პარტია „ანა დოლიძე ხალხისთვის“ საკრებულოს დეპუტატი ნინო წულაძე დედაქალაქის მერს, კახა კალაძეს მიმართავს, არამიზნობრივი ხარჯები შეამციროს და თბილისის სკოლებში უფასო კვების პროგრამა დაიწყოს.

როგორც ნინო წულაძე აცხადებს, ბიუჯეტიდან მილიონობით ლარის გამოთავისუფლება შეიძლება, რომელიც, მისი თქმით, „არა პარტაქტივს და თბილისის მერის პიარს, არამედ, იმ ბავშვებს უნდა მოხმარდეს, რომლებიც სრულფასოვნად ვერ იკვებებიან“.

„ჩვენი პარტია დიდი ხანია ითხოვს, რომ ამ ეტაპზე თბილისში და შემდეგ უკვე რეგიონებშიც, დაიწყოს უფასო კვების პროგრამა ყველა სკოლაში. დედაქალაქის ბიუჯეტს თუ გადავხედავთ, 5 მილიონ ლარზე მეტი მხოლოდ კახი კალაძის პიარსამსახურზე იხარჯება. ჩვენ შეგვიძლია თანხის ნაწილი ასევე სსიპ-ებიდან და ააიპ-ებიდან გამოვათავისუფლოთ, სადაც არაერთი არამიზნობრივი პროგრამა ხორციელდება.

2022 წლის მონაცემებით, მაშინდელი სახალხო დამცველის განცხადებით, ბავშვთა სიღარიბე 28%-ით გაიზარდა წინა წელთან შედარებით, სოციალურად დაუცველი ოჯახების მონაცემთა ერთიან ბაზაში ჩარიცხული ბავშვიანი ოჯახების რაოდენობა და ასევე პროგრამაში ჩართული არასრულწლოვნების რაოდენობამ კი 235 252-ს მიაღწია. ასევე მაშინდელ ომბუდსმენზე დაყრდნობით, გამოიკვეთა, რომ 2022 წლის მონაცემებით, საქართველოში უკიდურეს სიღარიბეში 50 ათასამდე ბავშვი ცხოვრობს. ეს ციფრები არის საგანგაშო. ამდენი ბავშვი შიმშილობს, უკიდურეს სიღარიბეშია და პარტაქტივზე, მერის პიარზე იხარჯება მილიონობით ლარი.

პარტია „ანა დოლიძე ხალხისთვის“ ითხოვს, სასწრაფოდ გამოათავისუფლოს დედაქალაქის მთავრობამ ბიუჯეტიდან თანხები, რაც სრულიად რეალურია და თბილისის სკოლებში უფასო კვების პროგრამა დაიწყოს“, – აცხადებს ნინო წულაძე.

საქართველოს აქვს ევროკომისიის რეკომენდაცია კანდიდატის სტატუსზე. ჩვენი რეკომენდაცია საბოლოოდ გათვალისწინებულია და ეს ძალიან გვიხარია, მაგრამ ბრძოლა დასრულებული არაა. ევროპულმა საბჭომ უნდა მიიღოს გადაწყვეტილება, – ამის შესახებ ხორვატიის პარლამენტის ევროპულ საქმეთა კომიტეტის თავმჯდომარემ დომაგოი ჰაიდუკოვიჩმა „ქრონიკასთან“ განაცხადა.

„მე უკვე მივწერე წერილი ევროპული საბჭოს პრეზიდენტს. იმედი გვაქვს დეკემბერში ერთად ვიზეიმებთ საქართველოსთვის კანდიდატის სტატუსის მინიჭებას. ეს იყო უსამართლობა, უსამართლობა იყო საქართველოს დატოვება სტატუსის გარეშე და მიხარია, რომ ეს შეცდომა გამოსწორდა. მინდა ქართველ ხალხს მივულოცო და ვუთხრა, რომ ეს მხოლოდ ერთი ნაბიჯია გრძელ გზაზე.

