რეალურად წინა არჩევნებზე ბარიერის დაწევას არანაირი პოზიტივი არ მოუტანია, – ამის შესახებ „ხალხის ძალის“ ერთ-ერთმა ლიდერმა გურამ მაჭარაშვილმა განაცხადა.

მისი თქმით, პრაქტიკულად ნულოვანი იყო ბარიერი, როდესაც 14 პოლიტიკური პარტია შევიდა პარლამენტში, მაგრამ ჯერ არ შედიოდნენ, მერე კი ერთმანეთს ასწრებდნენ პარლამენტიდან გასვლას.

„პრაქტიკულად ნულოვანი იყო ბარიერი, როდესაც 14 პოლიტიკური პარტია შემოვიდა პარლამენტში. ჯერ არ შემოდიოდნენ, მერე რომ შემოვიდნენ ერთმანეთს ასწრებდნენ პარლამენტიდან გასვლას. ვინც დარჩა ისინი ერთმანეთს ეჩხუბებოდნენ. ამიტომაც, რეალურად წინა არჩევნებზე ბარიერის დაწევას არანაირი პოზიტივი არ მოუტანია“, – აღნიშნა გურამ მაჭარაშვილმა.

მოქმედი კონსტიტუციით, 2024 წლის საპარლამენტო არჩევნები პროპორციული სისტემითა და 5%-იანი ბარიერით ჩატარდება.

მიმდინარე სასესიო კვირას, 17 ნოემბერს პარლამენტი „მინისტრის საათის“ ფორმატში იუსტიციის მინისტრს, რატი ბრეგაძეს მოუსმენს. ამის შესახებ პარლამენტის თავმჯდომარემ, შალვა პაპუაშვილმა ბიუროს სხდომაზე განაცხადა.

პარლამენტი მიმდინარე სასესიო კვირას 2024 წლის სახელმწიფო ბიუჯეტის გადამუშავებულ ვარიანტზე იმსჯელებს. ასევე დაჩქარებული წესით განიხილავს „მაუწყებლობის შესახებ“ საქართველოს კანონში შესატან ცვლილებას.

ბიუროს სხდომაზე ახალი საკანონმდებლო ინიციატივები განიხილეს და სავალდებულო და წამყვანი კომიტეტები განსაზღვრეს.

ბიუროს გადაწყვეტილებით, საპარლამენტო ოპოზიციის მიერ შემუშავებული რეზოლუციის პროექტი „რუსეთის ფედერაციის საოკუპაციო რეჟიმის მიერ ოკუპირებულ რეგიონებში ადამიანის უფლებათა უხეში დარღვევისა და მათზე ეფექტური რეაგირების შესახებ“ ადამიანის უფლებათა დაცვისა და სამოქალაქო ინტეგრაციის კომიტეტს გადაეცემა განსახილველად.

ბიურომ საორგანიზაციო საკითხებიც განიხილა.

ევროოპტიმისტების” წევრის რომან გოცირიძის განცხადებით, მომავალი არჩევნების სამართლიანად და დემოკრატიულად ჩასატარებლად აუცილებელია საკონსტიტუციო ცვლილებების მიღება, რომელიც თაროზეა შემოდებული.

მისი თქმით, ავსტრიის პარლამენტის ფედერალური საბჭოს პრეზიდენტთან შეხვედრაზე, რომელიც პარლამენტში გაიმართა, ავსტრიულმა მხარემ სამი მნიშვნელოვანი საკითხი გამოყო, რა მიმართულებითაც რეფორმები უნდა განხორციელდეს და ერთ – ერთი სწორედ არჩევნებს ეხება. გოცირიძის თქმით, თავად ბარიერის დაწევის აუცილებლობაზე ისაუბრა.

