„ოცნების“ ამოცანა არის ოკუპანტებისთვის კომფორტის შექმნა და არა საკუთარი მოქალაქეების ინტერესების დაცვა, – ამის შესახებ ჟურნალისტებთან „ლელოს“ დეპუტატმა ანა ნაცვლიშვილმა განაცხადა.

ნაცვლიშვილი საოკუპაციო ძალის მიერ თამაზ გინტურის მკვლელობას გამოეხმაურა და აღნიშნა, რომ სამარცხვინოა, როცა საქართველოს პარლამენტს ევროპარლამენტი ასწრებს მსგავსი რეზოლუციის მიღებას და ხელისუფლება ამის გაკეთებას არც განიხილავს.

„მივესალმები და მადლობას ვუხდი ევროპარლამენტარებს მხარდაჭერისთვის. სამარცხვინო და სავალალოა, რომ ევროპარლამენტი ასწრებს ეროვნულ პარლამენტს გამოხატოს თავის პოზიცია ამ სასტიკ მკვლელობასთან, მშვიდობიანი ადამიანის დახვრეტასთან დაკავშირებით. ხელისუფლებას რომ ეს პოზიცია არ აქვს და ზოგადად, საქართველოს მოქალაქეების დაცვა რომ არ არის მისი ამოცანა ეს ბევრჯერ ვნახეთ, მათ შორის, მაშინ, როცა დახვრეტილ მშვიდობიან მოქალაქეზე ამბობდნენ, გარდაიცვალაო. ეს არის „ქართული ოცნების“ პოზიცია და სახე ამ სასტიკ მკვლელობასთან დაკავშირებით და ზოგადად ოკუპაციასთან დაკავშირებით. ჩვენ არაერთი მაგალითი გვაქვს, თუ გვინდა ამის დანახვა, ვისაც არ უნდა, გასაგებია, რატომაც არ უნდა, მაგრამ, მოქალაქეები, ვისაც სურთ რეალობას გაუსწორონ თვალი, კარგად ხედავენ, რომ „ქართული ოცნების“ ამოცანა არის ოკუპანტებისთვის კომფორტის შექმნა და არა საკუთარი მოქალაქეების ინტერესების დაცვა“, – განაცხადა ნაცვლიშვილმა.

ბოროტმა ძალამ გუშინდელ ამბავს ღონისძიება დაარქვა. სინამდვილეში, არც მეტი და არც ნაკლები „ნაციონალური მოძრაობის“ პოლიტიკური ქელეხი იყო, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

„რა მომავალი უნდა ჰქონდეთ, რომელთაც ჯერ კიდევ ვერ გაიაზრეს, ჩვენს ქვეყანას თავს რა უბედურება დაატეხეს. უფრო მეტიც, მათ ჩვენი ხალხისთვის ბოდიში არ მოუხდიათ და თავს დამნაშავედ არ გრძნობენ. ნაცვლად ამისა, იკრიბებიან, მასკარადს აწყობენ. რა ეზეიმებათ, ამ უბედურებს? მართლა მაინტერესებს, რას ზეიმობენ, როცა ქართველმა ხალხმა მათი მმართველობა შეაფასა როგორც ისტორიის სირცხვილი, მწამებლებისა და ქვეყნისთვის უბედურების მომტანი პოლიტიკური ძალა.

თავის დროზე, ეს ბოროტები ქვეყანას საკუთარი ხალხის წინააღმდეგ მოასხდნენ და ხალხის წამებითა და სახელმწიფოს ინტერესების დაზიანებით იყვნენ დაკავებული. გუშინ რაც ვნახეთ, ეს იყო „ნაციონალური მოძრაობის“ პოლიტიკური ქელეხი, რაც საბოლოოდ 2024 წლის არჩევნებზე დასრულდება“, – აღნიშნსა ღუდუშაურმა.

მისივე თქმით, „ნაციონალურ მოძრაობაში“ ახალ-ახალ თემებს იგონებენ, მოიგონეს ახლა მანიფესტი, მანამდე კი, ჰქონდათ მემორანდუმი.

„თვითკმაყოფილებას არიან მიცემული. მათ, რასაც პოლიტიკური ლიდერი დაუკვეთავთ, იმას სამარცხვინოდ აკეთებენ. რა მანიფესტმა უნდა გადაარჩინოთ? ეს ღიმილისმომგვრელია. ეს ადამიანები ქართველი ხალხისა და ქართული სახელმწიფოს ინტერესს აცდენილი არიან. მათ არანაირი პოლიტიკური მომავალი არ აქვთ, რადგან სახელმწიფოსა და ხალხის ინტერესებთან წინააღმდეგობაში არიან. ერთადერთი ის გადაარჩენთ, რომ ქუდი დაიხურონ და სახლში წავიდნენ“, – განაცხადა ალუდა ღუდუშაურმა.

