„ვარდების რევოლუციის“ აღნიშვნა და მისთვის პომპეზურობის მიცემა პოლიტიკური და ეთიკური ამორალურობის კომპონენტს შეიცავს, რადგან 2003 წლის შემდეგ არაერთი ოჯახი და ადამიანი გაუბედურდა, უზარმაზარი ტრაგედიის მსხვერპლი გახდა, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.

სარჯველაძეს კითხვა დაუსვეს „ნაციონალური მოძრაობის“ „ვარდების რევოლუციის“ 20 წლისთავისადმი მიძღვნილ ღონისძიებაზე, რომელიც დღეს გაიმართება.

„ალბათ ჩვენი საზოგადოების ნაწილს ნამდვილად არაფერი ეზეიმება და დაკავშირებულია იმდროინდელ პოლიტიკურ პროცესებთან. ამ პოლიტიკური გუნდისთვის სიმახინჯეა და თან მათთვის დამახასიათებელია, როცა თავიანთი პოლიტიკური წარმატება უფრო მნიშვნელოვნად მიაჩნიათ, ვიდრე გიორგობის დღესასწაული. ამის დაჩრდილვას, გადაფარვას რომ ცდილობენ, ლამაზი არ არის და უნდა დაფიქრდნენ. 2013-2014 წელს მობოდიშების მიუხედავად, აღქმული არ აქვთ, რომ მათ დააშავეს და ბოდიში აქვთ მოსახდელი იმ ადამიანებისთვის, ვინც ტერორიზმში ცხოვრობდა და მათი რეჟიმი საკუთარ ზურგზე განიცადეს. ფიქრობენ, რა მოიფიქრონ ისეთი, რითიც შეუძლიათ პოლიტიკურ თავდაღმართში მყოფი პარტიის დამუხრუჭება. ამისთვის ისეთ ფორმებს იგონებენ, თითქოს კონსოლიდაციის ფუნქციის შესრულება შეუძლიათ“, – განაცხადა მიხეილ სარჯველაძემ.

ამასთან, სარჯველაძემ კომენტარი გააკეთა „ნაციონალური მოძრაობის“ მანიფესტზეც და აღნიშნა, რომ მანიფესტაციით შენიღბულია იმ პოლიტიკური პარტიის სახე, რომელიც ინგრევა.

„რა კონსოლიდაციაზე საუბარი, როცა მანიფესტაციით შენიღბულია იმ პოლიტიკური პარტიის სახე, რომელიც ინგრევა. ყველა კარგად ხვდება, რომ გაფორმება სჭირდებათ იმის, როგორ დასრულდება კეზერაშვილისა და მელიას დაჯგუფებების დაპირისპირება. ეს არის მხოლოდ ფორმალური დასასრული, თორემ ეს პარტია დიდი ხნის წინ არის დასრულებული და დანგრეული. მათი მანიფესტიც საკუთარი რენომეს შენარჩუნებისთვის გადადგმული ნაბიჯია, სხვა მხრივ, შინაარსისგან დაცლილია“, – განაცხადა მიხეილ სარჯველაძემ.

„გირჩი“ არასდროს გაერთიანდება „ნაცმოძრაობასთან“. არ გვჭირდება, რომ ვინმეს ბარიერის გადასალახად შევუერთდეთ, – ამის შესახებ „გირჩის“ ლიდერმა, იაგო ხვიჩიამ განაცხადა.

მისივე თქმით, „გირჩი“ გარკვეულ საკითხებზე თანამშრომლობას არავისთან გამორიცხავს, თუმცა ეს იდეურ ერთობას უნდა ეფუძნებოდეს.

