თბილისი ყოველთვის იყო საქართველოში პოლიტიკური ცვლილებების მამოძრავებელი ერთ-ერთი მთავარი ძალა და ასე იქნება ისევ 2024 წელსაც. ახლა არის ჩვენი დრო, ფეხზე დავდგეთ ერთად ჩვენი ქალაქისთვის და ჩვენი ქვეყნისთვის, – ამის შესახებ პარტია „ლელოს“ ერთ-ერთმა ლიდერმა, მამუკა ხაზარაძემ „ლელო“ თბილისის ორგანიზაციის დაფუძნების კონფერენციაზე სიტყვით გამოსვლისას განაცხადა.

მისივე თქმით, როდესაც ევროპა ვითარდება ახალ საუკუნეში, განიცდის პროგრესს და თანამედროვე მსოფლიოს გამოწვევებს პასუხობს, საქართველო ისევ საბჭოთა კავშირისკენ, წარსულისკენ, მიემართება.

ხაზარაძის თქმით, მომდევნო ოთხი კვირის განმავლობაში „ლელო“ ხალხთან მივა და ნათლად აუხსნის, რას გულისხმობს საქართველოსთვის ერთად დგომაში და ქვეყნისთვის ბრძოლაში.

პირველივე დღეებიდან ნათელი გახდა, რომ ოპოზიცია და მათი ლობისტები, ამ საკითხს განიხილავდნენ როგორც ინსტრუმენტს არა ევროკავშირთან საქართველოს დასაახლოებლად, არამედ საქართველოში რევოლუციის მოსაწყობად, – ამის შესახებ პარტია “ქართული ოცნების” თავმჯდომარემ, ირაკლი კობახიძემ, საქართველოსთვის კანდიდატის სტატუსის მინიჭების თემაზე საუბრისას განაცხადა.

მისი თქმით, რადიკალურმა ოპოზიციამ და არასამთავრობო სექტორის ნაწილმა რევოლუციის მოწყობა სცადა, რასაც კონკრეტული ევროპარლამენტარებიც უჭერდნენ მხარს, თუმცა, მათ საბოლოო მიზანს ვერ მიაღწიეს. “მაშინ მოეწყო ცნობილი ბაკურიანის შეკრება, სწორედ კანდიდატის სტატუსის არ მინიჭებას დაუკავშირეს მათ რევოლუციური გეგმები, რაც მათ სცადეს კიდეც. გახსოვთ, ივნისში, რადიკალურმა ოპოზიციამ “ენჯეოებთან” ერთად სცადა რევოლუციის მოწყობა, ოდიოზური ევროპარლამენტარები პირდაპირ მხარს უჭერდნენ რევოლუციურ გეგმას, ერთვებოდნენ ხოლმე შესაბამის მიტინგებზე.” – აღნიშნა ირაკლი კობახიძემ.

მისივე განმარტებით, ქვეყანაში და მის გარშემო მომხდარი ცვლილებების გამო, იმ ადამიანებმა, რომლებიც საქართველოსთვის კანდიდატის სტატუსის მინიჭებას ბლოკავდნენ, გააცნობიერეს, რომ ეს ნაბიჯი მომგებიანი აღარ იქნებოდა. “მათ ჰქონდათ ივნისისთვის გამზადებული რევოლუციური გეგმა, ასევე ამ წლის ბოლოსთვისაც ჰქონდათ გამზადებული რევოლუციური გეგმა, თუმცა, ბევრი რამ შეიცვალა ჩვენს ქვეყანაში, ბევრი რამ შეიცვალა ჩვენი ქვეყნის გარშემო და ასეთ ვითარებაში, იმ ადამიანებმა, რომლებიც ბლოკავდნენ ქვეყნისთვის კანდიდატის სტატუსის მინიჭებას, გააცნობიერეს, რომ მათთვის ახლა აღარ იქნებოდა მომგებიანი სტატუსის დაბლოკვა ჩვენი ქვეყნისთვის. საბოლოოდ, არ გამოუვიდათ იმ შედეგის მიღწევა, რომელიც მათი მხრიდან იყო დასახული, თორემ, რა თქმა უნდა, თითოეული ეს ნაბიჯი გათვლილი იყო იმაზე, რომ ბოლოს არ უნდა მოგვნიჭებოდა კანდიდატის სტატუსი და ამის საფუძველზე უნდა შემდგარიყო რევოლუცია.” – განაცხადა კობახიძემ.

რეალურად ოპოზიციური პარტიები უყურებენ რეიტინგებს და ეს რეიტინგები მათ არ აძლევს ოპტიმიზმის საფუძველს. თუმცა ისინი ფიქრობენ, რომ თუ ბარიერი იქნება დაწეული, „ნაცმოძრაობა“ და მისი სატელიტი პარტიები ერთობლიობაში მოახერხებენ დაახლოებით იმდენი პროცენტის მიღებას, რამდენსაც „ქართული ოცნება“ მიიღებს, – ამის შესახებ ირაკლი კობახიძემ „იმედის კვირასთან“ საუბრისას განაცხადა.

„ქართული ოცნების“ თავმჯდომარემ და საპარლამენტო უმრავლესობის ლიდერმა კიდევ ერთხელ აღნიშნა, რომ დაპირება ბარიერის დაწევის შესახებ 2022 წელს საქართველოსთვის კანდიდატის სტატუსის მონიჭებას უკავშირდებოდა.

მისივე თქმით, მეათე მოწვევის პარლამენტი მხოლოდ ფორმალურად არის მრავალპარტიული და მრავალფეროვანი, სინამდვილეში კი ოპოზიციური მანდატების უმეტესობა „კოლექტიურ „ნაცმოძრაობას“ აქვს, საარჩევნო ბარიერი კი ევროპის ქვეყნების უმეტესობაში მოქმედებს.

„ევროკავშირის წევრ ქვეყნებს რომ გადახედოთ, არის მხოლოდ და მხოლოდ 4 ქვეყანა, სადაც 3%-იანი ან უფრო დაბალი ბარიერი მოქმედებს. ეს არის ნიდერლანდები, დანია, ესპანეთი, იტალია. სხვა სახელმწიფოებში მოქმედებს 5%-იანი ან უფრო იშვიათად 4%-იანი ბარიერი. იმიტომ რომ პროგრესიული სისტემის პირობებში, რაღაცამ უნდა დააბალანსოს ის პრობლემა რასაც ჰქვია შესაძლო არასტაბილურობა პოლიტიკურ სისტემაში და მთავარი სტაბილიზატორი პროპორციულ სისტემებში არის სწორედ 5%-იანი საარჩევნო ბარიერი. ჩვენც გვჭირდება ეს სტაბილიზატორი. ჩვენ გვჭირდება სტაბილურობა დემოკრატიულ პროცესებში და სწორედ ამას ემსახურება ის 5%-იანი ბარიერი, რომელიც საქართველოს კონსტიტუციით არის დადგენილი“, – განაცხადა კობახიძემ.