საქართველოს პრეზიდენტი სალომე ზურაბიშვილი ბუნდესტაგის საგარეო ურთიერთობათა კომიტეტის თავმჯდომარეს მაიკლ როთს შეხვდა. ინფორმაციას ზურაბიშვილი “ტვიტერის” პირად გვერდზე ავრცელებს.

“შეხვედრა მქონდა მაიკლ როთთან. განვიხილეთ საქართველოსთვის ევროკავშირის კანდიდატის სტატუსის მინიჭების საკითხი და ამ გზაზე გერმანიის მტკიცე მხარდაჭერის მნიშვნელობა”, – წერს ზურაბიშვილი.

ოკუპირებული ე.წ. სამხრეთ ოსეთის რესპუბლიკის ახალგორის რაიონის მცხოვრებლებს რელიგიურ დღესასწაულთან „ლომისობასთან“ დაკავშირებით, დე ფაქტო საქართველო-სამხრეთ ოსეთის „საზღვრის“ გამარტივებული წესით გადაკვეთის უფლება ექნებათ. ინფორმაციას ადგილობრივი სააგენტო „რესი“ ავრცელებს.

ამის შესახებ გადაწყვეტილება დღეს, ე.წ. უშიშროების საბჭოს ოპერატიული სხდომაზე მიიღეს.

დე ფაქტო საზღვრის გადაკვეთა რაზდახანის გამშვები პუნქტით, გამარტივებული წესით, 7 ივნისის 8:00 საათიდან 8 ივნისის 20:00 საათამდე იქნება შესაძლებელი.

გადაწყვეტილების შესრულებაზე კონტროლი დაევალა „რესპუბლიკის უშიშროების საბჭოს მდივანს“ ანატოლი პლიევს , – ნათქვამია ინფორმაციაში.

რისი გასაღებიც აქვს „ნაციონალურ მოძრაობას“, ის საკეტი უკვე დიდი ხანია გამოცვლილია. ამიტომაც ცდილობენ წლებია, უშედეგოდ, ხან პარლამენტის, ხან ცესკოს ღობეზე გადაძრომას, – ასე გამოეხმაურა პარლამენტის ვიცე-სპიკერი არჩილ თალაკვაძე „ნაციონალური მოძრაობის“ თავმჯდომარის ლევან ხაბეიშვილის განცხადებას, რომ „ბიძინა ივანიშვილის წინააღმდეგ მთავარი დამარცხების გასაღები „ნაციონალურ მოძრაობას“ აქვს“.

„ოპოზიციური პარტიები ამ სატყუარას თუ წამოეგებიან, „ნაცმოძრაობასთან“ ერთად გარეთ დარჩებიან“, – აღნიშნა თალაკვაძემ.

„ნაციონალური მოძრაობის“ თავმჯდომარემ ლევან ხაბეიშვილმა განაცხადა, რომ ბიძინა ივანიშვილის წინააღმდეგ მთავარი დამარცხების გასაღები „ნაციონალურ მოძრაობას“ აქვს.

„ეს გასაღები „ნაციონალურ მოძრაობას“ აქვს, ჩვენთან უნდა ისაუბროს ყველამ. ენის მოჩლექით არ უნდა ველაპარაკოთ ვინმეს, მოვიდნენ და თუ უნდათ, მივეხმარებით ამ გასაღების გადამრავლებაში, რომ 5-7% მიიღონ, რომ ხვალ-ზეგ კოალიციური მთავრობა იყოს“, – აღნიშნა ხაბეიშვილმა.

საქართველოს საგარეო საქმეთა მინისტრი ილია დარჩიაშვილი, მთავრობის მეთაურის, ირაკლი ღარიბაშვილის ბერლინში დაგეგმილ ვიზიტს და ამის შესახებ ოპოზიციის მიერ გაკეთებულ შეფასებებს გამოეხმაურა.

„მინდა გამოვეხმაურო ბოლო ორი დღის განმავლობაში ოპოზიციურ ტელეარხებზე მიმდინარე ისტერიას, რომელიც უკავშირდება საქართველოს პრემიერ-მინისტრის სამუშაო ვიზიტს ბერლინში. საკითხი არის შემდეგნაირად: საქართველოს პრემიერ-მინისტრი ძალიან აქტიურად არის ჩართული გერმანიასთან ორმხრივი ურთიერთობების განვითარებაში და მე მინდა შევახსენო ჩვენს მოსახლეობას, რომ სწორედ საქართველოს პრემიერ-მინისტრი ბრძანდებოდა ოფიციალური ვიზიტით ბერლინში. ჩვენ გვახსოვს გერმანიის საგარეო საქმეთა მინისტრის ვიზიტი საქართველოში და დინამიკა, რომელიც შეიქმნა ამ ურთიერთობებიდან. ამ დინამიკის გაგრძელებაა ის, რომ საქართველოს პრემიერ-მინისტრი მიემგზავრება ბერლინში სამუშაო ვიზიტით. მე მგონია, რომ ასეთი გაუგებარი და მავნებლური რეაქცია, რომელიც აქვთ ჩვენს ოპონენტებს ამ ვიზიტთან დაკავშირებით გამომდინარეობს იქიდან, რომ სწორედ გერმანია იქცა ჩვენი ევროპული ინტეგრაციის ერთ-ერთ მთავარ მხარდამჭერ ქვეყნად, რომელიც ხმამაღლა საუბრობს საქართველოს ევროპული ინტეგრაციის მნიშვნელობაზე“, – განაცხადა ილია დარჩიაშვილმა.