„იდეური ერთობა ერთ დღეში როგორ უნდა დაინახოთ? წარმოუდგენელია, ვიღაცამ მესიჯი დაწეროს და მთელმა ქვეყანამ დავიჯეროთ, რომ იდეური ერთობა შემდგარია. პოლიტიკურმა სპექტრმა კონკრეტულ საკითხებთან დაკავშირებით თანამშრომლობა უნდა ვისწავლოთ. კარგია, რომ მიხეილ სააკაშვილი ინიციატივით გამოვიდა, რომ კონკრეტულ საკითხებზე ვითანამშრომლოთ. ასეთია ეროვნული ბანკი და ამნისტია. ეს თუ გაგრძელდება და ინტენსიური ხასიათი ექნება, აჩვენებს ტენდენციებს, თორემ, ხომ გაგიგიათ, ერთი მერცხალი და ბულბულის ჭიკჭიკი გაზაფხულს ვერ მოიყვანსო. „გირჩი“ არასდროს გაერთიანდება „ნაცმოძრაობასთან“. ზოგადად, არავისთან არანაირი ტიპის თანამშრომლობას არ გამოვრიცხავთ, არასერიოზული იქნება, ვთქვა, რომ ვიღაცასთან რაიმე ტიპის თანამშრომლობას გამოვრიცხავ, მაგრამ ეს თანამშრომლობა უნდა იყოს ლოგიკური და დაფუძნებული იმაზე, რომ პარტიებს ბევრ საკითხზე აქვს დამთხვევები. ეს პროცესი ჯერ დაწყებული არ არის, ამიტომ საფუძველს მოკლებულია საუბარი ნებისმიერ გაერთიანებაზე, იმაზე, რომ „გირჩი“ ვინმესთან გაერთიანდება. პირადად მე, იაგო ხვიჩიას და ჩემს სხვა მეგობრებსაც არ გვჭირდება, რომ ვინმეს ბარიერის გადასალახად შევუერთდეთ. ჩვენ გვინდა, ადამიანების ნდობა გვქონდეს იმდენი, რომ ბარიერის გადალახვა ჩვენით შევძლოთ და ამის შემდეგ, ბარიერგადალახულები მივიდეთ სხვასთან სალაპარაკოდ, როგორ მოვაწყოთ ეს ქვეყანა.

მიხეილ სააკაშვილთან შეხვედრას ვცდილობდი. მას წერილი მივწერე, ასევე მის ადვოკატს ველაპარაკე და ზეპირადაც გადავეცი, რასაც ვფიქრობდი. მინდოდა, მისგან გამეგო მისი მოსაზრება, რაიმე საერთო ღირებულებები, იდეები გვაქვს თუ არა, რისთვისაც ვიბრძოლებთ. ჩემთვის ძალიან მნიშვნელოვანი იყო ამნისტიის საკითხი. როგორც 2012 წელს იყო საჭირო, ისე ახლა არის საჭირო დიდი ამნისტია. ჩვენ ევროპაში მესამე თუ მეოთხე ვართ პატიმართა რაოდენობით“, – განაცხადა იაგო ხვიჩიამ.

შეგახსენებთ, საქართველოს ყოფილმა პრეზიდენტმა, მიხეილ სააკაშვილმა „ფეისბუქის“ გვერდზე დაწერა: „მას შემდეგ, რაც გამოვაცხადე, რომ დადგა დრო ეროვნული ბანკის გაუქმების და ეკონომიკის ევროზე გადაყვანის, აღმოჩნდა, რომ ამასვე ითხოვს იაგო ხვიჩიას „გირჩი“. არის თუ არა ეს საფუძველი ერთობის? რა თქმა უნდა, არის“.

ევროპამ საქართველოს მიმართ კიდევ ერთხელ აჩვენა ურყევი მხარდაჭერა, – ამის შესახებ საქართველოს პრეზიდენტი სალომე ზურაბიშვილი სოციალურ ქსელში წერს.

სალომე ზურაბიშვილი ევროპარლამენტს თამაზ გინტურის მკვლელობასთან დაკავშირებით მიღებული რეზოლუციისთვის მადლობას უხდის.

„ევროპამ საქართველოს მიმართ კიდევ ერთხელ აჩვენა ურყევი მხარდაჭერა. მადლობელნი ვართ ევროპარლამენტის თამაზ გინტურის მკვლელობასთან დაკავშირებით მიღებული გადამწყვეტი რეზოლუციისთვის, რომელიც ხაზს უსვამს საერთაშორისო საზოგადოების როლს იმ გამოწვევებთან გამკლავებაში, რომელთა წინაშეც რუსეთის მუდმივი ოკუპაციის გამო საქართველოს მოქალაქეები დგანან“, – წერს პრეზიდენტი.

ევროპარლამენტში რუსეთის საოკუპაციო ძალების მიერ თამაზ გინტურის მკვლელობასთან დაკავშირებით რეზოლუცია მომზადდა.

ევროპარლამენტმა რუსეთის საოკუპაციო ძალების მიერ საქართველოს მოქალაქის, თამაზ გინტურის მკვლელობასთან დაკავშირებით რეზოლუცია დაამტკიცა.

რეზოლუციას, რომელსაც რამდენიმე თანაავტორი ჰყავს, ევროპარლამენტის 495-მა წევრმა დაუჭირა მხარი.

რეზოლუციის ტექსტში ევროპარლამენტარები საქართველოს მოქალაქის, თამაზ გინტურის მკვლელობას გმობენ და საქმის საფუძვლიან გამოძიებას, დამნაშავეების დასჯას და საოკუპაციო ძალების ტყვეობაში მყოფი მოქალაქეების გათავისუფლებას მოითხოვენ. ევროპარლამენტარები ასევე გამოხატავენ მხარდაჭერას ქვეყნის ტერიტორიული მთლიანობისა და სუვერენიტეტის მიმართ.