„ნაციონალურ მოძრაობას“ გახლეჩისგან მხოლოდ ის გადაარჩენს, თუ სააკაშვილი პარტიის თავმჯდომარის პოსტს გააუქმებს, – ამის შესახებ ოპოზიციონერმა დეპუტატმა, ხატია დეკანოიძემ განაცხადა.

დეკანოიძის თქმით, „ნაციონალური მოძრაობა“ კონკრეტული პრობლემების გამო დატოვა და ეს პრობლემები არსად გამქრალა.

„სამწუხაროდ, გუშინ რაც მოვისმინე, თურმე „ვარდების რევოლუციის“ თარიღი მნიშვნელოვანი იმის გამო ყოფილა, რომ პარტიიდან რამდენიმე ადამიანი გაერიცხათ. ეს არის ძალიან სამწუხარო ფაქტი, რადგან ოპოზიციური პარტიები დემოკრატიისა და განსაკუთრებული კონტრასტის მაგალითს უნდა აჩვენებდნენ. პარტიიდან ადამიანების გარიცხვის მომენტი თუ მართლა დადგება, ეს იქნება „ნაციონალური მოძრაობისგან“ კიდევ ერთი სერიოზული პრობლემა. გარიცხვები „კომუნისტური პარტიიდან“ გვახსოვს, რაც დემოკრატიული თვალსაზრისით, პარტიისთვის დიდი პრობლემაა. ეს პარტია კონკრეტული პრობლემების გამო დავტოვე, რაც არსად გამქრალა. იმ პრობლემების ფონზე, ვერასდროს წარმომედგინა, რომ ერთობა ყოფილიყო. პარტიას გახლეჩისგან მხოლოდ ის გადაარჩენს, თუ მიხეილ სააკაშვილი მიიღებდა გადაწყვეტილებას, რომ თავმჯდომარის პოსტი გააუქმოს და რეალურად, შეიქმნას საბჭო, რომელიც გადაწყვეტილებებს პარიტეტის პრინციპზე მიიღებს და ეს გადაწყვეტილებები მიღებული იქნება დემოკრატიის კონტექსტში“, – განაცხადა ხატია დეკანოიძემ.

თუ ადამიანი არ აწერს ერთობის მანიფესტს ხელს და არ უერთდება მის სულისკვეთებას, ის თავად აღმოჩნდება პარტიის მიღმა. ეს არის ის რეალობა, რომელშიც დღეს ნიკა მელია აღმოჩნდა , – ამის შესახებ „ნაციონალური მოძრაობის“ ერთ-ერთმა ლიდერმა, თინა ბოკუჩავამ პარტიის მიერ გამოქვეყნებულ მანიფესტთან დაკავშირებით ჟურნალისტებს განუცხადა.

მან იმედი გამოთქვა, რომ აღნიშნულ საკითხზე პარტიის ის წევრები, რომლებიც მანიფესტს არ შეუერთდნენ, თავად გააკეთებენ განმარტებებს.

“სიმართლე გითხრათ, იურიდიული ტექნიკური დეტალებით ნამდვილად არ დავინტერესებულვარ, რადგან პარტიის დატოვება არის პოლიტიკური გადაწყვეტილება. პრეზიდენტი სააკაშვილი არის ჩვენთან ერთად ერთობის მანიფესტის ავტორი, თუმცა ის არის ინიციატორი და მისი ეს ინიციატივა ჩვენ გავიზიარეთ. მან ძალიან ცხადად განაცხადა, რომ თუ ადამიანი არ აწერს ერთობის მანიფესტს ხელს და არ უერთდება მის სულისკვეთებას, ის თავად აღმოჩნდება პარტიის მიღმა. ეს არის ის რეალობა, რომელშიც დღეს ნიკა მელია აღმოჩნდა. ძალიან ვწუხვარ, რომ მან ეს ბოლო შესაძლებლობა არ გამოიყენა იმისთვის, რომ გავერთიანდეთ იმ დიდი გამარჯვებისთვის, რომელიც უნდა მოვიპოვოთ. ალბათ, სხვებიც გააკეთებენ განმარტებებს, თუმცა, ნამდვილად მაქვს დიდი იმედი, რომ ადამიანები, რომელთა ერთადაც მხარდამხარ ვიბრძვით რუსული რეჟიმის წინააღმდეგ უკვე მრავალი წელია, “ერთიან ნაციონალურ მოძრაობაში” დარჩებიან და ჩვენ ერთად მოვიპოვებთ გამარჯვებას”, – განაცხადა ბოკუჩავამ.

