეს სიგნალები სრულად შეესაბამება ქართველი ხალხის სურვილს, გაწევრიანდნენ ევროკავშირში. ჩემთვის სრულად მისაღებია თქვენს ქვეყანაში არსებული მოლოდინებები, რომ ევროკავშირმა უნდა აიღოს თავის პასუხისმგებლობა. თუმცა, ასევე ველოდები თქვენი მთავრობისგან, თქვენი პარლამენტისგან სამუშაოს შესრულებას. ევროკავშირმა თბილისს გადასცა 12 რეკომენდაცია. ვფიქრობ, ახლა არის გადამწყვეტი დრო ამ 12 საკითხის შესასრულებლად და ეს არ არის ძალიან რთული. ერთ-ერთი ყველაზე სადავო საკითხი არა მხოლოდ თქვენს ქვეყანაში, არამედ ევროკავშირშიც, იყო ე.წ. უცხოური აგენტების შესახებ კანონი. მე ვერ გავიგე, რატომ წარადგინეს თქვენს ქვეყანაში პოლიტიკოსებმა ასეთი კანონპროექტი, ის ძალიან რუსულად გამოიყურება. ევროკავშირი არ არის უბრალოდ ერთიანი ბაზარი, ეკონომიკური პროექტი, ჩვენ უპირველესად და უმთავრესად ვართ საერთო ღირებულებების კავშირი, ეს არის სამოქალაქო საზოგადოება. სწორედ ამიტომ, მინდა, მოვუწოდო ჩემს პატივცემულ კოლეგებს აქ თბილისში, სამოქალაქო საზოგადოება განიხილონ არა მტრებად, ისინი არიან პარტნიორები და მოკავშირეები. თუ მათ სურთ ევროკავშირში რაც შეიძლება მალე გაწევრიანება, თქვენ გჭირდებათ სამოქალაქო საზოგადოება, მათ შორის მისი კრიტიკული ნაწილი“, – განაცხადა მიხაელ როტმა.

მიხაელ როტის თქმით, ევროპამ გააღო კარი საქართველოსთვის და ახლა დროა, საქართველომ შეასრულოს დავალებები.

„მე შეხვდი ზოგიერთ პოლიტიკოსს თქვენს ქვეყანაში და მათ თქვეს, თქვენ უნდა გაითვალისწინოთ, რომ ეკლესია და ჩვენი კულტურა არის ცოტა კრიტიკული ლგბტ უფლებების მიმართ. ჩემი გზავნილი იყო, რომ მე პატივს ვცემ თქვენ ტრადიციებს, პატივს ვცემ თქვენ კულტურას, თუმცა მე არ ვცემ პატივს, არ ვარ ტოლერანტული საქართველოს პოლიტიკური ლიდერების ჰომოფობიური განცხადებების მიმართ. პოლიტიკოსებს ეკისრებათ განსაკუთრებული პასუხისმგებლობები. ლგბტ უფლებები კი ადამიანის უფლებებია, ადამიანის უფლებები კი ევროპული იდეის ერთ-ერთი წამყვანი პრინციპია. ასე რომ, გთხოვთ, დააცხრეთ ემოციები, გთხოვთ, შეწყვიტეთ სტერეოტიპები და კლიშეები, როდესაც საქმე ეხება ეთნიკურ, რელიგიურ, კულტურულ და ასევე სექსუალურ უმცირესობებs. არ მესმის, რატომ შექმენით გაუგებრობის ასეთი სტრატეგია. სწორედ ახლა არის დრო, რომ გაუგზავნოთ მკაფიო გზავნილი ბრიუსელს – ჩვენ ველოდებით რაღაცას თქვენგანაც, თუმცა ჩვენ მზად ვართ შევასრულოთ ჩვენი ვალდებულებები, ჩვენი სამუშაო. ვფიქრობ, ეს არ არის ძალიან მარტივი. მე ძალიან დიდი იმედი მაქვს, რომ მომავალი რამდენიმე თვის განმავლობაში არის რეალური შანსი უფრო მეტის გაკეთების დეოლიგარქიზაციასთან, სამოქალაქო საზოგადოების როლის გაძლიერებასთან, სხვა აუცილებელი რეფორმების გატარებასთან დაკავშირებით. არავის სურს, საქართველოს ასწავლოს, თუმცა ვფიქრობ, თქვენს ქვეყანაში ხალხის ხმა ისმის საკმაოდ ხშირად და ეს ხმა არის ძალიან მკაფიო, გულწრფელი, ემოციური – გთხოვთ, გააღეთ კარი. ჩვენ უკვე გავაღეთ კარი, ახლა მოქმედების და საშინაო სამუშაო შესრულების დროა ორივე მხრიდან – ბრიუსელის და თბილისის. ტრადიციულად, გერმანიას სურს, შეასრულოს პატიოსანი შუამავლის როლი, ჩვენ ხიდების შენება გვინდა, რომელიც მისაღები და კომფორტულია არა მხოლოდ პოლიტიკოსებისთვის, არამედ ასევე მისაღები და კომფორტულია მოქალაქეებისთვის, სამოქალაქო საზოგადოებისთვის და სწორედ ამიტომ ვარ აქ“, – განაცხადა მიხაელ როტმა.