შეგახსენებთ, რომ ევროპარლამენტში რეზოლუციის შესახებ დებატები გუშინ გაიმართა, სადაც ევროპარლამენტარებმა თამაზ გინტურის მკვლელობაში პასუხისმგებელი პირების დასჯა და საქართველოს სუვერენიტეტის მხარდაჭერა დაადასტურეს.

6 ნოემბერს რუსეთის საოკუპაციო ძალებმა გორის მუნიციპალიტეტში, სოფელ კირბალის მიმდებარედ საქართველოს მოქალაქე, თამაზ გინტური მოკლეს, ხოლო ლევან დოთიაშვილი გაიტაცეს.

ოკუპანტების მიერ გატაცებული ლევან დოთიაშვილი 9 ნოემბერს, გაათავისუფლეს.

მინდა, ყველა პატრიოტს მივულოცო „ვარდების რევოლუციის“ 20 წლის იუბილე, იმ რევოლუციისა, რომელმაც საქართველო აქცია თანამედროვე, ცივილიზებულ სახელმწიფოდ, – ამის შესახებ „ერთიანი ნაციონალური მოძრაობის“ პოლიტიკურმა მდივანმა, გიორგი ბარამიძემ განაცხადა.

„ამ წლების განმავლობაში მოხდა საქართველოში იმ ინსტიტუციების შექმნა, რამაც საშუალება მოგვცა დღეს ვისაუბროთ ევროკავშირში გაწევრიანების თაობაზე მოლდოვასა და უკრაინასთან ერთად. ვისაუბროთ ევროკავშირის კანდიდატის სტატუსზე და ეს ყველაფერი რეალობა იყოს. მინდა, მივულოცო ყველა პატრიოტს განურჩევლად პარტიულობისა. განსაკუთრებით, მინდა, მივულოცო ჩვენს პატრიოტ პოლიციელებს, რომლებიც წარმოადგენენ იმ პოლიციას, რომელიც შექმნა მიხეილ სააკაშვილის გუნდმა, ჩვენს სამხედროებს, ჩვენს ჯარს, რომლებიც ასევე არიან სამშობლოს სადარაჯოზე და რომელიც მიხეილ სააკაშვილის ხელმძღვანელობით შეიქმნა.

მინდა, მივულოცო ყველა პედაგოგს, რომელიც დღეს სულ სხვა მდგომარეობაში არიან, ვიდრე იყვნენ „ვარდების რევოლუციამდე“. მინდა, მივულოცო ლექტორებს, მოსწავლეს, სტუდენტს. ის, რომ მათ არ სჭირდებათ ჩაწყობით და ფულის გამოყენებით გამოცდების ჩაბარება, მივულოცო ყველა იმ მოქალაქეს, რომელიც სარგებლობს იუსტიციის სახლების სერვისით და ყველა ადამიანს, რომლისთვისაც ძვირფასია ნორმალური, ცივილიზებული საქართველო.

მინდა, მივულოცო ოკუპაციის ხაზის გასწვრივ ჩვენს მოქალაქეებს, რომლებიც, მიუხედავად ოკუპანტის ყოველდღიური აგრესიისა, პროვოკაციებისა, ჩვენი მოქალაქეების გატაცებისა, მკვლელობისა, მედგრად დგანან სამშობლოს სადარაჯოზე და იციან, რომ საქართველო ჩვენი ერთიანობით, ჩვენი მეგობრების დახმარებით აუცილებლად მშვიდობიანად გამთლიანდება.

მინდა, საქართველოს ყველა პატრიოტს, როგორც ქვეყნის შიგნით, ასევე ქვეყნის გარეთ მყოფ საქართველოს ემიგრანტებს მივულოცო დღევანდელი დღე, რომლებმაც ქვეყნის სიდუხჭირის, თავდასხმების და სხვა მრავალი მიზეზის გამო დატოვეს საქართველო, მაგრამ იმედი აქვთ, რომ დაბრუნდებიან, მომავალს იმედით უყურებენ და სურთ, რომ ჩვენი ქვეყანა იყოს განვითარებული, მშვიდობიანი, ერთიანი, გამთლიანებული, ცივილიზებული, ქართული, მაშასადამე ევროპული სახელმწიფო, რომელიც იქნება ევროკავშირისა და ნატო-ს წევრი.

დღეს, როგორც არასდროს „ვარდების რევოლუციის“ იდეები არის მნიშვნელოვანი და მნიშვნელოვანია, რომ რაც ჩვენ შევძელით, მომავალში გაგრძელდეს, რაც ვერ შევძელით და სადაც იყო პრობლემები, ის პრობლემები ყველამ ერთად გამოვასწოროთ ერთობლივი ძალისხმევით“, – განაცხადა გიორგი ბარამიძემ.