„მათი მხრიდან სამი მნიშვნელოვანი საკითხი იქნა გამოკვეთილი, რა უნდა გააკეთოს საქართველომ დაწესებული 9 ვალდებულების შესასრულებლად და აქედან სამი იყო გამოყოფილი, როგორც მთავარი საკითხი. ეს იყო საარჩევნო ცვლილებები და მომავალი არჩევნების დემოკრატიულად ჩატარება, სასამართლო რეფორმა და მედიის თავისუფლება. ჩემი მხრიდან დასმული იქნა საკითხი იმის თაობაზე, რომ 5 პროცენტიანი ბარიერი არ შეესაბამება არსებულ პოლიტიკურ ვითარებას და საზოგადოების განწყობილებას, უდიდესი ნაწილი ამომრჩევლებისა იქნება დაკარგული ამ წესით ჩატარებული არჩევნების შედეგად. ის, რომ მოატყუა თავის ამომრჩეველი, მოქალაქეები, ოპოზიცია, ევროკავშირი, როცა შარლ მიშელის პროცესი დაიწყო და პირველი მოსმენით მიღებული კონსტიტუცია, სადაც გათვალისწინებულია დაბალი ბარიერი და ბლოკების შესაძლებლობა, არის თაროზე შემოდებული. ამ კონსტიტუციური ცვლილებების მიღება არის აუცილებელი მომავალი არჩევნების სამართლიანად და დემოკრატიულად ჩატარებისთვის“, – განაცხადა გოცირიძემ.

თავდაცვისა და უშიშროების კომიტეტში თავდაცვის სფეროში ნატო-საქართველოს შორის თანამშრომლობის საკითხებზე, თავდაცვის მინისტრის პირველ მოადგილეს, ლელა ჩიქოვანს მოუსმინეს. საკითხის მნიშვნელობიდან გამომდინარე მოსმენა დახურულ ფორმატში წარიმართა, – ამის შესახებ ინფორმაციას პარლამენტის პრესსამსახური ავრცელებს.

მათივე ინფორმაციით, შეხვედრაზე ნატო-ს სამხედრო კომიტეტის საქართველოში ვიზიტის თაობაზე და ჩრდილოატლანტიკურ ალიანსსა და საქართველოს ურთიერთობებზე დეპუტატებმა დეტალური ინფორმაცია მოისმინეს.

„თავდაცვის სფეროში ნატო-საქართველოს თანამშრომლობის საკითხი განსაკუთრებით აქტუალურია საქართველოში ნატო-ს სამხედრო კომიტეტის მეხუთე ვიზიტის შემდეგ. შეხვედრაზე ძალიან მნიშვნელოვანი დეტალები განვიხილეთ და თავდაცვის სფეროში ნატო-საქართველოს თანამშრომლობის აბსოლუტურად ყველა საკითხი დავფარეთ. მინისტრის პირველი მოადგილის მხრიდან დეპუტატების შეკითხვებს ამომწურავი პასუხები გაეცა. უნდა აღინიშნოს, რომ ნატო-საქართველოს თანამშრომლობა დღეს უპრეცედენტოდ მაღალ ნიშნულზეა და განსაკუთრებით ეს თავდაცვის სფეროს შეეხება. კანონმდებლების მხრიდან, თავდაცვის უწყებას და ნატო-საქართველოს თანამშრომლობას, მის განმტკიცებას ყოველთვის მაქსიმალური მხარდაჭერა ექნება“, – განაცხადა კომიტეტის თავმჯდომარემ ირაკლი ბერაიამ.

თავდაცვის მინისტრის პირველი მოადგილის განცხადებით, კომიტეტის წევრებთან შეხვედრისას საუბარი შეეხო იმ სტატუს-კვოს, რაც ნატო-საქართველოს თავდაცვის თანამშრომლობის კუთხით არსებობს.

„აღნიშნულ თემებზე საუბრისას, ბოლო პერიოდში განვითარებულ მოვლენებს და დინამიკას შევეხეთ. დეპუტატებს სამინისტროს გამოცდილება გავუზიარეთ და იმ პერსპექტივებზე ვესაუბრეთ, რომლებიც თავდაცვის სფეროში ნატო-საქართველოს შორის თანამშრომლობას ახლავს“, – განაცხადა ლელა ჩიქოვანმა.