უკრაინა/მოლდოვისთვის, რომლებსაც სავარაუდოდ გაუხსნიან მოლაპარაკებებს, მათთვის მეორე ნაბიჯია იმ ათასი ნაბიჯიდან, რაც წინ აქვთ. იყავით მოთმინებით და იცოდეთ, რომ მარტო არ ხართ – თქვენ გყავთ მეგობრები, რომლებიც მხარს დაგიჭერენ და თქვენს გვერდით იქნებიან. თქვენ მარტო არ ხართ. თქვენ აუცილებლად იქნებით ევროკავშირის წევრი. კითხვაა მხოლოდ როდის“, – აღნიშნა ჰაიდუკოვიჩმა.

ჩვენი მოთხოვნაა, რომ ის ასობით მილიონი ლარი, რომელიც ქალაქს დაემატება, მიმართული იყოს საცობების პრობლემის მოგვარებისკენ იმიტომ, რომ ერთ-ერთი მთავარი მწვავე პრობლემა საცობებია, – ამის შესახებ თბილისის საკრებულოს, „ნაციონალური მოძრაობის” წევრმა, ირაკლი ნადირაძემ თბილისის საკრებულოს სხდომაზე განაცხადა, სადაც 2024 წლის ბიუჯეტის პირველადი განხილვა მიმდინარეობს.

მისივე განმარტებით, დედაქალაქისთვის ერთ-ერთი მთავარი პრობლემა ნაგავია და თბილისი ნელ-ნელა ნაგვით ივსება.

„დედაქალაქში პრობლემები იზრდება, როგორც ინფრასტრუქტურული, ასევე სოციალური მომართულებით.

უნდა ვთქვათ, რომ დიახ, ყველა მიმართულებით ბიუჯეტი უნდა გაიზარდოს, იმიტომ, რომ სატრანსპორტო მიმართულებით თუ არ გაიზარდა ბიუჯეტი, ავტობუსში ახვალ ჭყლეტაა, მიკროავტობუსში ახვალ ჭყლეტაა, მეტროში ჩახვალ ჭყლეტაა და ამას ემატება ისიც, რომ ჭერი თავზე გვენგრევა და ვერა და ვერ დავამთავრეთ იგივე, ვარკეთილის მეტროს რეაბილიტაცია.

უნდა გაიზარდოს, რა თქმა უნდა, ავარიული კორპუსების დაფინანსება, ინფრასტრუქტურის და კეთილმოწყობის სამუშაოებს დაფინანსება, დასუფთავების ღონისძიებები, რომლებიც უმნიშვნელოვანესია. მე მესმის, ცალკეულ გამზირებზე გვაქვს 50 ათას ლარიანი ნაგვის ურნები, მაგრამ თბილისი, რომელიც ერთ დროს ნამდვილად იყო სისუფთავის ქალაქი, ნელ-ნელა ნაგვით ივსება და ე.წ. პერიფერიებში არც ნორმალური ნაგვის ურნებია, არც თავსახური აქვს, არც ფორმა აქვს და ეს ნაგვის ურნებია ადგილები მინი ნაგავსაყრელებად იქცა ფაქტობრივად.

ჩვენი მთავარი მოთხოვნაა, რომ ის ასობით მილიონი ლარი, რომელიც ქალაქს დაემატება, მიმართული იყოს საცობების პრობლემის მოგვარებისკენ იმიტომ, რომ ერთ-ერთი მთავარი მწვავე პრობლემა არის საცობები. ამ ქალაქში გადაადგილება უკვე წარმოუდგენელია. ვეღარც სასწრაფო მისულა თავის დროზე და ვეღარც ბავშვი მოუყვანია მშობელს ვერც ბაღში და ვერც სკოლაში”,- განაცხადა ნადირაძემ.

მზად ვართ, ჩვენი დაპირება შევასრულოთ, ვიმუშავებთ იმ რეკომენდაციებთან დაკავშირებით, რომლებიც ევროკავშირში გაწევრიანების საკითხს შეეხება, იქნება ეს ცხრა, 20 თუ მეტი, – ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

ანრი ოხანაშვილის თქმით, კარგი იქნება, თუ სამუშაო პროცესს ოპოზიციაც შეუერთდება.