მისი თქმით, წუხს იმის გამო, რომ ნიკა მელიამ ეს ბოლო შესაძლებლობა არ გამოიყენა.

„ისედაც ძალიან გაწელა მან პარტიის დატოვების გადაწყვეტილება. როგორც არაერთხელ განაცხადა პრეზიდენტმა სააკაშვილმა, ეს იყო ბოლო შესაძლებლობა, ბოლო შანსი და ძალიან ვწუხვარ, რომ მან ეს ბოლო შანსი არ გამოიყენა“, – განაცხადა ბოკუჩავამ.

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის მიხეილ სარჯველაძის განაცხადებით, „ნაციონალურ მოძრაობაში“ ყველამ კარგად იცის, რომ პარტიის დაშლა გარდაუვალია.

“რაც არ უნდა შეეცადოს „ნაციონალურმა მოძრაობამ“ ფორმა მისცეს ამ გარდაუვალ დაშლას, სადამდეც ეს ყველაფერი მიიყვანეს, ვფიქრობ, რეალურად ყველა ხვდება, რომ ეს არ არის ის მდგომარეობა, მანიფესტზე ვინ ხელს მოაწერს და ვინ არა, ამის მიხედვით მიიღება გადაწყვეტილება. ამის ილუზია არავის ჰქონდეს. ყველამ კარგად იცის იქ, რომ ამ პოლიტიკური პარტიის დაშლა გარდაუვალია“, – განაცხადა მიხეილ სარჯველაძემ.

„ნაციონალურმა მოძრაობამ“ პარტიისა და მიხეილ სააკაშვილის 23 ნოემბრის მანიფესტი გამოაქვეყნა.

დღეს იწყება აზერბაიჯანის რესპუბლიკაში საქართველოს პრემიერ-მინისტრის, ირაკლი ღარიბაშვილის ვიზიტი, რომლის ფარგლებში პრემიერ-მინისტრი მიიღებს მონაწილეობას SPECA-ს ეკონომიკურ ფორუმში, რომელსაც ასევე ესწრებიან შუა აზიის ქვეყნების ლიდერები, – ამის შესახებ აზერბაიჯანის რესპუბლიკაში  საქართველოს საგანგებო და სრულუფლებიანმა ელჩმა, ზურაბ პატარაძემ განაცხადა.

მისი თქმით, პრემიერ-მინისტრი აღნიშნულ ღონისძიებას უშუალოდ ილჰამ ალიევის მოპატიჟებით ესწრება.

„ვიზიტის ფარგლებში, პრემიერ-მინისტრი სიტყვით მიმართავს დამსწრე საზოგადოებას. ასევე გაიმართება ორმხრივი შეხვედრა აზერბაიჯანის რესპუბლიკის პრეზიდენტთან. შეხვედრისას განხილულ იქნება მთელი რიგი საკითხები, როგორც პოლიტიკურ ჭრილში, ასევე სავაჭრო-ეკონომიკური მიმართულებით, კულტურულ-ჰუმანიტარული საკითხებიც, მათ შორის, განსაკუთრებით აღსაღნიშნი არის მწვანე ენერგიის პროექტი და შავი ზღვის ფსკერზე ელექტრო კაბელის გაყვანის საკითხი, რაც ხელს შეუწყობს ენერგო უსაფრთხოებას, ენერგიის ექსპორტს ევროპის მიმართულებით, ასევე, რა თქმა უნდა, ლოჯისტიკური საკითხები, სატრანსპორტო დერეფანი, ამ მიმართულებით ახალი პროექტების წამოწყება. ერთ-ერთი მნიშვნელოვანი საკითხი არის ბაქო-თბილისი-ყარსის რკინიგზის პროექტის გაფართოება და დასრულება, რომელიც წელს დასრულდება. ეს და სხვა საკითხები იქნება განხილული ორმხრივი შეხვედრების დროს. ვფიქრობ, ეს ვიზიტი მისცემს დამატებით იმპულსს ჩვენს ქვეყნებს შორის ურთიერთობების გაღვივებასა და გაძლიერებაში“, – განაცხადა აზერბაიჯანის რესპუბლიკაში საქართველოს საგანგებო და სრულუფლებიანმა ელჩმა.