თავდაცვისა და უშიშროების კომიტეტში გამართულ შეხვედრას თავდაცვის მინისტრის მოადგილე, გრიგოლ გიორგაძე და სამინისტროს თანამშრომლების დაესწრნენ.

სამწუხაროდ, ოპოზიციას ბევრი რამ აქვს არეული, მათ შორის, კალენდარიც. ყველას კარგად ახსოვს, საარჩევნო ბარიერზე ნათქვამი იყო შარშან, 2022 წლის ივლისში და ეხებოდა 2022 წლის დეკემბერს. ახლა გვაქვს 2023 წელი. კალენდარში უნდა ჩაიხედონ, შარშანდელ თოვლს ნუ ეძებენ წლევანდელ დეკემბერში, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა იმ კითხვის პასუხად, რომლის თანახმადაც: „ოპოზიცია ბარიერის 2 პროცენტამდე დაწევას ითხოვს და იხსენებენ ირაკლი კობახიძის განცხადებას, კანდიდატის სტატუსს დეკემბერში თუ მოგვცემენ, არჩევნები 2-პროცენტიანი ბარიერით ჩატარდება“.

პაპუაშვილის თქმით, ეს ყველაფერი კიდევ ერთხელ აჩვენებს, რამდენად უსუსურია ოპოზიცია. შალვა პაპუაშვილი ამბობს, რომ საარჩევნო ბარიერის დაწევაზე ოპოზიციის მოთხოვნას არანაირი შინაარსი არ აქვს.

„მათ ჰქონდათ შანსი. „ქართულმა ოცნებამ“, მათ შორის, პატარა პარტიებს მისცა შანსი, ერთპროცენტიანი ბარიერით მოხვედრილიყვნენ პარლამენტში და გაძლიერებულიყვნენ, ეჩვენებინათ ამომრჩევლისთვის საკუთარი, ინდივიდუალური დღის წესრიგი, ამით გაეზარდათ მხარდაჭერა ან გამსხვილებულიყვნენ და ეძებნათ პარტნიორები სხვა პარტიებში, გაერთიანებულიყვნენ და აქედან გამომდინარე გასულიყვნენ შემდეგ 5-პროცენტიანი ბარიერით, რომელიც, უკვე წლებია, კონსტიტუციაში წერია. სამწუხაროდ, ნაცვლად იმისა, რომ გამოეყენებინათ ეს შესაძლებლობა, დღეს, ფაქტობრივად, გადასული არიან თხოვნაზე, იქნებ რამენაირად დაუწიონ ბარიერი, რომ კიდევ ერთხელ წახალისდეს მათი საქციელი. არანაირი შინაარსი ამ მოთხოვნას არ აქვს. 2024 წლის არჩევნები ოქტომბერში ჩანიშნულია, დიდი ხანია, ყველამ კარგად იცის, რომ ბარიერი არის 5%-იანი. მოემზადონ ამ არჩევნებისთვის და თან ისიც განგვიმარტონ, როგორ ეთანხმება ერთმანეთს, რომ, ერთი მხრივ, ამბობენ, რომ ისინი იგებენ, მოდიან ხელისუფლებაში და, მეორე მხრივ, რითი იგებენ, 3 პროცენტით აპირებენ ქვეყნის მართვას?“ – განაცხადა შალვა პაპუაშვილმა.

შალვა პაპუაშვილის განმარტებით, ვინ მოხვდება პარლამენტში, ეს დამოკიდებულია პარტიების აქტიურობაზე, ხალხის მხარდაჭერის მოპოვებაზე.