„მმართველმა პარტიამ 12-პუნქტიანი გეგმის გადმოცემისთანავე აქტიური საპარლამენტო მუშაობა დაიწყო. სწორედ ამ გეგმის მიხედვით შევასრულეთ კონკრეტული რეკომენდაციები ინტენსიური მუშაობის ფარგლებში. სამწუხაროდ, ძირითადმა ოპოზიციურმა ჯგუფებმა, რომლებსაც პრეტენზია აქვთ, რომ ყველაზე მეტ ოპოზიციურ ხმას წარმოადგენენ საქართველოს პარლამენტში, სამუშაო ჯგუფებს ბოიკოტი გამოუცხადეს. ამის მიუხედავად, განვაგრძეთ მუშაობა და კონკრეტული შედეგი მივიღეთ. სამომავლოდაც მზად ვართ, თუ საჭირო იქნება, შესაბამისი ფორმატები შეიქმნას. ამასთან დაკავშირებით გვექნება მსჯელობა.

არავითარი ვალდებულება, წინაპირობა არ არსებობს, რომ 15 დეკემბრამდე, სტატუსის მონიჭებამდე რაიმე სამუშაო ფორმატი უნდა შეიქმნას. ამიტომ საუბარი, რომ ჩვენ 15 დეკემბრამდე გვაქვს რაიმე  შესასრულებელი და ამაზე იქნება დამოკიდებული სტატუსის მინიჭება, ასეთი რამ დღის წესრიგში არ დგას. ჩვენ ვთქვით და შემდეგშიც მზად ვართ, ჩვენი დაპირება შევასრულოთ, ვიმუშავებთ იმ რეკომენდაციებთან დაკავშირებით, რომლებიც ევროკავშირში გაწევრიანების საკითხს შეეხება, იქნება ეს ცხრა, 20 თუ მეტი.

უფრო მეტი გვაქვს განსაზღვრული ასოცირების შესახებ შეთანხმებით. ამიტომ ჩვენთვის ევროკავშირში ინტეგრაცია არ არის რამდენიმე თვის ან ერთი წლის საკითხი, ეს ინტენსიური მუშაობის რეჟიმია, როდესაც უნდა შევძლოთ და ჩვენი ქვეყანა ევროკავშირში გავაწევრიანოთ. ამიტომ ევროკავშირის შესაბამის წარმომადგენლებთან ერთად მოგვიწევს მუშაობა. რა თქმა უნდა, ოპოზიციამ თავისი როლი უნდა შეასრულოს ამ პროცესში – კონსტრუქციული და საქმიანი. 12-პუნქტზე მუშაობის პროცესში მათ შევთავაზეთ, მიეღოთ მონაწილეობა, თუმცა ძირითადმა ნაწილმა საბოტაჟის რეჟიმში ყოფნა ამჯობინა, ნაწილმა კი მონაწილეობა მიიღო. შემდგომშიც ჩვენ კარს არ დავუხურავთ ოპოზიციას, ვიმუშავებთ და კარგი იქნება, თუ შემოგვიერთდებიან, პოზიტიურ წვლილს შეიტანენ და არა – დესტრუქციულს“, – განაცხადა ანრი ოხანაშვილმა.

მიხეილ სააკაშვილი ორი წელი კვდებოდა, მისი მობრუნება იყო შეუძლებელი, თუმცა ვხედავთ, რომ მობრუნდა, აღარ კვდება, მისი დამოკიდებულება არის აბსოლუტურად არასერიოზული, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის განცხადებით, მიხეილ სააკაშვილი ორი წელი იტყუებოდა, რომ კვდებოდა.

„სიმულიანტობდა ორი წელი, ბოლომდე დააზიანა საკუთარი რეპუტაცია. დარწმუნებული ვარ, მის მხარდამჭერებს შორისაც კი შეელახა მას რეპუტაცია. როდესაც საკუთარი მხარდამჭერი გიყურებს და ხედავს, რომ სიმულიანტობა, ასეთ დროს პოლიტიკური იმიჯის შენარჩუნება არის წარმოუდგენელი. ასეთ დროს, მისი სურვილი, რომ მობრუნდეს პოლიტიკაში, წარუმატებლობისთვის არის განწირული“, – განაცხადა კობახიძემ.