რამდენჯერ უნდა უთხრას უარი ქართველმა ხალხმა „ნაციონალურ მოძრაობას“, მგონი, უკვე ცხრა თუ ათი არჩევნები იყო, რომელზეც ქართველმა ხალხმა ცხადი უარი უთხრა „ნაციონალურ მოძრაობას“, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისი თქმით, „ნაციონალურ მოძრაობას“ საქართველოს მოსახლეობა მხარს არ დაუჭერს.

„არაფერი „ნაციონალური მოძრაობიდან“ არ გამოვა, გამომდინარე იმ ფილოსოფიიდან, რაზეც არის დაყრდნობილი „ნაციონალური მოძრაობა“. ვიდრე ისინი არ გააცნობიერებენ საკუთარ დანაშაულს, ვიდრე, მათ შორის, მიხეილ სააკაშვილს არ მოუწოდებენ, რომ საკუთარი დანაშაულისთვის პასუხი უნდა აგოს და შეეგუოს ამ საკითხს, ვიდრე ისინი არ ჩამოიცილებენ იმ ადამიანებს, რომლებიც ამ დანაშაულებრივი სისტემის შემოქმედნი არიან, ვგულისხმობ, მიხეილ სააკაშვილს, ზურაბ ადეიშვილს და სხვებს, რომლებმაც ის დანაშაულებრივი სისტემა შექმნეს, რომელიც ადამიანის ღირსების აყრაზე იყო დაფუძნებული, მანამდე „ნაციონალურ მოძრაობას“ არ აქვს შანსი, რომ ქართველმა ხალხმა მას მისცეს ხელისუფლების მანდატი“, – განაცხადა პაპუაშვილმა.

„ნაციონალური მოძრაობის“ თავმჯდომარემ, ლევან ხაბეიშვილმა განაცხადა: „ჩვენთან უნდა ისაუბროს ყველამ, მოვიდნენ და თუ უნდათ, მივეხმარებით, რომ 5-7 პროცენტი მიიღონ, რათა ხვალ, ზეგ იყოს კოალიციური მთავრობა“.

უნიკალური შემთხვევა არის ელენე ხოშტარია, რომელიც ფინანსდება რუსული, არარუსული წყაროებიდან, პიროვნული ტრაგედიაა, რომ ქართულ პოლიტიკაში ჩამოყალიბდა ექსტრემისტ პოლიტიკოსად, რომელიც სხვადასხვა ქვეყნისგან ფინანსდება, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.

პაპუაშვილს ჟურნალისტებმა კითხვა დაუსვეს მედიით გავრცელებულ ინფორმაციაზე, რომლის მიხედვითაც, „ელენე ხოშტარიას ოჯახს რუსეთიდან 22 მაისს 2.5 მილიონზე მეტი რუსული რუბლი ჩაერიცხა“.

პარლამენტის თავმჯდომარის თქმით, ქართულ პოლიტიკაში ხოშტარიას როლია სიყალბის გავრცელება და ექსტრემიზმი.

„მის მიმართ ნდობა ხალხში რა თქმა უნდა, არ არსებობს. ერთადერთი რაც მას აქვს, ეს არის ის, რომ ისტერია მოაწყოს სხვადასხვა საკითხთან დაკავშირებით. კიდევ ერთხელ, სულ მცირე ალბათ 10-მდე ბრიფინგი აქვს ჩატარებული, სადაც საქართველოს აბრალებდა, რომ აქ სანქციების გვერდის ავლა ხდებოდა. ტყუილს თხზავდა პირდაპირ ეთერში საქართველოს წინააღმდეგ და შესაბამისად, ეს არის მისი ფუნქცია, სხვა არაფერი, გარდა იმისა, რომ სიყალბე, დეზინფორმაცია შემოიტანოს ქართულ პოლიტიკაში. ის სხვადასხვა წყაროდან ფინანსდება უცხოეთიდან, სხვადასხვა ქვეყნიდან. პირდაპირ, ყველა მისი განცხადება დაფინანსებულია უცხოეთიდან“, – განაცხადა შალვა პაპუაშვილმა.