ივანიშვილის რეჟიმი შინაარსზე ფოკუსირებით დამარცხდება და არა ივანიშვილის ფრაზების გადამღერებითა და გაერთიანებაზე მუდმივი სპეკულირებით, – ამის შესახებ „ევროპული საქართველოს“ ლიდერმა, გიგა ბოკერიამ განაცხადა, რითაც პარტია „ლელოს“ თავმჯდომარის, მამუკა ხაზარაძის ფეისბუქ პოსტს გამოეხმაურა, სადაც ის აღნიშნავს, რომ „შუა უნდა შეიკრიბოს“.

როგორც გიგა ბოკერიამ განაცხადა, ყველა პროდასავლურ ძალას პირველ რიგში, სათითაოდ გაძლიერება სჭირდება, რადგან შესაკრებთა გადანაცვლებით ჯამი არ იცვლება და პროდასავლურ პარტიებს ჯამი გასაზრდელი აქვთ.

მისი თქმით, ამის გარეშე პუტინისტური სულისკვეთების ივანიშვილის რეჟიმი არ დამარცხდება.

„ეს რეჟიმი შეიცვლება მხოლოდ შინაარსზე ფოკუსირებითა და მოქალაქეებთან პირდაპირი კონტაქტით, რასაც „ევროპული საქართველო“ აკეთებს. ეს ვერ მოხდება ივანიშვილის ფრაზების გადამღერებითა და მუდმივად იმაზე სპეკულირებით, თუ ვინ ვისთან გაერთიანდება,“ – განაცხადა გიგა ბოკერიამ.

20 წლის თავზე სახელმწიფოს წინაშე ჩადენილი უამრავი დანაშაულისთვის, ნაციონალურ მოძრაობას შეგვიძლია ვუსურვოთ ერთადერთი – პასუხი აგონ ქართველი ხალხის და ქვეყნის წინაშე!, – ასე ეხმაურება “ხალხის ძალის” ერთ-ერთი ლიდერი დიმიტრი ხუნდაძე “ნაციონალური მოძრაობის” მიერ მანიფესტის გამოქვეყნებას და 2003 წლის რევოლუციის წლისთავის აღნიშვნას.

ხუნდაძის თქმით, „ნაციონალურმა მოძრაობამ” მის მიერ ჩადენილი დანაშაულებისთვის ქვეყნის წინაშე პასუხი უნდა აგოს.

„პოლიტიკურად გაკოტრებული მიხეილ სააკაშვილი და მისი “ნაციონალური მოძრაობა” 20 წლისთავზე მანიფესტს გამოსცემს, რომელზედაც ხელის მოწერისკენ მოუწოდებს მთელს ოპოზიციურ სპექტრს. ოპოზიციას არ სჭირდება ოფიციალური ხელის მოწერა, ისინი ისედაც ერთიანი ნაციონალური მოძრაობის წევრები არიან პრეზიდენტის ჩათვლით. რაც შეეხება თავად მანიფესტს, ეს ქართველი ხალხის კიდევ ერთი დაცინვაა სისხლიანი რეჟიმის დამნაშავე პრეზიდენტისგან.

ვარდების რევოლუციამ რომ საზოგადოების მოლოდინი ვერ გაამართლა და საფრთხედ იქცა, ამიტომ იყო 2012 წლის არჩევნებში ამომრჩევლის მკაცრი პასუხი. დღეს კი მათი მხრიდან ამ თარიღის საზეიმოდ ქცევა მოსახლეობის უდიდესი ნაწილის შეურაცხყოფა და ამავე დროს, მტკიცებულებაა იმისა, რომ ნაცმოძრაობა ამ მძიმე წარსულს არ ნანობს და უარესის ჟინი აქვთ.
მთელი ამ წლების განმავლობაში მათგან არ გაგვიგია სინანული ქუჩაში ჩაცხრილული ბიჭების გამო, ციხეებში გაუპატიურებული და ნაწამები პატიმრების გამო, დაკარგული ტერიტორიების და ბრძოლის ველზე მიტოვებული დაღუპული გმირების გამო, ბიუჯეტის გაძარცვის და ხალხის ფულის მიტაცების გამო, თავისუფალი სიტყვის ჩახშობის და მიტინგების დარბევის გამო და კიდევ რამდენი ჩამოვთვალო…

20 წლის თავზე სახელმწიფოს წინაშე ჩადენილი უამრავი დანაშაულისთვის, ნაციონალურ მოძრაობას შეგვიძლია ვუსურვოთ ერთადერთი – პასუხი აგონ ქართველი ხალხის და ქვეყნის წინაშე! სხვა შემთხვევაში სამართალზე დაფუძნებულ სახელმწიფოს ვერ მივიღებთ“, – წერს ხუნდაძე.