ვეთანხმები ევროკავშირი ელჩს, მან აღნიშნა, რომ არის ევროკავშირი ქვეყნები, უმეტესობაა ასეთები, სადაც მოქმედებს მაღალი ბარიერი. მხოლოდ ოთხი ქვეყანაა ევროკავშირში, სადაც მოქმედებს სამპროცენტიანი ან უფრო დაბალი ბარიერი, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

ირაკლი კობახიძეს კითხვა დაუსვეს საქართველოში ევროკავშირის ელჩის, პაველ ჰერჩინსკის განცხადებაზე, სადაც მან აღნიშნა: „ევროკავშირის წევრ ზოგიერთ ქვეყანას ბარიერი მაღალი აქვს, ზოგს საერთოდ არ აქვს, ვიმედოვნებთ, რომ ბარიერთან დაკავშირებით რა წესებიც არ უნდა იყოს, რაც შეიძლება მალე იქნება წარდგენილი“.

მისი თქმით, მაღალი ბარიერი სჭირდება საქართველოში დემოკრატიული პროცესების განვითარებას.

„ასეთ პირობებში არავითარი სამართლებრივი თუ პოლიტიკური ვალდებულება არ გვაქვს, რომ დაბლა დავწიოთ ბარიერი. მაღალ ბარიერს აქვს პლუსებიც და მინუსებიც. მთავარი პლუსი არის ის, რომ პროპორციული სისტემის პირობებში მაღალი ბარიერი ასრულებს ერთგვარი სტაბილიზატორი ფუნქციას. ჩვენს დემოკრატიულ პროცესებს  სჭირდება სტაბილური განვითარება და ამისთვის არის მნიშვნელოვანი ხუთპროცენტიანი ბარიერის შენარჩუნება“, – განაცხადა კობახიძემ.

ზურაბ ნოღაიდელის ჩვენება ძალიან მნიშვნელოვანი იყო, რადგან დაიკითხა ყოფილი პრემიერ-მინისტრი, რომელმაც ცალსახად და ერთმნიშვნელოვნად განაცხადა, რომ დავით – გარეჯის კომპლექსის მიმდებარე ტერიტორიის და მთლიანად, სასაზღვრო ზოლის საკითხები საქართველოს იმჟამინდელი პრეზიდენტის ექსკლუზიური კომპეტენცია, უფლებამოსილება იყო, – ამის შესახებ საქართველოს საწინააღმდეგოდ ჩადენილ ქმედებებში ბრალდებულების, ივერი მელაშვილისა და ნატალია ილიჩოვას საქმის პროკურორმა მიხეილ სადრაძემ განაცხადა.

მისივე განმარტებით, ჯერ კიდევ, 1999 წელს არსებობდა თავად ბრალდებულ ივერი მელაშვილის მიერვე შექმნილი და ხელმოწერილი დოკუმენტი, რომლითაც კომისიამ საზღვრის დადგენისას არ იხელმძღვანელა.

„გარკვეული მონაკვეთები 2006 წელს შეთანხმდა, რაც საქართველოს პრეზიდენტთან იქნებოდა შეთანხმებული. ასევე, მნიშვნელოვანი საკითხი, რაც მან დაადასტურა, არის ის, რომ 2005 წელს, კომისია აცხადებდა, რომ თურმე, არანაირი დოკუმენტი, არანაირი მასალა, არანაირი რუკა არ არსებობდა, რომელიც დაადასტურებდა, რომ თითქოს, დავით – გარეჯი და მის კომპლექსში შემადგენელი ნაწილები საქართველოს ტერიტორიაზე ექცეოდა. ჯერ კიდევ, 1999 წელს, ივერი მელაშვილმა საკუთარი ხელით შექმნა დოკუმენტი და ხელი მოაწერა, სადაც დაფიქსირებული აქვს მათ შორის, ის რუკა, რომელზეც ჩვენ ვედავებით, რომ უნდა გამოყენებულიყო. შესაბამისად, ნოღაიდელის ჩვენება ძალიან მნიშვნელოვანია, განსაკუთრებით, სწორედ ამ ორ კომპონენტთან მიმართებაში“, – განაცხადა სადრაძემ.

კითხვაზე, ამ ყველაფრიდან გამომდინარე, ხომ არ იკვეთება იმჟამინდელი პრეზიდენტის, სააკაშვილის ბრალეულობა და ხომ არ აპირებენ მისი მოწმის სახით დაკითხვას, პროკურორი პასუხობს, რომ „დეტალებს მათ კონკრეტულ ტაქტიკასთან და სამომავლო გეგმებთან დაკავშირებით ვერ გააჟღერებს, თუმცა, განმარტავს, რომ აბსოლუტურად ყველა საჭირო საგამოძიებო მოქმედება ჩატარდება“.