მინისტრის თქმით, ის ფაქტი, რომ გერმანია – ერთ-ერთი გადაწყვეტილების მიმღები ქვეყანა ევროკავშირის გაფართოების მიმართულებით, აქტიურობს საქართველოსთან მიმართებით, წარმოადგენს ოპოზიციის გაღიზიანების მთავარ მიზეზს.

„ეს არის მათი გაღიზიანების და მსგავსი მავნებლური დეზინფორმაციის გავრცელების მიზეზი. თუმცა მე მინდა დავამშვიდო ისინი და მოვუწოდო, კონსტრუქციულად შეაფასონ საქართველოს საგარეო პოლიტიკა. საქართველოს პრემიერ-მინისტრს აუცილებლად შედეგიანი ვიზიტი ექნება ბერლინში, სადაც საუბარი იქნება ჩვენს ევროპულ მომავალზე, რეგიონული უსაფრთხოების განმტკიცების თემაზე, ეკონომიკურ თანამშრომლობაზე და ორმხრივი ურთიერთობების კიდევ უფრო გაძლიერებაზე“, – აღნიშნა დარჩიაშვილმა.

მინისტრმა ასევე განმარტა, რომ აღნიშნული ვიზიტი ორმხრივი კონსულტაციების საფუძველზე დაიგეგმა აპრილის ბოლოს, 28 აპრილს ორ საგარეო საქმეთა სამინისტროს შორის მჭიდრო კონსულტაციების შემდეგ.

„მე მოვუწოდებ ყველას, რომ საქართველოს საგარეო პოლიტიკის და ჩვენი ევროპული ინტეგრაციის მიმართულებით გაკეთებული შეფასებებისას ნუ შეჰყავთ ჩვენი მოსახლეობა შეცდომაში და ნუ აზიანებენ ქვეყნის ინტერესებს“, – განაცხადა საგარეო უწყების ხელმძღვანელმა და დასძინა, რომ გერმანიის მხრიდან საქართველოს ევროპული ინტეგრაციის მტკიცე მხარდაჭერა, საქართველოს მთავრობის მიერ გატარებული თანმიმდევრული პოლიტიკის შედეგია.

„აქ მნიშვნელოვანი არის ის, რომ ამ ყველაფრის შესახებ ჩვენ ინფორმაციას ვიღებთ აგენტების შესახებ ამერიკული კანონი FARA-ს მეშვეობით, თანაც უკვე მეორედ. ეს კიდევ ერთხელ გვარწმუნებს, რამდენად მნიშვნელოვანი ყოფილა ეს კანონი და, თურმე, როგორი კარგია იმისთვის, რომ ვიცოდეთ საზოგადოებრივ თუ პოლიტიკურ ცხოვრებაში, ასევე მედიასივრცეში მიმდინარე მოვლენების შესახებ, საიდან და როგორ ფინანსდებიან ისინი“, – ამის შესახებ „ხალხის ძალის“ წევრმა, ეკა სეფაშვილმა, მედიასთან ისაუბრა.

მისი თქმით, FARA-ს მეშვეობით მიღებული ინფორმაცია ხაზს უსვამს, რომ ეს ძალიან მნიშვნელოვანი კანონია. იგი საშუალებას აძლევს საზოგადოებას, უკეთესად განსაჯოს, ვინ ვინ არის და ვინ რა მიზნით იღვწის.

„რადგან კეზერაშვილი პიარ-კამპანიის განხორციელებას გეგმავს საერთაშორისო მასშტაბით, როგორც ჩანს, სამართლებრივი ბრძოლის საშუალება და სამართლებრივი ბერკეტები არ გააჩნია. ჩვენ გვახსოვს მისი განცხადება, რომ BBC-ის სიუჟეტის საპასუხოდ ის აუცილებლად იჩივლებდა, თუმცა, როგორც ჩანს, გადაიფიქრა სასამართლოში ჩივილი იქიდან გამომდინარე, რომ, ალბათ, არ არის ამ დავის მოგების საშუალება ჩვეულებრივი სამართლებრივი გზით. ახლა კი ცდილობს იმიჯის შექმნას, რისთვისაც დაიქირავა ამერიკული კომპანია, რომელმაც უნდა ჩაუტაროს ე.წ რეპუტაციის აღმდგენი პიარ-კამპანია, რათა შელახული იმიჯი და რეპუტაცია აღიდგინოს.

აქ მნიშვნელოვანი არის ის, რომ ამ ყველაფრის შესახებ ჩვენ ინფორმაციას ვიღებთ აგენტების შესახებ ამერიკული კანონი FARA-ს მეშვეობით, თანაც უკვე მეორედ. ეს კიდევ ერთხელ გვარწმუნებს, რამდენად მნიშვნელოვანი ყოფილა ეს კანონი და, თურმე, როგორი კარგია იმისთვის, რომ ვიცოდეთ საზოგადოებრივ თუ პოლიტიკურ ცხოვრებაში, ასევე მედიასივრცეში მიმდინარე მოვლენების შესახებ, საიდან და როგორ ფინანსდებიან ისინი. ვფიქრობ, ასეთი ტიპის ხარჯების შესახებ საზოგადოებამ ნამდვილად უნდა იცოდეს ისევე, როგორც გავიგეთ, სააკაშვილის ოჯახმა როგორ დაიქირავა 1 000 000$-ზე მეტად ლობისტური კომპანია და ვფიქრობ, ეს საშუალებას აძლევს საზოგადოებას, უკეთესად განსაჯოს, ვინ ვინ არის და ვინ რა მიზნით იღვწის“, – განაცხადა ეკა სეფაშვილმა.