„„ქართული ოცნებისთვის“ არცერთი ბარიერი პრობლემა არ არის. შეგახსენებთ, რომ 2020 წელს ერთპროცენტიანი ბარიერით „ქართულმა ოცნებამ“ მოიპოვა უმრავლესობა და, სხვათა შორის, მაშინ რომ ყოფილიყო სრულად პროპორციული არჩევნები, მაინც უმრავლესობას მოიპოვებდა „ქართული ოცნება“ იმ 1%-იანი ბარიერით. პრობლემა არის ოპოზიციაში, რომ მათ, სინამდვილეში, არ სურთ, ხალხს დაანახონ საქმე, მათ სურთ, რომ იყვნენ პარლამენტის წევრები, ჰქონდეთ კაბინეტები და ა.შ. ატყობენ ხოლმე, რომ არ არიან იმ პირობებში, მიიღონ მხარდაჭერა და ცდილობენ, რაღაცნაირად დააწევინონ ბარიერი. არასერიოზულია, არ მინდა, დამაკნინებელი ტერმინები გამოვიყენო, მაგრამ როდესაც პარტია, ერთი მხრივ, ამბობს, რომ ქართველი ხალხის სახელით საუბრობს და შემდეგ აღმოჩნდება, თურმე 3%-ის იმედად არიან ეს პარტიები, უკვე აჩვენებს, რამდენად არასერიოზულია მათი საქციელი“, – განაცხადა შალვა პაპუაშვილმა.

შალვა პაპუაშვილის თქმით, 5 პროცენტი არის ადეკვატური ბარიერი, რომელიც არსებობს ბევრ ქვეყანაში და რომელიც საქართველოში კონსტიტუციაში, უკვე წლებია, წერია.

„ყველას მოვუწოდებ, გადაშალოს კალენდარი და დაფიქრდეს, რა განსხვავებაა 2022 წლის დეკემბერსა და 2023 წლის დეკემბერს შორის. ალბათ ამოიკითხავს პასუხს ამ მარტივ კითხვაზე. ყველა ამ საკითხთან დაკავშირებით ნათქვამი იყო მარტივი სიტყვა, რომ იმ შემთხვევაში, თუ 2022 წლის დეკემბერში იქნებოდა პოზიტიური გადაწყვეტილება – და ამას ხომ თავისი შინარსი ჰქონდა, აქ საკითხი იყო არა ბარიერზე, არამედ იმასთან დაკავშირებით, რომ პოზიტიური გადაწყვეტილება და კანდიდატის სტატუსი დაწევდა პოლარიზაციას – დაწეული პოლარიზაციის ფარგლებში შესაძლებელი იქნებოდა კიდევ ამაზე ფიქრი. საერთო ჯამში, ჩვენ ვნახეთ ჯანჯღარის ერთი დამატებითი წელი და მომავალ წელს რა მოგველის, შევხედოთ. მგონი, ოპოზიციას არაფერი ეტყობა, რომ ისინი მზად არიან, რადიკალური დღის წესრიგიდან გავიდნენ. 5 პროცენტი არის ადეკვატური ბარიერი, რომელიც არსებობს ბევრ ქვეყანაში და რომელიც საქართველოში, მათ შორის, კონსტიტუციაში, უკვე წლებია, წერია და მოწონებული არის საერთაშორისო დონეზეც. ვენეციის კომისიის დასკვნაც არსებობს ამასთან დაკავშირებით. ამიტომ ახლა მათხოვრობა იმაზე, რომ დაიწიოს ბარიერი, მგონი, შეუსაბამოა. პარტიებს თუ აქვთ პრეტენზია, რომ წარმოადგენენ ხალხს და უნდათ, ქვეყანა მართონ, იმის იმედიც უნდა ჰქონდეთ, რომ რამდენიმე ათას ხმას მიიღებენ. პრობლემები ეძებონ საკუთარ თავში. წინ კიდევ არის ერთი წელი, არის დრო, ნაცვლად იმისა, რომ ყოველ ჯერზე „ნაციონალური მოძრაობის“ ქოლგის ქვეშ იყვნენ, გამოიჩინონ ინდივიდუალობა, ნაცვლად იმისა, რომ გაემიჯნონ ერთმანეთს, გაერთიანდნენ“, – განაცხადა შალვა პაპუაშვილმა.