„შემდეგი ბრალდებული, ვინ იქნება, ამას ვერ გეტყვით, ეს უდანაშაულობის პრეზუმფციასთან კონფლიქტში მოდის, მაგრამ ცალსახად გიდასტურებთ, რომ აბსოლუტურად ყველა ღონეს განვახორციელებთ, რომ ობიექტური მოცემულობა დადგინდეს.

ორი მოცემულობაა, ერთი, საკანონმდებლო რეგულაცია, რომელზეც მოწმემ ცალსახად განაცხადა, რომ ეს პრეზიდენტის უფლებამოსილება იყო, კომისიის მარეგულირებელ ბრძანებაშიც, რომლის ავტორიც საქართველოს პრეზიდენტი იყო, ეს მითითებულია. შესაბამისად, ეს არის მოცემულობა, რომელსაც ვერ გავექცევით. მეორე, მოწმემ დაადასტურა, ფაქტი პრეზიდენტთან შეთანხმებული იქნებოდა, რადგან გარეჯთან დაკავშირებული საკითხი განიხილებოდა. ბრალდებულებს ვედავებით, რომ საქართველოს საწინააღმდეგოდ, დავალების არსებობისას, შეგნებულად არ გამოიყენეს რელევანტური მასალა, სწორედ ამაზეა საუბარი, როცა კომისია უშიშროების საბჭოს წინაშე წარსდგა, განაცხადა, რომ არ არსებობდა არანაირი მასალა, რომელიც გარეჯის კუთვნილებას საქართველოსადმი დაადასტურებდა, მაშინ როცა უამრავი ასეთი მასალა არსებობს. მოტივია სწორედ ის არაკეთილსინდისიერი დავალება, რომლის საფუძველზეც ბრალდებულებმა სამწუხაროდ, მაგრამ შეათანხმეს ძალიან ბევრი მონაკვეთი საქართველოს საზიანოდ. ამ მიმართულებით გამოძიება გრძელდება, შესაბამისად, დეტალიზაციას ვერ მოვახდენ, თუმცა, ბევრი მნიშვნელოვანი გარემოება არსებობს, როცა მტკიცებულებითი სტანდარტი იარსებებს, სამართლებრივი შეფასება მას აუცილებლად მოჰყვება…

რეალობა და ღონისძიებები რაც განხორციელდა, არის შემდეგი, რომ 2006 წელს, ჩიჩხიტურის კოშკიდან, 100 მეტრის დაშორებით შეთანხმდა კონკრეტული მონაკვეთი, შესაბამისად, ეს ფაქტია აბსოლუტურად ყველაფერზე პასუხი, იმაზე თუ რა განზრახვები, რა მიმართულებები და რა სურვილები ჰქონდათ მაშინ. რაც არ უნდა ისაუბროს დაცვამ, თითქოს, ბრალდებულები ამ მიმართულებით იბრძოდნენ, ამის საპირისპიროდ არამხოლოდ ის არის, რომ ეს ყველაფერი ხელმოწერით დაადასტურეს, არამედ არსებობს ფარული აუდიო-ვიდეო მასალა, რომელიც გასაჯაროებულია, სადაც ივერი მელაშვილს პრაქტიკულად, აღიარება აქვს განხორციელებული“, – განაცხადა სადრაძემ.

ცნობისთვის, გენერალურმა პროკურატურამ სახელმწიფო უსაფრთხოების სამსახურთან ერთობლივი თანამშრომლობის შედეგად საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი – ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა დააკავა. პროკურატურის ინფორმაციით, ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში. სახელმწიფო ბრალდების ცნობით, ბრალდებულები განზრახ, ზემდგომი პირების დავალებების შესაბამისად მოქმედებდნენ. ივერი მელაშვილი და ნატალია ილიჩოვა თბილისის საქალაქო სასამართლომ სხდომათა დარბაზიდან გასული 2021 წლის 28 იანვარს გაათავისუფლა. მოსამართლემ ბრალდებულებს აღკვეთის ღონისძიების სახით შეფარდებული პატიმრობა 20 000-20 000-ლარიანი გირაოს სანაცვლოდ შეუცვალა.